Maake 12

Nɔɔno de o gaare memaŋe

Matiyu 21:33-46; Luka 20:9-19

1Yezu daa ta ma maŋe memaŋe de-ba o we, “Nɔɔno wodwoŋi mo wora. O ma zaŋe o che gaare, ye o daare o jeiri Vini teeni de wone.#Izaya 5:1-7 O ma daare o ko gwoŋo te-dɛa jei ne se o ná gwori teeni bia bam, se o ke da o nɔ o ŋoke te nyoa bam. O ma daare o chwi da-pala se nɔɔno taa jei da o yere gaare dem. O na fɔge o che-de konto to, o laam ma kwei nɔɔna o yage da se ba taa toŋa, ye o daare o beeri o vo teo kodwoŋi. 2Tio-bia bam gworim maŋa ma yi. O ma toŋe o tontoŋeno se o vo vala bam tei se ba pɔɔre tio-bia bam ba pa‑o. 3Tontoŋeno wom na yi ba tei to, ba ma zi‑o ba mage. Ba ma daare ba pa o viiri de je-yaara. 4Nɔɔno wom daa ma toŋe o tontoŋeno wodwoŋi. O na yi ba tei to, ba ma mage o yuu ba kaare ye ba twe‑o dedɛ. 5O daa ta ma toŋe o tontoŋeno wodwoŋi o woli da. Wonto na yi ba tei to, ba ma mage‑o ba go. Nɔɔno wom ma jwoori o toŋe o nɔɔna dedɛ. Vala bam ma mage ba badwonna. Ba ma go badwonna.

6Ko na ti to, ko daare nɔɔno dedoa yerane mo. Wonto ye o bu mo. O maa jege o swono dedɛ. O ma toŋe‑o ba tei ne o kweeli, ye o boŋe we, ba wó nege wonto. 7Vala bam nam na nɛ‑o to, ba ma bane daane ba we, ‘Mo gaare dem tu bu-kwea kam, ye wonto mo lage o ba o taa tei o kwo wom wonnu. Nam pa-na se dé go‑o, se dé daare dé taa tei o wonnu tem.’ 8Ba laam ma ja‑o ba go, ye ba vaŋe‑o ba ja nwoŋi gaare dem ne ba yage.

9Tɔ. Gaare dem tu wom laam wó ke vala bam konto bɛ mo? O jege se o ba o go-ba, se o daare gaare dem o kwei o pa nɔɔna badwonna se ba taa nii-de. 10Ko popone Wɛ tɔnɔ kom ne we:

‘Kandwɛ delo lɔra na ve to

laam mo jwoori de ba de ji kandwɛ delo na pae diga kam dana to.

11Konto ye Baŋa Wɛ keim mo.

Ko maa ye wo-kenkagele ko pa debam.’#Lei 118:22-23

Abam nam maŋe á wo gage konto na?”

12Juu tiina yiga tiina bam na nigi konto to, ba ma lɔre we o maŋe memaŋe dem banto ŋwaane mo. Konto to, ba ma kwaane ba lage chwoŋa se ba ja‑o. Ba ma ware, ba na kɔre foone de nɔn-kɔgɔ kom to ŋwaane. Ba ma yage‑o ye ba daare ba viiri.

Lampwoo ŋweem

Matiyu 22:15-22; Luka 20:20-26

13Juu tiina bam déem ma le Farisi tiina badwonna de Pɛ Herodi kwaga nɔɔna badwonna se ba vo Yezu tei. Ba maa lage se ba pa o ŋɔɔne o tusi se ba wane ba ja‑o. 14Ba ma yi o tei ye ba ta ded‑o ba we, “Berem tu, dé yei we nmo ye chega tu mo. Nmo yiga tera de nɔɔna na boŋe kolo ba pa nmo to, ye n ta ba pɔɔre nɔɔna daane de n na ke-ba tei to. Nmo nam yeini n bere nɔɔna Wɛ chwoŋa chekke. Dé lage dé bwei dé nii, debam Juu tiina ná ŋwe lampwoo dé pa logo kom Pa-faro wom, ko chɔge debam chullu na? Dé wó ŋwe naa dé bá ŋwe?”

15Yezu maŋe o yei ba na ye pipiri-nyena tei to. O ma ta de-ba o we, “Bɛ nam mo ye á lage se á ja-ne? Nam bere-ne sabu-dale se a nii.” 16Ba ma le sabu-dale dem ba bere‑o. O ma nii ye o bwei-ba o we, “Wɔ nyenyego de o yere mo ba sare ba yage de baŋa ne?” Ba ma leiri‑o ba we, “Ko ye Pa-faro wom mo.” 17Yezu laam ma ta de-ba o we, “Ko lamma. Á nam ta‑á ŋwe kolo na ye Pa-faro wom nyem to á pa‑o, se á daare á ta‑á pae Wɛ kolo de na ye o nyem to.”

O na leiri-ba konto to, ko ma so-ba dedɛ.

Wɛ telaao ŋwea na wó taa ye tei to

Matiyu 22:23-33; Luka 20:27-40

18Saduka tiina badwonna déem ma zaŋe ba vo Yezu tei. Banto mo bere we, nɔɔno ná tega, o daa bá jwoori o bi. 19Ba ma vo ba ta de Yezu ba we, “Berem tu, Moses déem na popone kolo o tiŋi o pa debam to, o bere we, nɔɔno zembaaro ná tega ye o daare kaane, ba ná wo loge bia, too wom nyaane mo jege se o di kaane wom se ba wane ba lo bia zembaaro wom ŋwaane. 20Tɔ. Nu-bia barepɛ ya mo wora. Ba nakwe wom ma di kaane. Kaane wom ma te o daare‑o ye o wo loge bu. 21Wolo na saŋe to laam ma di kadeim dem. O de ma te o daare kaane wom ye bu tera. Ko ma ke batɔ tu wom bedwe mo. 22Ba maama barepɛ di kaane wom, ye ba wo loge bia. Ba maama na tege to, kaane wom de laam ma te. 23Ba maama barepɛ na di kaane wom to, ba laam ná tu ba bi toone wone, banto wɔ mo wó taa tei kaane wom?”

24Yezu ma leiri-ba o we, “Abam tiini á tusi mo. Abam maŋe á wo lɔre Wɛ tɔn-dwoŋo kom berem dem, ye á ta yeiri Wɛ dam dem na ye tei to. Ko dae konto na? 25Nɔɔna ná tu ba bi toone wone, banto lage ba taa nye de Wɛ malese sem na ye tei to mo, ye ba ba di kaana, naa ba zo banna de. 26Ko nam ná ye twa na wó bi toone wone tei to, Moses na popone kolo o tiŋi to bere we nɔɔna wó seene ba bi. Abam maŋe á wo gage kolo Wɛ na tage de Moses o na veere o tete sabare wone maŋa kalo to na? Wɛ déem tage de Moses o we, ‘Amo ye Abaraham Wɛ, de Izaak Wɛ, de Jakob Wɛ mo.’#Nwoŋim 3:6 27Ko bere we banto daa ta jege ŋwea mo o tei ne, kolo ŋwaane Baŋa Wɛ ye ŋwea tiina nyem mo se o dae twa nyem. Mo kokuri, á tiini á tusi de á na boŋe tei to.”

Wɛ nia yam wone dɔ mo dana de dwoi maama?

Matiyu 22:34-40

28Ba na wora ba ŋɔɔne daane konto to, Wɛ nia yam zamesem tu wodwoŋi ma ba ba tei. O ma ni ba taane dem. O ma lɔre we Yezu tiini o kwaane de o na leiri Saduka tiina bam tei to. O laam ma bwei Yezu o we, “Wɛ nia yam maama wone dɔ mo dana de dwoi?” 29Yezu ma leiri‑o o we, “Wɛ ni delo na ye wo-chɛɔ de dwoi maama to mo tento: ‘Isarele tiina bam, cheigi-na. Dé Yuu-tu Baŋa Wɛ ye debam Teiru, ko ye wonto yerane. 30Ta‑n swoi n tu Baŋa Wɛ wom de n bochare maama, de n wo maama, de n boboŋa maama, de n dam maama.’#Nia Gulim 6:4-5 31Wɛ ni delo na saŋe to mo tento: ‘Ta‑n swoi n dwoŋi se ko maŋe de n na swoi n tete tei to.’ Wɛ ni dedwoŋi daa tera de na dana de dwoi nia yalei yam konto.”#Chullu 19:18

32Wɛ nia yam zamesem tu wom ma ta de Yezu o we, “Berem tu, n tage chega. Nmo na tage we Wɛ dedoa yerane mo wora ye o dwoŋi tera to, ko ye chega mo. 33Ko maŋe se dé taa swoi‑o de dé wo maama, de dé boboŋa maama, de dé dam maama, ye dé daare dé taa swoi dé dwonna se ko maŋe de dé tete. Dé ná ke konto, ko bere we dé ke lanyerane ko dwoni dé ná ke zwɛɛm kaanem naa kaanem dwi delo maama dé pa Wɛ.”

34Yezu ma lɔre we o leiri taane dem de boboŋ-dɛɛra. O laam ma ta ded‑o o we, “Ko daare fenfee yerane se n zo Wɛ paare dem wone.”

Ko maa zege maŋa kam konto ne nɔɔna maama maa kɔre se ba daa bwei‑o taane.

Yezu bere nɔɔna Wɛ diga kam wone

Matiyu 22:4-46; 23:1-36; Luka 20:41-47; 21:1-4

35Yezu déem maa wo Wɛ diga kam konkɔlɔ kom ne o bere nɔɔna, ye o ta o we, “Wɛ ni-dwoora zamesem tiina bam yeini ba bere we, Wɛ Dam Tu Krista ye Pɛ David dwi tu mo. Ko nam wó wane ko taa ye konto na? 36Wɛ Sin-laao kom nam pɛ se David tete ta o we,

‘Yuu-tu Baŋa Wɛ tage de amo Teiru wom o we:

Ba n jeini amo jazem seeni

se a laam wane nmo dona bam maama

a ke nmo dam kuri ne se n ta‑n tei-ba.’#Lei 110:1

37David tete na seene o bwoŋi Wɛ Dam Tu wom we, o Teiru to, dé nam wó ke tɛ mo ye dé daa ta bwoi‑o we David dwi tu?”

Yezu na bere Wɛ chega kam tei to ma pa se nɔn-kɔgɔ kolo na jei ba cheigi to wo pwoli dedɛ.

38O daa ta ma bere-ba o we, “Ta‑á cho-na á tete de Wɛ nia zamesem tiina bam. Banto swoi se ba zo gare-dedwaaro se ba taa beera ye nɔɔna nii-ba. Ba ná vei yaga, ba lage se nɔɔna maama taa tui ba zuli-ba. 39Ba ná yeini ba zo ba jeerim di sem, ba wó taa lage jei-kamunu mo se ba jeini yiga ne. Ba ná vei nɔɔno sɔŋɔ se ba di kuri, ko ye jei-laao jeiga ne mo ba lage se ba jeini da. 40Ba maa yeini ba gane kadeina ba jwoŋi wonnu ba tei ne. Ba maa bere ba tete de ba na tiini ba ware Wɛ tei to. Konto ŋwaane Wɛ wó tiini o waare-ba dedɛ.”

41Yezu ma vo o jeini tega ne Wɛ diga kam wone, jeiga kalo Wɛ pɛɛra dakaa kam na wora to. O maa jei o nii nɔɔna bam na vei ba de ba sabia ka wone tei to. Naduna dedɛ ma ba ba de sabu-fɔrɔ ba yage da. 42Kadeim wodwoŋi laam ma tɔge da, o na ye yiniga tu. O ma ja sabu-dala-balɛ selei o vo o de da. Ko maa ye sabu fenfee yerane mo. 43Yezu na nɛ to, o ma bwoŋi o kwaga tɔgena bam se ba ba o tei, ye o ta o we, “A tɛ abam chega ŋwaane to, kadeim wonto de sabu ko dwoi nɔɔna balo maama na de da to. 44Banto maama le ba sabu-daara wone mo ba pa Wɛ. Kadeim wom nam na ye yiniga tu to, o ma kwei woŋo kolo maama o na jege se o ma yeigi o ni-wodiu to o de da.”#Luka 21:1-4

Currently Selected:

Maake 12: KBG

Highlight

Copy