Pulim 6
6
Nabiina déem tiini ba chɔge
1Ko déem maa wora ko wora ye nabiina puli ba su logo kom jei maama ye ba lo bukwa. 2Wɛyuu nɔn-donno ma tu tega baŋa ba na nabiina bukwa bam na tiini ba lamma tei. Ba ma di ba wone ba ma ba ji ba kaana. 3Baŋa Wɛ maa we, “Amo daa bá yage a siu kolo na pae ŋwea to taa wo nɔɔna wone se ko taa vei wuu. Ba jege se ba te mo. Ba ŋwea daa bá dwoni bena bi de finlei (120).”
4Maŋa kam konto ne de ka kwaga ne, wɛyuu nɔɔna bam dedaane nabiina bukwa bam déem na lage daane ye ba lo bia to, nɔn-sawaara maa wo logo baŋa ne. Ba déem bwoŋi-ba we ‘Nefili tiina’ mo.#Jeelim 13:33 Banto ye babɛ mo ye ba tiini ba na yere faŋa faŋa.
5 Baŋa Wɛ déem ma maane we nabiina tiini ba jege puseŋa, ye ba boboŋa de ba pale-kia maama tɔge lwarem yerane mo. 6Baŋa Wɛ wo ma tiini ko chɔge dedaane o na maŋe o ke nabiina o yage tega baŋa ne to. Ko ma daane‑o dedɛ ko ŋwaane. 7O laam ma boŋe o tete ne we, “Amo wó seene a chɔge woŋo kolo maama a na ke ye te ŋwe to. Ko ná ye nabiina de vara dwi delo maama, dedaane tega-veila de wo-korro dwi maama, ko ta woli de zuna bam dwi maama mo, a lage a saare-te a yage logo baŋa ne, amo wo na chɔge dedaane a na maŋe a ke-te to ŋwaane.”
8Se ko ná ye Noah, Baŋa Wɛ yi déem su wonto totoŋa yam.
Noah taane
9Noah dedaane o dwi dem taane mo tento.
Noah déem maa ye nɔn-ŋom ye o ba jege tusim. O maa tiini o me de Wɛ. 10O déem jege bu-baara batɔ: Sɛm, de Ham, dedaane Jafete.
11Logo baŋa nabiina maama déem pɔge mo Wɛ yiga ne, ye ba kikia ye vuvuga yerane. 12Wɛ ma na we nabiina yɔɔre ba ke lwarem mo, ye ba ba tɔge chwoŋa de fenfee tete de. 13O ma ta de Noah we, “Amo boboŋa jaane se a chɔge nabiina bam mo. Ko ye banto ŋwaane mo logo kom maama su de vuvuga yerane. Amo wó yɔɔre a chɔge-ba ko woli de logo kom wonnu maama. 14Konto to, beeri da-ŋonno n ma n ke dakaa kamunu se ka taa nye de nabworo. Nam ke-ka se ka taa jege di dedɛ ka wone, ye n laam daare n ma kɔtaale n taare ka wo kom dedaane ka kwaga kam maama. 15Nmo nam ná lage n ke-ka se n pa se ka taa ye tento: Ka dedɔrem seeni wó taa ye jatwogo de noa ni maŋem kuni bia yatɔ (300) mo. Ka kayɔlɔ kom seeni maa wó taa ye jatwogo de noa ni maŋem kuni finnu (50), ye ka baŋa seeni laam maa wó taa ye jatwogo de noa ni maŋem kuni fintɔ (30). 16Ke dɛ sedwonna n daŋe da n ma n pu dakaa kam yuu, se n pa se ko zaŋe choraam baŋa kam ne fee se ko maŋe de jatwogo de noa ni maŋem bedwe. Nmo nam ta wó ke-ka mo se ka taa jege kuri de tetare dedaane wɛyuu di, se n daare n bɔɔre ni ka daa dedoa ne. 17Kokuri, amo lage a pa se na-fɔrɔ mo ba ba pɛɛle tega kam maama ba chɔge woŋo kolo maama na jege ŋwea to. Kolokolo daa ba lage ko daare. 18Se ko ná ye nmo, amo lage a gwoni ni de nmo we nmo tete, de n bu-baara bam, de ba kaana bam, de nmo de n kaane, abam maama wó zo dakaa kam wone se ka taa ye nabworo ka pa abam. 19Nmo jege se n ja woŋo kolo maama na ŋwe to dwi maama wone balei balei mo n ja n zo dakaa kam wo, woŋo maama wo-bɛa dedaane wo-kana. Konto mo wó pa se te dwi dem ta ŋwe. 20Zuna maama de ba dwi, vara bam de maama de ba de dwi, dedaane tega-veila de wo-korro dwi maama, tento maama mo wó ba nmo tei dakaa kam wone, se ba dwi dem yé jei. 21Nam lage wodiu dwi maama n la n ke dakaa kam wone, se balo maama na wó zo to taa di, nabiina dedaane vara maama.”
22Noah déem ma ke kolo maama Wɛ na pɛ‑o ni se o ke to.#Hiburu 11:7
Currently Selected:
Pulim 6: xsmKBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
