Pulim 40

Josɛf bere dendwea kuri

1Ko maa wora ko wora, Ejipti Pɛ wom tontoŋena balei déem ma ke ba chɔge o yiga. Ba dedoa ye wolo na yeini o kwei na-zoŋa de ka wo sana bam o ke Pɛ wom jeŋa ne to. Wowom wom maa ye wolo na nii Pɛ wom bworobworo fɔgem baŋa ne to. 2Pa-faro wom bane ma zaŋe de o tontoŋena balei bam konto. 3O déem ma pa ba pe-ba ba yage peena diga ne, Pɛ che-tara yiga tu wom tei ne. Dáane mo ba déem ya lwoori yiga ba pe Josɛf. 4Ba na pe-ba ye ba zo jei sem ne to, mo peena diga dedɛɛro wom ma kwei Josɛf o yage ba tei ne ye o zeini-ba de kolo ba na lage to.

Ba maa wora konto taa. 5Tete dedoa ne, wolo wom na ke sana Pɛ wom jeŋa ne to dwɛ dendwɛ mo, ye wolo wom na nii Pɛ wom bworobworo fɔgem baŋa ne to de dwɛ o nyem, dendwɛ maama de de kuri. 6Tega na poore to, Josɛf ma vo se o daane ba peiga. O déem ma maane we woŋo tiini ko daane-ba dedɛ. 7O déem ma bwei Pa-faro wom tontoŋena balei bam we, “Bɛ mo kea ye abam yibia zem nyɔne konto?” 8Ba ma leiri‑o we, “Debam maama dwɛ dé dendwea mo, ye nɔɔn-nɔɔno laam tera se o ta ya kuri o bere debam.” Josɛf ma ta de-ba we, “Wɛ mo ye wolo na bere nɔɔna dendwea kuri to. Ta-na á dendwea yam á bere-ne.”#Danyeli 2:27-28

9Wolo ya na ke sana pɛ wom jeŋa ne to ma ta o dendwɛ dem o bere Josɛf. O déem maa we, “Amo na dwɛ dendwɛ dem to mo a nɛ we tio kolo bia na wae ba ke sana to mo zege a yiga ne. 10Ko maa jege nɛ setɔ. Vɔɔro ma nwoŋi nɛ sem ne ye punnu de nwoŋi lela. Ko wo dáane de ko na leigi bia, ye ba de yɔɔre ba be lanyerane. 11Amo ma na we a zei Pa-faro wom na-zoŋa kam mo. A ma gwori tio-bia bam ye a ŋoke-ba a ke nyoa na-zoŋa kam ne. A laam ma kwei a pa Pɛ wom.”

12Josɛf déem ma ta‑o we, “Dendwɛ dem kuri mo tento: Tio kom nɛ setɔ sem ye da yatɔ mo. 13Da yatɔ wɛɛne Pa-faro wom wó le‑m pa se n yuu jwoori ko zeiŋi. O maa wó pa se n jwoori n ta‑n toŋa n faŋa totoŋa yam mo. Nmo wó ta‑n ke Pa-faro wom sana bam o jeŋa ne, ne nmo ya na yeini ne ke tei boboa ne to mo. 14Wonnu nam ná kwei chwoŋa te pa‑m, se n guli amo gula. Duri amo yibwona se n ta a taane n bere Pa-faro wom. Konto wó pa se ba pore-ne se a nwoŋi peena diga kanto ne. 15Kokuri to, ba jaane-ne mo ba vere Hiburu tiina teo kom ne ba ja ba ba ywo-seeni. Amo nam na yi ywo-seeni to, a wo ke kolokolo a chɔge se ba pe amo jeiga kanto wone.”

16Tontoŋeno wolo na nii Pɛ wom bworobworo fɔgem baŋa ne to ma maane we o dwoŋi wom dendwɛ dem kuri lamma de pa‑o. O déem ma ta de Josɛf o we, “Amo de dwɛ we: A zeŋe bworobworo kayɛ setɔ mo a yuu ne, se nam teini da-baŋa ne mo. 17Kayaa kalo na wo se maama baŋa ne to ma su de wo-laaro dwi dwi se Pa-faro wom ya di. Zuna laam maa tui ba di wodiiru tem, ye te ta wo amo yuu ne.”

18Josɛf maa we, “Nmo dendwɛ dem de kuri mo tento: Kayɛ setɔ sem ye da yatɔ mo. 19Da yatɔ wɛɛne Pa-faro wom wó le‑m o pa se n yuu zeiŋi. Ba ta wó kuuni n ba ba yage tio yuu ne pa se n te mo, se zuna laam taa tui ba di n ya-nɔna yam.”

20Da yatɔ yam déem ma seene ya yi, ye ko ye Ejipti Pa-faro wom lora dɛ mo. O ma ke kuri o pa o nakwa maama. O déem ma pa se ba pore o tontoŋena balei bam, se ba ba ba jeeri o nakwa bam tei ne. 21Pa-faro wom déem ma seene o pa se sana tu wom jwoori o totoŋa jei se o taa ke sana Pɛ wom jeŋa ne nenɛɛne ko na ye tei faŋa to. 22O déem ma daare o pa se ba kuuri bworobworo tu wom ba lei tio yuu ne ba go. Ko maama déem ke ko maŋe de Josɛf na tage ba dendwea yam kuri tei o bere-ba to mo. 23Ko nam ná ye Pɛ wom sana tu wom, o yɔɔre o swei Josɛf swia mo.

Currently Selected:

Pulim 40: KBG

Highlight

Copy