Matiyu 5

Yezu berem-doore

Luka 6:20-23

1Yezu déem ma na nɔn-kɔgɔ na tɔge‑o tei. O ma pwɛ o tete o vo o di peo kodwoŋi o jeini da. O na jei to, o kwaga tɔgena bam ma vo o tei. 2O laam ma bobo se o bere-ba we:

3“Balo na yei we yiniga jege-ba Wɛ seeni to mo jege yu-ywoŋo,

ba na tɔge ba di Wɛ telaao paare dem to ŋwaane.

4Balo wo na chɔge to mo jege yu-ywoŋo,

Wɛ na wó pa ba bochara zuri to ŋwaane.#Jɔn 16:20-22

5Balo na tu ba tete to mo jege yu-ywoŋo,

Wɛ na wó pa ba taa tei logo kom baŋa to ŋwaane.#Lei 37:11

6Balo na pae se Wɛ chega kam tɔgem jege fera ba tei ne to

mo jege yu-ywoŋo,

Wɛ na wó pa se ba bochara peini de ba fera yam to ŋwaane.

7Balo na jege nɔɔna ŋwaŋa to mo jege yu-ywoŋo,

Wɛ na wó duri ba de ŋwaŋa to ŋwaane.

8Balo bochara na lana fase to mo jege yu-ywoŋo,

ba na wó ba ba na Wɛ to ŋwaane.#Lei 24:4

9Balo na pae se nɔɔna jege ywoni daane to mo jege yu-ywoŋo,

Wɛ na wó taa bwoi-ba we, o tete bia to ŋwaane.

10Balo na tɔge Wɛ chega kam ye nɔɔna bɛɛse-ba to

mo jege yu-ywoŋo,

ba na wó tɔge ba di Wɛ telaao paare dem to ŋwaane.

11Nɔɔna ná twe abam ye ba bɛɛse abam, ye ba ta ná tɔge amo ŋwaane ba fɔ vwa dwi maama ba pa abam, á jege yu-ywoŋo mo. 12Wɛ wó pa á na nyɔɔre dedɛ o tei ne. Konto to, ta‑á jege-na wopwolo lanyerane. Ko ná ye Wɛ sampwori selo déem na lwoori abam yiga ba ba ba wora to, nɔɔna déem maŋe ba bɛɛse-ba konto mo.#Jemsi 1:2-3; 1 Piita 4:13-14

13Yɛ na kwɛ wodiu tei to, abam de nam ye konto mo de nabiina. Ko ye abam mo pae ywoni wora ba tei ne. Yɛ ni nam ná ti, n daa‑n bá‑n wane n pa de jwoori de ja ni. Dento daa ba jege kuri. Ba nam wó dole-de ba yage, se nɔɔna taa nɔne de baŋa ne.

14Abam nye ne pwooni mo á pae nabiina. Teo kolo ba na lɔge peo yuu ne to tiini ko nae mo jaja. 15Nɔɔn-nɔɔno bá sɛ o tɔre min-zwoŋo o pu zoŋa kuri ne. O nam wó kwei-ko o zege wɛyuu ne, se ko pwooni taa wora nɔɔna maama tei ne diga kam wone. 16Abam jege se á ta‑á ye konto mo se ko pa á ji pwooni nɔɔna tei ne. Ba laam wó na wo-laaro telo á na ke to, ye ba daare ba zuli á Kwo Wɛ na wo telaao ne.#1 Piita 2:12

Wɛ nia yam taane

17Abam nam yé ta‑á boŋe we amo tu se a pa Wɛ tɔn-dwoŋo kom na bere kolo to ji kafɛ, de ko ná maŋe ko ye Wɛ nia yalo na tɔge Moses jeŋa to, naa o sampwori sem na bere tei faŋa faŋa to de. Amo tu se a pa ya tiini ya taa jege kuri mo lanyerane, ye ko dae we a lage a chɔge-ya mo. 18A tɛ abam chega ŋwaane to, logo baŋa de wɛyuu na wora se ko taa vei maŋa kalo to, kolokolo bá wane ko le Wɛ ni-dwoora yam wone de fenfee de. Ya nam wó taa wora konto mo taa, se ko ba ko yi wonnu maama na wó ti maŋa kalo to. 19Nɔɔno wolo maama ná pae se Wɛ nia yam dedoa ye kafɛ, ye o ná paale o soge o dwonna se ba chɔge-de, de ná maŋe de ye Wɛ ni delo na muri to de, konto tu wó taa ye wolo na tiini o ye balaŋa Wɛ tei ne mo. Ko daare wolo maama ná yɔɔre o sɛ Wɛ nia yam, ye o daare o bere o dwonna se ba de ke konto, konto tu wó taa jege dam Wɛ telaao paare dem wone. 20Á nam ta‑á yei we, abam ná ba tɔge chwoŋa se ko taa dwoi Wɛ nia zamesem tiina bam de Farisi tiina bam, á bere á bá na chwoŋa se á tɔge á di Wɛ telaao paare dem.

Ban-zɔŋɔ na nye de nɔɔno gom tei to

Luka 12:57-59

21Abam yei we ba déem bere debam kwoa bam we, ‘Yé zaŋe n go n dwoŋi. Wolo nam ná ke konto, ba jege se ba di o taane mo.’#Nwoŋim 20:13 22Ko daare amo laam nam tɛ de abam we, nɔɔno wolo ná jege ban-zɔŋɔ de o dwoŋi, ko maŋe se ba di konto tu de taane mo. Wolo ná tage o dwoŋi o we, o ba jege boboŋa, ko maŋe se debam nakwa bam mo di konto tu taane. Nɔɔno wolo de ná tage o dwoŋi o we, o ye wo-koro, ko maŋe se konto tu na waarem de mini te-seŋa ne. 23Mo kokuri, nmo ná lage n kwei n pɛɛra n pa Wɛ, ye n laam ná guli we n dwoŋi jege n ban-zɔŋɔ, 24se n yage n pɛɛra yam n tiŋi, se n jwoori n vo n dwoŋi wom tei se á fɔge daane. Nmo ná ke konto, se n laam jwoori n ba n kwei n pɛɛra yam n pa Wɛ.

25Ko daare nɔɔno nam ná jaane‑m o vo o saŋe, se n ke lela n pa á fɔge daane ye á daa ta wo yi taane dim jei sem. Ko ná dae konto, o laam wó ke nmo taane dim tu wom jeŋa ne se o waare‑m. Wonto de laam maa wó ke‑m o tontoŋeno jeŋa ne se o ja‑m o vo o ke peena diga ne. 26A tɛ nmo chega ŋwaane to, nmo wó ta‑n wora taa. Nmo ná wo ŋwe jene dem maama ye bi ná daare, ba bá yage‑m.

Ka-laga boboŋa na nye de bwoŋa tei to

27Abam nam yei we ba maŋe ba ta ba we, ‘Yé zaŋe n bwoori de nɔɔno kaane.’#Nwoŋim 20:14 28Amo nam tɛ de abam we, nɔɔno wolo ná nɛ kaane ye o fera zo‑o, ko nye de kotu maŋe o ke bwoorim mo de o na jege o boboŋa tei to.#Job 31:1 29Konto to, nmo jazem yi ná pae n tusa, se n chochɔrege-de n le n yage. Nmo yera fenfee ná chɔge konto, ko lana ko pa‑m ko dwoi n yera yam maama ná wora ye ba de-ya ba yage te-seŋa ne. 30Ko woli da, nmo jazem ná pae n tusa, se n gwoni-ka n yage. Nmo yera fenfee ná chɔge, ko lana ko pa‑m ko dwoi n yera yam maama ná zo te-seŋa ne.

Kaane yagem taane

Matiyu 19:9; Maake 10:11-12; Luka 16:18

31Ba ta maŋe ba ta ba we, ‘Nɔɔno wolo ná yage o kaane, kotu jege se o pa‑o tɔnɔ kolo na bere we ba yage daane to.’ 32Amo nam tɛ a bere abam we, nɔɔno wolo ná yage o kaane ye ko dae we o chɔge, kotu pae se kaane wom ke bwoŋa mo, ne o ná zo baro wodwoŋi. Nɔɔno wolo maama nam ná di kaane wom konto dwoŋi, konto tu keim dem de bwoŋa ye bedwe mo.

Duuri duum taane

33Ko woli da, abam yei we ba déem bere debam kwoa bam we, ‘Yé zaŋe n kwane n ni. Nam ke kolo maama n na dugi n pa Baŋa Wɛ to.’#Nia Gulim 23:21 34Amo nam lage a ta a bere abam se á yé zaŋe á du de kolokolo. Yé zaŋe á du duuri Wɛ telaao ŋwaane, kokuri dáane mo ye Wɛ jeiŋa jei.#Izaya 66:1 35Yé du-na de tega baŋa de, ka na ye o nɛ chwiim jei to ŋwaane. Ko nam ná ye Jerusalem, se á yé zaŋe á du de konto de, se konto de ye Wɛ Pa-faro teo kom mo. 36Nam yé zaŋe á du de á tete yuu, kolo ŋwaane á bá wane á pa á yu-yua dedoa tete leiri ka ji napwoŋo naa nazwono. 37Nam pa-na se á ná tage taane, se de taa ye ‘ɛɛ’ naa ‘aawo’ yerane, se á daa yé woli kolokolo da. Á nam ná dugi duuri á woli da, konto ye setaane nyem mo.

Bochare zurim taane

Luka 6:29-30

38Abam ta yei we ba maŋe ba ta ba we, ‘Nɔɔno ná chugi n yi, se n de chu konto tu yi. Ko daa ná ye n yeili, se n de guri o yeili.’#Chullu 24:20 39Amo nam tɛ de abam we, nɔɔno ná ke‑m lwarem, se n yage‑o. Nɔɔno ná lɔge nmo jazem popɔŋɔ, se n pa o lɔ kodwoŋi kom de. 40Nɔɔno ta ná saŋe‑m se o jwoŋi n gare-bu o jene ŋwaane, se n pa o kwei n gare-bwora o woli da. 41Dedɛɛro nam ná jaane‑m se n zeŋe o zela n vo chwo-kukua laŋa ne, se n zeŋe n gaale dáane. 42Nɔɔno nam ná lwoori woŋo n tei ne, se n kwaane n pa-o-ko. Nɔɔno nam ná lage se o jene woŋo n tei ne, se n yé ve‑o.

Swono taane

Luka 6:27-28, 32-36

43Abam ta yei we ba maŋe ba ta ba we, ‘N jege se n ta‑n swoi n fara maama mo, se n daare n ta‑n chuli n dona.’#Chullu 19:18 44Amo nam tɛ a bere abam, se á ta‑á swoi á dona mo. Ko nam ná ye balo na jege abam ba bɛɛse to, se á ta‑á lwoori Wɛ á pa-ba.#Rom 12:14 45Á ná ke konto, ko wó bere we á Kwo mo ye Baŋa Wɛ, de á na tɔge o kikia yam dwoŋi to. Wonto ba pɔɔre nɔɔna daane de o na pae se wea nye ba maama baŋa ne, ko ná ye nɔn-balwaaro naa nɔn-laaro de. O ta kwori o pae se doa nena ka pae balo na tɔge chwoŋa de balo na ywori to. 46Abam nam ná swoi balo de na swoi abam to yerane, konto jege nyɔɔre Wɛ tei ne na? Lampwoo lara de yeini ba ke konto dwoŋi mo. 47Abam nam ná ke lanyerane de á chorro yerane, ko ba bere kolokolo. Balo na yeiri Wɛ to de yeini ba ke konto dwoŋi mo. 48Abam nam jege se á yɔɔre á ta‑á tɔge chega, se ko maŋe de á Kwo Wɛ na yɔɔre o jege chega tei to mo.”

Currently Selected:

Matiyu 5: xsmKBG

Highlight

Copy