Nwoŋim 9

5. Vara toone

1 Baŋa Wɛ déem daa ma ta de Moses o we, “Véi Pa-faro wom tei n ta we, ‘Baŋa Wɛ na ye Hiburu tiina bam Wɛ wom to ni dem mo tento:

Pa amo nɔɔna bam chwoŋa se ba viiri, se ba vo ba zuli-ne. 2Nmo nam ná wo sɛ se ba viiri, ye n cheiŋi-ba, 3Baŋa Wɛ wó ma o dam o ja jawe-chɛɛro mo o ba o yage á vara bam maama baŋa ne. Ko ná ye á sisei, de á bonɛ, de á kona, de á naane, de á pei, dedaane á bone, jaweero wó ja te maama pa se te te. 4Baŋa Wɛ nam wó pa se popɔra mo taa wora Ejipti tiina vara bam dedaane Isarele tiina vara bam tetare ne. Ko ná ye Isarele tiina vara bam mo, ba dedoa tete ba lage o te.

5 Baŋa Wɛ maŋe o tiŋi dɛ mo se ko ke konto, ye o ta we, Jwa ne, omo wó pa se ko ke Ejipti teo ne.’ ”

6Tega déem na poore to, Baŋa Wɛ ma seene o ke o na wuuri o ta tei to. Ejipti tiina vara bam maama ma te. Se ko ná ye Isarele tiina vara bam, dedoa tete déem wo tege. 7Pɛ wom ma toŋe nɔɔna se ba nii. O ma maane we Isarele tiina vara bam dedoa tete wo tege. De konto de, o bochare ta dana mo, ye o ve se o pa nɔɔna bam chwoŋa se ba viiri.

6. Ŋɔn-pwoni

8 Baŋa Wɛ daa ma ta de Moses de Aron o we, “Zwɛ-na tentwarem, se á ja á vo Pɛ wom tei. Abam ná yi da, se Moses zege pɛ wom yiga ne o dole tentwarem dem o yage wɛɛne. 9Tentwarem dem wó ji fwogo mo wɛyuu ne ye te jage te yi Ejipti teo kom maama. Ko ta wó pa se ŋɔn-pwoni jeini nabiina dedaane vara yera ne se daane-ba logo kom jei maama ne.” 10Ba ma seene ba kwei tentwarem dem ba ja vo Pɛ wom tei. Moses laam ma kwei-te o ta o yage wɛɛne, ye te pa se ŋɔn-pwoni jeini nabiina dedaane vara yera ne se daane-ba. 11Liri keira bam déem wo wane ba vo ba zege Moses yiga ne, ŋɔn-pwoni sem na leigi ba yera ne, de Ejipti tiina bam maama yera ne to ŋwaane. 12Baŋa Wɛ déem ma pa se Pɛ wom bochare taa dana, ye o wo sɛ se o cheigi Moses de Aron taane. Baŋa Wɛ nam maŋe o ta de Moses we ko wó taa ye konto mo.

7. Do-kandwa

13 Baŋa Wɛ déem ma ta de Moses o we, “Jwa zezeŋa ne se n vo n jeeri Pɛ wom n che o chwoŋa n ta‑o we, ‘Baŋa Wɛ na ye Hiburu tiina bam Wɛ wom to ni dem mo tento:

Pa a nɔɔna bam chwoŋa se ba viiri se ba vo ba zuli-ne. 14Nmo ná wo sɛ, amo laam wó pa se cham tiini de yi nmo tete yera, ko woli de n nakwa bam de n nɔn-bia bam maama. Ko maa wó pa se nmo lɔre we nɔɔn-nɔɔno tera logo baŋa ne o na maŋe de amo. 15Amo yi se a kwei a jeŋa a fere nmo de n nɔn-bia bam maama pa se jawe-chɛɛro tiini te ja abam. Amo ya ná ke konto, abam dwi dem ya wó saare logo kom baŋa ne. 16Ko nam na ye tei to, woŋo kolo ŋwaane amo na pɛ chwoŋa se n ta‑n wora to mo ye se a tɔge nmo ŋwaane a bere nɔɔna a dam dem na mae tei to, ye a daare a jwoŋi yere logo baŋa jei maama ne.#Rom 9:17 17Nmo nam ta pae n tete kamunni mo ye n cheiŋi amo nɔɔna bam se ba yé viiri. 18Ta‑n yei we, amo jwa wó pa se do-kandwa tiini ya to á tega kam ne. Ko na zege Ejipti teo kom boboa ne to se ko yi zem, ko dwi ta wo fɔge ko ke. 19Nam pa n nɔɔna bam ni se ba ja ba vara dedaane ba wonnu telo maama na wo pwooni yiga ne to, ba ba ba ke ba sam dem wone. Kokuri to, do-kandwa yam wó vwei vara de nabiina balo maama na wo pwooni yiga ne to mo pa se ba maama te.’ ”

20Pɛ wom nakwa badaara déem ma fone de Baŋa Wɛ taane dem. Banto ma ke lela ba vo ba pa se ba kabɛ sem dedaane ba vara maama ba ba zo sam dem wone. 21Ba badwonna yiga déem tera de Baŋa Wɛ taane dem ye ba yage ba kabɛ sem de ba vara bam pwola ne.

22 Baŋa Wɛ ma ta de Moses o we, “Twe n jeŋa n yɔɔre wɛyuu ne, se do-kandwa laam to Ejipti teo kom maama ne. Ya lage ya to ya mage nabiina, de vara, dedaane wodiiru telo na wo Ejipti tiina kare sem ne to mo.” 23Moses déem ma twe o nacheiga kam wɛyuu ne. Baŋa Wɛ ma toŋe do-napana, dedaane do-kandwa. Doa kam daa ta ma pepele ka bage tega kam. Baŋa Wɛ déem ma pa se do-kandwa tiini ya to Ejipti teo kom ne.#Josua 10:11 24Ka ma tiini ka wuuri jei maama, ye ka ta pepele taa. Ko na zege Ejipti teo kom boboa ne to, do-fɔrɔ konto dwi ta wo fɔge ko ke logo kom ne. 25Do-kandwa yam déem ma mage woŋo kolo maama na wo Ejipti teo kom pwooni yiga ne to. Ya déem chɔge nabiina de vara maama, ye ya ta chɔge wodiiru de teeni delo maama na nwoŋi tega kam baŋa ne to. 26Ko daare Gosen laŋa kam yerane mo, do-kandwa yam déem wo yi da. Dáane mo Isarele tiina bam déem nam zoore to.

27Ejipti Pɛ déem ma toŋe o bwoŋi Moses de Aron ye o ta-ba o we, “Amo laam lɔre we a tusi mo, ye Baŋa Wɛ jege chega. Ko ná ye amo de a nɔɔna bam, debam ba jege bora. 28Nam lwoori-na Baŋa Wɛ á pa debam-na, se dé yera laam mo chɛ de do-kandwa yam dedaane do-napana kam. Amo de laam wó pa abam pwola se á viiri. Abam daa dae se á maŋe ywo-seeni.” 29Moses ma leiri o we, “Amo ná nwoŋi teo kom wone, a laam wó zeiŋi a je sem wɛɛne a lwoori Baŋa Wɛ se do-napana kam yage bagem. Do-kandwa yam de daa bá taa nena. Konto mo wó pa se nmo lɔre we logo baŋa maama ye Baŋa Wɛ nyem mo. 30Amo nam yei lanyerane we nmo de n nakwa bam ta ba kɔre Yuu-tu Baŋa Wɛ.”

31Ko déem na ke tei to, kanzɛ#9:31 kanzɛ = flax sem de chaara#9:31 chaara = barley yam chɔge mo, kokuri kanzɛ sem jege se punnu mo. Chaara yam de ma be te maŋe de do-kandwa yam. 32Ko nam ná ye banina#9:32 banina = wheat kam dedaane ka dwi dem maama, kanto wo tɔge ka chɔge, ka daa ta na wo bege to ŋwaane.

33Moses ma nwoŋi Pɛ wom tei ne o vo o nwoŋi teo kom wone. O ma vo o zeiŋi o je sem Baŋa Wɛ yiga ne o lwoori‑o. Do-napana kam dedaane do-kandwa yam ma kwori. Doa kam déem daa wo nege tega kam baŋa ne. 34Pa-faro wom na nɛ we doa kam de do-kandwa yam daa ba nena, ye do-napana kam de daa ba bage to, o ma jwoori o tusi. O de o nakwa bam maama ma pa se ba bochara dana. 35O bochare na dana to, o ve se o pa Isarele tiina bam chwoŋa se ba viiri. Baŋa Wɛ nam maŋe o pa se Moses lɔre we ko wó taa ye konto mo.

Currently Selected:

Nwoŋim 9: KBG

Highlight

Copy