Hosea 12
12
1Efrayim tiina bam ni-wodiu ye vio mo.
Ba maa yeini ba pare vio na nwoŋi wɛ-puli seeni to
se ba kwaane ba ja-ko.
Vwa de puseŋa kikia mo ba jege ba toŋe maŋa maama.
Ba maa jaane ba tete ba vei ba ke ni-sɛɛm de Asiria tiina,
ye ba daare ba ke nuga pipiu de Ejipti tiina.”
2 Baŋa Wɛ ti o yiga mo se o bwɛ Judah tiina bam.
O lage o waare Jakob dwi tiina bam ba totoŋe nɛ ŋwaane mo.
O maa wó jwoori o ŋwe ba tusim kikia yam jene ba yuu ne.
3Jakob ta na wo o nu puga wone to,
o déem zo jaŋa mo de o choro Esawu,
de ba na ye yeywa daane to.
O ta na ke nɔɔno to
mo o dwoni de Wɛ.#Pulim 25:26
4O ma jaŋe de Wɛ maleka kam o wane-ka o di.
O déem keeri mo lanyerane
se o wane o na Wɛ swolim.
Bɛtel ne mo o jeeri de Wɛ,
ye Wɛ de ŋɔɔne ded‑o.#Pulim 28:10-19; 32:24-28
5Paŋwa Tu Baŋa Wɛ wom mo konto.
Baŋa Wɛ mo o yere, de na maŋe de zula!
6Abam nam maŋe se á jwoori á Tu Wɛ wom tei.
Fɔge-na á ta‑á tɔge swono de chega,
ye á jege Baŋa Wɛ teena maŋa maama.
7Á pipiina bam jege bwɛ selo na muri to mo.
Ba maa swoi se ba taa pini ba yeilla bam.
8Efrayim tiina bam maa tɛ ba we,
“Nii-na dé na duni tei!
Dé nɛ jejegero dé pa dé tete!
Dé na toŋe tei maama dé na nyɔɔre to,
nɔɔn-nɔɔno bá na dé tusim se o ma o bwɛ debam.”
9Amo mo ye á Tu Baŋa Wɛ wolo wom na jaane abam
a nwoŋi Ejipti teo kom wone to.
A ta wó pa á jwoori á ta‑á zoore vwoa wone,
ne á déem na zoore tei kagoa kam wone to.#Nehemia 8:14
10Amo déem ŋɔɔne de a sampwori sem.
A ma veere wonnu dedɛ a bere-ba.
A tɔge ba baŋa mo
a pa a nɔɔna bam lɔre a boboŋa.
11Puseŋa kikia daga Gilead ne mo na?
Balo na zoore da to nam lage ba jei mo!
Giligal ne ba yeini ba ma nabɛ mo
ba ke kaanem ba pa jwona na?
Ba kaanem bimbina kandwa yam wó sirimi tega ne,
ye ba dogele-ya ba tiŋi ba kare ne.
12Jakob déem duri o vo o zoore Aram ne mo.
O ma toŋe o pa nɔɔno wodwoŋi
se o pa‑o kaane se o di.
O yeini o yere pei mo
se ko taa ye o kaane wom kwora.#Pulim 28:5
13 Baŋa Wɛ déem mo tɔge o sampwora baŋa ne
o jwoŋi Isarele dwi tiina bam o ja o nwoŋi Ejipti ne.
Wɛ ta ma pa se o sampwora kam taa nii ba baŋa ne.
14Efrayim tiina bam nam tiini ba chuchugi Wɛ bane.
Ba jege se ba na waarem ba lwarem kikia ŋwaane mo.
Ba Teiru wom wó jwoori o ŋwe ba wɛleera yam jene ba yuu ne,
ba na yaale‑o tei to ŋwaane.
Currently Selected:
Hosea 12: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
