Pulim 18

Veira batɔ tu Abaraham tei

1Maŋa kalo Abaraham déem na zoore Mamere tei-kamunnu tem teiŋa ne to, dɛ dedwe o maa jei o vwei dem ni ne. Baŋa Wɛ déem ma ba o tei. Maŋa kalo wea na dɔge yupare ne to mo konto. 2Abaraham ma kwoni o yuu wɛɛne ye o na nɔɔna batɔ na zege ba twɛ ded‑o. O na nɛ-ba to, mo o ke lela o zaŋe o vwei dem ni ne o jeeri-ba ye o tiini o chɔɔle o yibia tega ne o jɔɔne-ba.#Hiburu 13:2

3O maa we, “Amo Teiru, nenɛɛne n yi ná su amo kikia, se n yé galese amo baŋa ne n kɛ. 4Sɛ se a ja na fenfee a ba se á ma á zare á nɛ, se á daare á jeini tio konto kuri ne á sii. 5Abam zuli amo mo ye á ba amo tei. Yage-na se a lage wodiu a pa abam se á di se á yera jwoori se á laam ta‑á kɛa.” Ba ma leiri we, “Tɔ, ke nenɛɛne nmo na tage tei to.”

6Abaraham ma ke lela o yi Sarah tei vwei dem ne ye o we, “Ke lela n kwei mun-bwei bwɛ setɔ n viiri n ma n wɔ bworobworo.” 7O daa ta ma ke lela o zo o naane dem wo o kuri na-chwɛ delo na lamma to, o ja o pa o tontoŋena se ba ma ke wodiu lela. 8O ta ma kwei nayel-pepala, dedaane nayele-na, de wodiu kom o zege ba yiga ne o pa-ba.#Yiga tiina 6:19 Nɔɔna bam déem ma jei ba di ye o zege ba tei ne tio kom kuri ne.

9Ba ma bwei‑o we, “Se n kaane Sarah wo yei ne mo?” O de ma leiri we, “O wo vwei dem wone.” 10Ba dedoa ma ta o we, “Amo wó jwoori a ba nmo tei bene ne maŋa kanto wone. Ka maŋa ne de nmo kaane Sarah wó taa jege bakeira o jeŋa ne.” Sarah déem ya dale vwei dem ni ne mo ba kwaga ne ye o cheigi ba taane dem.

11Abaraham de Sarah déem ya maŋe ba kwe ye ba bena yam de gaale. Sarah déem kɛ bu-lore. 12Sarah ma mɔne o wone ye o boŋe boboŋe dento nenɛɛne, “Amo laam na kwaare maŋa kalo ne ye amo diga tu wom de tiini o kwe to mo amo laam lage a ni ywoni dento na?”

13 Baŋa Wɛ ma bwei Abaraham we, “Bɛŋwaane mo Sarah mɔne ye o daare o ta we ‘A laam na kwe tento to, amo wó wane a lo bu na?’ 14Woŋo wora ko na tiini ko chamma se amo Baŋa Wɛ toŋe na?#Matiyu 19:26 Nenɛɛne ka maŋa kam ná yia bene wɛɛne, amo wó jwoori a ba nmo tei, dedaane Sarah laam jege bakeira o jeŋa ne.”

15Foone ma ja Sarah ye o fo o ni o we, “Amo wo mɔne.” O de maa we, “Chega to, n mɔne.”

Abaraham lwoori Wɛ Sodom ŋwaane

16Nɔɔna bam ma zaŋe se ba kɛ, ye ba laam guni ba nii Sodom seeni. Abaraham de ma vo se o yage-ba chwoŋa ne se ba de laam taa kɛa.

17 Baŋa Wɛ ma ta o tete ne we, “Ko wó ke tɛ mo se amo seigi a na boŋe se a ke tei to ye Abaraham yeiri ko ni ne? 18Abaraham dwi dem wó ji te-zɔŋɔ kolo na dana to mo. Wɛ wó da wonto baŋa ne mo o swɛ logo kom baŋa teene dem maama swolim.#Pulim 12:3; 22:18 19Kokuri to, amo mo kuri‑o, se o bere o bia de o sɔŋɔ kom maama na wó saŋe o kwaga ne to, se ba taa tɔge Baŋa Wɛ chwoŋa kam ba daare ba taa toŋe kolo na maŋe de kolo na ye chega to. Konto mo wó pa se amo Baŋa Wɛ na pwooli se a ke tetei maama a pa‑o to wane ko toŋe chekke.”

20 Baŋa Wɛ laam ma ta o we, “Nɔɔna tiini ba keeri ba jare amo Sodom de Gomora ŋwaane se ko gaale. Ba wo-lwanno totoŋa de ta maa tiini te daga. 21Konto ŋwaane mo amo lage a vo se a nii, ba totoŋa yam seene ya lwara nenɛɛne nɔɔna keira kam na bere tei to na. Ko ná dae konto, amo wó lɔre ko ni ne.”

22Nɔɔna balei bam ma pipiri ba kwei Sodom chwoŋa kam ba maa kɛa. Abaraham de déem ma maŋe dáane o zege Baŋa Wɛ yiga ne. 23Abaraham ma vaŋe o tete o twɛ Baŋa Wɛ ye o we, “Konto, nmo wó saare nɔn-laaro tem maama mo n woli de puseŋ-nyena bam na? 24Se nɔn-laaro ná yi finnu ye ba wo teo kom ne, nmo wó saare ko maama n yage mo na? N bá‑n pa se ko ta wora, nɔn-laaro finnu telo na zoore ko wone to ŋwaane na? 25A yei we nmo bá‑n go nɔn-laaro de puseŋ-nyena n gwaane daane, ye ko wó taa nye de n pɛ se nɔn-laaro de puseŋ-nyena bam taa ye bedwe mo. Amo yei we ko bá ke konto! Nmo na ye wolo wom na bore logo kom maama bora to, nmo jege se n ke kolo na tɔge chega chwoŋa to mo.”

26 Baŋa Wɛ ma ta we, “Ne a ná nɛ nɔn-laaro Sodom teo kom ne pa se ba yi finnu, amo wó da banto ŋwaane se a yage se teo kom daa yé na chɔgem.”

27Abaraham daa ma ŋɔɔne we, “Amo Teiru, amo dae kolokolo nmo yiga ne. A nye de teero dedaane tentwarem mo. A laam nam nɛ baare se a ŋɔɔne dede‑m. 28Se nɔn-laaro tem ná muri finnu kom de nɔɔna banu, nmo wó ta we, nɔɔna banu bam na muri to ŋwaane se n chɔge teo kom maama na?” O maa we, “Amo za ná nɛ nɔɔna finna-banu da, a bá chɔge-ko.”

29Abaraham daa ma ŋɔɔne we, “Se nɔɔna finna yerane mo ná wora?” O de ma leiri we, “Nɔɔna finna bam ŋwaane amo bá chɔge-ko.”

30Abaraham laam maa we, “Jan ja! Amo Teiru, yé pa se n bane zaŋe. Nam sɛ se a ŋɔɔne dede‑m. Se nɔɔna fintɔ yera mo ná wora?” O ma leiri we, “A bá ke kolokolo nenɛɛne a ná nɛ nɔn-laaro fintɔ jei sem ne.”

31Abaraham maa we, “Nmo maŋe n pa se a na baare se a ŋɔɔne de nmo. Yage se a bwei a nii, se n ná nɛ nɔɔna finlei mo da?” O de ma ta we, “Finlei kom ŋwaane, a bá chɔge-ko.”

32Abaraham laam ma ta we, “Ja! Amo Teiru, yé pa se n bane zaŋe, se a lage a ŋɔɔne bedwe dento yerane mo. Se nɔɔna fuga tete mo ná wora?” Baŋa Wɛ ma leiri we, “Nɔɔna fuga kam konto ŋwaane, amo bá chɔge-ko.”

33 Baŋa Wɛ na ŋɔɔne dedaane Abaraham o ti konto to, o ma viiri. Abaraham de ma jwoori sɔŋɔ.

Currently Selected:

Pulim 18: KBG

Highlight

Copy