Luka 19

Lampwoo laro Zakeya na ke tei to

1Yezu ma vo o zo Jeriko teo wo o tole o maa kɛa. 2Nɔɔno wodwoŋi mo wora teo kom ne, o yere mo Zakeya. O maa ye lampwoo lara yiga tu, ye o jejegero tem daga. 3O déem maa lage se o nii o lɔre Yezu na ye wolo to. O ma kwaane o ga, o na ye nɔn-kukula ye kɔgɔ kom daga to ŋwaane. 4O ma duri o kɛ kɔgɔ kom yiga o vo o di kaporo yuu se o kwaane o nii o na Yezu, o na lage o tɔge da to ŋwaane.

5Yezu ma vo o yi jei sem. O ma kwoni o yuu wɛɛne o nii, ye o we, “Zakeya, ke lela n tu tega, se zem amo jege se a ba a peini nmo sɔŋɔ ne mo.” 6Zakeya na nigi konto to, o ma ke lela o tu tega, ye o vo o jeeri Yezu lanyerane o sɔŋɔ ne de wopwolo.

7Nɔɔna bam na nɛ Yezu na ke tei to, ba maama maa poona ba we, “Ta‑á nii-na o na vei o zo nɔn-chechɔgɔ sɔŋɔ mo se o taa ye o veiru.”

8Zakeya laam ma zaŋe wɛɛne o ta de dé Teiru Yezu o we, “Amo Tu, nii amo na wó ke tei. Amo wó pɔɔre a jejegero tem chichworo mo a maŋe a pa yiniga tiina. Amo nam na pini wolo maama se a jwoŋi lampwoo dedɛ o tei ne to, amo wó jwoori a ŋwe kuni bena mo a pa kotu.” 9Yezu ma ta ded‑o o we, “Zem dɛ dem ne sɔŋɔ konto tiina nɛ ba verem, kolo ŋwaane nɔɔno wonto bere we o de tɔge o ye Abaraham dwi tu chekke. 10Nabiin-bu wom na tu logo baŋa to, ko ye se o beeri balo na jei to mo, se o daare o jwoŋi-ba o ke Wɛ jeŋa ne.”#Ezekeli 34:11-16

Nɔɔno de o tontoŋena memaŋe

Matiyu 25:14-30

11Nɔɔna bam ta na wora ba cheigi Yezu taane konto to, o daa ma maŋe memaŋe o bere-ba. O na tu o twɛ Jerusalem to, ba maa boŋe we Wɛ wó ke lela o pa o paare dem taa nae jaja nɔɔna tei ne. 12Konto ŋwaane o ma maŋe o bere-ba o we, “Nɔɔno wodwoŋi mo wora, o na nwoŋi nadum sɔŋɔ. Dɛ dedwe o ma zaŋe se o vo sa-teo yiga yiga se ba tiŋi‑o pɛ se o laam jwoori o ba. 13O ma bwoŋi o tontoŋena fuga ye o kwei sabu ywollu fuga#19:13 sabu ywollu fuga déem maŋe de nɔɔno bena yatɔ ŋweero. o pa-ba ye o we, ‘Kwei-na sabu kom á ta‑á maa pipia se ko taa vei maŋa kalo amo na wó jwoori to.’

14O teo kom tiina nam ba lage o ni taane kɔtaa. Ba ma toŋe nɔɔna se ba da o kwaga ba vo ba ta we, ba bá sɛ se nɔɔno wom taa ye ba pɛ. 15De ko de, ba ta tiŋi nɔɔno wom pɛ. O ma jwoori o tete teo kom. O laam ma pa ba bwoŋi o tontoŋena balo o ya na pɛ-ba sabu kom to se ba ba o tei ba bere‑o nyɔɔre delo ba na nɛ ko baŋa ne to. 16Boboa nɔɔno wom ma ba o ta ded‑o o we, ‘Amo tu, a kwei sabu ywolo nmo na pɛ-ne to a ma na ywollu fuga nyɔɔre a woli da.’ 17O tu wom ma leiri‑o o we, ‘Nmo ke chega ye n ta jege jawala de nmo na ke a boboŋa na lage tei to. Nmo na ke chega de wonnu fenfee amo na ke n jeŋa ne to, amo laam wó pa se n ta‑n tei teene fuga.’

18Balei tu wom ma ba o ta de o tu wom o we, ‘Amo tu, amo kwei sabu ywolo kom a ma na ywollu tenu nyɔɔre mo.’ 19O tu wom ma leiri‑o o we, ‘Amo laam wó pa se n ta‑n tei teene denu.’

20Ko daare tontoŋeno wodwoŋi de daa ma ba o ta ded‑o o we, ‘Amo tu, nam jwoori n jwoŋi nmo sabu ywolo kom. Amo kwei-ko mo a kukuli de gare-bu a tiŋi, 21a na yei we nmo ye keim-chɛ-nyeno ye a kɔre foone de nmo to ŋwaane. Nmo yeini n jwoŋi nyɔɔre wonnu telo nmo yera na wo chɛ te baŋa ne to, ne nɔɔno na zage mena yalo o tete na wo dugi to.’ 22O tu wom laam ma ta ded‑o o we, ‘Nmo ye tontoŋeno-balɔrɔ mo. Amo wó pa se n tete ni taane dem bere‑m we, n ba jege bora. Nmo na boŋe we amo ye keim-chɛ-nyeno ye a lage nyɔɔre delo na dae a totoŋa nyem to, 23ko ya maŋe se n kwei a sabu kom mo n pa sabu jenna. Nmo ya ná ke konto, amo ya wó jwoŋi-ko de nyɔɔre.’

24O laam ma ta de balo na zege da to o we, ‘Jwoŋi-na sabu ywolo kom o tei ne á pa wolo na nɛ ywollu fuga kam to.’ 25Ba ma ta ded‑o ba we, ‘Dé tu, wonto maŋe o jege ywollu fuga.’ 26O ma leiri o we, ‘A nam tɛ abam we, wolo maama ná maŋe o jege woŋo, o ta wó jwoŋi kodwoŋi o woli da. Wolo nam na maŋe o ba jege kolokolo to laam wó ba o ga kolo fenfee o ya na jege to mo. 27Ko daare ko ná ye balo na ba sɛ se a taa ye ba pɛ to, ja-ba-na á ba ywo-seeni, ye á go-ba amo tei ne.’ ”

Yezu zo Jerusalem teo wo

Matiyu 21:1-17; Maake 11:1-11, 15-19; Jɔn 12:12-19

28Yezu déem na tage wonnu tem konto maama o ti to, o ma zaŋe o kwei o chwoŋa o tɔge o nɔɔna bam yiga o maa vei Jerusalem. 29Ba ma vo ba yi te-balwa balei, ba yere mo Bɛtefage de Bɛtania. Jei sem konto wo peo kodwoŋi saŋa ne mo, ko yere mo Olivi peo. Yezu ma le nɔɔna balei o kwaga tɔgena bam wone, 30ye o ta o we, “Véi-na á vo á zo teo kolo na wo abam yiga ne to. Á ná zo ko wo, á wó na bona-pɔla na leigi da ye nɔɔn-nɔɔno daa ta wo diini ka baŋa. Véi-na á bwoli-ka á ja ba á pa-ne. 31Nɔɔno nam ná bwei abam o we, ‘Bɛ mo ye á bwoli-ka?’ se á ta ded‑o we, ‘Ko ye dé Teiru wom mo lage-ka.’ ”

32Nɔɔna balei bam o na toŋe to ma zaŋe ba vo se ba nii. Ba ma seene ba na we, ko ye ne o na tage tei to. 33Ba na wora ba bwoli bona-pɔla kam to, ka tiina ma bwei-ba ba we, “Bɛŋwaane mo á jege bonaga kam á bwola?” 34Ba ma leiri ba we, “Ko ye dé Teiru wom mo lage-ka.”

35Ba ma ja-ka ba ja vo Yezu tei. Ba laam ma le ba gwaaro ba kwei ba daŋe ka baŋa ne. Yezu ma di ka baŋa, 36ye o vei o maa kɛa. O na maa kɛ to, nɔɔna ma le ba gwaaro ba lware chwoŋa kam ni ne se o tɔge te baŋa o kɛ.

37Ko gɛ fenfee se o vo o yi Jerusalem. O ma da chwoŋa kalo na kwei ka tu Olivi peo kom seeni to. O kwaga kɔgɔ kom maama laam ma bobo se ba taa tei Wɛ de kwor-dɛa. Ba maa jege wopwolo de wo-kamunnu dedɛ o na ke ye ba na-te to, 38ye ba we:

“Baŋa Wɛ wó swɛ pɛ wolo na tu o yere ŋwaane to swolim.

Ywoni taa wo Wɛ telaao ne.

Baŋa Wɛ maŋe de tia wɛyuu ne.”#Lei 118:26

39 Farisi tiina badwonna na tɔge ba wo kɔgɔ kom wone to ma ta de Yezu ba we, “Berem tu, nam bwɛ n kwaga tɔgena bam se ba yé taa tɛ konto dwoŋi.” 40O ma leiri-ba o we, “Amo nam tɛ abam we, banto ná chem, kandwa yam tete wó laare de kwor-dɛa.”

41Yezu ma vo o twɛ Jerusalem. O na nɛ teo kom to, o ma keeri o pa-ko, 42ye o we, “Jerusalem tiina bam, á ya ná yei zem dɛ dem ne wonnu telo na wó pa se á ta‑á zoore de ywoni to, ko ya wó taa lana. Wo-laaro tem konto laam seigi abam tei ne. 43Ta‑á yei-na we maŋa wó ba, ye á dona wó ba ba gilimi á teo kom maama. Ba wó che ko nia yam maama pa se nɔɔn-nɔɔno daa yé wane o nwoŋi ko wone. 44Ba laam wó tiini ba chɔge teo kom, dedaane abam balo na zoore ko wone to. Ba ná ke ba ti, teo kom kandwɛ daa bá daare de dwoŋi baŋa ne. Ko ye abam na wo lɔre we maŋa kam yia se Wɛ ba o vere abam to ŋwaane mo wonnu tem konto maama lage te ke abam baŋa ne.”

45Yezu ma vo o zo Wɛ diga kam wo. O ma na balo na wora ba yeigi wonnu ba pa nɔɔna. O ma bobo se o zeili-ba pa se ba nwoŋi.#Matiyu 21:12-16 46O ma ta de-ba o we, “Ko popone Wɛ tɔnɔ kom ne we, ‘Ba wó taa bwoi amo sɔŋɔ kom we, wara-jei mo.’ Abam nam pɛ se ko ji ŋweena tigisim jei.”#Izaya 56:7; Jeremia 7:11

47Dɛ maama Yezu maa wo Wɛ diga kam ne ye o bere nɔɔna Wɛ chega kam. Ko daare Juu tiina kaanem yiga tiina, de ba zamesem tiina bam, de teo kom dedɛɛra bam maa kwaane se ba na chwoŋa ba go‑o. 48Ba maa yeiri ba na wó ke tei, kolo ŋwaane nɔɔna bam maama tiini ba cheigi o taane dem mo.

Currently Selected:

Luka 19: KBG

Highlight

Copy