Matiyu 10

Yezu toŋe o nɔɔna fuga-balei bam

Maake 3:13-19; 6:7-13; Luka 6:12-16; 9:1-6

1Yezu déem ma bwoŋi o nɔɔna fuga-balei bam se ba ba o tei. O ma pa-ba dam se ba wane setaana ba zeili nɔɔna tei ne, se ba daare ba pa nɔɔna na yazura ba jaweero dwi maama wone.

2O totoŋa nakwa fuga-balei bam yera mo tento:#Kikia 1:13

Simon wolo yere dedwoŋi na ye Piita to mo ye boboa tu.

Ko woli de Anduru wolo na ye Simon nyaane to,

de Jemsi, de o nyaane Jɔn, balo na ye Zebedi bia to.

3Filipi de Batoloma.

Tomas de Matiyu wolo na ye lampwoo laro to.

Jemsi wolo na ye Alafayu bu to, de Tadayus.

4Simon wolo na nwoŋi Zɛlota tigisim#10:4 Zɛlota tigisim nyena tiini ba chuli Rom tiina, ba na bɛɛse Juu tiina to ŋwaane. wone to,

de Judas Yisakara wolo na tu o yeigi Yezu o pa nɔɔna to.

5Yezu laam ma toŋe banto fuga-balei bam se ba nwoŋi ba beeri. Ba na lage ba kɛ konto to, o ma kaane-ba we, ba yé zaŋe ba vo dwi-gɛ tiina na zoore mɛ to, naa ba vo Samaria tiina teo. 6O maa we, “Á nam jege se á vo Isarele dwi tiina bam tei, se banto nye de pei selo na beeri kafɛ to mo. 7Nam véi-na á bere-ba we maŋa kam yia Wɛ telaao paare dem na lage de ba o nɔɔna baŋa to. 8Véi-na á ta‑á yɔɔre jaweena, se á daare á ta‑á bi balo na tege to, se á pa naywanno jwoori te na yazura, se á daare á ta‑á zeili setaana nɔɔna tei ne. Á nam jege se á zeini nɔɔna zɛɛra mo, á na jwoŋi á dam Wɛ tei ne zɛɛra to ŋwaane. 9Á ná maa vei, se á yé zaŋe á kwei sabu-seŋa naa sabu dwi maama á ke ganlɔgere ne á woli da. 10Nam yé kwei-na tampɔgɔ kolo á na wó ta‑á jwoŋi wodiu á ke da to. Á nam yé kwei gwaaro telei telei, naa natera, naa nacheiga á woli da. Kokuri, tontoŋeno maŋe se o taa jwoŋi o ni-wodiu mo.

11Abam nam ná vei á yi teo kolo, se á lage wolo na ye nɔn-ŋom to, se á laam vo o sɔŋɔ á ta‑á wora se ko ba ko yi á viirim. 12Á nam ná vei á zo sɔŋɔ kolo, se á jɔɔne-ba. 13Sɔŋɔ kom tiina nam ná jeeri abam lanyerane, se á lwoori Wɛ se yazura taa wo ba tei ne. Ko daare, ba ná wo ke abam lanyerane, Wɛ wó pa abam mo leiri ba yuu ne á na yazura. 14Abam nam ná vei sɔŋɔ kolo naa teo kolo, ye ba ná wo sɛ se ba jeeri abam naa ba cheigi abam taane, se á yage jei sem konto. Á ná maa viira, se á kokɔge á nɛ fwogo kom á yage da.#Nehemia 5:13 15A tɛ abam chega ŋwaane to, Wɛ borem dɛ dem ná yia, Sodom de Gomora tiina bá tiini ba na lɛɛro se ko maŋe de teo kom konto.

Yaara yalo na wó yi-ba to taane

Maake 13:9-13; 9:41; Luka 21:12-17; 12:2-9, 51-53; 14:26-27

16Nii-na, a na lage a toŋe abam tei to, á wó ta‑á nye de pei na maa vei se se gwaane wiira wone tei to mo. Mo kokuri á jege se á ta‑á yei á tete ne basankwe na jege se tete tei to, se á daare á pa á wo taa lana ne kunkwona na ye tei to. 17Ta‑á cho-na á tete de nɔɔna na lage ba ke abam tei to. Badaara wó ja abam ba vo ba saŋe nakwa tei ne, ye ba daare ba ja abam ba fere ba jeerim di sem wone. 18Abam na tɔge amo to ŋwaane, ba wó ja abam ba vo ba saŋe dedɛɛra de pwa tei ne. Konto mo á wó wane á bere-ba Wɛ chega kam, ye á daare á bere dwi-gɛ tiina de.#Kikia 24:24 19Ba nam ná jaane abam konto, se á yé ta‑á jege lwia de á na wó ta kolo, naa á na wó leiri-ba tei to. Abam na wó ta‑á zege ba yiga ne maŋa kalo to, Wɛ wó pa á lɔre á na wó ta kolo to. 20Ko bá taa ye abam tete taane, se ko ye á Kwo Wɛ Sin-laao kom mo wó tɔge abam baŋa pa se á ŋɔɔne.

21Nɔɔna badwonna wó ja ba tete chorro ba ke nɔɔna jeŋa ne se ba go-ba. Kwoa de wó ke ba bia konto dwoŋi. Bia de wó zaŋe ba tiina baŋa ne ye ba pa ba ja-ba ba go. 22Nɔɔna maama wó taa chuli abam, á na ye amo nyem to ŋwaane. Wolo maama nam ná tiini o jege pu-dɛa se ko vo ko kweeli, Wɛ wó jwoŋi konto tu ŋwea. 23Ba nam ná bɛɛse abam teo kolo ne, se á duri á vo kodwoŋi. A tɛ abam chega ŋwaane to, abam bá wane á tole teene delo maama na wo Isarele ne to á ti ye amo Nabiin-bu wom daa ta wo jwoori a ba.

24Zenzamso nam tera o na dwoi o berem tu. Kabaa de nam tera ka na dwoi ka tu. 25Zenzamso nam ná tu o yi ne o berem tu wom tei, konto mo lana ko pa‑o. Kabaa de ná tu ka yi ne o tu wom tei, konto mo lana ko pa‑o. Ba ná jege sɔŋɔ tu ba bwoi we, ‘Setaana pɛ Bɛlzabula’, ba nam wó tiini ba twe o sɔŋɔ tiina bam se ko dwoni konto.

26Á nam yé ta‑á fona de nabiina. Woŋo kolo maama na seigi nɔɔna tei ne to laam wó ba ko lɔre jaja. 27Amo na seigi a bere abam chega kalo maama to, á jege se á pa ka nwoŋi pwooni mo se á pa ba di nayuu ba tɔɔle-ka. 28Ko ná ye nabiina, banto wae ba goe á yera ye ba ware á jworru ba go. Konto ŋwaane, á yé ta‑á kɔre foone de-ba. Á jege se á ta‑á kɔre Wɛ mo, kokuri wonto wae o chɔge á yera de á jworru maama te-seŋa ne.#1 Piita 3:14

29Ko ná ye zun-kabeili, ba yeini ba yeigi sento mɔle mo. Á Kwo Wɛ nam nii sento baŋa ne, ye se dedoa bá wane ka to tega ne ka te ye o wo sɛ. 30Ko nam ná ye abam, Wɛ maŋe o yei abam yu-ywei sem ni na mae tei to. 31Konto ŋwaane, á yé ta‑á kɔre foone, se abam dedoa dedoa tiini á jege fera á dwoi zun-kabeili dedɛ.

32Nɔɔno wolo maama ná zege nabiina yiga ne o bere jaja we wonto ye amo nyem, amo de nam wó zege konto tu kwaga ne a bere we o ye a nyem a Kwo Wɛ yiga ne. 33Ko daare nɔɔno wolo maama ná ve amo nabiina yiga ne, amo de wó ve konto tu a Kwo Wɛ yiga ne.

34Amo na tu logo baŋa to, á yé ta‑á boŋe we ko ye se a pa nɔɔna mo na ywoni daane. A nam tu se a de jara mo nabiina tetare ne. 35A tu se a pa nɔɔna de ba kwoa mo chɔge daane, se a daare a pa bukwa de ba niina de ke konto, se kaana de ba banna niina de chɔge daane. 36Ko maa wó pa se nɔɔno de o tete sɔŋɔ tiina taa done daane.#Mika 7:6

37Wolo ná swoi o tete kwo de o nu se ko dwoni amo, konto tu wo yi se o taa ye amo nyem, ko woli de wolo maama na swoi o bia o dwoi amo to. 38Wolo maama ná wo sɛ se o tɔge amo kwaga se o na yaara ne wolo na zeŋe dagara o maa vei o toone tei to, konto tu wo yi se o taa ye amo nyem. 39Wolo nam na kwaane se o taa jege o tete ŋwea to wó ga-ka Wɛ tei ne. Ko daare wolo na gɛ o ŋwea amo ŋwaane to wó na ŋwea Wɛ tei ne.

40Wolo nam ná jeeri abam lanyerane, konto tu jeeri amo mo. Wolo maa ná jeeri amo, konto tu jeeri Baŋa Wɛ wolo na toŋe-ne to mo.#Jɔn 12:44 41Nɔɔno wolo maama ná jeeri Wɛ ni-jwoŋinu lanyerane, de Wɛ na toŋe‑o to ŋwaane, Wɛ wó pa konto tu de tɔge o na nyɔɔre ne o ni-jwoŋinu wom tei. Ko woli da, nɔɔno wolo ná jeeri nɔn-ŋom o nɔn-ŋonne dem ŋwaane, Wɛ wó pa konto tu tɔge o na nyɔɔre delo o na wó pa nɔn-ŋom wom to. 42A tɛ abam chega ŋwaane to, nɔɔno wolo ná nɛ amo nɔn-balaŋa dedoa, ye o ná pɛ‑o na-zura se o nyɔ o na ye amo tɔgeno to ŋwaane, konto tu wó tiini o na nyɔɔre Wɛ tei ne mo.”

Currently Selected:

Matiyu 10: xsmKBG

Highlight

Copy