Joweli 2
2
Kayere kɔgɔ na bere Baŋa Wɛ dɛ-kamunu kom tei to
1Zaŋe-na á wu tigura nabɔnɔ kom,
se ko sɔɔ kom zaŋe Wɛ tete peo Zion yuu ne.
Ko ye se foone tiini de ja balo maama na zoore tega kam baŋa ne to,
kokuri to, Baŋa Wɛ dɛ-kamunu kom lage de yi lela mo.
De tiini de bwola dedɛ.
2Dento dɛ dem wó taa ye lim yerane mo.
Kunkwonnu tem wó zwori
te li tega kam maama!
Kokuri to, nɔn-kɔgɔ dedɛ mo maa beena,
ye ba kwoli zwonnu laŋa kam maama.
Ko zege faŋa faŋa, lɛɛro konto dwoŋi ta wo yi logo kom,
ye ko dwoŋi de nam ta bá fɔge ko ke.
3Ba nye de min-vogo na di yiga de kwaga maama tei to mo.
Ba yiga ne to, tega kam nye de Eden telaao kom mo.
Ba kwaga seeni to, ka maa nye de kagoa wo kasolo kom.
Kolokolo bá wane ko lu ba tei ne.
4Ba ta nye de sisein-nɔɔna mo,
ye ba yɔɔre ba duri lela,
nenɛɛne sisei selo ba na ma ba ke jara to.
5Ba na diini peero tem yupara to,
ba tiini ba duri dedɛ.
Ba sɔɔ kom nye de sisei-torokooro sɔɔ mo.
Ba nɛ sem na dɔne tei to
nye de mini na yeini de zwɛ ga-korro
pa ko dɔne tei to mo.
Ba ta saŋe da-kwaga mo
nenɛɛne jar-keira na lage se ba ke jara tei.
6Nɔɔna dwi maama ná nɛ-ba,
foone mo yeini de tiini de zo-ba,
ye ba yiga maama nyɔne!
7Nɔɔna bam ná yi mɛ maama,
ba yeini ba yɔɔre yiga kam mo
nenɛɛne bembɛ na kwaare jara tei to.
Ba ta wae ba faŋe ba gaale kabiri sem
ba zoore teene dem ba jaana.
Ba maama tɔge ba chwoŋa mo,
ye ba ba fɔge ba ywori ba daare-ka.
8Ba ba yeini ba peene daane.
Nɔɔno maama tɔge o chwoŋa mo.
Kolokolo ware ba yiga se ko che,
ko ná maŋe ko ye chichwoa de chena maama de.
9Ba ná yi teo kolo maama,
ba wó meeli-ko mo,
ye ba dɔɔle ko kabiri sem baŋa ne.
Ba maa yeini ba ŋɔ ba zo ko di sem wone,
nenɛɛne ŋweena na ke tei to.
10Tega kam baŋa maa ziziŋi ba yiga ne.
Wɛyuu kom de maa sua.
Wea kam de chana kam maama ma ji lim.
Chalechwe sem pwooni de daa maa tera.
11 Baŋa Wɛ di o jar-keira bam yiga.
O kwora kam maa tiini ka zaŋa de baare!
Ko ná ye kɔ-fɔrɔ kolo na tɔge o kwaga ye ba sɛ o ni to,
n bá‑n wane n jeeli n lɔre ba ni.
Baŋa Wɛ dɛ-kamunu kom jege foone dedɛ!
Wɔ mo wó wane o zege de wone?#Malaki 3:2
Leiri-na á bochara yam
12 Baŋa Wɛ nam tage tento mo o we:
“De konto maama, maŋa ta wo kɛ.
Jwoori-na á ba amo tei ne dedaane á wo maama.
Ta‑á vɔ-na á nia ye á keera,
se á ba amo yiga ne de á wo-chechɔgɔ.
13Pa-na se á wom tem seene te chɔge,
ye ko dae á na vaŋe á gwaaro á kaare kaare tei to yerane.”
Jwoori-na á Tu Baŋa Wɛ wom tei,
kokuri to o zaane dem gaale,
ye o jege nɔɔna yibwona.
O maa yeini o peene o bane,
ye o swono gaale.
O ba swoi se o taa toŋe waarem nɔɔna baŋa ne.
14Wɔ mo wó wane o lɔre?
Dɛ delo abam Tu Baŋa Wɛ wom wó leiri o boboŋa,
se o daare o duri abam ŋwaŋa,
ye o ke zaane á yuu ne.
Abam laam maa wó neene de wodiiru dedaane sana,
se á ma‑á ke kaanem á pa Baŋa Wɛ.#Nia Gulim 4:30
15Wu-na nabɔnɔ kom Zion peo kom yuu ne.
Ta-na se nɔɔna bam jeeri ba vɔ ni Wɛ ŋwaane!
Bwoŋi-na ba maama se ba la daane ba zuli Wɛ.
16Pa-na se á kɔgɔ kom maama kwɛ ba tete Wɛ ŋwaane,
se ba daare ba jeeri Wɛ yiga ne.
Bwoŋi-na nɔn-kwe se ba nwoŋi ba ba,
ko ta woli de bia de bu-sese selo ta na ŋɔge ba niina yela to de.
Baaro de kaane wolo na zo daane leile to de wó yage ba bwoŋ-yeila dim mo,
ye ba daare ba nwoŋi ba di sem ne
ye ba da ba jeeri dáane.
17Se ko ná ye kaanem tiina bam na toŋe ba pae Baŋa Wɛ to,
banto ye se ba zo Wɛ diga kam ne mo.
Ba laam maa wó taa zege diga kam ni dem dedaane kaanem bimbini dem tetare laŋa ne mo,
ba keera ye ba lwoori Wɛ ba we:
“Amo Tu Baŋa Wɛ, duri n nɔɔna bam ŋwaŋa se n yé waare-ba.
Yé sɛ se dwi-gɛ tiina bam taa jege n nɔɔna bam ba twea,
ye ba mɔne-ba se ba taa tɛ ba we, ‘Abam Wɛ dem nam bɛ?’ ”
Baŋa Wɛ jwoori o ke zaane ba yuu ne
18 Baŋa Wɛ nam bere we o yiga wo o tega kam wone mo.
O ma duri o nɔɔna bam ŋwaŋa.
19O ma leiri-ba o ta o we,
“A lage a pa á na wodiiru mo, de sa-ywoŋo, dedaane nuga.
Abam laam ma‑á wó di á boboŋa á su.
Amo daa bá sɛ se dwi-gɛ tiina bam taa ke abam ba mɔna.
20Ko ná ye nɔn-kɔgɔ kolo na nwoŋi baŋa seeni ko ba á baŋa ne to,
amo wó zeili-ba a ja vo a yage kagoa yuu ne,
se ba daa yé daane abam.
A lage a kale balo na wo kɔgɔ kom yiga ne ba maa vei to
a ja vo se ba to Yɛ naneo kom#2:20 Yɛ naneo kom = The Dead Sea wone mo.
Ko ta ná ye balo na maŋe kwaga ne ba vei to,
a lage a ja-ba a vo se ba to Mediterania naneo kom ne mo.
Ba kɔgɔ kom laam maa wó pɔ,
se ba lwom taa zaŋe jei maama ne.”
Baŋa Wɛ seene o toŋe wo-kenkagela!
21Tega kam yé taa kɔre foone
se ka daare ka taa chake de wopwolo.
Chega to, Baŋa Wɛ seene o toŋe wo-kenkagela!
22Kago-vara bam de yé taa kɔre foone,
kokuri pwola kam maama su mo dedaane ga-lɛɛro.
Teeni dem de maa lei bia zwase!
Mɔɔro dedaane Vini tio-bia wora mo yɔɔ!
23Zion tiina bam, ta‑á jege-na wopwolo!
Ta‑á di-na ywoni dedaane Baŋa Wɛ na ke kolo o pa abam to.
Kokuri, wonto mo tɔge o zaane dem baŋa ne
o pa se doa taa nena dedɛ ka pa abam.
O ma pa abam duum doa, de faao ni doa kam de
se ko maŋe dedaane o ya na yeini o ke tei to mo.
24Mena ferem jei sem lage se su dedaane wodiiru mo,
se sana de nuga de taa daga se gaale.
Baŋa Wɛ mo we:
25“A nam wó jwoori a ŋwe á wodiiru telo kayere sem ya na chɔge
bena yalo wone se kɔgɔ de kɔgɔ na tu abam baŋa ne to.
Ko ye amo mo déem toŋe-se abam tetare ne,
ne jar-keira tei.
26Abam laam wó ta‑á di á sui,
á wodiiru na wó gaale to ŋwaane.
Abam laam maa wó seini á Tu Baŋa Wɛ wom yere,
de amo na toŋe wo-kenkagela a pa abam tei to.
Amo nɔɔna bam daa bá di ba chaveera.
27Abam Isarele tiina bam laam wó lɔre we amo mo wo abam tetare ne.
Amo mo ye abam Tu Baŋa Wɛ wom,
ye wɛ dedwoŋi daa tera se de dwoni de amo.
Chega to, a nɔɔna bam daa bá di ba chaveera.”
Baŋa Wɛ dɛ-kamunu kom taane
28“Ko maama kwaga ne,
amo wó lwo a Jworo nabiina maama baŋa ne.
Konto nam wó pa se á bu-baara de á bukwa taa pworisi amo kwora kam,
se á nɔn-kwe de dwɛ dendwea amo ŋwaane,
ko daare se abam nɔn-donno na wo-kenkagela yalo a na wó veere a bere-ba to.#Izaya 32:15; Kikia 2:17-21
29Chega to, da yam konto ne a lage a lwo a Jworo mo a tontoŋena baŋa ne,
baara de kaana de.
30Amo ta wó pa se wo-kenkagela taa nae wɛyuu ne
dedaane tega baŋa ne.
Kanto maŋa kam ne jana wó taa wora, de mini,
de nyoa kalo na tiini ka zwora to.
31Wea kam wó ba ka vaŋe ka li lim,
ye chana kam de ji nasoŋo ne jana tei.
Ko laam daare se Baŋa Wɛ dɛ-kamunu kom ba ko yi,
se o nenɔŋa kam de bere jaja.
32Dɛ dem konto ne,
wolo maama na wó bwoŋi Baŋa Wɛ yere
o ma lwoori zeinim to wó na verem.
Zion peo kom yuu ne de Jerusalem teo kom maama wone mo
nɔɔna badaara wó lu cham dem wone,
ne Baŋa Wɛ na maŋe o ta tei to.
Ko ná ye balo na wó wori to,
balo Baŋa Wɛ na bwoŋi se ba taa ye o nyem to
wó taa wo ba wone.”
Currently Selected:
Joweli 2: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
