Jɔn 6

Yezu pɛ nɔɔna 5,000 wodiu se ba di

Matiyu 14:13-21; Maake 6:30-44; Luka 9:10-17

1Dɛ dedwe Yezu ma zaŋe o vo o bɛ naneo kolo yere na ye Galili to. Nɔɔna badaara bwoi-ko we Tiberia mo. 2Nɔn-kɔgɔ dedɛ maa tɔge o kwaga, ba na nɛ wo-kenkagela yalo o na ke o yɔɔre jaweena to ŋwaane. 3-4Ko ma daare fenfee se Juu tiina di ba kuri delo yere na ye Atɔgebabaŋa to. Yezu ma vo o di peo yuu o jeini da de o tɔgena bam.

5O ma dole o yuu o nii jei maama o na we kɔgɔ dedɛ mo maa beene o tei. O ma ta de Filipi o we, “Dé wó ke tɛ mo dé na wodiu se dé yeigi dé pa nɔɔna banto maama se ba di?” 6O na tage konto to, ko ye se o maŋe Filipi boboŋa mo o nii. O maŋe o yei o na wó ke kolo to. 7Filipi ma leiri‑o o we, “Dé ná lage se dé yeigi bworobworo se nɔɔno maama na fenfee o di, ko sabu kom wó dwoni nɔɔno dedoa chane seredo ŋweero mo.”

8O tɔgena bam dedoa, Anduru wolo na ye Simon Piita nyaane to ma ta o we, 9“Nii bu wodwoŋi mo wo ywo-seeni, o jege bworobworo-balɛ senu de ywona yalei. Tento nam bá wane te yi nɔɔna banto maama.”

10Yezu laam ma ta de-ba o we, “Á nam pa se nɔɔna bam jeini tega ne.” Gaaro tiini te wora jei sem ne. Nɔɔna bam maama ma jeini tega ne. Ba yi nenɛɛne baara morro tenu (5,000), ko woli de kaana de bia. 11Yezu ma kwei bworobworo-balɛ sem ye o ke Wɛ lei. O ma daare o maŋe-te o pa nɔɔna bam na jei tega ne to. O ma ke ywona yam de konto dwoŋi. Nɔɔna bam maama ma di ne ba na lage tei to. 12Ba ma di ba su ba daare. Yezu ma ta de o tɔgena bam o we, “Véi-na á twɛ mumuga kalo na daare to, se á yé pa dé yage kolokolo.” 13Ba ma twɛ ka maama ba su kayɛ fuga-selei. Bworobworo tenu tem ba na di ba daare to mumuga yerane mo konto.

14Nɔɔna bam na wora ye ba na wo-kenkagele dem Yezu na ke to ma ta ba we, “Ko seene ko ye chega mo, Wɛ ni-jwoŋinu wolo ya na maŋe se o ba logo baŋa to mo konto.” 15Yezu laam ma lɔre we ba lage ba ma dam mo ba ja‑o ba pa o ji ba pɛ. O na lɔre konto to, o ma zaŋe o jwoori o vo o di peo yuu o wora o yerane.

Yezu vei na baŋa ne

Matiyu 14:22-33; Maake 6:45-52

16Tega na yi to, Yezu kwaga tɔgena bam ma vo ba yi naneo kom ni. 17Ba ma zo nabworo ba tɔge naneo kom wo ba maa vei Kaparenia. Tega maa fɔge ka yia ye Yezu daa ta wo tu ba tei. 18Vo-dɛɔ laam ma zaŋe ko fula ye ko mage na bam. 19Yezu tɔgena bam ma yuŋi nabworo kom ba vo ba yi nenɛɛne mɛɛla yatɔ. Ba laam ma na Yezu na vei na bam baŋa ne o maa beene ba tei. Foone ma zo-ba. 20Yezu ma ta-ba o we, “Yé ta‑á kɔre-na foone, se ko ye amo mo.” 21Ba ma boŋe se ba pa Yezu zo nabworo kom, de ba pɔpɔ ba yi bubɛ jei selo ba na maa vei to.

Yezu pae nɔɔna nae ŋwea Wɛ tei ne

22Tega na poore to, nɔn-kɔgɔ kolo na maŋe naneo kom bubɛ dedwoŋi dem ne to ma maane we nabworo dedoa yerane ya mo wora. Ba maa yei we Yezu kwaga tɔgena bam kɛ ba daare‑o mo, ye o wo dɛ o zo ba nabworo kom o kɛ. 23Nabwooru tedwonna na nwoŋi Tiberia te ba to laam ma yi bubɛ delo nɔn-kɔgɔ kom na wora to. Ko maa ye jei selo dé Teiru Yezu ya na ke Wɛ lei wodiiru tem ŋwaane ye o daare o pa nɔɔna bam di to. 24Nɔɔna bam na lɔre we Yezu de o kwaga tɔgena bam daa tera to, ba ma zo nabwooru tem wo ba maa vei Kaparenia se ba beeri‑o.

25Nɔɔna bam na bɛ naneo kom to, ba ma na Yezu. Ba ma bwei‑o ba we, “Berem tu, maŋa kɔ mo n tu ywoba?” 26Yezu ma leiri-ba o we, “A tɛ abam chega ŋwaane to, abam na kare á beeri amo tei to, ko dae á na nɛ wo-kenkagela yalo na bere we Wɛ toŋe-ne to ŋwaane. Ko nam ye á na di wodiiru tem á daare to ŋwaane mo á lage amo. 27Abam nam yé ta‑á toŋa á lage wodiu kolo na wó ba ko pɔ to yerane. Ko daare, ta‑á ke kolo na wó pa á na ŋwea kalo na ba jege kweelim Wɛ tei ne to. Amo wolo na ye Nabiin-bu wom to wó pa á na wodiu konto dwoŋi, kolo ŋwaane a Kwo Wɛ mo tiŋi-ne se a taa toŋa a pa‑o.”#Izaya 55:1-2

28Ba laam ma bwei‑o ba we, “Debam nam wó ke tɛ mo se dé taa toŋe Wɛ totoŋa?” 29O ma leiri-ba o we, “Totoŋe delo na jege kuri Wɛ tei ne to mo tento: O lage se á sɛ wolo wom o na toŋe to mo.”

30Ba ma ta ded‑o ba we, “Wo-kenkagele dwi dɔ mo nmo wó ke se dé wane dé lɔre we Wɛ seene o toŋe nmo, se dé laam sɛ dé pa nmo? Nmo wó ke bɛ mo? 31Faŋa faŋa to, dé nabaara déem na wo kagoa yuu ne maŋa kalo to, ba di wodiu kolo yere na ye ‘Manna’ to, ne Wɛ tɔnɔ kom na tage tei ko we, ‘O pɛ-ba wodiu kolo na nwoŋi Wɛ telaao ne to pa ba di.’ ” 32Yezu ma leiri-ba o we, “A tɛ abam chega ŋwaane to, ko dae Moses mo pɛ abam wodiu kolo na nwoŋi Wɛ telaao ne to.#Nwoŋim 16:4; Nehemia 9:15 Ko nam ye amo Kwo Wɛ mo pae abam wodiu chekke kolo na seene ko nwoŋi telaao ne to. 33Wɛ wodiu kom ye kolo na nwoŋi telaao ne ye ko tu logo baŋa ko pae nabiina ŋwea Wɛ tei ne to.” 34Ba ma ta ded‑o ba we, “Debam tu, ta‑n pae debam wodiu kom konto maŋa maama.”

35Yezu ma ta-ba o we, “Amo mo ye wodiu kolo na pae nɔɔna ŋwea Wɛ tei ne to. Wolo maama ná sɛ se o ba amo tei, kana daa bá ja konto tu. Wolo maama ná ke o wo-dedoa de amo, na-nyɔm daa bá ja kotu. 36Amo maŋe a ta a bere abam we, á yia nɛ-ne ye á ta ba jege wo-dedoa de amo. 37Ko daare wolo maama amo Kwo Wɛ na ke amo jeŋa ne to wó ba a tei. Wolo maama nam ná tu amo tei, a bá fɔge a zeili kotu. 38Kolo ŋwaane amo nwoŋi Wɛ telaao ne a ba se a ke wolo wom na toŋe-ne to boboŋa mo, se ko dae amo tete boboŋa. 39Wolo wom na toŋe-ne to boboŋa na lage kolo to mo ye se a yé yage pa balo maama o na ke amo jeŋa ne to wolowolo jei, se a daare a pa ba maama bi logo baŋa kweelim dɛ dem ne. 40Amo Kwo Wɛ boboŋa lage se wolo maama ná jege teena o Bu wom tei ne ye o ke o wo-dedoa ded‑o, se konto tu na ŋwea kalo na ba jege kweelim o tei ne to. Amo wó seene a bi konto tu logo baŋa kweelim dɛ dem ne pa se o na Wɛ ŋwe-doŋa kam konto.”

41Yezu na tage konto to, Juu tiina dedɛɛra bam maa jege‑o ba poona de o na tage o we, omo mo ye wodiu kolo na nwoŋi Wɛ telaao ne to. 42Ba maa tɛ ba we, “Nɔɔno wonto dae Yezu wolo na ye Josɛf bu to mo na? Dé yei o kwo de o nu. Bɛ mo ye o wane o ta we, o nwoŋi Wɛ telaao ne mo o ba?”

43Yezu ma leiri-ba o we, “Yage-na á pompona kam. 44Nɔɔn-nɔɔno bá wane o ba amo tei, ye ko dae we amo Kwo Wɛ mo wó vaŋe konto tu jeŋa se o ba amo tei. Amo wó bi konto tu logo baŋa kweelim dɛ dem ne. 45Ko popone faŋa faŋa Wɛ sampwori tɔnɔ kom ne ko we, ‘Ba maama wó zamese Wɛ tete tei ne.’#Izaya 54:13 Wolo maama nam na jwoŋi a Kwo Wɛ taane dem ye o kwori o zamese-de to wó ba amo tei. 46Ko nam dae we nɔɔno yia mo nɛ amo Kwo Wɛ, se amo wolo na nwoŋi o tei to yerane mo nɛ‑o. 47A tɛ abam chega ŋwaane to, wolo na ke o wo-dedoa de amo to mo jege ŋwea Wɛ tei ne. 48Amo ye wodiu kolo na pae nɔɔna ŋwea Wɛ tei ne to. 49Faŋa faŋa to, abam nabaara déem na wo kagoa kam wone to, ba di wodiu kolo yere na ye ‘Manna’ to mo, ye ba ta wo lugi toone wone. 50Ko daare ko ná ye wodiu kolo na seene ko nwoŋi Wɛ telaao ne to, wolo ná di-ko, toone daa bá ja konto tu Wɛ yiga ne. 51Amo ye wodiu kolo na nwoŋi Wɛ telaao ne ye ko jege jworo ko pae nabiina to. Wolo maama na di wodiu kom konto to wó na ŋwea Wɛ tei ne se ko taa vei wuu. Wodiu kolo amo na wó kwei a pa nɔɔna to ye a ya-nɔna mo, se ko pa nabiina taa jege ŋwea Wɛ tei ne.”#Luka 22:19

52Yezu na tage konto to, Juu tiina dedɛɛra bam laam ma tiini ba mage ni-kantɔgɔ daane ba we, “Nɔɔno wonto wó ke tɛ mo o pa debam o ya-nɔna yam se dé di?” 53Yezu ma ta de-ba o we, “A tɛ abam chega ŋwaane to, abam wolo ná wo di amo Nabiin-bu wom ya-nɔna yam ye o daare o nyɔ a jana bam, Wɛ ŋwe-doŋa kam bá zo kotu bochare. 54Wolo nam ná di a ya-nɔna yam ye o daare o nyɔ a jana bam, konto tu jege ŋwea Wɛ tei ne. Amo wó bi‑o logo baŋa kweelim dɛ dem ne. 55Amo ya-nɔna yam mo ye wodiu kolo na ye chekke to, de a jana bam de. 56Wolo na di amo ya-nɔna yam, ye o daare o nyɔ a jana bam to me de amo, ye amo tigi konto tu bochare ne. 57Amo Kwo Wɛ na ye ŋwea tu to mo toŋe-ne. Ko nam ye wonto ŋwaane mo amo de jege ŋwea. Ko nam ye bedwe mo de wolo ná di amo ya-nɔna yam, konto tu wó taa ŋwe amo ŋwaane. 58Konto mo seene ko ye wodiu kolo na nwoŋi Wɛ telaao ne to. Konto nam ba nye de wodiu kolo abam nabaara bam na di ye ba daare ba te to. Wolo maama na di wodiu kom konto to wó na ŋwea Wɛ tei ne se ko taa vei wuu.”

59Mo Yezu déem na tage tei Kaparenia ne o bere balo na wo Juu tiina jeerim diga kam wone to. 60Yezu kwaga tɔgena bam dedɛ na nigi konto to, ba ma ta ba we, “O taane dem tiini de dana. Nɔɔn-nɔɔno bá wane o jwoŋi-de.”

61Yezu ma lɔre o kwaga tɔgena bam na poona de o taane dem tei. O laam ma ta de-ba o we, “A taane dem konto pɛ abam boboŋa chɔge mo na? 62Ko na ye konto to, á ná nɛ Nabiin-bu wom na maa jwoori o diini Wɛ telaao o na maŋe o nwoŋi mɛ to, abam wó wane á sɛ konto na? 63Ko ye Wɛ Sin-laao kom mo pae nɔɔna ŋwea o tei ne. Ko daare nabiina dam bá wane kolokolo de ke. Amo na tage taane delo de abam to bere Wɛ na wó fɔge nabiina bochara de o ŋwe-doŋa kam tei to. 64De konto de, abam badaara ta wo sɛ.” Yezu tage konto kolo ŋwaane boboa ne mo o maŋe o yei balo na bá sɛ‑o to, de wolo na wó ba o yeigi‑o o pa nɔɔna to. 65O daa ma ta o we, “Konto ŋwaane mo amo tage a bere abam we, nɔɔn-nɔɔno bá wane o ba amo tei, ye ko dae we amo Kwo Wɛ mo tiŋi chwoŋa o pa kotu.”

66Konto na ke to, o tɔgena dedɛ ma jwoori o kwaga ne, ye ba daa ba tɔge‑o. 67Yezu laam ma ta de o tontoŋena fuga-balei bam o we, “Abam de wó taa lage se á yage amo na?” 68Simon Piita ma leiri‑o o we, “Amo tu, se dé laam vo wɔ tei? Nmo mo ŋɔɔne taane delo na pae nɔɔna ŋwea Wɛ tei ne to.#Lei 73:25 69Debam laam sɛ nmo, ye dé ba dé lɔre we, nmo ye Wo-pwoŋo Tu wolo Wɛ na toŋe to mo.”

70Yezu ma ta de-ba o we, “Amo le abam fuga-balei bam, abam dedoa nam ye setaane nyem mo.” 71O na tage konto to, ko ye Judas wolo na ye Simon Yisakara bu to taane mo. Wonto tɔge o wo Yezu tontoŋena fuga-balei bam wone, ye o laam wó ba o yeigi Yezu o pa nɔɔna.#Jɔn 13:26-27

Currently Selected:

Jɔn 6: KBG

Highlight

Copy