Matiyu 4

Setaana pɛ maŋe Yezu

Maake 1:12-13; Luka 4:1-13

1Wɛ Sin-laao kom déem na tu Yezu tei konto to, ko laam ma ja‑o ko vo kagoa yuu ne se setaana pɛ maŋe‑o o nii.#Hiburu 2:18 2Yezu déem maa wora taa, da finna, ye o ba di wodiu wea de tete maama. Kana maa jege‑o. 3Setaana pɛ wom laam ma ba o tei, ye o ta ded‑o o we, “Nmo ná seene n ye Baŋa Wɛ Bu, se n ta de kandwa yanto se ya ji wodiu se n di.” 4Yezu ma leiri‑o we, “Ko nam popone Wɛ tɔnɔ kom ne we:

‘Ko dae wodiu yerane mo pae se nabiina ŋwe,

se ko ye Wɛ ni taane dem maama mo pae nɔɔna ŋwea.’#Nia Gulim 8:3 ”

5Setaana pɛ wom laam ma kwei‑o o ja vo Wɛ tete teo Jerusalem. O ma ja‑o o vo o di Wɛ diga kam yuu mɛ na dɔra to o zege‑o da, 6ye o we, “Nmo ná ye Wɛ Bu, se n faŋe n chu tega ne se dé nii. Kokuri, ko popone Wɛ tɔnɔ kom ne we:

‘Wɛ wó ta de o malese sem

se ba ba ba ma ba jea ba lwori‑m,

se n yé mage n naga de kandwɛ n to tega ne.’ ”#Lei 91:11-12

7Yezu ma leiri‑o we, “Ko ta popone we,

‘N yé faŋe n Teiru Baŋa Wɛ n nii.’ ”#Nia Gulim 6:16

8Setaana pɛ wom daa ma ja‑o o ja vo o di peo kolo na tiini ko dɔra to yuu. O laam ma bere‑o logo kom teene dem maama de wo-laaro telo maama na wora to. 9O ma ta ded‑o o we, “Nmo ná sɛ n kuni dwoona n zuli amo, amo wó pa se n ta‑n tei wonnu tem maama.” 10Yezu laam ma ta‑o o we, “Setaana pɛ, véi dáa a tei ne! Se ko popone Wɛ tɔnɔ kom ne we:

‘Ko ye n Teiru Baŋa Wɛ yerane mo

n jege se n kuni dwoona n zuli,

ye n toŋe n tɔge o boboŋa.’ ”#Nia Gulim 6:13

11Setaana pɛ wom laam ma viiri o daare‑o. Wɛ malese laam ma ba Yezu tei se woli‑o de kolo o na lage to.

Yezu bobo se o toŋe Wɛ totoŋa

Maake 1:14-15; Luka 4:14-15

12Yezu déem ma maane we, ba jaane Jɔn ba ke peena diga ne. O na lɔre konto to, o ma zaŋe o jwoori Galili.#Matiyu 14:3 13O maa daa ba zoore Nazarete ne, ye o kɛ o vo Galili teo kodwoŋi, ko yere mo Kaparenia, o zoore da. Teo kom konto wo naneo ni ne, jei selo Zebula dwi tiina de Nafitali dwi tiina ya na zoore da to mo. 14O na zoore da konto to, ko déem ma pa se Wɛ sampwora Izaya na maŋe o bere Wɛ kwora kalo faŋa faŋa tei to ba ka ji chega. 15O déem we:

“Ko ná ye Zebula de Nafitali teene dem jei sem,

de jei selo na wo naneo kom seeni to,

de jei selo na wo Jɔdan buga kam bubɛ dedwoŋi dem kwaga ne to,

de Galili jei selo dwi-gɛ tiina na zoore da to,

16jei sem konto tiina bam déem ya wo lim wone mo,

ye ba laam ba ba na pwooni dedɛ,

pa se ba yi poore lanyerane de Wɛ chega kam.

Balo na zoore da to ya ba jege teena Wɛ tei ne.

Toone mo tei-ba.

Wea laam ma nye ba baŋa ne pa se lim daa tera ba tei ne.”#Izaya 9:1-2

17Yezu na jwoori o vo o zoore Galili ne to, ko zege maŋa kam konto ne o déem wora o bere nɔɔna we ba jege se ba leiri ba wo, kolo ŋwaane maŋa kam laam yia Wɛ telaao paare dem na lage de ba o nɔɔna baŋa ne to.

Yezu bwoŋi nɔɔna bana se ba taa tɔge‑o

Maake 1:16-20; Luka 5:1-11

18Yezu déem maa wo Galili naneo kom ni ne o via. O ma na nɔɔna balei, ba na ye chorro to. Ba dedoa yere mo Simon, o yere dedwoŋi maa ye Piita. Wodwoŋi wom maa ye o nyaane, o yere mo Anduru. Ba ye ywon-jara mo, ye ba wo na bam wone ba dole chworu ba ma jaane ywona.#Jɔn 1:40-42 19Yezu laam ma ta de-ba o we, “Zaŋe-na á ba á ta‑á tɔge-ne. Amo wó pa se á ta‑á lage nɔɔna mo se ba ba ba da amo kwaga, se ko taa nye de á na jaane ywona tei to.” 20O na tage konto to, ba ma zaŋe lela ba yage ba chworu tem ye ba vo ba tɔge o kwaga.

21Yezu na vei o maa kɛ to, o daa ma na nɔɔna balei, ba de ta ye chorro mo. Ba kwo yere mo Zebedi. Ba dedoa yere mo Jemsi. Wodwoŋi wom maa ye o nyaane, o yere mo Jɔn. Banto balei de ba kwo Zebedi maa wo nabworo wone ba kwɛ ba chworu se ba ma ja ywona. O ma bwoŋi bia bam se ba ba ba taa tɔge‑o. 22O na bwoŋi-ba konto to, ba ma zaŋe lela ba yage ba kwo wom de nabworo kom ye ba daare ba vo ba tɔge‑o.

23Yezu déem maa tole Galili teene dem maama. O maa yeini o vei Juu tiina jeerim di sem se o taa bere nɔɔna Wɛ chega kam. O maa tɔɔle Wɛ paare dem kwor-ywoŋa kam, ye o kwori o yɔɔre jaweena de jaweo kolo dwi maama na jege-ba to. 24Nɔɔna ma ba ba ni o ŋwa jei sem konto ne de Siria teo kom maama ne. Ba maa yeini ba jaane jaweena dwi dwi ba tui, balo yera na tiini ya wɔe to, ko woli de balo setaana na daane-ba to, de balo na sae kɔɔro to, de gwaaro. Ba na tu Yezu tei konto to, o maa yeini o yɔɔre-ba. 25Nɔn-kɔgɔ dedɛ ma ba ba tɔge‑o. Ba déem nwoŋi Galili teene dem, de jei selo ba na bwoi we ‘Teene Fuga’ to, de Jerusalem, de Judea maama, de jei selo na wo Jɔdan buga kam bubɛ dedwoŋi dem ne to, ye ba tɔge ded‑o ba beera.

Currently Selected:

Matiyu 4: KBG

Highlight

Copy