Hosea 1

1 Baŋa Wɛ kwora kalo o na pɛ Beeri bu Hosea to mo tento. Ko maa ye maŋa kalo Yuzia, de Jotam, de Ahaz, de Hezekia déem na saŋe daane ba di Judah teo paare to mo. Maŋa kam konto ne Jehoasa bu Jeroboam de déem di paare Isarele teo kom ne.#2 Pwa 14:23-29; 2 Tigisim 26:1–32:33

Hosea kaane de o bia taane

2 Baŋa Wɛ déem na bobo o kwei o kwora o pa Hosea se o lwoni o bere Isarele tiina bam to mo o tage ded‑o o we, “Nam zaŋe n swo kaane na ye ka-tola to. Wonto wó lo bia o tusim dem baŋa ne o pa‑m, ye ba maama lage ba ywori nmo kwaga ne mo. Amo nɔɔna Isarele tiina bam de nam ye konto dwoŋi mo. Ba kare ba tusi mo dedɛ ye ba ywori amo Baŋa Wɛ kwaga ne.”

3Hosea ma seene o vo o di kaane. O déem ye Dibilayim bukɔ mo, o yere mo Gomera. O ma ja puga o lo bakeira o pa‑o. 4Baŋa Wɛ ma ta de Hosea o we, “Pa bu wom yere we ‘Jezerele’. Kokuri to, ko bá dáane a lage a pa cham yɔɔre de yi Jehu dwi dem de wonto déem na tiini o toŋe nɔn-gora totoŋa Jezerele teo kom ne tei to ŋwaane.#2 Pwa 10:11 Konto baŋa ne amo wó pa se o dwi dem paare ti Isarele teo kom ne. 5Dɛ dem konto ne a lage a chɔge Isarele jar-keira bam mo de ba dam maama Jezerele bwolo kom ne.”

6Gomera daa ma ja puga ye o lo bukɔ. Baŋa Wɛ ma ta de Hosea o we, “Pa bu wom yere we ‘Lo-Ruhama’.#1:6 Lo-Ruhama kuri mo ye Swono tera. Kokuri to, amo daa bá taa jege Isarele dwi tiina bam swono. A daa bá yage ba wɛleera a ma chɛ-ba. 7Ko nam ná ye Judah dwi tiina bam, amo wó taa jege ba swono ye a jwoŋi-ba a yage ba cham wone. Amo wolo na ye ba Tu Baŋa Wɛ wom to mo wó jwoŋi-ba, ye ko dae ba jara zela ŋwaane, naa ba sisein-nɔɔna ŋwaane, naa balo na yei jara keim chekke to ŋwaane.”

8Gomera bukɔ wom na waare o tu tega to, o daa ma kwei puga o lo bakeira kadwoŋi. 9Baŋa Wɛ ma ta de Hosea o we, “Pa bu wom yere we ‘Lo-Ammi’.#1:9 Lo-Ammi kuri mo ye Ba dae amo nɔɔna. Kokuri to, abam daa seene á dae amo nɔɔna. Amo de maa dae abam de Wɛ.”

Isarele tiina wó jwoori ba na verem

10Ko jwa na wó taa ye tei to, Isarele tiina bam wó puli ba taa daga dedɛ ne naneo ni kasolo bia na daga tei to, ye nɔɔn-nɔɔno bá wane o ga o lɔre ba ni na mae tei. Ko ná ye jeiga kalo Wɛ ya na tage de-ba we, ba dae o nɔɔna to, jeiga kam konto ne nɔɔ, o wó ta de-ba we, “Abam ye Ŋwea Tu Wɛ wom bia mo.”#Rom 9:26 11Dɛ dem konto ne, Judah tiina bam de Isarele tiina bam wó jwoori ba ke daane, kɔgɔ dedoa. Ba wó kuri yuu tu dedoa ba wone se o taa nii-ba. Ba wó taa tei ba tega kam de yazura. Chega to, Jezerele dɛ dem konto wó taa ye dɛ-kamunu.

Currently Selected:

Hosea 1: KBG

Highlight

Copy