Jɔn 3

Nikodema vei Yezu tei

1Nɔɔno wodwoŋi déem mo wora, o yere mo Nikodema. O nwoŋi Farisi tiina kɔgɔ kom wone mo. O maa tɔge o ye Juu tiina bam yiga tu dedoa. 2Dɛ dedwe o ma zaŋe o vo Yezu tei tete ne, ye o ta ded‑o o we, “Berem tu, dé yei we Wɛ mo toŋe nmo se n ba n bere nɔɔna o chega kam. Dé nɛ wo-kenkagela yalo nmo na ke to. Ko ma pa dé lɔre we Wɛ mo seene o wo nmo tei ne, pa nmo wae wo-kenkagela yam n ke.” 3Yezu ma leiri‑o o we, “A tɛ nmo chega ŋwaane to, ba ná wo jwoori ba lo nɔɔno wolo, konto tu bere o bá lɔre Wɛ paare dem na ye tei to.” 4Nikodema ma bwei‑o o we, “Nɔɔno ná ye nɔn-kweo, ba wó ke tɛ mo ba lo‑o? O nam bá wane o jwoori o zo o nu wo se o lo‑o.”

5Yezu ma leiri‑o o we, “Chega ŋwaane to, ba ná wo dɛ na baŋa ba lo nɔɔno wolo, ye ba kwori ba wo dɛ Wɛ Sin-laao kom baŋa ba lo‑o, konto tu bá wane o woli Wɛ paare dem wone. 6Nabiina ná yeini ba lo nɔɔno, ko ye logo baŋa momwɛ mo o jega. Ko daare ko ná ye Wɛ Sin-laao kom, konto mo pae nɔɔno jege Wɛ telaao ŋwe-doŋa kam. 7Yé ta‑n ye yaau de amo na tage kolo we, abam jege se ba jwoori ba lo abam to. 8Ko ná ye vio, ko yeini ko dole mɛ de mɛ ko na lage to mo. N ma‑n yeini n ni ko sɔɔ kom, ye n yeiri ko na nwoŋi mɛ, de ko na maa vei mɛ to. Ko ye bedwe mo de Wɛ Sin-laao kom na pɛ wolo maama ŋwea Wɛ tei ne to.”

9Nikodema ma bwei o we, “Ko wó ke tɛ mo ko taa ye konto?” 10Yezu ma leiri‑o o we, “Nmo ye wolo na zamese Isarele dwi tiina bam to mo. Bɛ mo ye n yeiri tento? 11Chega ŋwaane to, dé yeini dé ta wonnu telo dé na yei to mo, ye dé kwori dé ŋɔɔne kolo dé na nɛ to dé bere nɔɔna. De konto de, á ta ba sɛ debam berem dem. 12Amo tage logo baŋa wonnu taane a bere abam, ye á ba sɛ amo ni. Konto to, amo ná ŋɔɔne Wɛ telaao wonnu taane a bere abam, á wó ke tɛ mo á sɛ amo ni? 13Nɔɔn-nɔɔno tera o na diini Wɛ telaao, ko ná dae wolo wom na maŋe o tu o ba to yerane. Ko ye Nabiin-bu wom mo konto.#Memaŋa 30:4

14Moses déem na wo kagoa wone faŋa faŋa to, o ma pale channa basankwea daa yuu ne, ye o zeiŋi-ka wɛɛne se o nɔɔna yé na chɔgem. Ba nam jege se ba kwei Nabiin-bu wom de ba zeiŋi wɛyuu ne konto mo, 15se ko pa nɔɔno wolo maama na ke o wo-dedoa ded‑o to na ŋwea kalo na ba jege kweelim Wɛ tei ne to.”#Jeelim 21:8-9; Jɔn 12:32-33

16Wɛ tiini o jege nabiina swono ye o toŋe o Bu-doa se o ba logo baŋa, se wolo maama na ke o wo-dedoa ded‑o to daa yé na chɔgem, se o daare o na ŋwea kalo na ba jege kweelim Wɛ tei ne to.#Rom 5:8 17Wɛ na toŋe o Bu wom se o ba logo baŋa konto to, ko dae se o di nabiina taane o vane ba bora. Ko nam ye se o jwoŋi-ba o yage mo. 18Wolo maama na ke o wo-dedoa de Wɛ Bu wom to bá to de o bora. Ko daare wolo maama na ba lage se o sɛ‑o to maŋe o to mo, o na ve Wɛ Bu-doa kam to ŋwaane. 19Wɛ na di nabiina taane tei to mo tento: Wɛ pɛ se wolo na ye pwooni tu to ba logo baŋa o wora. Nabiina nam swoi lim ba dwoi pwooni dem, kolo ŋwaane ba kikia ba lana. 20Nɔɔno wolo maama na ke keim-balwaaro to wó chuli pwooni dem mo, ye o bá sɛ se o nwoŋi de yiga ne, se o keim-balwaaro tem ba te taa nae jaja. 21Wolo maama na tɔge chega chwoŋa to nam wó nwoŋi pwooni dem yiga ne, se nɔɔna lɔre we o kikia maama tɔge Wɛ boboŋa mo.

Jɔn daa ŋɔɔne Yezu yera taane

22Konto déem na kɛ to, Yezu de o kwaga tɔgena bam ma vo ba beeri Judea te-balwa bam wone. O ma dáane de-ba jei sem konto ne, ye o pa nɔɔna sɛɛm Wɛ yere ŋwaane. 23Jɔn maa wo Ayinon seeni. Teo kom konto bwola dedaane Salim. O na wora to mo o yeini o pae nɔɔna sɛɛm, na na daga jei sem konto ne to ŋwaane. Nɔɔna dedɛ déem yeini ba tui o tei maŋa maama se ba jwoŋi sɛɛm. 24Maŋa kam konto ne ba ta wo jaane Jɔn ba pe.

25Jɔn tɔgena badwonna déem ma mage ni-kantɔgɔ de Juu tu wodwoŋi de nɔɔna na jege se ba zare ba tete tei se ko tɔge ba chullu tem chekke to. 26Ba ma vo Jɔn tei ba ta ded‑o ba we, “Berem tu, dé nɛ nɔɔno wolo daama na wo nmo tei ne ye n wo Jɔdan buga kam bubɛ dedwoŋi dem ne to. Nmo tage o taane n bere debam. Leile konto o laam wora o pa nɔɔna sɛɛm, ye nɔɔna dedɛ tiini ba vei o tei ba daare debam. Ko lana na?” 27Jɔn ma leiri-ba o we, “Ko wo chɔge. Nɔɔno ná tɔge chwoŋa kalo, ko ye Wɛ mo tiŋi-ka o pa‑o. 28Abam tete wó zege amo kwaga ne de a na tage a we, amo dae Wɛ Dam Tu wom, se ko ye Wɛ mo toŋe-ne se a tɔge o Bu wom yiga a ba.#Jɔn 1:6-8 29Ko nye de nɔɔno ná di kaane, ko ye kan-baro wom tete mo tei kaane wom. O yiŋinu wom wó taa zege dáa ne mo ye o cheiga. O laam ná nigi kan-baro wom kwora, o wó taa jege wopwolo lanyerane. Tɔ. Amo de jege wopwolo de Yezu na tu ye a ni o kwora to. Amo tiini a jege wopwolo se ko ja gaale. 30Yezu yere dem jege se de taa zaŋa mo, se amo yere dem taa wo tega ne.#Matiyu 3:11

31Wolo wom na nwoŋi Wɛ tei o ba to mo ye nɔn-kamunu o dwoi nɔɔno maama. Ko daare wolo na nwoŋi logo baŋa to ye logo baŋa nyem mo. O ni taane de maa ye logo baŋa nyem. Wolo wom na nwoŋi Wɛ telaao to nam mo dwoi maama. 32O yeini o tɛ kolo o na lɔre Wɛ tei ne to mo o bere nɔɔna. De konto de, nɔɔna ba sɛ o berem dem. 33Nɔɔno wolo nam ná sɛ o berem dem, konto tu sɛ we Wɛ ye chega mo. 34Kolo ŋwaane, ko ná ye wolo wom Wɛ na toŋe to, Wɛ pɛ‑o o Sin-laao kom mo se ko tiini ko gaale, pa se ko ye Wɛ tete ni taane mo o tɛa. 35Dé Kwo Wɛ swoi o Bu wom. O ma pa se woŋo maama dam wo o jeŋa ne. 36Nɔɔno wolo na ke o wo-dedoa de Wɛ Bu wom to jege ŋwea kalo na ba jege kweelim to. Ko daare nɔɔno wolo na ve Wɛ Bu wom to bá fɔge o na ŋwea Wɛ tei ne. Wɛ ban-lom nam wó taa wo o baŋa ne taa.”

Currently Selected:

Jɔn 3: KBG

Highlight

Copy