Matiyu 11

Jɔn wolo na pae nɔɔna sɛɛm to taane

Luka 7:18-35

1Yezu déem na pɛ o kwaga tɔgena fuga-balei bam o ni dem o ti to, o laam ma kɛ o vo jei sem konto teene dem wone o tola, se o taa bere nɔɔna ye o tɔɔle Wɛ kwora o pa-ba.

2Jɔn wolo na pae nɔɔna sɛɛm Wɛ ŋwaane to déem maa wo peena diga ne. O ma ba o lɔre Wɛ Dam Tu Yezu na ke kikia yalo to. O ma toŋe o kwaga tɔgena badwonna se ba vo ba nii‑o, 3se ba daare ba bwei‑o we, “Nmo mo ye wolo Wɛ na bere debam we o wó ba to na? Naa dé ta wó taa teene nɔɔno wodwoŋi mo?” 4Ba na bwei Yezu konto to, o ma leiri-ba o we, ba véi ba ta de Jɔn kolo maama ba na nɛ ye ba kwori ba ni to. 5“Á ta á bere‑o we, lilwoa jwoori ba nae, gwaaro de wae te via, naywanno yera de maa kwɛ lanyerane, zwa-kwarro de zwa ni, twa de jwoori ba bi. Ko woli da, yiniga tiina de maa ni Wɛ kwor-ywoŋa kam.#Izaya 35:5-6 6Wolo maama na ba jwoori Wɛ kwaga ne amo ŋwaane to mo ye yu-ywoŋo tu.”

7Jɔn kwaga tɔgena bam ma zaŋe se ba viiri. Ba na maa kɛ to, Yezu laam ma ta Jɔn taane o bere nɔn-kɔgɔ kom. O ma ta de-ba o we:

“Abam déem na vei Jɔn tei kagoa yuu ne to, á boŋe we á wó na bɛ mo? Á vei se á nii gaaro telo vio na jege ko dole to mo na? 8Aawo. Se bɛ mo? Á vei se á nii nɔn-yero na zo gare-nyenno to mo na? Aawo. Nɔn-yero nam wó taa zoore sɔ-fɔrɔ wone mo, se ko dae kagoa yuu ne. 9Bɛ nam mo ye á vo? Á vei se á na Wɛ sampwora mo na? Ɛɛ, ko ye konto mo. Á nam na nɛ wolo to tiini o dwoi faŋa faŋa Wɛ sampwori sem na ye tei to. 10Wɛ tɔnɔ kom nam maŋe ko ta wonto taane ko we,

‘Nii, amo Wɛ lage a toŋe a tontoŋeno mo,

se o da nmo yiga o vo o kwɛ chwoŋa kalo nmo na wó tɔge da to.’#11:10 Malaki 3:1

11A tɛ abam chega ŋwaane to, nabiina balo ba na maŋe ba lo to wone nɔɔn-nɔɔno tera o na yi Wɛ tontoŋeno Jɔn na ye tei to. Ko daare leile konto, nɔn-yɔɔ kolo maama na zo Wɛ woro kom wone to laam tu o dwoi Jɔn. 12Ko zege maŋa kalo Jɔn déem na pɛ nɔɔna sɛɛm to, se ko ba ko yi zem to, Wɛ telaao paare dem laam jage de yi yiga de dam. Balo na seene ba yia Wɛ paare dem ŋwaane to laam mo kwaane lanyerane se ba tɔge ba di o paare dem konto. 13Ko ná ye faŋa faŋa Wɛ sampwori sem de Moses de déem na bere kolo to, ba maŋe ba bere Wɛ paare dem chega kam se ko ba ko yi maŋa kalo Jɔn laam na tu to. 14Abam ná sɛ á jwoŋi ba na bere chega kalo to, á wó lɔre we Jɔn na tu o wora to, wonto mo ye Elija wolo ba déem na ŋɔɔne o taane we o wó ba to.#Malaki 4:5-6

15Abam nam fɔge á cheigi amo taane dem. 16Amo nam wó ke tɛ mo a maŋe zem nɔɔna bam kikia na ye tei to? Ba nye de bia na jei yaga kaporo ne ba kwɛɛra to mo. Ba maa tɛ de ba yuudwonna ba we:

17‘Dé mage gullu mo se á sa,

ye á wo sage.

Dé ma daare dé leeni luseim dé pa abam,

ye á wo sɛ se á pa á yiga nyɔne.’

18Zem nɔɔna bam de ye konto mo. Jɔn na tu to, o peene o kana mo ye o ba nyɔ sana. Nɔɔna na nɛ‑o to, ba maa jege‑o ba yaala we, ko ye setaane mo tɔge‑o. 19Ko daare amo Nabiin-bu wom nam na tu to, amo wo vɔge ni. Nɔɔna daa ta ma yaale amo de ye ba we, a ye nɔn-kwolo mo, ye a ye sa-nyɔro de. Ba daa ta maa we, a me de lampwoo lara de nɔn-chechɔgero mo. Abam nam wó ba á lɔre swa yalo na ye chekke to de ya na pae se nɔɔna tɔge kikia yalo to.”

Lɛɛro wó yi balo na ve Yezu to

Luka 10:13-15

20Yezu na tage konto o ti to, o laam maa jege balo na nɛ o wo-kenkagela yam ye ba ta wo sɛ se ba leiri ba wo to taane o ŋɔɔna. O ma kaane balo na zoore teene delo o na ke wo-kenkagela dedɛ da to, ye o we, 21“Abam Chorazin tiina, lɛɛro yi abam! Ko woli de abam Bɛtasida tiina, lɛɛro yi abam! Kokuri, wo-kenkagela yalo maama amo na ke abam tei ne to, ya dwoŋi ya ná kea Tura de Sidon tiina tei ne, banto ya wó ke lela ba leiri ba wo Wɛ ŋwaane. Ba maa wó zo gare-nyenyaaro ye ba jei tentwarem wone ba wo-chechɔgɔ kom ŋwaane. 22Ta‑á yei-na we, Wɛ borem dɛ dem ná yia, Tura de Sidon tiina bá tiini ba na lɛɛro se ko maŋe de abam.

23Ko nam ná ye abam Kaparenia tiina, á ga boŋe we Wɛ lage o zeiŋi abam wɛyuu ne mo na? Aawo. Abam nam wó to á zo tega kuri kuri ne mo. Kokuri, wo-kenkagela yalo maama amo na ke abam tei ne to, ya dwoŋi ya ná kea Sodom tiina tei ne, ba ya wó leiri ba wo pa se Wɛ ya bá chɔge ba teo kom. 24Á ta‑á yei we, Wɛ borem dɛ dem ná yia, Sodom teo kom bá tiini ko na lɛɛro se ko maŋe de abam.”

Yezu wó pa nɔɔna na siu de ba cham

Luka 10:21-22

25Maŋa kam Yezu na ŋɔɔne konto o ti to, o déem ma ke o Kwo Baŋa Wɛ lei ye o we, “A Kwo, nmo mo ye wolo na tei wɛyuu de tega baŋa maama. Nmo nam pɛ se n chega kam seigi swa tiina de yi-pore-nyena tei ne, ye n daare n pa se balo boboŋa ta na wo bege to lɔre ka kuri. 26A Kwo, a ke nmo lei. Nmo na ke konto to, ko ye n boboŋa na lage kolo to ŋwaane.

27A Kwo Wɛ mo kwei wonnu maama o ke a jeŋa ne. Nɔɔn-nɔɔno bá wane o lɔre Wɛ Bu wom o ti, ko ná dae o Kwo yerane. Nɔɔn-nɔɔno daa ta bá lɔre a Kwo Wɛ, ko ná dae amo wolo na ye o Bu wom to yerane, ko woli de amo na boŋe se a pa nɔɔno wolo maama lɔre o na ye tei to.

28Abam balo na wo cham dedɛ wone, ye á yera chɛ de totoŋa pa se á laam bugi to, se á maama ba amo tei se a pa á na siu. 29Ba-na á sale amo yera ne, nenɛɛne nabɛ na sale daane se vare tei to. Kokuri a ye nɔn-mɔlɔ mo ye a gwooni a tete.#Filipi 2:5 A maa wó pa á boboŋa taa tigi jeiga dedoa. 30Á ná sale amo yera ne, a bá taa chana á baŋa ne, ye ko wó taa lana ko pa abam.”

Currently Selected:

Matiyu 11: xsmKBG

Highlight

Copy