Mika 1

1 Baŋa Wɛ na ŋɔɔne taane delo o bere Mika, o na nwoŋi Moresɛf teo to mo tento. Ko maa ye maŋa kalo Jotam, de Ahaz, de Hezekia déem na saŋe daane ba ye pwa Judah teo kom ne to.#2 Pwa 15:32; 16:1; 18:1 Samaria dedaane Jerusalem nɔɔna bam na toŋe tei to mo Wɛ veere o bere Mika.

Samaria de Jerusalem borem taane

2Abam balo maama na zoore tega baŋa ne to, pore-na á zwa á cheigi taane dento lanyerane. Yuu-tu Baŋa Wɛ mo jei o wɛyuu sɔŋɔ kom ne ye o lage o saŋe abam. 3Nii-na! Baŋa Wɛ zege o jeiŋa jei sem ne o tu o beena! O lage o ba o nɔ logo baŋa peero tem yuu ne mo. 4Peero tem tete wó nyeene kalia kalia, ne ba na saŋe nuga mini ne tei to mo. Zwonnu tem de wó jage te jei, nenɛɛne na na chuuri ba kɛ tei to. 5Ko ye Jakob dwi tiina bam na sɛ lwarem totoŋa to ŋwaane mo konto maama wó ke. Chega to, Isarele tiina bam lɔge Wɛ kwaga ne! Bera mo pɛ se ba tusi konto dwoŋi? Ko ye ba te-fɔrɔ Samaria tiina tete ŋwaane mo! Bera mo pɛ se Judah tiina bam zuli jwona? Ko maa ye ba teo kamunu Jerusalem tiina tete ŋwaane!

Baŋa Wɛ maa we:

6“Konto ŋwaane amo lage a chɔge Samaria teo kom maama pa se ko ji di-dwonnu nɔɔna na wó che gaare ye ba du Vini teeni da to. A wó pa se na chuuri teo kom kalankula baŋa ne. Na bam wó ja-ya ba jage pa se teo kom de ko kugu maama saare. 7Amo ta wó chochoge ba jwona yam, ye a daare a ma mini a zwɛ pɛɛra yalo maama ba na kwei ba ma zuli-ya to. Chega to, a wó chɔge kamwaro telo maama ba na jege ba kaane to mo. Ba nɛ ba jwona jejegero tem ka-tole totoŋa baŋa ne mo. Konto ŋwaane amo wó pa se ba dona bam jwoŋi-te ba ja vo teo kodwoŋi ba ma ba ŋwe ka-tole dáane.”

Judah bá lu lɛɛro tem wone

8Lɛɛro na wó ba konto to, amo wo chɔge dedɛ ye a keeri ko ŋwaane. Amo laam wó taa vei kalambwolo de a napera yerane mo.#Izaya 20:2 A ta wó suuri ne nywoŋ-kura mo tei, ye a chwoosi ne kunkworo na keeri tei to. 9Samaria tiina bam na nɛ zonne delo to ba jege yɔɔrem. Ba jaweo kom lɔgese ko ja Judah tiina bam de, ye ko lage ko yi Jerusalem teo kom, amo chorro tem na zoore mɛ to.

10Yé zaŋe-na á ta taane dento se Gafa tiina bam maane dé cham dem ni ne! Yé keeri-na de fenfee de! Ko daare abam balo na zoore Bɛte-Lafera ne to, kwei-na fwogo á ma á taare á yera á wo-chechɔgɔ kom ŋwaane. 11Ba wó kale abam Safiri tiina bam ba viiri se á nwoŋi á teo kom wone bwori de á chaveera á ta‑á via. Zaanan tiina bam nam ware ba nwoŋi ba teo kom wone. Bɛte-Ezeli tiina bam maa laare dedɛ, ba daa bá wane abam ba woli. 12Marofa tiina bam maama yɔɔre ba wowole mo ba teene verem, Baŋa Wɛ na toŋe lɛɛro ye te ga fee se te yi Jerusalem teo to ŋwaane.

13Abam balo na zoore Lakisi ne to, kwɛ-na á jara-keim torokooro tem se sisein-nɔɔna vaŋe-te ye á duri á kɛ! Ko ye abam mo bobo á tɔge Isarele tiina wɛleera yam dwoŋi, pa se Jerusalem tiina bam#1:13 Jerusalem tiina bam: Hiburu = Zion bukɔ wom de to tusim wone. 14Judah tiina bam, véi-na á ke bana de Moresɛf-Gafa tiina bam. Á daa bá na-ba. Akiziba teo kom nam lage ko lɔ Isarele tiina pwa bam kwaga ne mo. 15Abam balo na zoore Maresa ne to, Baŋa Wɛ lage o pa á dona bam wane á teo kom ba di mo. Wolo na jege yere Isarele tiina bam wone to wó duri o vo o seigi Adulam peo bɔɔne dem wone.

16Judah tiina bam, cheeri-na á yum se á daare á ta‑á laara, ba na lage ba ja á bu-swonnu tem ba kale ba vo sa-teo to ŋwaane. Chega to, tiini á cheeri-na á yum nenɛɛne duura yum na ye tei to.

Currently Selected:

Mika 1: KBG

Highlight

Copy