Danyeli 7

Baŋa Wɛ na le wonnu telo o bere Danyeli to

Danyeli dwɛ o na jurru tena

1Pɛ Bɛlesaza boboa bene dem o na di Babilon teo paare to wone, mo Danyeli peini o sara ne o dwɛ. O ta ma na veera, ye o popone ya maama o tiŋi.#Danyeli 5:1

2Danyeli ma ta o we:

“A na tigi a dɔa tete dedwoŋi ne to, mo a déem nɛ veera we vo-dɛɔ tiini ko zaŋe jei maama ne ko dole nane-fɔrɔ na bam ko pɔgele-ba. 3Jurru kamunnu tena ma zege na bam wone te nwoŋi pwooni ne. Juru maama nam yɔɔre ko ye ko yera mo dedaane tedwonna tem.

4Boboa juru kom nye ne nywoŋo mo, ye ko jege maao vɔna. Amo na zege a nii-ko maŋa kalo to, mo ko vɔna yam gwori ya to. Ba laam ma ja juru kom ba pa ko zege ko nɛ selei baŋa ne, ne nabiinu zega na ye tei to. Ba ma daare ba kwei nabiinu boboŋa ba ke ko yuu ne.

5A ma nii a na juru telei tu wom na nye de faao#7:5 faao = bear na ye tei to. Ko déem gwoori ko zega ko saŋa dedoa baŋa ne mo. Ko maa jege saŋa-kwi setɔ ye se gare ko ni ne. Ba ma pa-ko ni ba we, ‘Nam zaŋe n done nɔna dedɛ ne n na lage tei to.’

6A ta na wora a nii to, a ma na juru tetɔ tu wom na nye de gweeru na ye tei to. Ko maa jege vɔna yana ko kwaga kam ne, ne zuŋa vɔna na ye tei to. Ko ta maa jege yum tena. Ba ma kwei paare dam ba pa-ko se ko taa jege ko di.#Gurim 13:1-3

7Tete dem konto ne a na nɛ veera yam konto to, mo a ta nɛ juru tena tu wom ko de na nwoŋi. Konto keim yɔɔre de tiini de chamma mo ye ko dam gaale pa se ko jege foone dedɛ. Ko ta jege yeili kamuna na ye luuru to mo, ye ko jege-ya ko yare wonnu ko dona. Ko maa nɔne telo maama na daare to. Juru kom konto déem ye ko yera de tedwonna tem mo, kokuri to, ko jege nyea fuga mo ko yuu ne.

8Amo na zege da ye a nii nyea yam to, mo a nɛ nyeŋ-balaŋa kadwoŋi na tage ka nwoŋi ka wo ya tetare ne. Nye sedwonna sem setɔ ma gɔ se kuri dem seeni, se kanto leiri ka zege sento ya na wo mɛ to. Nyeŋa kam konto déem jege yia mo na nye de nabiinu yia, ye ka ta jege ni se ka taa ma ka ŋɔɔne ni-wɛɛle taane.

9A déem ta na zege a nii to, mo a nɛ tento:

Ba ma kwei paare yitunnu ba zege,

ye wolo na maŋe o wora

faŋa faŋa to ma vo o jeini

o yituŋu baŋa ne.

Gwaaro telo o déem na zo to

tiini te peere mo cha.

O yu-ywei de maa peere

ne lɔŋɔ na ye tei to.

O yituŋu kom maama déem ye mini yerane mo.

Ko nɛ sem de maa jege wo-gigillu,

ye te de jaane mini.

10Mini mo yɔɔre de zege o tei ne

de foore de nwoŋi.

Nɔɔna morro dedɛ maa zege

se ba ke o na lage tei to.

Kɔgɔ kuni morro fuga laŋa ne

de maa wo o yiga ne.

Bora borem maŋa kam

déem ma yi,

ye ba laam puri twanno se ba nii.#Gurim 5:11

11Amo déem ta zege a nii mo, nyeŋ-balaŋa kam ta na kare ka ŋɔɔne ni-wɛɛle taane to ŋwaane. A na zege a nii konto to, mo ba jaane juru tena tu wom ba go, ye ba daare ba dole ko yera yam ba yage mini wone se ya chɔge. 12Ba déem nam jwoŋi jurru tetɔ tedwonna tem dam dem mo ba daare-te. De ko de, ba pɛ-te chwoŋa se te ta taa wo ŋwea wone se te maŋa kam ba yi.

13Amo ta na nɛ kolo tete dem veera yam wone to mo tento:

A nii a na nɔɔno na nye

ne nabiinu bu to.

O tɔge de wɛyuu kunkwonnu tem mo o vei o beene.

O ma vo o yi wolo na maŋe

o wora faŋa faŋa to tei,

ye ba ja‑o ba vo ba zege

wonto yiga ne.

14Ba ma kwei dam, de nenɔŋ-fɔrɔ, de paare ba pa‑o,

se nɔɔna maama sɛ ba pa‑o,

ba ná nwoŋi dwi delo maama ne,

de teo kolo maama ne,

ye ba ná ŋɔɔne taane delo maama de.

O maa jege dam se o taa tei nɔɔna taa wuu.

O paare dem maa wó taa wora taa

de daa bá chɔge!”#Matiyu 26:64; 28:18; Gurim 11:15

Danyeli veera yam kuri na ye tei to

15“Amo Danyeli na nɛ veera yalo to yɔɔre ya so-ne mo, pa se a boboŋa vugimi. 16Amo ma fɔɔre a yi balo na gilimi ba zege da to wone dedoa ye a bwei‑o se a lɔre keim dem konto maama kuri chekke. O de ma tole wonnu tem maama kuri o bere-ne, 17ye o we, ‘Jurru kamunnu tena tem maama zege te pae pwa bana mo de ba na wó di paare tega baŋa ne tei to. 18Ko nam ná ye Yuu-tu Wɛ wom nɔn-laaro tem, banto wó jwoŋi o paare dem ba taa tei se ko taa vei wuu.’

19Amo nam yɔɔre a lage se a fɔge a lɔre juru tena tu wom laŋa kam mo chekke, konto na ye ko yera de tetem tem to ŋwaane. Ko tiini ko jege foone mo. Ko yeila ye luuru. Ko ja-fwe sem de maa ye channa. Ko maa yare woŋo maama ko done ko chɔga, ko daare ko jege ko nɛ ko nɔne wonnu telo ta na daare to. 20A ta lage se a lɔre juru kom yuu nyea fuga kam kuri, dedaane nyeŋa kalo na saŋe ya kwaga ka ba to kuri de na ye tei to mo. Kanto kam pɛ se nyea yadwonna yam yatɔ gɔ se kuri dem seeni, se kanto leiri ka zege ya jei sem ne. Nyeŋ-balaŋa kam konto déem jege yia mo, ye ka ta jege ni ka tiini ka ŋɔɔne ni-wɛɛle taane. Ka maa nye de ka jege dam ka dwoi nyea yadwonna yam. 21A na zege a nii to mo a nɛ nyeŋ-balaŋa kam na bobo se ka kwaare jara de Wɛ nɔɔna bam, ye ka wane-ba. 22Wolo na maŋe o wora faŋa faŋa to mo laam tu o bore bora o pa Yuu-tu Wɛ wom nɔɔna bam, ye maŋa laam yi ka pa-ba se ba jwoŋi paare dem ba taa jege ba di.

23Nɔɔno wom ma ta o bere ne we ko kuri dem mo tento: ‘Juru tena tu wom bere we teo wó saŋe ko ke tena ko ba ko taa wo logo baŋa ne. Paare dem konto nam wó taa ye de yera de paara yadwonna yam. Dento dem lage de yare tega kam baŋa maama mo ko done ko chɔge, ye ko daare ko nɔne wonnu maama ko se tega ne. 24Nyea fuga yam nam zege ya pae pwa fuga mo na wó nwoŋi paare dem konto wone. Pwa bam konto kwaga ne, pɛ wodwoŋi de wó ba, o na ye o yera de pwa badwonna bam. O wó di dam pwa batɔ bam baŋa ne. 25Pɛ wom konto wó ŋɔɔne ni-wɛɛle taane o ma o lwɛ Yuu-tu Wɛ wom, ye o daare o bɛɛse Wɛ tete nɔɔna bam. O ta wó kwaane se o leiri kura dim da yam se o daare o pipiri Wɛ nia yam de. Wɛ nɔɔna bam wó taa wo o dam kuri ne, maŋa kadwoŋi laŋa ne, de maŋa kuni belei laŋa ne, ko woli de maŋa chichworo laŋa ne.#7:25 naa bena yatɔ de chichworo

26Maŋa laam wó yi se ba di pɛ wom konto taane, ye ba daare ba le o paare dem dam maama ba chɔge-de se de ti fase. 27Ba laam maa wó kwei teene delo maama na wo tega kam baŋa ne to paare, dedaane de dam, de de kamunni maama ba pa nɔn-ŋona bam na ye Yuu-tu Wɛ wom nɔɔna bam to. Banto de maa wó di paare taa wuu. Teene maama wó sɛ ba pa-ba ye ba daare ba taa tɔge ba ni.’

28Tɔ, mo a na nɛ kolo to maama. Ko ná ye amo Danyeli, a boboŋa déem daane-ne dedɛ, ye a yibia de da ka leiri. De ko de, a wane a tete a ja de veera yam, se ya taa wo a boboŋa ne.”

Currently Selected:

Danyeli 7: KBG

Highlight

Copy