Habakuki 2
2
Baŋa Wɛ na leiri o ke belei tei to
1Amo wó zege nayuu kom baŋa ne mo a cheigi se a nii Baŋa Wɛ lage o ta bɛ mo o bere-ne se o leiri a pompona kam. 2Baŋa Wɛ ma leiri o ta de amo o we:
“Popone a na le wonnu telo a bere‑m to jaja n ke tɔnɔ wone. Konto wó pa se balo na wó pa taane dem yi nɔɔna to ni ko kuri se ba de lwoni ba bere nɔɔna. 3Maŋa ta wo yi se wonnu telo a na wó le a bere‑m to ji chega. Ko nam bá dáane se maŋa kalo te na wó ji chega to ba ka yi. Ko ná nye de ko wora ko dáane mo de, daa‑n ta peene n cheigi, se ka maŋa kam wó seene ka yi se veera yam ji chega.
4Nii! Bere-n-tete nyena bam mo wó ga ba ŋwea. Wolo maama na jege chega Wɛ tei ne to wó na ŋwea o wo-dedoa kam ŋwaane.#Rom 1:17; Hiburu 10:37
5Jejegero #2:5 jejegero naa sana nam gane nɔɔna pa se ba to mo. Siu de maa tera ko pa bere-n-tete nyena bam. Ba jege puseŋa mo ye ba kaŋe ba nia kayɔn-yɔlɔ ne toone de yibeela to. Ba yeini ba le teene dedɛ se ba taa jega, ye ba wane de nɔn-bia bam.
6Dɛ wó ba de yi pa se ba na wane balo to jwoori ba bɛɛse nɔɔna bam konto. Ba wó de dende ba ma mɔne bere-n-tete nyena bam ye ba we, ‘Lɛɛro wo á baŋa ne, abam balo na gane nɔɔna ye á vere-ba se á ma á duni to. Abam wó ke konto taa se á vo á maŋe yei ne mo?’
7Balo á na jene ba tei ne to wó zaŋe lela ba jwoori ba jwoŋi ba wonnu tem. Ba ta wó pa á ŋwe tedwonna de á woli da. Abam dona mo lage ba jwoori ba wane abam, se foone zo abam. 8Abam wane teene dedɛ nɔɔna mo á go-ba ye á vere ba wonnu. De konto maama de, nɔɔna balo na daare to de mo lage ba jwoori ba vere abam de wonnu tem. Kokuri to, á ke tigura mo logo kom baŋa ne ye á go nabiina teene maama wone.
9Lɛɛro wo á baŋa ne, de á na ke dam á ma á vere wonnu zanzam se á ma á ji naduna to. Á ma‑á kwaane se abam sɔŋɔ kom taa zege lanyerane se ko yé chɔge. 10Abam na ke keim-balwaaro ye á chɔge nɔɔna dedɛ konto to, chaveera mo jaane abam dwi dem maama pa se á ga á ŋwea. 11Peero tem ba na mɛ ba ma lɔ á sane dem to, ko woli de bei selo ba na mɛ ba ke nayuni tem to, wonnu tem konto maama mo wó ŋɔɔne te ve abam bora.
12Lɛɛro wo á baŋa ne, dedaane á na go nɔɔna dedɛ, ye á daare á ke keim-balwaaro á ma á lɔ á teo kom á zege to. 13Nii! Paŋwa Tu Baŋa Wɛ nam mo wó pa se teene dem jejegero dwi maama ji kafɛ. Ba na yaare ba lɔ kolo maama ba zege to wó ji tentwarem. 14Baŋa Wɛ nenɔŋ-fɔrɔ kom wó ba ko lɔre jaja, pa logo baŋa su dedaane balo na yei-ko to, ne na na yɔɔre ba su naneo kom wo maama tei to mo.#Izaya 11:9
15Lɛɛro wo abam baŋa ne, dedaane á na pɛ se á dwonna nyɔ sa-dɛɛra ba su, se á laam wane á na ba kuri-nɔrɔ to. 16Baŋa Wɛ wó pa se á zula ji chaveera! O nam wó pa se á tete jwoori á nyɔ sa-dɛɛra bam á bugi, pa se á tiini á na á chaveera. O maa wó kwei na-zoŋa kalo na wo o jazem ne to o pa abam, se á nyɔ ka wone ye á na waarem. 17Abam mo zage Lebanon teeni dem á de tega ne, ye á daare á zeili kago-vara bam maama á go. Wɛ nam wó zage abam o de tega ne! Kago-vara bam wó jwoori ba ja foone ba ba abam baŋa! Kokuri to, abam go nɔɔna dedɛ ye á ma dam á chɔge logo baŋa teene dedaane de nɔn-bia bam maama.
18Jwoni jege bɛ nyɔɔre mo de pae nabiina? De za jege wolim dɔ mo ye nɔɔna maa jege teena de baŋa ne konto to? Jwoni fɔ vwa yerane mo. Nabiinu mo ke-de o zege, ye de nam ware se de puri de ni de ŋɔɔne. 19Lɛɛro wo abam baŋa ne! Abam yeini á kwei daa naa kandwɛ ye á tɛ á we, de zaŋe wɛɛne de jwoŋi abam de yage! Jwoni wae de ŋɔɔne na? Nabiinu mo kwei sabu-seŋa naa lu-nyenno o ma o kwoli de maama, ye de ba ŋwe.”
20 Baŋa Wɛ nam wo o telaao sɔŋɔ kom ne mo. Logo baŋa nɔɔna maama jege se ba taa ye chemm mo o yiga ne.#Lei 11:4; Zefania 1:7
Currently Selected:
Habakuki 2: xsmKBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
