Luka 22
22
Juu yiga tiina ke ni se ba go Yezu
Matiyu 26:1-5, 14-16; Maake 14:1-2, 10-11; Jɔn 11:45-53
1Ko déem daare fenfee yerane se Juu tiina bam di ba kuri delo yere na ye Atɔgebabaŋa to. Kuri dem konto ne ba yeini ba di bworobworo-memene selo na ba jege sabɔle ko wone to. 2Juu tiina kaanem yiga tiina bam de ba zamesem tiina bam maa kwaane ba lage chwoŋa se ba ja Yezu ba go. Ba nam yeiri ba na wó ke tei to, ba na kɔre foone de nɔɔna bam to ŋwaane.
3Setaane laam ma zo Judas bochare. Wonto yere dedwoŋi maa ye Yisakara, ye o ye Yezu nɔɔna fuga-balei bam wo dedoa mo. 4O ma vo Juu tiina kaanem yiga tiina bam, de Wɛ diga kam soja tiina dedɛɛra bam tei se ba bane ba nii o na wó ke tei o bere-ba chwoŋa se ba wane ba ja Yezu. 5Ba na nigi to, ba wo ma pwoli dedɛ. Ba ma ke ni-sɛɛm ded‑o we, ba wó pa‑o sabu. 6O ma sɛ. O laam maa lage chwoŋa se o ja Yezu o ke ba jeŋa ne ye nɔn-kɔgɔ tera.
Yezu di kuri wodiu de o kwaga tɔgena bam
Matiyu 26:17-29; Maake 14:12-25; Jɔn 13:21-30; 1 Korinti 11:23-25
7Ko ma ba ko yi dɛ delo ba na bobo se ba di Bworobworo-memene kuri dem to. Dɛ dem konto ne Juu tiina bam yeini ba goe pipeili mo ba ma di Atɔgebabaŋa kuri dem. 8Yezu ma le Piita de Jɔn ye o ta de-ba o we, “Véi-na á kwɛ woŋo maama á pa debam se dé ba dé di Atɔgebabaŋa kuri dem.”
9Ba ma bwei‑o ba we, “Nmo lage se dé vo jeiga kɔ mo se dé ke konto?” 10O ma leiri-ba o we, “Á ná vei á maa zoore teo kom wo, nɔɔno wodwoŋi wó jeeri abam o na zeŋe kɔɔro de na. Tɔge-na o kwaga á vo á zo sɔŋɔ kolo o na wó zo to. 11Á ná zoa, se á ta de sɔŋɔ kom tu we, ‘Dé Berem tu lage o bwei nmo o nii, veira diga kalo omo na wó jeini da de o kwaga tɔgena bam se ba di Atɔgebabaŋa kuri dem wodiu to wo yei ne mo?’ 12Á ná bwei‑o konto, o laam wó bere abam wɛyuu diga. Ka wó taa daga lanyerane, ye ka jege woŋo kolo maama dé na lage to ka wone. Véi-na á kwɛ kuri dem wonnu tem á ti se dé laam ba.”
13Ba ma zaŋe ba vo, ye ba na woŋo maama ne Yezu na maŋe o ta tei to. Ba ma kwɛ Atɔgebabaŋa kuri dem wodiu kom ba ti.#Nwoŋim 12:1–13:16
14Wodiiru dim maŋa na seene ka yi to, Yezu ma jeini de o totoŋa nakwa bam se ba di wodiu kom. 15O laam ma ta de-ba o we, “Amo ya tiini a lage se a di kuri dento de abam, se a laam daare a yaare a te. 16Amo nam tɛ abam we, amo daa bá di kuri dem konto se ko taa vei maŋa kam dé na wó di kuri dem chekke Wɛ paare dem wone to.”
17Yezu na tage konto o ti to, o laam ma jwoŋi zoŋa de ka wo sa-soŋo, ye o ke Wɛ lei ba ŋwaane. O ma ta de-ba o we, “Jwoŋi-na banto á nyɔ á daare á pa daane. 18Amo nam tɛ abam we, ko zege zem amo daa bá nyɔ sana banto se ko taa vei maŋa kam Wɛ paare dem na wó ba o nɔɔna baŋa to.”
19O laam ma kwei bworobworo ye o ke Wɛ lei ko ŋwaane. O ma daare o fɔ-ko o pa o tontoŋena bam ye o we, “Amo yera yam mo tento, amo na lage a kwei a pa abam to. Ta‑á ke-na konto dwoŋi se á ta‑á ma guli amo gula.”#Jɔn 6:51
20Ba na di ba ti to, o daa ma kwei zoŋa ye o ta ke konto dwoŋi, ye o we, “Zoŋa kam wo sana banto bere we Wɛ gwoni ni-doore dedaane nabiina mo amo jana bam ŋwaane.#Nwoŋim 24:8 Amo jana bam konto lage ba pwori se ko jwoŋi abam ko yage mo. 21Nam ta‑á nii-na, nɔɔno wolo na lage o yeigi amo o pa nɔɔna to tɔge o jei de amo o di ywo-seeni. 22Ko nam jege se Nabiin-bu wom vo o te ne Wɛ boboŋa na jaane tei to mo. Ko nam wó taa ye lɛɛro mo ko pa nɔɔno wolo na wó yeigi‑o o pa to.” 23Ba na nigi o na tage kolo to, ba ma bobo se ba taa bwei daane ba nii banto wone wɔ mo wó wane o ke konto.
24Ni-kantɔgɔ déem ma ba Yezu nɔɔna bam wone se ba nii banto wone wɔ mo ye kamunu nɔɔna tei ne o dwoi maama. 25Yezu ma ta de-ba o we, “Ko ná ye logo baŋa teene pwa mo, banto yeini ba jege ba nɔɔna ba bɛɛsa. Balo na di dam nɔɔna baŋa ne to, ba yeini ba bwoi-ba we ‘fɔgena’. 26Abam nam ba jege se á ta‑á ye konto dwoŋi. Wolo na ye nɔn-kamunu abam wone to jege se o ji ne á nyaane mo tei. Wolo de na ye abam yuu tu to jege se o ji ne á tontoŋeno mo tei. 27Ko ná ye wolo na jeini se o di wodiu to de wolo na kwei wodiu kom o tiŋi o pa‑o to, banto wɔ mo ye kamunu? Ko dae wolo na jeini o di to mo na? Ko nam ná ye amo, amo wo abam wone ye a ke nenɛɛne wolo na ye á tontoŋeno mo tei.#Jɔn 13:12-16
28Abam nam ye balo na tɔge de amo a cham maama wone ye á wo yage a kwaga. 29Amo wó pa se abam tɔge á di paare, ne amo Kwo Wɛ na pɛ se a di paare tei to. 30Konto to, á wó ba á zo amo woro kom wo ye á tɔge de amo á jeini á di ywoni dedɛ. Á wó ba á jeini paare yitunnu baŋa ne, se á ta‑á tei Isarele dwia fuga-yalei yam.”
Yezu wuuri o bere Piita na wó ve‑o tei to
Matiyu 26:31-35; Maake 14:27-31; Jɔn 13:36-38
31Yezu laam ma ta de Simon Piita o we, “Simon, Simon, setaana pɛ seene o na chwoŋa se o maŋe abam o nii, ne nɔɔno na kwei yɔlɔ o jege o maa zezɛ wonnu tei to. 32Amo nam lwoori Wɛ a pa nmo we, n ta wó ta‑n jege wo-dedoa de amo ye n bá‑n yage. Nmo nam ná tusi, ye n boboŋa ná jwoori ya tɔge amo, se n pa n nu-bia na dam se ba fɔge ba zege lanyerane.”
33Piita laam ma ta ded‑o o we, “Amo tu, ba ná lage ba ke amo de nmo peena diga ne, naa ba ná lage ba go debam de, amo ta bá sɛ se a jwoori nmo kwaga ne.” 34Yezu ma leiri‑o o we, “Piita, a tɛ nmo we, chebɛɔ daa ta ná wo keeri zem, nmo wó fo kuni betɔ we, n yeiri amo.”
35O laam ma ta de ba maama o we, “Amo ya na toŋe abam se á tole teene ye á ba jege sabia ganlɔgere, de tampɔgɔ, de natera to, á gɛ wonnu na?” Ba ma leiri ba we, “Aawo, de wo gɛ kolokolo.”
36O ma ta de-ba o we, “Ko daare leile konto, wolo ná jege sabia ganlɔgere, konto tu jege se o kwei-de o ja vo mo. Wolo de na jege tampɔgɔ to jege se o kwei-ko. Wolo maama ná ba jege se-zɔɔ, konto tu jege se o kwei o gɔrɔ mo o yeigi o ma yeigi se-zɔɔ. 37Amo nam tɛ abam we, kolo na popone Wɛ tɔnɔ kom ne amo ŋwaane to jege se ko ji chega amo tei ne de ko na we, ‘Nɔɔna pɛ o ye wɛ-lwɛɛna bam wone dedoa.’#Izaya 53:12 Kolo maama na popone Wɛ tɔnɔ kom ne amo ŋwaane to laam wó ji chega leile.”
38Yezu kwaga tɔgena bam ma ta ded‑o ba we, “Dé tu, nii se-zɔɔro telei mo dé jega.” O ma leiri-ba o we, “Yage-na se ko maŋe.”
Yezu tiini o lwoori o Kwo Wɛ
Matiyu 26:36-46; Maake 14:32-42
39Yezu déem ma nwoŋi teo kom wone o vo Olivi peo kom seeni, ne o na yeini o ke tei to. O kwaga tɔgena bam de ma tɔge‑o ba vo. 40Ba na yi jei selo ba na maa vei to, Yezu ma ta de-ba o we, “Ta‑á lwoori-na Wɛ se á yé to cham delo na wó soge á boboŋa to wone.”
41O laam ma fɔɔre ba tei ne o vo o zege dáa ne. O ma kuni dwoona o lwoori Wɛ o we, 42“Amo Kwo, nmo ná sɛ, se n pa cham delo na lage de ba amo baŋa ne to kɛ de daare-ne. Nam ke kolo na tɔge nmo boboŋa to, ye ko dae amo boboŋa na lage kolo to.”#Matiyu 6:10 43O na lwoori Wɛ konto to, Wɛ maleka ma nwoŋi telaao ne ka ba o tei ye ka woli‑o de dam. 44O wo na tiini ko chɔge dedɛ to ma pa se o tiini o lwoori Wɛ de o bochare maama. O luluŋu ma ji nenɛɛne jana mo tei ye ko lura tega ne.#Hiburu 5:7
45O na lwoori Wɛ o ti to, o ma zaŋe o jwoori o vo o kwaga tɔgena bam tei. O ma na we ba tigi ba dɔa wo-chechɔgɔ ŋwaane. 46O ma ta de-ba o we, “Bɛ mo ye á dɔa? Zaŋe-na se á ta‑á lwoori Wɛ, se á yé to cham delo na wó soge á boboŋa to wone.”
Ba jaane Yezu
Matiyu 26:47-56; Maake 14:43-50; Jɔn 18:2-11
47Yezu ta na wora o ŋɔɔne konto to, nɔn-kɔgɔ laam ma ba ko yi o tei. Judas wolo na ye o nɔɔna fuga-balei bam wo dedoa to ma tɔge ba yiga. O ma fɔɔre o yi Yezu tei se o kukwori‑o lanyerane. 48Yezu ma ta ded‑o o we, “Judas, n tu se n pa ba ja Nabiin-bu wom, ye n ta lage n kukwori-ne mo na?”
49Yezu tɔgena balo na wo o tei ne to ma na ko na lage ko ke‑o tei to. Ba ma bwei‑o ba we, “Dé Teiru, dé le dé se-zɔɔro tem dé ma zage-ba na?” 50Ba wo dedoa ma le o seo kom o ma zage kaanem yuu tu wom tontoŋeno jazem zwɛ o de tega ne. 51Yezu na nɛ konto to, o ma ta o we, ba yage! O ma vo o dwei nɔɔno wom zwɛ dem, ye de jwoori de kwɛ lanyerane.
52O ma daare o ta de Juu tiina kaanem yiga tiina bam, de ba nakwa bam, de Wɛ diga kam soja tiina dedɛɛra balo na tu se ba ja‑o to o we, “Abam na kwei seene de da-lwanno á ba se á ja amo to, amo ye ŋweeno mo na? 53Dɛ maama amo yeini a wo Wɛ wara-jei sem ne. Abam de tɔge á wora ye á wo kwaane se á ja-ne. Ko nam na ye tei to, maŋa kam laam yi se á ke á boboŋa na lage kolo to. Setaana pɛ maa pae se lim tei nɔɔna logo baŋa ne.”
Piita seene o ve Yezu
Matiyu 26:57-58, 67-75; Maake 14:53-54, 65-72; Jɔn 18:12-18, 25-27
54Ba laam ma zi Yezu ye ba ja‑o ba kɛ. Ba ma vo ba yi kaanem yuu tu wom sɔŋɔ. Piita ma dale o tɔge ba kwaga o da o vo. 55Ba ya tɔre mini mo ba tiŋi sɔŋɔ kom konkɔlɔ tetare ne. Nɔɔna bam ma vo ba jeini ba weeri mini dem. Piita de ma tɔge o vo o jeini ba wone. 56O na jei da mini dem pwooni yiga ne konto to, sɔŋɔ kom ka-nyaane wodwoŋi ma yɔɔre o nii o yibia ne ye o we, “Nɔɔno wonto de tɔge o wo Yezu tei ne mo.” 57Piita ma fo ye o we, “A nakɔ, a yeiri‑o.”
58Ko na ke fee to, nɔɔno wodwoŋi de daa ma na‑o, ye o we, “Nmo tɔge n ye ba kɔgɔ kom wo dedoa mo.” Piita ma leiri o we, “A nɔɔno, amo tɔge a dae.”
59Ko daa na ke fee nenɛɛne awa dedoa to, nɔɔno wodwoŋi de ma kwaane o ta o we, “Nɔɔno wonto seene o tɔge ded‑o. O de ye Galili tu mo.” 60Piita ma leiri‑o o we, “A nɔɔno, ta-yɔɔro mo n jege n ŋɔɔna.”
O ta na wora o ŋɔɔne konto to, chebɛɔ ma pɔpɔ ko keeri. 61Dé Teiru Yezu laam ma pipiri o nii Piita seeni. Piita ma guli Yezu ya na tage kolo ded‑o o we, “Chebɛɔ ta ná wo keeri zem, nmo wó fo kuni betɔ we n yeiri amo.” 62O na guli konto to, o laam ma nwoŋi ye o tiini o keeri lanyerane.
63Nɔɔna balo déem na yere Yezu to maa jege‑o ba ke ba mɔna ye ba kwori ba mage‑o. 64Ba ma kwei gɔrɔ ba pu o yia ye ba bwei‑o we, “Lɔre n bere debam wolo na mage‑m to.” 65Ba ta maa ŋɔɔne wonnu dwi dwi ba ma chɔge o yuu ye ba twe‑o dedɛ.
Ba ŋɔɔne Yezu taane
Matiyu 26:59-66; Maake 14:55-64; Jɔn 18:19-24
66Tega déem na tu ka poore to, Juu tiina nakwa kɔgɔ kom maama ma la daane, de ba kaanem yiga tiina bam, de ba zamesem tiina maama. Ba laam ma pa se Yezu nwoŋi o ba o zege ba yiga ne. 67Ba ma ta ded‑o ba we, “Nmo ná seene n ye Wɛ Dam Tu Krista wom, se n ta n bere debam.” Yezu ma leiri-ba o we, “Amo ya ná tage konto a bere abam, á ta bá sɛ amo ni. 68Amo daa ná bwei abam taane, abam bá sɛ se á leiri á pa-ne. 69Ko nam zege leile konto, Nabiin-bu wom wó vo o jeini Dam-fɔrɔ Tu Baŋa Wɛ jazem seeni.”
70Ba maama laam ma bwei‑o ba we, “Konto to, nmo nam seene n ye Wɛ Bu wom na?” Yezu ma leiri-ba o we, “Abam tete mo tɛ á we amo ye konto.”
71Ba laam ma ŋɔɔne o taane dem ba we, “Debam tete laam mo nigi o kwora kam na bere o tete chɔgem. Dé daa ba lage se nɔɔna zaŋe ba ŋɔɔne o taane dem.”
Currently Selected:
Luka 22: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
