Jɔn 20

Yezu bi toone wone ye o bere o tete

Matiyu 28:1-10, 16-20; Maake 16:1-11, 14-18; Luka 24:1-12, 36-49

1Siu dɛ dem na kɛ de daare de pa dɛ delo to,#20:1 Ko kuri mo ye ‘Sunday’ tetete. Mary Magadala ma zaŋe o gwoni tega o vo Yezu yibeeli dem jeiga. O ma na we kandwɛ delo ya na pe bɔɔne dem ni to tigi dáa ne. 2O ma duri o jwoori o vo o ta de Simon Piita de tɔgeno wodwoŋi wom Yezu na swoi to o we, “Ba kwei dé Teiru wom yera yam yibeeli dem wone. Dé nam yeiri ba na ke‑o mɛ.”

3-4Piita de o dwoŋi tɔgeno wom ma zaŋe ba duri ba maa vei bɔɔne dem. Tɔgeno wodwoŋi wom ma duri o kɛ o vo o yi bɔɔne dem o daare Piita. 5O ma tiiri o nii bɔɔne dem wone o na gare-jale na tigi da, ye o wo zo. 6Simon Piita ma da o kwaga o ba. O ma kɛ o zo bɔɔne dem wo. O ma na gare-jale dem na tigi da, 7ye o ta na gɔrɔ kolo ba ya na mɛ ba ba Yezu yuu to. Konto nam piri mo ko tigi ko yera. 8Tɔgeno wodwoŋi wom ya na lwoori o yi da to de laam ma zo. O ma na kolo na wora to, ye o daare o sɛ we ko seene ko ye chega. 9Ba daa ta maa wo lɔre Wɛ tɔnɔ kom na tage kolo we o jege se o bi toone wone to kuri. 10Ba laam ma jwoori ba viiri.

11Mary daa ta maa zege yibeeli dem ni ne o keera. O na wora o keera konto to, o ma tiiri o nii bɔɔne dem wone. 12O ma na malese selei na zo gare-pwonnu se jei mɛ seeni Yezu yera yam ya na tigi da to. Dedoa maa wo o yuu seeni, ye wodwoŋi wom maa wo o nɛ seeni. 13Se ma bwei‑o se we, “A nakɔ, bɛ mo ye n keera?” O ma ta de-se o we, “Ba kwei amo Teiru wom yera yam ba ja viiri, ye a nam yeiri ba na kwei‑o ba ke mɛ.”

14O na tage konto to, o ma pipiri o nii o kwaga ne o na Yezu na zege da, ye o wo lɔre we ko ye Yezu mo. 15Yezu ma bwei‑o o we, “A nakɔ, bɛ mo ye n keera? Wɔ mo nmo kare n beera?” Mary déem boŋe we o ye gaare dem tu mo. O ma ta ded‑o o we, “Amo tu, ko ná ye nmo mo kwei‑o n ja n viiri, se n bere-ne n na ke‑o mɛ to se a vo a kwei.” 16Yezu ma bwoŋi o yere o we, “Mary.” Mary ma pipiri o nii o seeni, ye o ta de Juu tiina taane dem o we, “Rabuni”, ko kuri mo ‘Berem tu’.

17Yezu ma ta ded‑o o we, “Yé ta‑n dwei-ne, se amo daa ta wo jwoori a vo a Kwo wom tei. Nam véi n ta n bere amo nu-bia bam we, amo laam maa vei a Kwo wom tei, wolo na ye abam de Kwo to. Wonto mo ye Baŋa Wɛ. O maa ye amo Tu de abam de Tu.” 18Mary Magadala laam ma zaŋe o vo o ta de Yezu kwaga tɔgena bam we, omo nɛ ba Teiru wom, ye o daare o ta kolo Yezu na tage o bere‑o to.

19Dɛ delo nɔɔ na saŋe siu dɛ dem to#20:19 Ko ta ye ‘Sunday’ dɛ dem mo konto. mo Yezu kwaga tɔgena bam lage daane jeiga dedoa, ye ba fɔge ba pe diga kam ni, ba na kɔre foone de Juu tiina dedɛɛra bam to ŋwaane. Yezu laam ma pɔpɔ o ba o zege ba tetare ne. O ma ta de-ba o we, “Yazura taa wo á tei ne.” 20O na tage konto o ti to, o ma bere-ba o jea de o saŋa kam. O kwaga tɔgena bam maa tiini ba jege wopwolo lanyerane de ba na nɛ ba Teiru wom to.#Jɔn 16:22 21O daa ma jwoori o ta de-ba o we, “Yazura taa wo á tei ne. Ne amo Kwo Wɛ na toŋe-ne logo baŋa ne tei to, amo de lage a toŋe abam konto dwoŋi mo.” 22O na tage konto to, o ma sii o momwa vio o yage ba yera ne ye o we, “Jwoŋi-na Wɛ Sin-laao kom. 23Abam ná yage nɔɔno wolo wɛleera á ma chɛ‑o, ya wó seene ya saare mo. Ko daare abam ná wo yage á ma chɛ wolo, ya ta wó taa wo kotu yuu ne mo.”

Tomas na tu o sɛ Yezu tei to

24Tomas wolo ba na bwoi‑o we ‘Yeywɛ’ ye o wo Yezu tontoŋena fuga-balei bam wone to ya tera maŋa kam Yezu na tu o kwaga tɔgena bam tei to. 25O dwonna bam ma ta ba bere‑o ba we, “Debam ya nɛ dé Teiru wom.” O ma ta de-ba o we, “Amo yi ná wo nɛ chena yam nia o je sem ne se a ke a noa da a nii, ye a daare a ke a jeŋa o saŋa kam ne, amo bá sɛ.”

26Da nana na kɛ to, Yezu tɔgena bam daa ma la daane jeiga dedoa, ye Tomas de wora ba tei ne. Ba ma fɔge ba pe diga kam ni. Yezu ma pɔpɔ o ba o zege ba tetare ne. O ma ta o we, “Yazura taa wo á tei ne.” 27O laam ma daare o ta de Tomas o we, “Ma n noa n taane a je sem ywo-seeni n nii, n daare n tore n jeŋa a saŋa kam ne. Yage bobwea, se n daare n sɛ.” 28Tomas ma leiri‑o o we, “Amo Teiru, de amo Tu Wɛ, a laam sɛ.” 29Yezu ma ta ded‑o o we, “Nmo na nii n na amo to mo pɛ nmo laam sɛ na? Balo na sɛ ye ba ta wo nɛ-ne to mo tiini ba jege yu-ywoŋo.”

Woŋo kolo ŋwaane ye Jɔn popone tɔnɔ konto

30Yezu déem ke wo-kenkagela dedɛ o kwaga tɔgena bam tetare ne, ye te maama nam wo popone tɔnɔ konto wone. 31Wonnu telo na popone to ye se á wane á sɛ we Yezu mo ye Wɛ Dam Tu wom, ye o kwori o ye Wɛ Bu wom. Á nam ná jege wo-dedoa ded‑o, á wó na ŋwea Wɛ tei ne.#1 Jɔn 5:13

Currently Selected:

Jɔn 20: KBG

Highlight

Copy