Hosea 4
4
Baŋa Wɛ bwɛ Isarele tiina bam
1Isarele dwi tiina bam, cheigi-na Baŋa Wɛ kwora kam! O jege taane de abam balo na zoore tega kanto wone to. Tega kam maama wone, nɔɔna ba tɔge chega naa swono kikia, ye ba ba kɔre Wɛ de. 2Á swoi sɔla, de vwa fɔm, de nɔn-gora, de ŋweene, dedaane kabwoŋa kikia dedɛ. Nɔɔna bam ke nankɔɔre totoŋa mo maŋa maama, ye ba goe ba dwonna se ko ja kɛ jeŋa. 3Konto mo tei tega kam koga#4:3 koga naa keeri wo-chechɔgɔ ŋwaane ka peere pa se balo maama na zoore ka wone to bugi. Kago-vara, de zuna, de naneo wo ywona yam maama de lage te te.
4Yé ta‑á jege-na daane á bwɛa, se á pa ko ye nɔɔno wodwoŋi yiga. Ko nam ye abam kaanem tiina bam mo amo lage a bwɛ. 5Wea de tete maama á yeini á tiri á to tega ne mo. Sampwori sem de ma da ba to tega ne. Amo nam lage a chɔge á dwi dem#4:5 á dwi dem: Hiburu = á nu wom mo. 6A nɔɔna bam lage ba na chɔgem, ba na ba jege yeino to ŋwaane. Abam yɔɔre á ve mo se á me de amo. Mo kokuri amo de wó ve abam se á yé ta‑á ye kaanem tiina á pa-ne. Amo ta wó nwoŋi á bia bam kwaga ne. Ko nam ye á na ve á Tu Wɛ bera yam to ŋwaane mo.
7Kaanem tiina bam kɔgɔ kom na daga tetei to, ba lwarem totoŋa yam de daga konto dwoŋi mo pa se ba tusi ba chɔge amo yiga dedɛ. Ba ma pa zula yalo ya na maŋe de-ba to leiri ya ji chaveera ba yuu ne. 8Wɛleera yalo a nɔɔna bam na ke to mo ye kaanem tiina bam ni-wodiu. Banto fera zo nɔɔna bam tusim kikia yam mo. 9Ko nam lage ko ke nɔɔna bam de kaanem tiina bam bedwe mo. Amo wó waare ba maama chwei selo ba na tɔge to ŋwaane. A ta wó jwoori a ŋwe ba kikia yam jene ba yuu ne. 10Ba na wó jwoŋi wodiu kolo ba di to bá zuri ba kana. Ba ná maŋe ba tɔge kabwoŋa kikia ba jwona kaanem jei sem ne mo de, ba dwi dem bá puli. Kokuri to, ba lɔge Baŋa Wɛ kwaga ne mo ye ba daare ba tɔge wa-yɔɔro.
Baŋa Wɛ chuli jwona kaanem
Baŋa Wɛ ma ta o we:
11Sa-dɛɛra de sa-bwona mo pɛ se
a nɔɔna bam boboŋa maama jei.
12Ba maa boŋe se ba jwoŋi swa
ba nwoŋi da-kora na ye jwoni to tei ne mo.
Ba daa ba jege ba tete boboŋe.
Voro bia laam mo bere-ba kolo na maŋe se ba ke to.
Kabwoŋa boboŋa mo pae se ba tusi konto dwoŋi.
Ba ma yage ba Tu Wɛ wom
ba daare ba kwei ba tete ba pa wa yadwonna.
13Peero tem yupare baŋa ne mo
ba yeini ba ke ba kaanem.
Ba maa zwɛ ba pɛɛra zwonnu tem yuu ne,
mɛ teeni dwi dwi#4:13 teeni dwi dwi = oak, poplar, terebinth na wora ye de woro kom ye tima-tima to.
Konto mo tei á bukwa bam zo tolo wone,
ye á bu-kaana de tɔge kabwoŋa kikia.
14Amo nam bá waare á bukwa bam ba tolo kikia yam ŋwaane.
A ta bá waare á bu-kaana bam ba kabwoŋa kikia de ŋwaane.
Kokuri to, á baara bam tete de peini de ka-tole mo.
Ba maa tɔge de-ba ba ke kaanem ba pa jwona.
Chega to, “Swa-mura tu ba jege sɔŋɔ.”
15Isarele tiina bam, á yeini á zo tolo wone.
Nam yé pa-na se Judah dwi tiina bam de tɔge á na-bɔŋa kam,
se banto de wɛleera taa wo ba yuu ne.
Yé zaŋe-na á vo Giligal naa Bɛte-Aven#4:15 Bɛte-Aven kuri mo ye lwarem sɔŋɔ. se á zuli-ne.
Yé ma-na Ŋwea Tu Baŋa Wɛ yere dem á du duuri.
16Isarele tiina bam ye zwabani-nyena mo,
ne na-chwa na ye tei to.
Baŋa Wɛ laam wó wane o nii ba baŋa ne
ne pipeili dwoŋi tei na?
17Efrayim#4:17 Efrayim lage ko bere we Isarele dwia yalo na wo baŋa seeni to. dwi tiina bam me de jwona kaanem.
Le-na á tete ba wone á daare-ba.
18Ba ná nyɔge sana ba su,
ba laam yɔɔre ba tɔge kabwoŋa kikia mo.
Ba swoi kuri-nɔrɔ ba dwoi zula.
19Vo-dɛɔ lage ko ba ko kale-ba mo ko pu
ko ja ko jage.
Ba na ke kaanem ba pae jwona tei to
wó guri-ba chaveera wone mo.
Currently Selected:
Hosea 4: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
