Matiyu 9

Yezu bere we o jege dam se o saare nɔɔna wɛleera

Maake 2:1-12; Luka 5:17-26

1Yezu laam ma jwoori o vo o zo nabworo kom. O ma bɛ buga kam o vo o yi o tete teo Kaparenia. 2O na wora to, nɔɔna badwonna ma zeŋe gɔrɔ kolo na tigi gungwolo baŋa ne to ba ba o tei. Yezu ma lɔre ba na tiini ba ke ba wo-dedoa ded‑o tei. O ma ta de gɔrɔ kom o we, “A bu, poore n yera, se nmo wɛleera yam saare.”

3Wɛ nia yam zamesem tiina badwonna maa wora, ye ba ŋɔɔne ba tete yera ne ba we, “Nɔɔno wonto ŋɔɔne o twe Wɛ yere mo.” 4Yezu ma lɔre ba na boŋe kolo to. O ma bwei-ba o we, “Bɛ mo ye á jege wo-balwaaro tem konto á boboŋa ne? 5Kɔ mo ye mɔle, a ná tage we gɔrɔ kom wɛleera yam saare, naa a ná tage we o zaŋe o taa via? 6Amo nam wó pa se abam lɔre we amo wolo na ye Nabiin-bu wom to jege dam logo baŋa ne se a yage nɔɔno wɛleera a ma chɛ‑o.” O laam ma ta de gɔrɔ kom o we, “Zaŋe wɛɛne se n kwei n gungwolo kom n ja n vo sɔŋɔ.” 7O na tage konto to, nɔɔno wom ma seene o zaŋe o viiri. 8Nɔn-kɔgɔ kom maama na nɛ konto to, foone ma zo-ba. Ba ma zuli Wɛ de o na pɛ dam dem konto wo nabiinu jeŋa ne to.

Yezu bwoŋi Matiyu se o taa tɔge‑o

Maake 2:13-17; Luka 5:27-32

9Yezu laam ma kɛ. O na maa vei to, o ma na nɔɔno wodwoŋi, o yere mo Matiyu.#9:9 Matiyu yere dedwoŋi ye Levi (Maake 2:14; Luka 5:27). O déem jei mɛ seeni o na yeini o jwoŋi lampwoo nɔɔna tei ne to mo. Yezu ma ta ded‑o o we, “Zaŋe n ta‑n tɔge-ne.” O ma seene o zaŋe o tɔge o kwaga.

10Yezu déem ma vo Matiyu sɔŋɔ se o di wodiu. O de o kwaga tɔgena bam na wora to, lampwoo lara de nɔn-chechɔgero dedɛ maa tɔge ba wora ba di wodiu de-ba. 11Farisi tiina de maa tɔge ba wora. Banto na nɛ Yezu na ke tei to, ba ma vo ba bwei o kwaga tɔgena bam ba we, “Bɛ mo kea ye á berem tu wom di wodiu dedaane lampwoo lara de nɔn-chechɔgero tem konto?”#Luka 15:2

12Yezu ma ni ba na tage kolo to. O laam ma ta o we, “Ko ná ye balo na jege ya-dɛɛra to, banto ba jege se ba vo dɔkta tu tei se o yɔɔre-ba. Ko daare balo na ba jege yazura to mo jege se ba vo se ba yɔɔre ba tete. 13Wɛ tete maŋe o ta we, ‘Nɔɔna ná jege ba dwonna yibwona, konto pwoli amo wo ko dwoni ba ná ke kaanem ba pa-ne.’#Hosea 6:6 Véi-na á zamese taane dem konto kuri chekke. Amo na tu logo baŋa to, ko dae balo na maŋe ba ye nɔn-ŋona to ŋwaane. A nam tu se a bwoŋi nɔn-chechɔgero mo se ba tɔge chwoŋa.”

Yezu berem dem ye berem-doore

Maake 2:18-22; Luka 5:33-39

14Jɔn kwaga tɔgena déem ma vo Yezu tei, ye ba bwei‑o ba we, “Debam de Farisi tiina bam yeini dé vɔ ni maŋa maama. Bɛ mo kea ye nmo kwaga tɔgena bam ba vɔ ni konto?” 15Yezu ma leiri-ba o we, “Nɔɔno ná wora o ke kadiri, ye o dwonna ná wora se ba tɔge ba di, banto wó wane ba nyɔne ba yiga se ba yé di wodiu na? Kan-baro wom ta ná wora, ba bá sɛ ba ke konto. Ko nam wó ba ko yi maŋa kam ba laam na wó ja kan-baro wom ba viiri to. Maŋa kam konto ne mo o badwonna bam laam wó vɔ ni.

16Nɔɔn-nɔɔno bá sɛ se o kwei gare-yi-doore o ma feiri gare-dwoŋo kolo na kaare to. O ná ke konto, ko feirim dem laam wó vuuri gɔrɔ kom ko pa ko chɔge dedɛ. 17Ko woli da, nɔɔn-nɔɔno bá sɛ o kwei sa-doora o lwo o ke lɔ-dwoŋa wone. O ná ke konto ye sana bam ná lage ba keeri, lɔa kam wó bage mo. Sana bam maa wó lwo ba yage, ye lɔa kam de chɔge. Nɔɔno nam maŋe se o kwei sa-doora o ke lɔ-doŋa wone, se te maama maŋe daane.”

Yezu yɔɔre nɔɔna badwonna

Maake 5:21-43; Luka 8:40-56

18Yezu déem na wora o ŋɔɔne konto to, Juu tiina nakwe wodwoŋi ma ba o tei. O ma kuni dwoona o yiga ne ye o we, “Amo bukɔ mo tega leile. Nam ba se n ma n jea n zi‑o, se konto wó pa o jwoori o na ŋwea.” 19Yezu ma seene o zaŋe o tɔge‑o, de o kwaga tɔgena bam maama.

20-21Ba na maa kɛ konto to, kaane wodwoŋi ma vo o tei. Kaane wom konto nam tiini o wɔe wo mo taa, bena fuga-yalei. O maa boŋe o wone o we, “Amo ná dwei o gɔrɔ kom yerane, ko wó pa se a na yazura.” O ma tɔge Yezu kwaga ne o dwei o gɔrɔ kom ni. 22O na dwei‑o konto to, Yezu ma pipiri o na‑o ye o we, “Amo bukɔ, poore n yera. Nmo na ke n wo-dedoa de amo to mo pɛ se n na yazura.” Maŋa kam konto ne nɔɔ mo kaane wom seene o na yazura.

23Yezu laam ma vo o zo Juu tiina nakwe wom sɔŋɔ. O ma zo o na balo na tu se ba leeni lua kam lei to, de nɔɔna dedɛ na wora ba fere ba tete to. 24O ma ta de-ba o we, ba zaŋe ba viiri, se bu wom wo tege, se o tigi o dɔ mo. O na tage konto to, nɔɔna bam maa jege‑o ba mɔna. 25Ba na pɛ se kɔgɔ kom maama nwoŋi to, Yezu laam ma vo o zo diga kam bu wom na wora to. O ma ja o jeŋa pa se o zaŋe wɛɛne.

26O keim dem konto ma jage de yi teo kom jei sem maama ne.

27Yezu déem ma zaŋe o maa kɛa. O na maa vei to, lilwoa balei ma zaŋe ba tɔge o kwaga ye ba tɛ baŋa baŋa ba we, “Pɛ David dwi tu! Duri debam yiniga!”

28O ma vo o zo sɔŋɔ kodwoŋi. Lilwoa balei bam ma tɔge ba zo da. O laam ma bwei-ba o we, “Abam sɛ we amo wó wane a ke á na lage kolo to na?” Ba ma leiri‑o ba we, “Debam tu, dé sɛ.” 29O laam ma dwei ba yia yam, ye o we, “Abam na ke á wo-dedoa de amo se a ke kolo to, Wɛ wó pa ko ke.” 30O na tage konto to, ba yia yam ma seene ya jwoori ya nae. O ma kaane-ba we, ba yé pa nɔɔn-nɔɔno lɔre ko ni ne. 31O na tage-ba konto to, ba ta ma zaŋe ba kare ba tɛ o taane jei sem maama ne.

32Nɔɔna bam konto na maa kɛ to, nɔɔna badwonna ma ja memaa ba ba Yezu tei. Ko maa ye setaane mo tɔge‑o pa se o ware o ŋɔɔne. 33Yezu ma zeili setaane dem o tei ne. Nɔɔno wom laam maa wae o ŋɔɔna. Ko ma so nɔn-kɔgɔ kom maama, ye ba tɛ ba we, “Debam wo fɔge dé na wo-kenkagele dento dwoŋi ywo-seeni Isarele teo ne.” 34Farisi tiina bam déem maa wo sɛ ye ba we, “Wonto na wae o zeili setaana to, ko ye setaana pɛ dam ŋwaane mo.”

35Yezu déem maa kare nawuura yam maama wone o tola. O maa yeini o vei Juu tiina jeerim di sem se o taa bere nɔɔna Wɛ chega kam. O maa tɔɔle Wɛ paare dem kwor-ywoŋa kam, ye o kwori o yɔɔre jaweena de jaweo kolo dwi maama na jege-ba to. 36O déem ma na nɔn-kɔgɔ kom yaara yam na ye tei to. Ba ŋwaŋa ma zo‑o lanyerane, de ba na jege lwia ye ba yeiri ba na wó ke tei to. Ba maa nye de pei selo na ba jege nayero se o taa nii se baŋa ne to. 37O laam ma ta de o kwaga tɔgena bam o we, “Ko nye de wodiu faao na ke lanyerane, ye tontoŋena fenfee yerane wora se ba zage tei to mo. 38Nam lwoori-na faao totoŋa yam yuu tu se o toŋe nɔɔna dedɛ se ba vo ba zage faao kom ba pa‑o.”#2 Tɛsaloni 3:1

Currently Selected:

Matiyu 9: xsmKBG

Highlight

Copy