Luka 17

Yezu bera yadwonna

Matiyu 18:6-7, 21-22; Maake 9:42

1Yezu déem ma ta de o kwaga tɔgena bam o we: “Wonnu telo na soge nɔɔna pa se ba tusi Wɛ chwoŋa wone to jege se te taa wora mo. Ko nam ná ye wolo na soge nɔɔna pa se ba tusi to, lɛɛro wo kotu tei ne. 2Ba ya ná jaane nɔɔno wom konto ye ba lei kandwɛ-kamunu o ba ne ba daare ba dole‑o ba yage naneo kom wone pa se o te, konto gare waarem delo o na wó na Wɛ tei ne de o na pɛ se Wɛ bu-balwa dedoa tusi to. 3Konto to, á ta‑á yei á tete.

Nmo nu-bu ná ke wɛleere, se n kaane‑o de o na ke kolo to. O nam ná sɛ ye o leiri o wo, se n yage n ma n chɛ‑o.#Matiyu 18:15 4O ná maŋe o ke lwarem o chɔge nmo wo kuni berepɛ dɛ wone, ye o ná jwoori o ba nmo tei kuni berepɛ ye o sɛ we o ke o chɔge, nmo ta jege se n ma n chɛ‑o mo.”

5Dé Teiru Yezu totoŋa nakwa bam ma ta ded‑o ba we, “Woli debam pa se dé tiini dé taa jege wo-dedoa de nmo.” 6Yezu ma leiri-ba o we, “Á ná jege wo-dedoa de amo, ye ko ná maŋe ko ye fenfee yerane se ko maŋe de tio-bu-memeeno tei de, á wó wane á tɔge ko ŋwaane á toŋe totoŋ-kamuna. Á wó wane á ta de kanyɔnɔ konto we, ko gɔ ko vo ko jeiri naneo kom wone, ye ko wó sɛ á ni.”

7Yezu daa ta ma ta o we, “Nmo wolo ná jege tontoŋeno, ye o ná wora o vare o pa nmo, naa o ná yere nmo pei gaao ne, ye wonto ná ti o totoŋa ye o ba o yi sɔŋɔ, nmo wó ta bɛ mo ded‑o? Nmo wó ta ded‑o we, o ba o jeini o di wodiu de nmo na? 8Aawo. Nmo nam wó ta ded‑o we, ‘Véi n ke wodiu se n laam kwɛ n tete n ja wodiu kom n ba n pa-ne se a di. Amo ná di a ti, se n laam vo n di n tete nyem.’ 9Nmo bá‑n ke n tontoŋeno wom lei de o na ke kolo nmo na pɛ‑o ni se o ke to. 10Ko ye bedwe mo de abam de. Abam ná ke kolo maama Wɛ na pɛ abam ni se á ke to, á jege se á ta we, ‘Debam maŋe dé ye tontoŋena mo, ye dé ba jwoŋi teem ko ŋwaane. Dé nam ke kolo na maŋe se dé ke to yerane.’ ”

Yezu yɔɔre naywanno fuga

11Yezu déem maa wo chwoŋa ne o maa vei Jerusalem. O ma da Samaria de Galili tetare laŋa o maa kɛa. 12O ma vo se o zo teo kodwoŋi. O na lage o zo ko wo to mo naywanno fuga jeeri‑o chwoŋa ne. Ba ma zege yiga yiga, 13ye ba laare de kwor-dɛa ba we, “Debam tu Yezu, popo duri debam yiniga.” 14Yezu na nɛ-ba to, o ma ta de-ba o we, “Véi-na Wɛ kaanem tiina tei se á pa ba nii á yera yam.”

O na tage konto ye ba maa vei to mo ba yera yam fɔge ya kwɛ fase. 15Ba wo dedoa na nɛ we o jaweo kom jei to, o ma pipiri o jwoori Yezu tei ye o tiini o tei Wɛ de kwor-dɛa. 16O ma vo o to Yezu yiga ne ye o ke o lei. Wolo na ke konto to ye Samaria teo nɔɔno mo. 17Yezu ma bwei o we, “Ko dae nɔɔna fuga kam maama yera yam mo fɔge ya kwɛ na? Nogo kom nam bɛ? 18Ba wolowolo wo jwoori o ba se o ke Wɛ lei, ko ná dae dwi-gɛ tu wonto yerane na?” 19O laam ma ta de nɔɔno wom o we, “Nmo na ke n wo-dedoa de amo tei to mo pɛ se n na yazura. Nam zaŋe n viiri.”

Wɛ paare dem na wó ba nɔɔna baŋa tei to

Matiyu 24:23-28, 36-41

20 Farisi tiina déem ma bwei Yezu se ba lɔre maŋa kalo Wɛ na wó di paare o nɔɔna baŋa ne to. O ma leiri-ba o we, “Wɛ paare dem maŋa kam ná yia, á bá wane á ma á yia á lɔre de ni ne. 21Nɔɔna bá ta we, ‘Nii-na ywo-seeni’, naa ba we, ‘Nii jei sento ne’, kolo ŋwaane Wɛ paare dem maŋe de wo abam wone.”

22Yezu ma ta de o kwaga tɔgena bam o we, “Maŋa wó ba ye á tiini á lage se á na da yalo Nabiin-bu wom na wó ba o veere o tete to, ko ná maŋe ko ye ya da dedoa de. Á nam bá na. 23Kanto maŋa kam ne, nɔɔna wó ta de abam ba we, ‘Nii-na! O wo ywo-seeni.’ Á nam yé sɛ ba taane se á vo á nii. 24Kokuri dɛ dem amo Nabiin-bu wom na lage a ba to ná yia, ko wó taa nye de doa na pepele wɛyuu ka lɛɛne ka pae pwooni logo baŋa jei maama ne tei to mo. 25Da-yiga ye konto ta wo ke to, ko fe mo se amo Nabiin-bu wom na yaara dedɛ ye zem nɔɔna bam chuli-ne. 26Amo Nabiin-bu wom na wó ba maŋa kalo to wó taa ye nenɛɛne ko déem na ke Noah da yam ne tei to. 27Kanto maŋa kam ne nɔɔna déem wora yɔɔ yerane mo. Ba maa di ba wodiiru, ye ba daare ba di kaana, ye kaana de maa zoore banna, se ko vo ko yi dɛ dem Noah na zo nabwor-kamunu kom wo to. Na-fɔrɔ laam ma ba ba wɛɛle ba lini logo kom ba chɔge nɔɔna bam maama.#Pulim 7:23

28Maŋa kalo Lot déem na wora to, ko de maŋe ko ye konto mo. Nɔɔna déem wora ba di ba wodiiru, ye ba daare ba ke pipiu, ye ba vara, ye ba lɔ sam. 29Ko ma ba ko yi dɛ dem Lot na duri o nwoŋi Sodom ne to. Dɛ dem konto ne, mini de chilibugu ma nwoŋi wɛyuu ne te to tega ne te chɔge teo kom nɔɔna bam maama.#Pulim 19:24

30Dɛ dem Nabiin-bu wom na wó ba o veere o tete nabiina tetare ne to wó pɔpɔ de ba nɔɔna baŋa konto dwoŋi mo. 31Dɛ dem konto ne, nɔɔno wolo ná wo nayuu ne ye o wonnu ná wo diga wone, konto tu yé tu o zege se o kwei o wonnu tem o ja duri. Nɔɔno wolo nam ná wo kara ne, se kotu daa yé jwoori sɔŋɔ. 32Guli-na ko déem na ke Lot kaane wom tei to.#Pulim 19:26 33Wolo maama ná lage se o taa jege o tete ŋwea, konto tu wó ga-ka mo. Wolo maama nam ná sɛ se o ga o ŋwea, konto tu wó na ŋwea Wɛ tei ne.

34A tɛ abam we, tete dem konto ne nɔɔna balei ná peini diga dedoa wone, Wɛ wó chaale ba dedoa o daare wodwoŋi wom. 35Kaana balei de ná tɔge daane ba choe muni, Wɛ wó chaale ba dedoa o daare wodwoŋi wom. [36Nɔɔna balei de ná wo kara ne ba toŋa, Wɛ wó chaale ba dedoa o daare wodwoŋi wom.]#17:36 wo popone ko tiŋi tɔn-dwonnu tem maama ne.”

37Yezu na tage konto to, ba ma bwei‑o ba we, “Debam Teiru, ko nam wó ke yei ne mo?” O ma leiri-ba o we, “Nɔɔna maama wó taa yei ko ni ne, nenɛɛne wo-teko na wo mɛ ye duura de jege se ba taa wora to.”

Currently Selected:

Luka 17: KBG

Highlight

Copy