Amosi 9
9
Nɔɔn-nɔɔno bá lu Baŋa Wɛ waarem wone
1Amo daa na nii to, mo a nɛ we Baŋa Wɛ zege bimbini dem teiŋa ne. O laam ma pa ni o we:
“Tiini n mage Wɛ diga kam nayuu bei sem de dam pa se diga kam kuri maama ziziŋi. Zage bei sem n pa se maama to nɔɔna bam yuni ne se go-ba. Amo nam wó pa se balo na daare ye ba ŋwe to te jara wone, se nɔɔn-nɔɔno yé lu.
2Ba ná maŋe ba ko tega mo se ba zo churu, amo wó yi da a vaŋe-ba a ja a nwoŋi. Ba ze ná diini telaao ne, amo wó ja-ba a tu tega. 3Ba nam ná kwaane ba di Kamele peo kom yuu ba seigi da, amo ta wó beeri ba jei a daare a zi-ba. Ba nam ze ná zo naneo kuri kuri mo se ba seigi amo yiga ne de, amo wó pa naneo wo juru kom done-ba ko go. 4Ba dona bam ná jaane-ba ba kale ba vo sa-teo kodwoŋi, a ta wó pa ba te jara wone. Kokuri to, a boboŋa jaane se a chɔge-ba mo, se a daa yé woli-ba.”
5Paŋwa Tu Baŋa Wɛ maa ye wolo
na yɔɔre o dwei tega kam
ye ka maama ziziŋi to.
Nɔɔna balo maama na wo ka baŋa ne to maa keeri bɔge-bɔge.
Tega kam maa zaŋe wɛɛne,
ye ka jwoori ka toe,
nenɛɛne Naili buga kam na yeini ka su ka pɛɛle
ye ka jwoori ka toe tei to mo.
6 Baŋa Wɛ lɔge o sɔŋɔ mo.
Ko nayuu kom wo wɛyuu ne mo
baŋa baŋa,
ko kugu kom maa wo tega baŋa ne.
Wonto mo yeini o kwoori
naneero tem na bam
o jwoori o lwoi tega kam baŋa ne.
O yere mo Baŋa Wɛ!
7 Baŋa Wɛ daa ma ta o we:
“Isarele tiina bam, á yé ta‑á boŋe-na we abam gare Kusi tiina bam amo yiga ne. Ko ye chega mo we a vere abam a ja nwoŋi Ejipti ne. Amo nam jaane Filisi tiina bam a nwoŋi Kiriti#9:7 Kiriti ye tega kalo na na gilimi-ka Mediterania naneo kom ne to. ne mo, ye a ta kwori a ja Aram tiina bam a nwoŋi Kiri ne. Ko dae konto na? 8Amo wolo na ye Yuu-tu Baŋa Wɛ to nɛ abam Isarele teo kom na ye tei ye ko tiini ko tusi to. A nam lage a chɔge ko nɔn-bia bam maama pa se ba jei mo tega kam baŋa ne. Ko nam na ye tei to, a bá fɔge a chɔge Jakob dwi dem maama a ti.
Amo Baŋa Wɛ mo tage konto.
9Amo lage a pa se Isarele tiina bam mo na yaara teene dedwonna dem maama wone. Ko wó ta nye de ba na zezɛ muni yɔlɔ wone se weero nwoŋi tei to mo. Amo wó pa se ba le nɔn-yɔɔro tem maama ba daare nɔn-ŋona bam. 10Amo nɔɔna balo maama na tusi to mo lage ba te jara wone, ko ná maŋe ko ye balo na tɛ ba we, Wɛ bá sɛ se kolokolo yi-ba to.”
Isarele teo kom na wó jwoori ko zege tei to
11“Dɛ dem konto ná yia, amo wó fɔge a lɔ Pɛ David sɔŋɔ kom na chɔge to. A maa wó jwoori a kwɛ ko kabiri sem pa se ko di-dwonnu tem jwoori te ji sɔ-doŋo. 12Ko maa wó pa se Isarele tiina laam di Edom laŋa kalo ta na daare to, dedaane teene delo maama ya na ye amo nyem to. Amo Baŋa Wɛ mo tage konto, ye a wó pa se wonnu tento maama seene te ke.”#Kikia 15:16-18
13 Baŋa Wɛ daa ta maa we:
“Nii-na! Maŋa lage ka yi
se wodiu taa ke lela
á kare sem ne,
ko dwoi balo na wó taa wora
se ba zage-ko to.
Á Vini tio-bia bam maa wó taa daga
ba dwoi á na wó taa wae
á ma balo á ke sana
se á laam ba á jwoori á du to.
Vini teeni delo á na wó jeiri
zwonnu jei sem ne to
wó pa á na sa-sona dedɛ
se ko gaale.
14Amo ta wó pa a nɔɔna
Isarele tiina bam
jwoori ba tega kam ne
ba jeini de dam.
Ba laam wó jwoori
ba fɔge ba lɔ ba teene dem,
ye ba taa zoore de wone.
Ba maa wó taa jeiri teeni
ba kare sem ne,
se ba taa nyɔ Vini tio-bia
sa-sona bam,
ye ba di tio-bia balo na leiri da to.
15Amo tete mo lage a jeini
a nɔɔna bam tega kalo
a na pɛ-ba to wone.
Ba nam ná jeini ka wone,
a daa bá le-ba maŋa de maŋa.”
Abam Tu Baŋa Wɛ wom mo tage konto maama.
Currently Selected:
Amosi 9: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
