Luka 11

Wɛ-lworo taane

Matiyu 6:9-15; 7:7-11

1Dɛ dedwe mo Yezu déem vei jei sedwoŋi se o ware Wɛ. O na ware Wɛ o ti to, o kwaga tɔgena bam dedoa ma ta ded‑o o we, “Debam Teiru, bere debam dé na wó ke tei se dé taa ware Wɛ, ne Jɔn de na bere o tɔgena bam se ba taa ke tei to.”

2Yezu ma ta de-ba o we, “Abam ná lage á ware Wɛ, se á ta tento dwoŋi:

‘Debam Kwo,

nmo yere dem maŋe de tia mo.

Nmo paare dem de ma maŋe

se de ba de jeini de dam.

3Ta‑n pae debam wodiiru dɛ dɛ se te maŋe debam.

4Yage dé wɛleera n ma n chɛ debam,

se debam de yeini dé ma chɛ wolo maama

na ke o chɔge debam yiga to mo.

Yé pa se dé na cham delo na wó maŋe dé boboŋa to.’ ”#1 Korinti 10:13

5Yezu daa ma ta de o tɔgena bam o we, “Wɛ-lworo nye de nmo na jege n badwoŋi n ke tei. Nmo ma‑n zaŋe tete kokoro ne n vo o tei n ta ded‑o we, ‘A badwoŋi, popo a lwoori‑m se n pa-ne bworobwooru tetɔ, 6se veiru mo nwoŋi yiga yiga o ba amo tei, ye a ba jege kolokolo se a pa‑o se o di.’ 7Nmo badwoŋi wom maa zege diga kam wone o ta de nmo o we, ‘Yé ta‑n jege-ne n daana, se manchwo-peena yam pe ye amo de a bia maama tigi dé dɔa. Amo bá wane a zaŋe a woli‑m.’

8Tɔ. N badwoŋi wom wó wane o ta konto dwoŋi na? Dɛ delo á badwoŋo kom bá pa o sɛ o zaŋe o pa nmo wodiu kom. Nmo nam ná zege da taa n lwoori‑o de baare, o laam wó sɛ o zaŋe o pa nmo kolo maama n na lage to.

9Mo kokuri, ta‑á lwoori-na Wɛ, se á wó na kolo á na lage to. Beeri-na kolo á na lage to, se á wó na. Ta ta‑á dɔne-na manchwo-peena yam, se ba wó pore ba pa abam. 10Kolo ŋwaane, wolo maama na lwoori Wɛ se o pa‑o woŋo to wó jwoŋi. Wolo maama na beeri woŋo to wó na-ko. Ba wó pore ba pa wolo maama na dɔne manchwo-peena yam to.

11Abam wolo ná jege bu, ye o ná lwoori‑m se n pa‑o ywoni, nmo wó sɛ n pa‑o basankwea na? 12O ná lwoori chechare nmo tei ne, nmo wó sɛ n kwei nɔŋɔ n pa‑o na? 13Aawo. Abam wo ba lana ye á ta yei se á ta‑á pae á bia wo-laaro telo ba na lage to. Ko daare á Kwo Wɛ na gare abam to, wonto nam bá kwei o Sin-laao kom o pa balo na lwoori‑o to mo na?”

Wɔ dam mo Yezu mae o zeili setaana?

Matiyu 12:22-30, 43-45; Maake 3:20-27

14Dɛ dedoa mo Yezu déem zeili setaane nɔɔno wodwoŋi tei ne. Setaane dem ya pɛ se nɔɔno wom ji memaa mo. De na yage o yera to, o laam maa ŋɔɔna. Ko ma so nɔn-kɔgɔ kom lanyerane. 15Nɔɔna badaara nam na nɛ to, ba maa we, “O na wae o zeili setaana to, ko ye setaana pɛ Bɛlzabula dam ŋwaane mo.” 16Ba badaara maa kwaane ba maŋe o dam ba nii, ye ba we o jege se o ke wo-kenkagele delo na wó bere-ba we o seene o nwoŋi Wɛ tei to mo.

17Yezu ma lɔre ba boboŋa na ye tei to. O ma ta de-ba o we, “Teo kolo maama paare ná pɔɔre belei pa ba jege daane, ko bá dáane ye ko chɔge. Sɔŋɔ kolo maama ná pɔɔre ko tete wone, ko jege se ko to mo. 18Setaana pɛ dam dem ná seene de pɔɔre belei, o paare dem bá dáane ye de chɔge. Abam na tɛ we ko ye Bɛlzabula dam ŋwaane mo a wae a zeili setaana to mo pɛ a ta konto dwoŋi. 19Ko ná seene ko ye amo tɔge Bɛlzabula dam ŋwaane mo a maa zeili setaana, abam nɔɔna bam de nam mae dam dem konto mo ba maa zeili-ya na? Abam tete nɔɔna bam na ke tei to mo bere we chega tera á tei ne. 20Ko nam na ye tei to, ko ye Wɛ tete dam ŋwaane mo a wae setaana a zeila. Konto maa bere we Wɛ maŋe o ba abam tei se o di paare o nɔɔna baŋa ne.

21Setaana pɛ nam nye de nɔn-babea na jege taŋa de chena o maa nii o sɔŋɔ tei to. O ta ná zege da konto, o jejegero tem bá jei. 22Nɔɔno wodwoŋi nam ná tua, ye o dam ná dwoi nɔn-babea kam, konto tu wó ja nɔn-babea kam o mage‑o o wane. O laam wó vere o jara zela yam, o ya na daŋe o teena ya baŋa ne to. O laam wó wane o wonnu tem maama o kwaleme ye o maŋe-te o pa nɔɔna.

23Nɔɔno wolo maama nam na ba zege amo kwaga ne to ye amo dono mo. Nɔɔno wolo maama nam na ba tɔge o lae amo wonnu o pa-ne to boŋe se o jage-te o yage mo.

24Setaane ná nwoŋi nɔɔno tei ne, o laam wó vo o beeri mɛ seeni na ye te-kora to se o lage jei o sii da. O ma beeri o ga. O laam maa we, ‘A jege se a jwoori a vo a na nwoŋi mɛ to mo a taa wora.’ 25O ma jwoori o vo nɔɔno wom tei, ye o lɔre we o jei sem fɔge se kwɛ lanyerane. 26O laam ma jwoori o vo o lage o dwonna barepɛ balo na maŋe ba ye puseŋ-nyena ba dwoi o tete to. Ba ma tɔge daane ba vo ba zoore da. Ko maama laam na kweeli tei to ye lɛɛro mo wó taa jege nɔɔno wom konto se ko dwoni o boboa kam na maŋe ka ye tei to.”

27Yezu na zege o ŋɔɔne konto to, kaane wodwoŋi na tɔge o wo kɔgɔ kom wone to ma ta baŋa baŋa o we, “Kaane wolo na loge‑m ye n ŋɔge o yele to mo ye yu-ywoŋo tu.” 28Yezu ma leiri o we, “Se balo na ni Wɛ kwora kam ye ba sɛ o ni to mo jege yu-ywoŋo ko ja gaale.”#Jemsi 1:22-25

Balo na ve Wɛ chega kam to wó na bora na?

Matiyu 12:38-42; Maake 8:12

29Nɔn-kɔgɔ kom ma tiini ko peene daane. Yezu daa ma ta o we, “Zem nɔɔna ye nɔn-balwaaro mo. Ba lage se a ke wo-kenkagele mo a bere-ba se ko taa ye maana ko pa-ba. Ba nam bá na, ko ná dae wo-kenkagele delo na maŋe de ke Jonah baŋa ne faŋa faŋa to. 30Wonto déem bere Wɛ dam Ninevɛ tiina tei ne se ko taa ye maana ko pa-ba. Amo wolo na ye Nabiin-bu wom to de wó ji maanem zem nɔɔna bam tei ne, ne ko déem na ke Jonah tei to.#Jonah 1:17 31Wɛ borem dɛ dem ná yia, ka-pɛ wolo déem na tei Seba faŋa faŋa to wó zaŋe o bere we abam ba jege chega. Wonto déem zaŋe o tete teo kolo na tiini ko ye yiga yiga to ne o ba Pɛ Solomon tei se o cheigi o swa yam na ye tei to. Wolo nam na dwoi Solomon to wo abam tei ne ye á yiga tera ded‑o. 32Ninevɛ tiina de wó zaŋe dɛ dem konto ne ba bere we abam ba jege chega, kolo ŋwaane Jonah na vei ba tei o bere-ba Wɛ chega kam to, ba leiri ba wo. Wolo na dwoi Jonah to nam wo abam tei ne ye á wo sɛ konto tu.#Jonah 3:5

Wɛ chega kam pae debam pwooni

Matiyu 5:15; 6:22-23

33Nɔɔno ná jege kanea, o bá sɛ o tɔre-ka o zege gugworo wone, naa o pu-ka zoŋa kuri ne. O nam wó kwei-ka o pale wɛɛne mo, se balo na zo diga kam wo to taa nae pwooni dem. 34Nmo yia mo pae se n yera jege pwooni. Konto to, nmo yia ná lana, ko pae se n ŋwea maama taa tɔge pwooni mo. Ya nam ná ba lae, ko pae se n ŋwea maama wo lim wone. 35Konto ŋwaane ta‑n yei n tete, se n pa pwooni dem seene de taa wo n tei ne, ye ko dae lim yerane. 36Konto to, pwooni yerane ná wo n tei ne, ye lim tera de fenfee de, nmo ŋwea maama wó taa jege pwooni chekke, ko maŋe de kanea na pae se pwooni wo n tei ne tei to.”

Lɛɛro wó yi Farisi tiina de ba dwonna

Matiyu 23:1-36; Maake 12:38-40; Luka 20:45-47

37Yezu déem na ŋɔɔne wonnu tem konto o ti to, Farisi tu dedoa ma bwoŋi‑o se o da o vo o sɔŋɔ o di wodiu. O ma vo o zo sɔŋɔ kom o jeini se o di. 38Farisi tu wom ma na we Yezu wo sane o jea se ko tɔge ba chullu tem chwoŋa. Ko ma so‑o. 39Dé Teiru Yezu ma ta ded‑o o we, “Nii mo! Abam Farisi tiina ná lage á di wodiu, á yeini á tɔge á chullu tem á fɔge á se á zwe de á kabeili, ko ná maŋe ko ye se kwɛ sem de. Ko daare abam tete nam su de digiru. Á ye kampin-nyena ye á tɔge wo-zɔɔna kikia. 40Abam ye jworru mo. Wɛ nam wo ke woŋo maama kwaga de ko yiga na? 41Á nam jege se á kwei wodiiru telo á na jege á zwe sem wone to á maŋe á pa yiniga tiina. Á ná ke konto, á woŋo maama bá taa jege digiru.

42Abam Farisi tiina bam, lɛɛro yi abam. Ko ná ye dwoa wo-sworru dwi maama, te ná maŋe te ye memeeno tei, á yeini á pɔɔre Wɛ-teiri á le á pa‑o. Ko lana. Ko daare abam yiga tera de chega tɔgem de Wɛ swono. Ko ya maŋe se á ta‑á tɔge keim-laaro tem konto maama, se á yé yage tedaara.

43Abam Farisi tiina bam, lɛɛro yi abam. Á ná zo á jeerim di sem, á lage jei-kamunnu mo se á jeini yiga ne. Á ná vei yaga, á lage se nɔɔna maama taa tui ba zuli abam.

44Lɛɛro yi abam! Á nye de yibeela yalo na saare ya daare tega, pa se nɔɔna tɔge ya baŋa ba kɛ ye ba ta yeiri ya ni ne to mo.”

45Wɛ nia yam zamesem tu dedoa laam ma zaŋe o ta de Yezu o we, “Berem tu, nmo na jege wonnu telo n ŋɔɔne to pa se n twe debam de mo.” 46Yezu ma leiri o we, “Abam balo na ye Wɛ nia yam zamesem tiina to, lɛɛro yi abam. Abam yeini á daane nɔɔna de wo-chɛɛro se ba taa tɔga. Ko maa nye de á na pa ba zeŋe zela yalo dum na dwoi ba zeŋem to, ye abam tete ba sɛ se á twori zela yam fenfee de á zeiŋi.

47Lɛɛro yi abam! Abam yeini á fɔge á ke faŋa faŋa Wɛ sampwori sem yibeela. Ko nam ye á nabaara mo go-ba. 48Á kikia yam bere we á sɛ keim-lwanno telo á nabaara bam na ke to. Banto déem go Wɛ sampwori sem, ye abam tete laam fɔge á kwɛ ba yibeela yam. 49Abam na tɔge á kwoa kikia konto to, Wɛ dɛ o swa ŋwaane ye o we, ‘Amo wó toŋe a sampwori de a tontoŋena ba tei ne. Ba maa wó ja ba badaara ba go, ye ba pa ba badaara na yaara.’ 50Konto ŋwaane Wɛ waarem dem wó ba á baŋa, ne ko ye abam tete mo go Wɛ sampwori selo maama ba na go boboa ne se ko ba ko yi zem to. 51Konto maa zege Abel ne, se ko ba ko woli de Zekaria wolo ba na go Wɛ kaanem bimbini dem de o tete diga kam tetare laŋa ne to. A tɛ abam chega ŋwaane to, keim-lwanno tem konto maama wó taa wo zem nɔɔna bam yuu ne.

52Wɛ nia yam zamesem tiina bam, lɛɛro yi abam. Á yeini á che nɔɔna se ba yé jwoŋi yeino chekke. Abam tete wo sɛ se á jwoŋi-ko, ye á daare á wo pɛ balo na lage ba jwoŋi-ko to chwoŋa se ba jwoŋi.”

53Yezu laam ma yage jei sem konto ye o viiri. Wɛ nia zamesem tiina bam de Farisi tiina bam maa ba lage o ni taane kɔtaa. Ba maa daane‑o ye ba bwei‑o wonnu dedɛ. 54Ba maa lage se ba pa o ŋɔɔne o tusi se ba wane ba da ko ŋwaane ba ja‑o.#Matiyu 22:15; Luka 20:20

Currently Selected:

Luka 11: KBG

Highlight

Copy