Pulim 13

1Abaram de o kaane déem ma ja ba jejegero tem maama ba nwoŋi Ejipti teo ne. Ba ma kwei chwoŋa ba vo baŋa seeni ba vo ba yi kagoa kalo na wo Kanaan tega-kuri seeni to. Lot de ma tɔge ded‑o o kɛ. 2Abaram déem ma tiini o duni de vara dwi dwi, ye o ta jege lu-nyenno dedaane sabu-seŋa wonnu dedɛ.

3O na zege kagoa kam seeni to, Abaram déem yeini o kare o vei mo, o zege jeiga dedoa o vo jeiga kadwoŋi ne. O ke konto mo taa o vo o yi Bɛtel de Ayi tetare laŋa ne. Dáane mo o ya maŋe o pu o vwei da, 4ye o lɔ bimbini da to.#Pulim 12:8 Abaram ma bwoŋi Baŋa Wɛ yere o zuli‑o dáane.

5Abaram choro bu Lot de déem maa tɔge de Abaram o kare o via. O de ya jege peeni, de bone, de naane, ko woli de tontoŋena. 6Ba na zoore daane konto to, tega kam ya daa ba daga ka pa-ba, ba vara bam na tiini ba gaale to ŋwaane. Ba daa ware se ba taa zoore daane jeiga dedoa. 7Abaram nayera bam de Lot nayera bam déem ma mage ni-kantɔgɔ daane. Maŋa kam konto ne mo Kanaan tiina bam de Pɛrizi tiina bam ya daa ta zoore jei sem konto ne.

8Abaram laam ma ta de Lot we, “Debam ye chorro mo. Pa se dé che jara debam laŋa ne, se amo nayera bam de nmo nayera bam yage ni-kantɔgɔ daane. 9Tega kam daga dedɛ ye ka tigi n yiga ne palalala. Ko dae chega na? Nam pa se dé pwɛ chwei. Nmo ná maa n vei jagwia seeni, amo wó vo jazem seeni. Ko daare nmo daa‑n ná maa n vei jazem, se amo vo jagwia seeni.”

10Lot déem ma kwoni o yuu o nii o na Jɔdan bwolo kom se ko taa vei Zoara seeni to. O ma maane we tega kam tiini ka jege na nenɛɛne Baŋa Wɛ tete teeni kara kam mo. Ka ta maa ye te-laao nenɛɛne Ejipti tega kam na ye tei to. Maŋa kam konto ne Baŋa Wɛ déem ta wo chɔge Sodom de Gomora teene dem.#Pulim 19:23-29 11Lot ma nii o kuri Jɔdan bwolo kom konto maama o pa o tete. O ma zaŋe o kwei chwoŋa o ma yɔɔre wɛ-puli jei sem ne.

Abaram de o choro kom ma pwɛ da-chwei. 12Abaram déem maŋe Kanaan teo kom ne, ko daare ye Lot vo o zoore teene delo na wo bwolo kom ne to tetare ne. O ma vo o twɛ Sodom o ja o vwei dem o vo o pu jei sem konto ne. 13Tɔ, Sodom tiina bam déem maa tiini ba jege puseŋa ye ba toŋe wɛleera Baŋa Wɛ yiga ne pa se ya gaale.

Abaram zaŋe o vo Heboron

14Lot na viiri to, Baŋa Wɛ déem ma ta de Abaram we, “Zege n na wo mɛ to se n kwoni n yuu n nii jei sem maama, n yiga ne, de n kwaga ne, ko woli de n jazem de n jagwia. 15A lage a pa nmo de n dwi dem tega kam konto maama mo, se á ta‑á tei taa wuu. 16Amo wó pa se n dwi dem taa daga dedɛ nenɛɛne logo baŋa kasolo kom na daga tei to. Nɔɔn-nɔɔno bá wane nmo dwi dem o ga o ti. 17Nam zaŋe n ta‑n vei n kaare tega kam maama, se n lɔre ka na dɔra tei to dedaane ka na yala tei maama to, kokuri to, a lage a kwei ka maama mo a pa‑m se n ta‑n tei.”

18Abaram ma zaŋe dáane de o nɔɔna bam maama ye o laam vo Heboron seeni o zoore Mamere tei-kamunnu tem na wo mɛ to. O ma lɔ bimbini dáane se o ma zuli Baŋa Wɛ.

Currently Selected:

Pulim 13: KBG

Highlight

Copy