Hosea 14
14
Isarele tiina ná leiri ba wo, Wɛ wó yɔɔre-ba.
1Isarele tiina bam, pipiri-na
á jwoori á Tu Baŋa Wɛ wom tei.
Á wɛleera yam mo pɛ se á tiri á to tega ne.
2Kwei-na wɛ-lworo á yi Baŋa Wɛ tei.
Ta-na ded‑o we:
“Yage dé wɛleera yam maama n ma n chɛ debam,
se n ke debam zaane ye n jwoŋi debam.
Dé laam wó zuli nmo yere,
pa se ko ji pɛɛre ko pa nmo,
se ko leiri na-bale sem dé na ma dé ke kaanem to yuu ne.
3Asiria tiina bam bá wane debam ba jwoŋi ba yage.
Dé daa bá di sisein-nɔɔna baŋa dé zo jara wo.
Ko ná ye wonnu telo dé je na mɔɔne to,
dé daa bá kwei-te dé ma ji dé wa dé zuli.
Nmo yerane mo jege yibwona n pae botara.”
Baŋa Wɛ maa we:
4“Amo wó yɔɔre a nɔɔna bam,
de ba na nwoŋi amo kwaga ne to de.
A maa wó taa swoi-ba de a wo maama.
Amo laam peene a bane mo
se de daa yé zaŋe ba baŋa ne.
5Amo wó pa se Isarele tiina bam bochara zuri,
ne doa na zuri te-kora tei to.
Ba wó taa jege nenɔŋa nenɛɛne kantɔgela na ye tei to.
Ba kuri wó ja tega lanyerane,
ne Lebanon laŋa kam tei-ŋonno tei.
6Ba ta wó puli lanyerane,
ne tio na kwi vɔɔro tei to.
Ba lam de Olivi tio lam mo wó taa nye daane.
Ba wó taa jege ywoni,
ne Lebanon teeni lwom na ywomma tei to.
7Ba wó jwoori ba taa zoore amo woro kom kuri ne,
ye ba du mena ba na wodiiru dedɛ.
Ba ŋwea maa wó ke lanyerane,
ne Vini tio na leiri bia dedɛ tei to.
Ba yere de wó zaŋe jei maama ne,
ne Lebanon teo sana bam na jege yere tei to.
8Efrayim tiina bam, amo yiga wo jwona wone na?
Amo mo wó jwoŋi á wara yam,
ye a nii á baŋa ne.
A jege woro a pa abam,
ne tio kolo na kwi vɔɔro maŋa maama to mo.
Á na nɛ wo-laaro telo to nwoŋi amo tei ne mo.”
9Abam wolo maama ná jege boboŋa,
kotu jege se o ni taane dento kuri.
Wolo ná jege yi-poro,
kotu jege se o ke-de o bochare ne.
Baŋa Wɛ chwei sem yɔɔre se ye chega.
Nɔn-ŋona wó taa tɔge-se.
Ko nam ná ye balo na ve Wɛ to,
banto wó chɔɔle ba to se wone.
Currently Selected:
Hosea 14: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
