Maake 1

Jɔn pɛ nɔɔna sɛɛm ye o bere-ba

Matiyu 3:1-12; Luka 3:1-17; Jɔn 1:19-28

1Kwor-ywoŋa kalo na vei Wɛ Bu Yezu Krista seeni to mo tento. 2Ko na puli tei to tɔge Wɛ sampwora Izaya na maŋe o popone kolo faŋa faŋa ye o tɔɔle Wɛ kwora o we:

“Nii, amo Wɛ lage a toŋe a tontoŋeno mo,

se o da nmo yiga o vo o kwɛ

chwoŋa kalo nmo na wó tɔge da to.”#Malaki 3:1

3“Nɔɔno mo wo kagoa yuu ne

o kaase o kwora ye o we,

‘Zaŋe-na á fɔge á kwɛ dé Teiru wom chwoŋa kam

o na lage o ba o tɔge da to.

Pa-na se chwei selo o na lage o tɔge to fɔge se yɔɔre lanyerane.’ ”#Izaya 40:3

4Ko déem seene ko ke konto dwoŋi mo. Nɔɔno wodwoŋi déem mo wora, o yere mo Jɔn. O maa wo kagoa ne ye o pa nɔɔna sɛɛm Wɛ ŋwaane. O maa yeini o tɔɔle Wɛ kwora o bere nɔɔna we, ba jege se ba leiri ba wo Wɛ ŋwaane se ba daare ba jwoŋi sɛɛm, se Wɛ laam wó yage ba wɛleera o ma chɛ-ba. 5Nɔɔna dedɛ maa yeini ba nwoŋi Judea nawuura yam maama de Jerusalem ba vei o tei. Ba na tui o tei to, ba maa tɛ jaja ba na ke ba tusi tei to. O laam maa pae se ba zoore Jɔdan buga kam wone ye ba jwoŋi sɛɛm Wɛ ŋwaane.

6Jɔn déem maa zoore gɔrɔ kolo ba na sɔge de kone koro to mo. O maa mae tankila o ja o teiŋa. O wodiu mo ye kayere de tooro. 7O maa tɔɔle o bere nɔɔna o we, “Nɔɔno wodwoŋi wó saŋe amo kwaga o ba, ye wonto tiini o dwoi amo. Amo wo maŋe se a tiiri a le o nɛ natera a pa‑o. 8Amo ná yeini a pa abam sɛɛm, ko ye na mo a mae a ke. Wonto nam ná lage o pa abam jwoŋi sɛɛm, ko wó taa ye Wɛ Sin-laao kom mo o wó pa á jwoŋi.”

Yezu Krista jwoŋi sɛɛm

Matiyu 3:13–4:11; Luka 3:21-22; 4:1-13

9Maŋa kam konto ne, Yezu déem ma zaŋe Galili teo kodwoŋi ne, ko yere mo Nazarete. O ma vo o yi Jɔn tei. Jɔn ma pa o zo Jɔdan buga kam wo ye o daare o pa‑o sɛɛm. 10Yezu na maa nwoŋi na bam wone to, o ma na wɛyuu na pɔɔre belei, ye o na Wɛ Sin-laao kom na nwoŋi da ko maa beene o baŋa, ko na nye de kunkwoŋa tei.#Izaya 11:2-3 11O ma ni Wɛ kwora na ŋɔɔne telaao ne ka we:

“Nmo mo ye amo bu-doa a na jege n swono to.

N kikia su amo yi.”

12Konto na ke bedwe baŋa ne to, Wɛ Sin-laao kom ma ja‑o ko zo kagoa yuu ne. 13O maa wo kagoa kam wone taa, da finna. O na wora to, setaana pɛ maa kwaane o maŋe‑o o nii. O maa zoore de kago-vara, ye Wɛ malese de tui o tei se zeini‑o.

Yezu bwoŋi nɔɔna bana se ba taa tɔge‑o

Matiyu 4:12-22; Luka 4:14-15; 5:1-11

14Ba déem ma ja Jɔn ba ke peena diga ne. Konto kwaga ne, Yezu ma jwoori o vo Galili. O maa wora o tɔɔle Wɛ kwor-ywoŋa kam o bere nɔɔna, 15ye o we, “Maŋa kam laam yia Wɛ paare dem na lage de ba o nɔɔna baŋa ne to. Konto ŋwaane, leiri-na á wo de á wɛleera yam se á daare á sɛ Wɛ kwor-ywoŋa kam.”

16Yezu déem maa wo Galili naneo kom ni ne o via. O ma na nɔɔna balei, ba na ye chorro to. Ba dedoa yere mo Simon. O nyaane yere mo Anduru. Ba ye ywon-jara mo. Ba maa wo na bam wone ba dole chworu se ba ja ywona. 17Yezu ma ta de-ba o we, “Zaŋe-na á ba á ta‑á tɔge amo. Amo wó pa se á ta‑á lage nɔɔna mo se ba ba ba da amo kwaga, se ko taa nye de á zem na jaane ywona tei to.” 18O na tage konto to, ba ma zaŋe lela ba yage ba chworu tem ye ba vo ba tɔge o kwaga.

19O ma vo yiga fee. O daa ma na nɔɔna balei. Ba dedoa yere mo Jemsi. O nyaane de maa wora, o yere mo Jɔn. Ba kwo yere mo Zebedi. Ba maa wo nabworo wone ba kwɛ ba chworu se ba ma ja ywona. 20O laam ma yɔɔre o bwoŋi-ba. O na bwoŋi-ba konto to, ba ma zaŋe ba yage ba kwo wom de o tontoŋena bam nabworo kom wone ye ba vo ba tɔge‑o.

Yezu zeili chichira nɔɔno tei ne

Matiyu 8:14-17; Luka 4:31-44

21Ba ma tɔge daane ba vo ba zo teo kodwoŋi wo, ko yere mo Kaparenia. Juu tiina siu dɛ dedoa na yi to, Yezu ma vo o zo ba jeerim diga kam se o bere-ba. 22O na bere-ba tei to, nɔɔna balo na wora to maa tiini ba ye yaau de o berem dem. Ko pɛ se ba lɔre we, o jege dam ko dwoi ba tete zamesem tiina bam.

23Nɔɔno déem maa wo ba jeerim diga kam ne ye chichira daane‑o. O ma zaŋe lela ye o kaase o we, 24“Yezu, Nazarete tu, bɛ mo n lage debam tei ne? Nmo tu se n chɔge debam dwi mo na? A yei nmo na ye wolo. Nmo ye Wo-pwoŋo Tu wolo Wɛ na toŋe to mo.” 25Yezu ma bwɛ chichira kam o we, “Cheigi sɔɔ, se n yage o yera se n viiri.” 26O na tage konto to, chichira kam ma tiini ka ja nɔɔno wom ka su ye ka kaase de kwor-dɛa. Ka laam ma yage nɔɔno wom yera ka daare‑o.

27Nɔɔna bam na nɛ konto to, ko ma so ba maama lanyerane ye ba bwei daane ba we, “Bɛ mo konto? O bere che-doŋa mo ye o berem dem jege dam chekke. Nii o na tɛ chichiri we se viiri, ye se sɛ o ni.”

28Nɔɔna balo maama na zoore Galili jei sem ne to déem ma ni Yezu ŋwa lela.

29Yezu de o nɔɔna bam ma nwoŋi jeerim diga kam ne ba kɛ. Ba tɔge de Jemsi de Jɔn ba vo ba yi Simon de Anduru ba sɔŋɔ. 30Simon tenkaane maa tigi tega ne ye paa jege‑o. Ba ma ta ba bere Yezu ko na ke‑o tei to. 31O ma vo kaane wom tei o ja o jeŋa pa se o zaŋe o jeini. Paa kam ma yage‑o. O ma zaŋe o ke wodiu o pa-ba.

32Wɛ na zo ye tega daare se ka yi to, nɔɔna maa jaane balo maama na ye jaweena to de setaana na daane balo maama to ba tui Yezu tei. 33Teo kom nɔɔna bam maama ma vo ba tigisi Simon ba sɔŋɔ manchwoŋo ni ne. 34Yezu ma yɔɔre nɔɔna dedɛ de ba jaweero dwi dwi, ye o daare o zeili setaana dedɛ nɔɔna tei ne. O maa wo sɛ se setaana yam ŋɔɔne kolokolo, ya na maŋe ya yei o na ye wolo to ŋwaane.

35Tega na poore tetete ye wɛ daa ta wo puli to, Yezu ma zaŋe o nwoŋi o vo jei selo nɔɔn-nɔɔno na tera to. O ma vo o ware Wɛ o yera ne. 36Simon de o yuudwonna bam laam ma zaŋe ba nwoŋi se ba lage o jei. 37Ba na nɛ‑o to, ba ma ta ded‑o ba we, “Nɔɔna bam maama beeri nmo jei.” 38Yezu ma leiri-ba o we, “Zaŋe-na se dé kɛ dé vo jei sedwonna. Amo jege se a vo te-balwa balo na wo ywoba seeni to se a tɔɔle Wɛ kwora kam. Ko ye konto ŋwaane mo a nwoŋi se a taa toŋa.”

39O laam ma beeri o tɔge Galili wo maama. O maa yeini o zoore Juu tiina jeerim di sem. O maa bere nɔɔna Wɛ chega kam ye o zeili setaana nɔɔna tei ne.

Yezu yɔɔre nayɔŋɔ

Matiyu 8:1-4; Luka 5:12-16

40Nɔɔno wodwoŋi déem mo wora, o na ye nayɔŋɔ. O ma zaŋe o vo Yezu tei o kuni dwoona o yiga ne o lwoori‑o o we, “Nmo ná laga, n wó wane n pa se a na yazura.” 41O ŋwaŋa ma zo Yezu. Yezu de ma twe o jeŋa o dwei‑o, ye o we, “A lage konto. Zaŋe de yazura.” 42O na tage konto bedwe baŋa ne to mo jaweo kom yage nɔɔno wom ye o yera yam kwɛ fase.

43Yezu ma ta‑o se o viiri lela ye o daare o kaane‑o o we, 44“Yé zaŋe n ta kolo na ke to n bere nɔɔn-nɔɔno. Nam yɔɔre n vo Wɛ kaanem tu wom tei se n pa o nii n yera yam, se n daare n kwei wonnu telo Moses nia yam na bere we te maŋe to n ma n kaane Wɛ. Konto wó bere nɔɔna we n jaweo kom seene ko jei.”#Chullu 14:2-32 45Yezu na tage konto to, nɔɔno wom ma nwoŋi o kare o ŋɔɔne kolo na ke to, pa se nɔɔna maama lɔre ko ni ne. Konto ŋwaane Yezu daa ware o zo teo de teo wo ye o wo seigi o tete. O ma lɛɛre o maŋe gaao wone nɔɔna na tera mɛ to. Nɔɔna maa yeini ba nwoŋa jei maama ba vei o tei.

Currently Selected:

Maake 1: xsmKBG

Highlight

Copy