Maake 14

Kaane wodwoŋi na ke tei o zuli Yezu to

Matiyu 26:1-16; Luka 22:1-6; Jɔn 11:45-53; 12:1-8

1Ko déem daare da yalei mo se Atɔgebabaŋa kuri dem yi. Ko maa ye Bworobworo-memene kuri dem, Juu tiina bam na yeini ba di bworobworo kolo na ba jege sabɔle to mo. Juu tiina kaanem yiga tiina bam de ba zamesem tiina bam maa kwaane ba lage chwoŋa se ba ke swa ba ma ja Yezu se ba go. 2Ba maa we, “Dé nam ba jege se dé ja‑o kuri dem maŋa ne, se ko wó ja bobɔga ko ba nɔɔna bam wone.”

3Yezu déem maa wo Bɛtania ne nɔɔno wodwoŋi sɔŋɔ ne. Nɔɔno wom yere mo Simon. Wonto déem ya ye nayɔŋɔ mo. Yezu maa wora o di wodiu ded‑o. Kaane wodwoŋi ma ba o tei. O maa jege kaboa ye ka su de terale nuga kalo sabu na daga to. Ba mɛ nuga kalo yere na ye ‘naade’ ye ka tiini ka lana to mo ba ke terale dem konto. O ma kwei kaboa kam o lɔ ye o daare o lwo nuga kam Yezu yuu ne se o ma ke‑o zula. 4Balo na tɔge ba wora to badwonna na nɛ konto to, ba maa ba jege wopwolo, ye ba tɛ daane ba we, “Bɛ mo ye o chɔge nuga kam konto? 5Dé ya wó wane dé yeigi-ka dé na sabu-fɔrɔ, nenɛɛne ywollu bia yatɔ tei, se dé ma woli yiniga tiina.” Ba ma tiini ba bwɛ kaane wom de o keim dem.

6Yezu ma ta de-ba o we, “Á nam yage‑o. Bɛ mo ye á jege‑o á daana? O na ke-ne zula tei to nam ye keim-laao mo o ke o pa-ne. 7Ko nam ná ye yiniga tiina, banto wó taa wora maŋa maama mo ye abam wae á ta‑á pa-ba zeinim. Ko daare amo bá taa wora de abam taa taa. 8Kaane wonto ke-ne nenɛɛne o na jege chwoŋa se o ke tei to. O na lwogi nuga kam amo yera ne tei to bere we o wuuri o kwɛ amo yera yam mo se ba laam kwei-ne ba suli. 9A tɛ abam chega ŋwaane to, ba na wó tɔɔle amo kwor-ywoŋa kam logo baŋa jei selo maama ne to, nɔɔna wó ta kaane wom konto taane se ba taa guli o gula.”

10Judas Yisakara laam ma zaŋe o nwoŋi. Wonto ye Yezu nɔɔna fuga-balei bam wo dedoa mo. O ma vo Juu tiina kaanem yiga tiina bam tei se o bere-ba chwoŋa se ba wane ba ja Yezu.#Jɔn 13:2 11Ba na nigi o na tage kolo to, ba wo ma pwoli dedɛ. Ba ma ke ni ded‑o we, ba wó pa‑o sabu. O laam maa kwaane o lage chwoŋa se o ja Yezu o ke ba jeŋa ne.

Yezu di kuri wodiu de o kwaga tɔgena bam

Matiyu 26:17-30; Luka 22:7-23; Jɔn 13:21-30; 1 Korinti 11:23-25

12Ko ma ba ko yi dɛ delo ba na bobo se ba di bworobworo kolo na ba jege sabɔle ko wone to. Dɛ dem konto ne Juu tiina bam yeini ba go pipeili mo ba di Atɔgebabaŋa kuri dem.#Nwoŋim 12:1–13:16 Yezu kwaga tɔgena bam ma vo ba bwei‑o ba we, “Nmo lage se dé vo jeiga kɔ mo se dé kwɛ woŋo maama dé pa nmo se dé di Atɔgebabaŋa kuri dem?”

13O ma le o kwaga tɔgena bam balei se ba vo ba nii, ye o ta de-ba o we, “Zaŋe-na á vo teo kom wo. Á ná yi da, nɔɔno wodwoŋi wó jeeri abam o na zeŋe kɔɔro de na. Tɔge-na o kwaga. 14O ná zo sɔŋɔ kolo, se á zo á ta de kotu we, ‘De Berem tu lage o bwei o nii, veira diga kalo omo na wó jeini da de o kwaga tɔgena bam se ba di Atɔgebabaŋa kuri dem wodiu to wo yei ne mo?’ 15Á ná bwei‑o konto, o laam wó bere abam wɛyuu diga. Ka wó taa daga lanyerane, ye ka jege woŋo kolo maama dé na lage to ka wone. Véi-na á kwɛ kuri dem wonnu tem á ti se dé laam ba.”

16O kwaga tɔgena balei bam laam ma zaŋe ba vo teo kom wo. Ba ma na woŋo maama ne Yezu na maŋe o ta tei to. Ba ma kwɛ Atɔgebabaŋa kuri dem wodiu kom ba ti.

17Tega ma ba ka yi. Yezu ma ba o zo diga kam, de o nɔɔna fuga-balei bam. 18Ba ma jeini se ba di wodiu kom. Ba na wora ba di to, Yezu laam ma ta o we, “A tɛ abam chega ŋwaane to, abam dedoa mo lage o yeigi amo o pa nɔɔna. Ko ye abam balo na tɔge á di de amo to dedoa mo.” 19Ba na nigi konto to, ko ma pa ba wo chɔge dedɛ. Ba maa bwei‑o ba saŋe daane we, “Ko nam dae amo mo n tɛ konto, se wɔ mo nam?”

20O ma leiri-ba o we, “Ko ye abam fuga-balei bam wo dedoa mo. Ko seene ko ye wolo na tɔge de amo o lu bworobworo zoŋa dedoa wone to mo. 21Ko nam jege se Nabiin-bu wom vo o te se ko maŋe de Wɛ tɔnɔ kom na maŋe ko bere o taane tei to mo. Ko nam wó taa ye lɛɛro mo ko pa nɔɔno wolo na wó yeigi Nabiin-bu wom o pa to. Ba ya ná wo loge nɔɔno wom konto, ko ya gara o tei ne.”

22Ba na wora ba di maŋa kalo to Yezu ma kwei bworobworo ye o ke Wɛ lei ko ŋwaane. O ma daare o fɔ-ko o pa o kwaga tɔgena bam ye o we, “Jwoŋi-na, se konto ye a yera yam mo.”#1 Korinti 11:23

23O daa ma kwei zoŋa de ka wo sa-soŋo, ye o ke Wɛ lei ko ŋwaane. O ma kwei o pa-ba, ye ba maama nyɔ. 24O maa we, “Banto mo ye a jana balo na bere we Wɛ ni-gwonim dem jege bu, ye ba jege se ba pwori se ko jwoŋi nɔɔna dedɛ ŋwea. 25A tɛ abam chega ŋwaane to, amo daa bá nyɔ sana banto dwoŋi se ko taa vei maŋa kam amo na wó jeini Wɛ woro kom wone se a laam nyɔ sa-doora dáane to.”

26Ba laam ma leeni ba zuli Wɛ, ye ba daare ba nwoŋi ba kɛ Olivi peo kom seeni.

Yezu wuuri o bere Piita na wó ve‑o tei to

Matiyu 26:31-35; Luka 22:31-34; Jɔn 13:36-38

27Yezu ma ta de-ba o we, “Abam maama wó jwoori amo kwaga ne, ne Wɛ tɔnɔ kom na maŋe ko bere tei we:

‘Amo Wɛ wó chɔge nayero wom,

pa se o pei sem maama jage.’#Zekaria 13:7

28Ko daare, Wɛ ná jwoori o bi-ne, amo wó lwoori abam a vo Galili.”

29Yezu na tage konto to, Piita ma ta o we, “Nɔɔna maama ná maŋe ba jwoori nmo kwaga ne, amo bá fɔge a ke konto.” 30Yezu ma leiri‑o o we, “A tɛ nmo chega ŋwaane to, zem tete dento ye chebɛɔ ta ná wo keeri kuni belei, nmo wó fo kuni betɔ we n yeiri amo.”

31Piita laam ma fɔge o ta de baare o we, “Amo bere a bá fo we a yeiri nmo, ko ná maŋe ko ye ba ná lage ba go amo de nmo maama de.” Ba maama de ma ta konto dwoŋi.

Yezu tiini o lwoori o Kwo Wɛ

Matiyu 26:36-46; Luka 22:39-46

32Ba laam ma zaŋe ba vo jei sedwoŋi gaare na wora ye ba bwoi-se we Gɛsemane to. Yezu ma ta de o kwaga tɔgena bam o we, “Ta‑á jei-na ywo se a vo a ware Wɛ.” 33O ma pa Piita de Jemsi de Jɔn tɔge‑o ba vo. O wo ma chɔge dedɛ ye o yera sɔɔre. 34O ma ta de-ba o we, “Amo wo mo tiini ko chɔge se ko yi a toone. Á nam zege ywo á ta‑á nia.”

35O laam ma fofɔ o vo dáa. O ma vwi o yibia tega ne o wora o lwoori Wɛ we, o ná sɛ, o nam pa se yaara maŋa kam kɛ ka daare‑o. 36O ma lwoori Wɛ o we, “Amo Kwo, Baba, nmo wae woŋo maama n ke. Nam pa cham delo na lage de ba amo baŋa ne to kɛ de daare-ne. Nam ke kolo na tɔge nmo boboŋa to, ye ko dae amo boboŋa na lage kolo to.”

37O na ti to, o ma jwoori o vo o tɔgena batɔ bam tei. O ma na we ba tigi ba dɔa. O ma ta de Piita o we, “Simon, n tigi n dɔ mo na? Bɛ mo ye n ware n ta‑n nia se ko maŋe de awa dedoa yerane? 38Fɔge-na á che á tete se á ta‑á lwoori Wɛ, se á yé na cham delo na wó soge á boboŋa to. Á boboŋa lage se ya sɛ Wɛ ye á yera laam bwona.”

39O ma jwoori o yage-ba, ye o vo o lwoori Wɛ, ne o ya na maŋe o ta kolo to. 40O daa ma jwoori o vo o na de ba ta dɔa, dɔɔm na tiini de wae-ba to ŋwaane. Ba maa yeiri ba daa na wó ta kolo ba bere‑o to. 41O daa ma vo o lwoori Wɛ o ke kuni betɔ ye o jwoori ba tei. O laam ma ta de-ba o we, “Á ta tigi á dɔa mo na? Ko maŋe. Nii-na! Maŋa kam yia se ba ja Nabiin-bu wom ba ke nɔn-chechɔgero jea ne. 42Zaŋe-na se dé vo. Nɔɔno wolo na lage o yeigi-ne o pa to maa beena.”

Ba jaane Yezu

Matiyu 26:47-56; Luka 22:47-53; Jɔn 18:3-11

43Yezu ta na wora o ŋɔɔne konto to, Judas wolo na ye o nɔɔna fuga-balei bam wo dedoa to laam ma ba o yi. Nɔn-kɔgɔ ma tɔge ded‑o ko ba, ye ba zei se-zɔɔro de da-lwanno. Ko maa ye Juu tiina kaanem yiga tiina bam, de ba zamesem tiina bam, de ba nakwa bam mo toŋe-ba. 44Judas ya maŋe o pa kɔgɔ kom maanem se ba ma ja Yezu ye o we, “Amo ná vei a kukwori nɔɔno wolo, se á vo á ja konto tu ye á fɔge á che‑o á ja viiri.”

45O laam ma yɔɔre o vo o yi Yezu tei ye o we, “Berem tu.” O ma daare o kukwori‑o lanyerane. 46Nɔɔna bam laam ma ba ba zi Yezu ba ja lanyerane. 47Nɔɔna balo na tɔge ba wo Yezu tei ne to dedoa ma le o seo o ma zage kaanem yuu tu wom tontoŋeno zwɛ o de tega ne. 48Yezu laam ma bwei kɔgɔ kom o we, “Abam na kwei seene de da-lwanno á ba se á ja amo to, amo ye ŋweeno mo na? 49Dɛ maama amo yeini a wo abam tei ne mo ye a bere nɔɔna Wɛ diga kam ne. Abam nam maa wo jaane-ne. Ko nam jege se ko ke tento dwoŋi se ko pa kolo na maŋe ko popone Wɛ tɔnɔ kom ne to ji chega.”

50O nɔɔna bam maama na nigi konto to, ba ma duri ba viiri ba daare‑o.

51Nɔn-doŋo kodwoŋi maa wora, o na tɔge Yezu. O ma zo gare-jale yerane. Ba ma kwaane se ba ja‑o. 52O ma vere o tete o daare o gɔrɔ kom o yage, ye o duri o viiri kalambwolo.

Ba ŋɔɔne Yezu taane

Matiyu 26:57-68; Luka 22:54-55, 63-71; Jɔn 18:12-14, 19-24

53Ba ma ja Yezu ba vo kaanem yuu tu wom sɔŋɔ. Juu tiina kaanem yiga tiina bam de ba zamesem tiina de ba teo kom nakwa bam maama ma gilimi jeiga kam ne. 54Piita ma dale o tɔge ba kwaga o da o vo o yi kaanem yuu tu wom sɔŋɔ. O ma zo konkɔlɔ kom o vo o jeini de sɔŋɔ kom tontoŋena bam ye o tɔge o weeri mini.

55Juu tiina kaanem yiga tiina bam de ba nakwa kɔgɔ kom maama maa kwaane se ba lɔre chwoŋa kalo ba na wó da ba ma saŋe Yezu se ba laam pa o te to. Ba ma kwaane taa ba ga. 56Nɔɔna dedɛ ma zaŋe ba fɔ vwa ba pa‑o, ye ba na tage kolo to maama wo sɛ woŋo dedoa. 57Ko kwaga seeni nɔɔna badaara ma zaŋe wɛɛne ye ba fɔ vwa ba pa Yezu ba we, 58“Dé nigi nɔɔno wonto na tage o we, ‘Ko ná ye Wɛ diga kanto nabiina na lɔge-ka to, amo wó yigi-ka a de tega ne, ye a jwoori a ma da yatɔ a lɔ kadwoŋi ye kanto dae nabiina mo wó lɔ-ka.’ ”#Jɔn 2:18-22 59Nɔɔna bam na maŋe ba ta konto to, ba daa ta wo wane ba sɛ woŋo dedoa.

60Kaanem yuu tu wom laam ma zaŋe ba maama tetare ne, ye o bwei Yezu o we, “Nɔɔna banto balei na tage kolo ba pa nmo to, nmo ba jege taane se n leiri na?” 61Yezu ma chem ye o wo leiri kolokolo. Kaanem yuu tu wom ma jwoori o bwei‑o o we, “Nmo ye Wɛ Dam Tu Krista na ye Nenɔŋa Tu Baŋa Wɛ Bu mo na?” 62Yezu ma leiri o we, “Ɛɛ, amo mo konto. Nam ta‑á yei-na we, á wó ba á na Nabiin-bu wom na jei Dam-fɔrɔ Tu Baŋa Wɛ jazem seeni, ye á ta daare á na‑o o na nwoŋi Wɛ telaao ne o maa beene de kunkwonnu.”#Danyeli 7:13

63Kaanem yuu tu wom na nigi konto to, o ma zaŋe o kaare o tete gwaaro se ko bere we o wo chɔge de Yezu taane dem. O ma ta o we, “Dé daa ba lage se nɔɔna zaŋe ba ŋɔɔne o taane. 64Abam maama maŋe á ni o na ŋɔɔne Wɛ o chɔge de o na pa se o ma de Wɛ to. Konto to, abam we bɛ mo?” Ba maama ma sɛ we o maŋe se o te mo. 65Nɔɔna badaara ma twe lileeru ba yage o yera ne. Ba ma kwei gɔrɔ ba pu o yia ye ba daare ba mage‑o. Ba maa we, “Lɔre n bere debam wolo na mage‑m to.”

Soja tiina bam ma ja‑o ye ba jege‑o ba maga.

Piita seene o ve Yezu kuni betɔ

Matiyu 26:69-75; Luka 22:56-62; Jɔn 18:15-18, 25-27

66Piita ya daa ta tɔge o jei konkɔlɔ kom ne. Kaanem yuu tu wom sɔŋɔ ka-nyaane ma tɔge da o maa kɛa. 67O ma na Piita na jei o weeri mini. O ma fɔge o nii‑o lanyerane, ye o we, “Nmo de tɔge de Nazarete tu Yezu mo.” 68O ma fo o we, “Amo yeiri woŋo kolo n na tɛ to. A ba ni ko kuri.”

O ma zaŋe o nwoŋi o vo manchwoŋo ni. Chebɛɔ ma pɔpɔ ko keeri. 69Ka-nyaane wom daa ma na‑o. O daa ta ma ta de nɔɔna balo na zege da to o we, “Nɔɔno wonto tɔge o ye ba kɔgɔ kom wo dedoa mo.” 70O daa ma fo we o dae.

Ko na ke fee to, nɔɔna balo na zege da to ma ta de Piita ba we, “Nmo seene n ye ba wo dedoa. Nmo de ye Galili tu mo.” 71O laam ma sɔɔle o pa o tete se ko bere o chega ye o we, “Amo bere a yeiri nɔɔno wolo á na tɛ o taane to.”

72O na tage konto to, chebɛɔ laam ma pɔpɔ ko keeri ko ke kuni belei. Piita laam ma guli Yezu ya na tage kolo ded‑o o we, “Chebɛɔ ta ná wo keeri kuni belei, nmo wó fo kuni betɔ we n yeiri amo.” O na guli konto to, o wo ma tiini ko chɔge dedɛ ye o keeri lanyerane.

Currently Selected:

Maake 14: KBG

Highlight

Copy