Jɔn 18

Ba jaane Yezu

Matiyu 26:47-56; Maake 14:43-50; Luka 22:47-53

1Yezu déem na tage wonnu tem konto o ti to, o de o tɔgena bam ma zaŋe ba nwoŋi se ba kɛ. Ba ma vo ba bɛ nabara kadwoŋi kalo yere na ye Kidoron to. Gaare maa wo jei sem konto ne. Ba ma vo ba zo de wone. 2Yezu de o kwaga tɔgena bam déem yeini ba jeeri daane gaare dem konto ne mo. Konto ma pa se Judas wolo na lage o yeigi Yezu o pa to yei ko jei. 3Judas ma tɔge de soja tiina kɔgɔ o vo jeiga kam konto. Wɛ kaanem yiga tiina bam de Farisi tiina bam de ma toŋe ba nɔɔna pa ba tɔge ba vo. Ba déem jege ba jara zela, dedaane min-zwonnu, de mɔɔla.

4Yezu maa yei kolo maama na lage ko ke‑o to. O ma fɔɔre o twɛ ba tei, ye o ta de-ba o we, “Wɔ mo abam laga?” 5Ba ma leiri‑o ba we, “Yezu wolo na ye Nazarete tu to mo dé laga.” Yezu ma ta o we, “Ko ye amo mo konto.”

Judas de maa tɔge o zege de-ba. Wonto maa ye wolo na yeigi Yezu o pa to. 6Yezu na tage de-ba o we wom mo konto to, ba ma tutwoni ba jwoori kwaga ba to tega ne. 7O ma jwoori o bwei-ba o we, “Wɔ mo abam laga?” Ba ma ta ba we, “Yezu wolo na ye Nazarete tu to mo dé laga.” 8Yezu ma ta de-ba o we, “Amo maŋe a ta a bere abam we, amo mo konto. Ko nam ná ye amo mo á laga, se á yage banto se ba viiri.” 9O tage konto se ko pa o na maŋe o ta taane delo to mo ji chega de o na we, “Amo Kwo, amo wo pɛ balo maama nmo na ke amo jeŋa ne to de dedoa de jei.”#Jɔn 6:39

10Simon Piita maa jege se-zɔɔ. O ma le-ko o ma o zage Wɛ kaanem yuu tu wom tontoŋeno jazem zwɛ o pere. Tontoŋeno wom yere mo Malachu. 11Yezu ma ta de Piita o we, “Jwoori n ke n seo kom ko pwolo ne. Amo jege se a na chanɛɛre delo a Kwo na pɛ-ne to mo. Nmo nam boŋe se a lu mo na?”

12Soja tiina bam kɔgɔ kom de ba dedɛɛro wom de Juu tiina bam nɔɔna bam ma ja Yezu ba vɔ. 13Ba ma ja‑o ba da yiga ba vo Anas tei. O maa ye Kayafa tembaaro mo. Kayafa mo ye Wɛ kaanem yuu tu wom bene dem konto ne. 14Wonto déem ya tage de Juu tiina bam we, ko maŋe se nɔɔno dedoa te nɔɔna bam maama ŋwaane.#Jɔn 11:50-51

Piita foge we o yeiri Yezu

Matiyu 26:69-70; Maake 14:66-68; Luka 22:55-57

15Simon Piita de o dwoŋi tɔgeno dedoa ma tɔge Yezu kwaga. Tɔgeno wom konto de Wɛ kaanem yuu tu wom yei daane lanyerane. O ma tɔge de Yezu o zo kaanem yuu tu wom sɔŋɔ konkɔlɔ. 16Piita ma maŋe manchwoŋo ni ne o zege da. Yezu tɔgeno wolo wom de kaanem yuu tu wom na yei daane to ma jwoori o nwoŋi o ta de busankana kalo na nii manchwoŋo ni dem baŋa ne to, ye o daare o ja Piita o zo. 17Busankana kam ma bwei Piita o we, “Nmo tɔge n ye Yezu kwaga tɔgeno mo na?” O ma leiri o we, “Amo dae.”

18Waaro déem mo wora. Konto ŋwaane tontoŋena bam de Juu tiina dedɛɛra bam ma dwei mini ba zege da ba weera. Piita de ma vo o tɔge o zege da o weeri mini dem.

Ba bwei Yezu taane

Matiyu 26:59-66; Maake 14:55-64; Luka 22:66-71

19Wɛ kaanem yuu tu wom laam ma bwei Yezu o tɔgena bam taane, de o berem dem na ye tei to. 20Yezu ma leiri‑o o we, “Amo yeini a ŋɔɔne jaja mo a bere nɔɔna maama. Amo na yeini a bere nɔɔna to, ko ye ba jeerim di sem ne mo, de Wɛ diga kam ne, mɛ Juu tiina bam maama na yeini ba jeeri daane to. Amo wo fɔge a seigi a ta kolokolo. 21Bɛ nam mo ye n bwei amo se n nii? Nam bwei balo na cheigi amo bera yam to n nii amo na tage kolo de-ba to, se banto mo yei amo na tage kolo to.” 22Yezu na tage konto to, dedɛɛra bam dedoa na zege o takeiri ne to ma lɔ o popɔŋɔ, ye o bwei‑o o we, “Bɛ mo ye n ŋɔɔne konto dwoŋi de Wɛ kaanem yuu tu wom?” 23Yezu ma leiri‑o o we, “Amo ná tage woŋo a chɔge, se n ta ko na ye kolo to se dé lɔre. Ko nam ná ye chega mo a taga, bɛ mo ye n mage-ne?”

24Anas laam ma pa se ba ja‑o ba vo Kayafa wolo na ye Wɛ kaanem yuu tu to tei, ye ba ta wo bwoli‑o.

Piita daa jwoori o fo we o yeiri Yezu

Matiyu 26:71-75; Maake 14:69-72; Luka 22:58-62

25Simon Piita daa ta maa zege da o weeri mini dem. Ba ma bwei‑o ba we, “Nmo tɔge n ye nɔɔno wonto kwaga tɔgeno mo na?” Piita ma fo o we, omo dae. 26Wɛ kaanem yuu tu wom tontoŋeno dedoa wolo choro Piita na zage o zwɛ o pere to ma ta ded‑o o we, “Amo wo nɛ nmo ded‑o gaare dem ne na?” 27Piita daa ta ma fo. Chebɛɔ ma da ko keeri.#Jɔn 13:38

Yezu zege Pilata yiga ne

Matiyu 27:1-2, 11-31; Maake 15:1-20; Luka 23:1-5, 13-25

28Ba laam ma ja Yezu ba nwoŋi Kayafa sɔŋɔ ne ba vo teo kom gɔmena tu wom sɔŋɔ. Ko déem ye tetete mo. Juu tiina bam maa wo dɛ ba zo sɔŋɔ kom wo ba chullu tem ŋwaane. Ba jege se ba che ba tete de digiru se ba wane ba na chwoŋa ba di Atɔgebabaŋa kuri dem. 29Gɔmena tu Pilata ma nwoŋi ba tei, ye o bwei-ba o we, “Bɛ mo ye abam saŋe nɔɔno wonto?” 30Ba ma leiri‑o ba we, “Nɔɔno wonto ya ná wo ke o chɔge, dé ya bá ja‑o dé ba nmo tei.” 31O ma ta de-ba o we, “Abam tete nam jwoŋi‑o se á di o taane dem, se ko tɔge abam chullu tem na ye tei to.” Juu tiina bam ma leiri ba we, “Debam ba jege chwoŋa se dé go nɔɔn-nɔɔno o keim-balɔrɔ ŋwaane.” 32Konto nam ke se Yezu na tage kolo to mo ji chega, ne o na wó te toone delo dwi to.#Jɔn 3:14; 12:32-33

33Pilata laam ma jwoori o zo sɔŋɔ kom wo o bwoŋi Yezu, ye o bwei‑o o we, “Nmo ye Juu tiina bam pɛ mo na?” 34Yezu de daa ma jwoori o bwei‑o o we, “Nmo na tage konto to, ko ye nmo tete boboŋa taane mo naa nɔɔna badwonna mo tage amo taane de nmo?” 35O ma leiri o we, “Amo dae Juu tu. Ko ye nmo tete Juu tiina de ba kaanem yiga tiina bam mo jaane nmo ba ba ba ke amo jeŋa ne. Kɔ mo n kea?”

36Yezu ma leiri o we, “Amo paare dem wo nwoŋi logo baŋa, se de ya ná ye logo baŋa nyem, amo nɔɔna bam ya wó ke jara se ba che se Juu tiina bam yé na chwoŋa se ba ja amo. Ko nam na ye tei to, amo paare dem ye jeiga kadwoŋi nyem mo.” 37Pilata ma bwei‑o o we, “Konto to, nmo ye pɛ mo na?” Yezu ma leiri o we, “Nmo tete mo tage n we, a ye pɛ. A tu se a ŋɔɔne chega kam taane mo a bere nɔɔna logo baŋa ne. Konto ŋwaane mo ba loge amo. Wolo maama na ye chega nɔɔno to mo cheigi amo taane.” 38O ma ta ded‑o o we, “Bɛ mo ye chega?”

Pilata na tage konto to, o laam ma jwoori o nwoŋi pwooni o ta de Juu tiina bam o we, “Amo wo nɛ o na ke kolo o chɔge to se a bwei‑o se o leiri. 39Abam nam yeini á jege meo kodwoŋi. Atɔgebabaŋa kuri dem maŋa ne amo yeini a le peeno dedoa a yage a pa abam se o viiri. Abam nam lage se a yage Juu tiina pɛ wom mo na?” 40Ba ma laare de kwor-dɛa ba we, “Ko dae wonto, ko ye Barabas mo dé laga se n yage.” Barabas ya ye venvereno mo.

Currently Selected:

Jɔn 18: KBG

Highlight

Copy