Pulim 48

1Ko déem daa wo dáane ye ba ta de Josɛf ba we, “N kwo weele mo.” Josɛf ma ja o bu-baara Manasɛ de Efrayim, o woli da o vo se o daane o kwo jaweo kom. 2Ba na yi da to, mo nɔɔno tage de Jakob o we, “N bu Josɛf tu se o daane n peiga.” Jakob déem ma ke o tete o ke daane o zaŋe o peiga jei ne o jeini. 3O ma ta de Josɛf o we:

“Amo na wo Kanaan teo Luzi ne to, Dam-fɔrɔ Tu Wɛ wom déem veere o tete de amo. O déem ma swɛ amo swolim dáane. 4Wɛ ma daare o ta de amo o we, ‘Amo wó pa se n dwi puli se n na kɔgɔ dedɛ, ye nmo bia ji teene dedɛ. Amo ta wó daare a kwei tega kanto a pa‑m se n de n dwi dem taa tei-ka taa wuu.’#Pulim 28:13-14

5Tɔ, amo bu, amo nam lage se n ta‑n yei we, n bia balei bam n na loge Ejipti ne ye a déem ta wo tu ywo to wó ji amo bia mo. Efrayim de Manasɛ laam ye amo bia mo, nenɛɛne Ruben de Simeon na maŋe ba ye amo bia tei to.#Jeelim 1:20-43 6Nmo daa‑n ná loge bia badwonna, se ba laam taa ye n tete bia. Ko nam ye Efrayim de Manasɛ yera baŋa ne mo ba de wó jwoŋi ba tega kam popɔra. 7Amo déem na zege Mesopotamia ne a maa jwoori to, a wo déem tiini ko chɔge de n nu Racheli na tege Kanaan teo kom ne to ŋwaane mo. Dé na wo chwoŋa ne dé vei to, o tega ye ba suli‑o chwoŋa kam yuu ne mo, ko bwola de Eferata.” (Eferata ye Bɛtelehem mo).

8Jakob déem ma na Josɛf bu-baara balei bam ye o bwei o we, “Banto ye bera mo?” 9Josɛf ma leiri o kwo we, “Ba ye bia balo Wɛ na pɛ amo ywo to mo.” Jakob ma ta o we, “Pa se ba yi a yera se a sɔɔle Wɛ swolim a ke ba yuu ne.” 10Jakob déem nam tiini o kwe mo, ye o yia déem wora ya dwia. Josɛf ma ja o bia bam o yi o yera. O kwo déem ma kukwori-ba lanyerane. 11Jakob ma ta de Josɛf o we, “Amo déem daa maŋe a ba teene se a na nmo tete yibia. Nam nii! Wɛ laam pɛ se a na n bia bam de a woli da.”

12Josɛf déem ma pa se o bia bam fɔɔre dáa o kwo nɛ baŋa ne. O tete ma tiiri o kwo yiga ne ye o chɔɔle o yibia tega ne. 13Josɛf ma pa se o bia bam zege Jakob sɛ sem ne. Efrayim wo Jakob jagwia ne ye Manasɛ maa wo o jazem ne. 14Jakob déem ma gare o jazem dem o daŋe Efrayim yuu ne, ye wonto mo ye nyaane wom. O ma daare o kwei o jagwia kam o daŋe Manasɛ yuu ne. Wonto nam mo ye bu-kwea kam. 15O ma daare o kwei Wɛ zaane o ma swɛ Josɛf swolim ye o we:

“Wɛ wó ke zaane o ke bia banto yuu ne.

O ye Wɛ wolo amo kwoa Abaraham de Izaak déem na sɛ ba pa‑o to mo.

Wɛ wom konto mo nii amo baŋa ne ne nayero tei

a ŋwea maama wone se ko yi zem.

16Amo cham dwi maama wone,

o maleka kam mo yeini o le-ne de wone.

Wɛ wom konto wó swɛ bakeiri sem swolim.

Wɛ wó pa se nɔɔna taa tɔge bia banto baŋa ne ba guli amo yere,

ko woli de amo kwoa Abaraham de Izaak yera yam.

Wɛ wó pa se ba dwi puli dedɛ logo baŋa ne.”

17Josɛf na nɛ we o kwo jazem dem daŋe Efrayim yuu ne to, mo ko tiini ko daane‑o. O déem ma kwaane se o dɔne o kwo jazem dem Efrayim yuu ne, se o ja o vo o daŋe Manasɛ yuu ne. 18Josɛf ma ta de o kwo we, “A kwo, wonto mo ye bu-kwea kam. Nam kwei n jazem n daŋe wonto yuu ne.” 19O kwo wom ma ve ye o we, “Amo bu, a yei ko ni ne. Wonto dé wó seene o ji nɔn-kɔgɔ. O nyaane wom nam wó taa daga o dwoi‑o, ye o dwi dem mo wó ji teene dedɛ.”

20Dento dɛ dem ne Jakob ma sɔɔle Wɛ swolim o ke ba yuu ne ye o we, “Isarele tiina ná yeini ba kwei Wɛ zaane ba ma swɛ wolo maama swolim, ba wó taa tɔge á yera yam ŋwaane ye ba we, ‘Wɛ wó pa se n ta‑n ye nenɛɛne Efrayim dedaane Manasɛ na ye tei to.’ ” Ko ke konto mo ye o pa se Efrayim kɛ Manasɛ yiga.

21Jakob déem ma ta de Josɛf o we, “Ko laam yi amo toone. Wɛ nam wó taa wora abam tei ne se o ja abam o jwoori á nabaara tega kam se á ta‑á jei da. 22Ko nam ná ye nmo tete, n dwoi n chorro tem maama. A kwei peero laŋa kalo a na mɛ a se-zɔɔ dedaane a taŋa a vere-ka Amori tiina bam tei ne to mo a pa‑m.”

Currently Selected:

Pulim 48: KBG

Highlight

Copy