Jɔn 8

1Ko daare Yezu déem ma vo o di Olivi peo kom yuu.#8:1 Jɔn 7:53–8:11 wo popone ko tiŋi tɔn-dwonnu tem maama wone.

Kaane wolo na ke kabwoŋa to taane

2Tega na poore tetete to, Yezu ma jwoori o vo o zo Wɛ diga kam. Nɔn-kɔgɔ kom maama ma ba ko gilimi‑o. O ma jeini tega ne o wora o bere-ba. 3Wɛ nia zamesem tiina bam de Farisi tiina bam ma ja kaane wolo ba na peere‑o bwoorim baŋa ne to ba ba ba zege ba maama yiga ne. 4Ba ma ta de Yezu ba we, “Berem tu, debam peere kaane wonto bwoorim baŋa ne mo. 5Moses na tiŋi Wɛ nia yam o pa debam to, o pɛ debam ni se, kaane ná ke keim dento dwoŋi, se dé dole‑o dé go.#Nia Gulim 22:22-24 Ko nam ná ye nmo, n we dé ke tɛ mo?” 6Ba na bwei‑o konto to, ba lage se ba maŋe Yezu mo ba nii, ba wó wane ba ja‑o na, se ba laam saŋe‑o.

Yezu ma tiiri o ma o noa o la tega ne. 7Ba maa zege da ba tiini ba bwei‑o taane dem. O laam ma kwoni wɛɛne ye o ta-ba o we, “Abam wolo na wo ke wɛleere to wae o tɔge yiga o kwei kandwɛ o ma dole kaane wom.” 8O laam ma jwoori o tiiri ye o wora o la tega kam de o noa.

9Ba na nigi o na tage tei to, ba nakwa bam mo dɛ yiga ba nwoŋi dedoa dedoa ba viiri. Ba maama ma nwoŋi ba daare Yezu yerane, ye kaane wom daa ta zege da. 10O ma kwoni wɛɛne, ye o bwei kaane wom o we, “Ba vei yei ne mo? Nɔɔn-nɔɔno wo daare se o ŋɔɔne o chɔge nmo na?” 11O ma leiri o we, “Amo tu, ba wolowolo daa wo daare.” Yezu ma ta o we, “Amo de nam bá ŋɔɔne a chɔge‑m. Véi, se ko zege zem se n daa‑n yé tusi.”]

Yezu bere we o jege chega

12Yezu déem ma ta de nɔn-kɔgɔ kom o we, “Amo mo ye pwooni a pae nabiina maama. Wolo nam ná tɔge amo, konto tu daa bá beeri lim wone. Konto tu na nɛ ŋwea chekke to, pwooni wó taa wo o tei ne.”

13 Farisi tiina bam ma ta ded‑o ba we, “Nmo na pae n tete chega to bere we n taane dem ba jege kuri.” 14O ma leiri-ba o we, “Amo ni taane dem seene de ye chega mo. Amo ná maŋe a pa a tete chega, ko ta ye chega mo, kolo ŋwaane amo yei we Wɛ mo toŋe-ne. Abam nam yeiri amo na nwoŋi mɛ, de mɛ amo na wó vo to. 15Abam ná bore nɔɔna daane, á yeini á ma nabiina boboŋa mo, ye ko dae Wɛ boboŋa. Amo nam ba bore nɔɔn-nɔɔno bora. 16Ko daare, amo ná bore nɔɔna bora, amo borem dem wó taa ye chega, kolo ŋwaane a Kwo mo toŋe-ne ye o zege a chega kam kwaga ne. Ko dae amo yerane mo wó di nɔɔna taane. 17Ko popone Moses nia twanno tem wone we, nɔɔna balei ná jege ni dedwe, ye ba ná tage kolo, ko ye chega mo. 18Amo ye wolo na pae a tete chega, ye amo Kwo na toŋe-ne to de zege a kwaga ne o ŋɔɔna, ye dé jege ni dedwe.”

19Ba ma bwei‑o ba we, “N kwo wom bɛ?” O ma leiri-ba o we, “Abam yeiri amo na ye wolo to, de amo Kwo wom de. Á ya ná yei amo, á ya wó lɔre amo Kwo wom de.”

20Yezu déem tage wonnu tento o bere nɔɔna Wɛ diga kam konkɔlɔ kom ne, jeiga kalo Wɛ pɛɛra dakaa kam na wora to. O na tage konto o ti to, nɔɔn-nɔɔno maa wo nɛ chwoŋa se o ja‑o, o maŋa kam ta na wo yi to ŋwaane.

21Yezu daa ma ta de nɔn-kɔgɔ kom o we, “Amo wó viiri a daare abam, ye á nam wó beeri amo jei á ga, kolo ŋwaane abam wɛleera yam wó taa wo á yuu ne taa, se ko vo ko yi á toone maŋa. Amo na wó vo mɛ to, abam bá wane da á vo.” 22Juu tiina bam maa tɛ ba we, “O na tage o we, debam bá wane dé vo o na wó vo mɛ to, ko bere we o lage o go o tete mo na?”

23O ta ma ta de-ba o we, “Abam ye logo baŋa nɔɔna mo, amo nam nwoŋi wɛyuu mo. Abam kugu jei ye logo baŋa ywo mo. Amo kugu jei nam dae logo konto. 24Konto ŋwaane mo amo tage a bere abam we, á wɛleera yam wó taa wo á yuu ne taa, se ko vo ko yi á toone maŋa. Abam ná wo sɛ we, amo mo seene a ye wolo na wora taa to, á wó te ye á wɛleera yam ta wo á yuu ne.” 25Ba ma bwei‑o ba we, “Nmo ye wɔ mo?” O ma ta-ba o we, “Ko ye kolo amo na maŋe a ta a bere abam to mo. 26Amo jege wonnu dedɛ se a maa ŋɔɔne abam taane a chɔge abam. Wolo wom na toŋe-ne to nam tiini o ye chega tu mo. Amo na nigi kolo o tei ne to yerane mo a tɛ a bere nabiina.”

27Yezu na tage wonnu tem konto to, ba wo lɔre we ko ye o Kwo Baŋa Wɛ taane mo o ŋɔɔne de-ba. 28O laam ma ta de-ba o we, “Maŋa wó ba ye á kwei amo wolo na ye Nabiin-bu wom to á zeiŋi wɛɛne. Á laam wó lɔre we amo seene a ye wolo na wora taa to. Abam ta wó lɔre we amo ba ke kolokolo a tete ne. Amo nam yeini a tɛ wonnu telo amo Kwo wom na bere-ne to yerane mo a bere nɔɔna. 29Wolo wom na toŋe-ne to wo amo tei ne, ye o wo yage-ne a yerane, kolo ŋwaane a yeini a ke kolo na pwoli o wo to mo.”

30Yezu déem na wora o ŋɔɔna konto dwoŋi to, nɔɔna dedɛ laam ma ke ba wo-dedoa ded‑o.

Bia tɔge ba kwoa kikia

31Yezu laam ma ta de Juu tiina balo na sɛ‑o to o we, “Abam ná tɔge amo berem dem ye á wo yage, á wó yɔɔre á ta‑á ye amo tɔgena mo. 32Abam laam wó ba á lɔre chega, ye chega kam wó jwoŋi abam ka yage se á ta‑á tei á tete.”#1 Piita 2:16 33Ba ma leiri‑o ba we, “Debam ye Abaraham dwi tiina mo, ye dé nam wo fɔge dé ji nɔɔn-nɔɔno kabɛ.#Matiyu 3:9 Bɛ ŋwaane mo ye n ta n we, dé wó taa tei dé tete?”

34O ma ta de-ba o we, “A tɛ abam chega ŋwaane to, wolo maama na paale o ke wɛleera to ye wɛleera kabaa mo. 35Ko nam ná ye kabaa, ka yeini ka ba zoore ka tu sɔŋɔ ne taa taa. Ko nam ná ye sɔŋɔ kom bu, wonto jege kugu jei se ko taa vei wuu. 36Konto ŋwaane, Wɛ Bu wom ná jwoŋi abam o yage, á wó seene á ta‑á tei á tete. 37Amo yei we abam seene á ye Abaraham dwi tiina mo. Abam nam ta maa kwaane se á go amo, kolo ŋwaane amo berem dem tera á bochara ne. 38Amo déem na wo a Kwo tei ne ye a lɔre wonnu telo to mo a yeini a ŋɔɔna. Abam nam yeini á ke kolo abam kwo na pɛ á lɔre to mo.”

39Ba ma leiri‑o ba we, “Debam kwo mo Abaraham.” O ma ta-ba o we, “Abam ya ná seene á ye Abaraham bia, á ya wó ta‑á ke kikia yalo Abaraham déem na ke to mo. 40Amo tage chega kalo a na nigi Wɛ tei ne to a bere abam, ye abam kwaane se á go-ne. Abaraham nam wo ke abam keim dem konto dwoŋi. 41Abam yeini á ke kikia yalo á kwo na ke to mo.”

Ba ma leiri‑o ba we, “Debam dae tampira. Wɛ tete yerane mo ye debam Kwo.” 42O ma ta de-ba o we, “Baŋa Wɛ ya ná ye abam Kwo, á wó ta‑á swoi amo, kolo ŋwaane amo nwoŋi Wɛ tei mo, ye a laam wora de abam. Amo wo tu a tete ne. Wɛ nam mo toŋe-ne. 43Bɛ mo ye abam ba lɔra amo taane dem? Ko nam na ye tei to, á boboŋa mo ware ya tɔge amo berem dem. 44Abam nam ye á kwo setaane nyem mo. Á ma‑á lage se á ta‑á ke wonto boboŋa na lage tei to. Boboa ne to o maŋe o ye nɔn-goro mo. O ba fɔge o tɔge chega chwoŋa, kolo ŋwaane chega tera o bochare ne. O ná yeini o fɔ vwa, ko ye mo o boboŋa na maŋe ya ye tei. O ye vwa-fɔro mo. Wonto nam mo ye vwa-nyena kwo. 45Ko ná ye amo, a yeini a tɛ chega mo. Konto ŋwaane mo abam ba sɛ amo. 46Abam wɔ mo wó wane o bere we amo ke a chɔge? Amo na ŋɔɔne chega to, bɛ mo ye á ba sɛ-ne? 47Wolo na ye Wɛ nyem to cheigi Wɛ botare mo. Abam nam na dae Wɛ nɔɔna to mo pae á ba cheiga.”

Yezu bere we o dwoi Abaraham

48Juu tiina dedɛɛra bam ma ta de Yezu ba we, “Nmo seene n ye Samaria tu. N nam yirisi mo. Vwa mo dé fɔ na?” 49O ma leiri-ba o we, “A ba yirisa. Amo pae a Kwo wom mo zula. Ko daare abam yiga nam tera amo wone. 50Amo ba kwaana se a na yere a pa a tete. Wɛ nam mo lage se konto ke, ye wonto mo bore nɔɔna daane. 51A tɛ abam chega ŋwaane to, wolo maama ná toŋe o tɔge amo berem dem, toone daa bá ja konto tu.”

52Juu tiina bam laam ma ta ded‑o ba we, “N taane dem nmo na tage to pɛ se dé lɔre we n yirisi mo. Abaraham déem tega, ye Wɛ sampwori sem de maama te. Nmo nam ta tage n we, wolo ná toŋe o tɔge nmo berem dem, toone daa bá ja konto tu. 53Nmo ye nɔn-kamunu n dwoi debam kwo Abaraham mo na? Wonto nam tega. Wɛ sampwori sem de ma te. Nmo bere n tete we n ye wɔ mo?” 54O ma leiri-ba o we, “Amo ya ná lage yere a pa a tete, konto ye kafɛ mo. Ko ye amo Kwo Wɛ mo zeiŋi a yere, ye ko nam ye wonto ŋwaane mo abam yeini á mage á nyɔɔna á tɛ we, Wɛ delo á na sɛ to. 55Abam nam yeiri‑o, ye amo yei‑o. Amo ya ná tage a we, a yeiri‑o, a ya wó taa ye vwa-nyem mo, nenɛɛne abam tei. Amo nam seene a yei‑o, ye a toŋe a tɔge o berem dem. 56Abam kwo Abaraham déem jege wopwolo se o na da yam amo na wó taa wora to. O nam seene o na-ya, ye o wo pwoli.”

57Ba ma ta ded‑o ba we, “Nmo nam ta wo yi bena finnu. Nmo ke tɛ mo n na Abaraham?” 58O ma leiri-ba o we, “A tɛ abam chega ŋwaane to, ba déem ta na wo loge Abaraham to, amo maŋe a wora mo.” 59Yezu na tage konto to, ba ma kwei kandwa se ba ma dole‑o ba go. O laam ma seigi o nwoŋi Wɛ diga kam wone.

Currently Selected:

Jɔn 8: KBG

Highlight

Copy