Kikia 9

Pɔɔl pipiri o ba o sɛ Yezu

Kikia 22:4-16; 26:9-18

1Sɔɔl déem ta yɔɔre o fugi dé Teiru Yezu tɔgena, ye o kwaane o lage chwoŋa se o go-ba. Konto ŋwaane o ma zaŋe o vo Juu tiina kaanem yuu tu wom tei. 2O ma vo o lwoori‑o se o pa‑o tɔnɔ kolo o na wó kwei o bere Juu tiina balo na nii ba jeerim di sem Damasika ne to, se ko pa ba jeeri‑o lanyerane. O déem lage chwoŋa se, o ná nɛ balo na tɔge Wɛ chwo-doŋa kam to mo, se o wane o ja-ba o jwoori o vo Jerusalem o ke-ba peena diga ne, baara de kaana maama. 3O na nɛ tɔnɔ kom to, o ma zaŋe o maa vei Damasika. O na twɛ teo kom to, pwooni ma pɔpɔ de nwoŋi wɛyuu de pepele de gilimi‑o. 4O ma to tega ne ye o ni kwora na bwoŋi o yere ka we, “Sɔɔl, Sɔɔl, bɛŋwaane mo nmo jege-ne n bɛɛsa konto?” 5O de ma bwei o we, “Amo tu, nmo nam ye wɔ mo?” Kwora kam ma ta ka we, “Amo ye Yezu mo, nmo na jege n bɛɛse to. 6Nam zaŋe n zo teo kom wo. Nmo ná yi da, ba laam wó ta kolo nmo na jege se n ke to.”

7Nɔɔna balo na tɔge de Sɔɔl to maa yɔɔre ba zega ye ba ware kolokolo se ba ta. Ba déem nigi kwora kam ye ba nam wo nɛ nɔɔn-nɔɔno. 8Sɔɔl ma zaŋe wɛɛne o puri o yia ye o ware se o na kolokolo. Ba ma ja o jeŋa ba vaŋe‑o ba ja zo Damasika teo wone. 9O déem jege da yatɔ mo o yia na dwei. Maŋa kam konto ne o ba di kolokolo ye o ta ba nyɔa.

10Yezu tɔgeno wodwoŋi déem maa wo Damasika ne, o yere mo Anania. O ma dwɛ o na dé Teiru wom na ŋɔɔne ded‑o. O ma bwoŋi o yere o we, “Anania!” O ma leiri o we, “Amo tu, nii-ne.”

11Dé Teiru wom ma ta ded‑o o we, “Zaŋe n vo Judas sɔŋɔ, ko na zege chwoŋa kalo ba na bwoi we ‘Chwo-yɔɔro’ to ni ne. Nmo ná yi da, se n bwei nɔɔno wolo yere na ye Sɔɔl to bwia. O ye Tasusi tu mo. Nmo wó na o na wora o ware Wɛ. 12O ya dwɛ mo o na nɔɔno, o yere mo Anania. O ma na‑o ye o ba o daŋe o jea o yuu ne, se o yia yam jwoori ya taa nae.”

13Anania na nigi konto to, o ma leiri o we, “Amo tu, nɔɔna dedɛ maŋe ba ta nɔɔno wom konto taane ba bere amo de o na ke wo-balwaaro telo maama o ma chɔge nmo nɔɔna balo na wo Jerusalem ne to. 14O laam tu ywo Damasika ne mo de o na jwoŋi chwoŋa Juu tiina kaanem yiga tiina bam tei ne se o ja balo maama na tɔge nmo yere ŋwaane ba zuli Wɛ to.” 15Dé Teiru wom ma ta ded‑o o we, “Nam véi, kolo ŋwaane wonto mo ye wolo amo na kuri se o taa toŋe o pa-ne, se o daare o zeiŋi amo yere Isarele dwi tiina bam tei ne, dedaane dwi-gɛ tiina de ba pwa de tei ne. 16Amo tete nam wó bere‑o yaara yalo maama o na jege se o na amo yere ŋwaane to.”

17Anania laam ma zaŋe o vo o yi sɔŋɔ kom o zo. O ma na Sɔɔl o daare o vo o daŋe o jea o baŋa ne ye o we, “Amo nu-bu Sɔɔl, dé Teiru Yezu tete mo toŋe amo nmo tei ne. Wonto ya mo veere o tete nmo yiga ne, n ya na wo chwoŋa ne n ma‑n beene to. O toŋe-ne se a ba a pa n jwoori n ta‑n nae mo, se n daare n jwoŋi Wɛ Sin-laao kom de ko dam maama.” 18Anania na tage konto to, bedwe baŋa ne mo wonnu kore te nwoŋi Sɔɔl yia yam ne, ne ywon-porro tei, ye o laam daare o jwoori o nae lanyerane. O ma zaŋe o zege wɛɛne. O ma jwoŋi sɛɛm Yezu ŋwaane. 19O laam ma di wodiu pa se o jwoori o na dam. O ma maŋe Damasika ne da fenfee o woli Yezu tɔgena bam wone.

20Sɔɔl déem na wo Damasika ne konto to, o ma yeini o vo Juu tiina jeerim di sem o bere-ba Yezu taane. O maa tɛ o we, Yezu ye Wɛ Bu mo. 21Nɔɔna balo maama na nigi o berem dem to maa ye yaau ded‑o. Ba ma bwei daane ba we, “Ko dae nɔɔno wonto déem mo wo Jerusalem ne o kwaane o chɔge balo na tɔge yere dento ŋwaane ba zuli Wɛ to na? Ko nam dae konto ŋwaane mo o tu ywo-seeni se o taa jaane Yezu tɔgena o vei o ke Juu tiina kaanem yiga tiina bam jeŋa ne na?”

22Sɔɔl déem nam mo tu o na baare dedɛ de o na bere nɔɔna tei to. O maa bere nɔɔna we, Yezu seene o ye Wɛ Dam Tu wom mo. Ko ma pa se Juu tiina balo na zoore Damasika ne to daa ware se ba leiri o ni taane.

23Da kɔgɔ kɔgɔ na kɛ to, Juu tiina bam ma ke ni daane se ba go Sɔɔl. 24O ma lɔre ba na boŋe se ba ke‑o kolo to. Dɛ maama wea de tete ba zege ba nii teo kom nia yam se ba nii, Sɔɔl wó tɔge da se ba laam go‑o na. 25Dɛ dedwe tete ne o nɔɔna bam ma pa se o zo tetɔ-kamunu wo, ye ba lei ŋona ko ni ne ba pa o tɔge takworo o nwoŋi o chu tega ne ye o lu.

26Sɔɔl laam ma zaŋe o vo Jerusalem. O maa kwaane se o tɔge o woli Yezu tɔgena bam wone. Ba maama maa fona ded‑o, ye ba wo sɛ we o seene o ji Yezu tɔgeno. 27Banabas ma vo o tei se o woli‑o. O ma ja‑o o vo Yezu totoŋa nakwa bam tei.#Kikia 4:36; 11:22 O ma ta o bere-ba Sɔɔl na wo chwoŋa ne o via ye o na dé Teiru wom na ŋɔɔne ded‑o tei to. O ta ma ta o bere-ba Sɔɔl na yɔɔre o ŋɔɔne de baare Yezu yere ŋwaane tei to, pa se balo na wo Damasika ne to lɔre Wɛ chega kam. 28Sɔɔl ma maŋe Yezu tɔgena bam tei ne ye o tole Jerusalem ni maama o bere nɔɔna Wɛ chega kam dé Teiru wom yere ŋwaane. 29O maa yeini o ŋɔɔne de Juu tiina balo na ŋɔɔne Girisi tiina taane to ye o mage ni-kantɔgɔ de-ba. Ba laam ma kwaane se ba go‑o. 30O dwonna bam na lɔre konto to, ba ma ja‑o ba ja vo Kazaria. Ba laam ma pa se o kɛ o vo Tasusi.

31Yezu kɔgɔ kom nɔɔna balo maama na wo Judea, de Galili, de Samaria jei sem ne to déem ma na siu ba yaara yam wone. Ba kɔgɔ kom ma fɔge de dam ye ko puli lanyerane, Wɛ Sin-laao kom na zeini-ba to ŋwaane. Ba maa kɔre dé Teiru wom ba ŋwea maama wone.

Piita na toŋe Wɛ totoŋa tei to

32Piita déem yeini o beeri o tole jei maama mo. Dɛ dedwe o daa ma zaŋe o vo se o nii Wɛ nɔɔna balo na zoore Lida ne to. 33O na yi da to, o ma na nɔɔno, o yere mo Ayinea. O déem ye gɔrɔ mo, ye o tigi o sara ne taa, bena nana, o ware o zaŋe wɛɛne. 34Piita na nɛ‑o to, o ma ta ded‑o o we, “Ayinea, Yezu Krista wó pa n na yazura. Nam zaŋe wɛɛne se n fɔge n piri n sara kam n tiŋi.” O na tage konto to, bedwe baŋa ne mo Ayinea ma zaŋe wɛɛne. 35Nɔɔna balo maama na zoore Lida ne de Sarɔn jei sem maama ne to ma na‑o. Ba laam ma ba ba sɛ dé Teiru Yezu.

36Kaane wodwoŋi déem mo wo Jopa ne, o yere mo Tabita. (O yere dedaane Girisi tiina taane mo ye Dɔkase.#9:36 Dɔkase kuri mo ye feira.) O maa ye Yezu tɔgeno. O maa chɛ de keim-laaro ye o woli yiniga tiina dedɛ. 37Maŋa kam konto ne o ma ba o weele o te. Nɔɔna ma kwei o yera yam ba swɛ, ye ba ja‑o ba di wɛyuu diga ba tiŋi da. 38Jopa maa bwola dedaane Lida. Konto to, Yezu tɔgena balo na wo Jopa ne to ma lɔre we Piita tu Lida o wora. Ba ma toŋe nɔɔna balei o tei ne. Ba ma vo ba lwoori‑o ba we, “Popo, ke lela n ba debam teo kom.”

39Piita ma zaŋe o tɔge de-ba o kɛ. O na yi Jopa to, ba ma ja‑o ba di wɛyuu diga kam. Kadeina bam maama maa zege ba gilimi‑o ye ba keera. Ba ma bere‑o gwaaro telo maama Dɔkase ya na ŋwe ye o sɔ to. 40Piita laam ma pa se ba maama nwoŋi diga kam wone ba daare‑o. O ma daare o kuni dwoona tega ne o ware Wɛ. O laam ma pipiri o nii too wom ye o we, “Tabita, zaŋe wɛɛne.” O ma puri o yia o na Piita na wora. O ma zaŋe o jei. 41Piita ma tei o jeŋa o woli‑o pa se o zaŋe wɛɛne o zega. O laam ma bwoŋi kadeina bam de Yezu tɔgena bam maama. O ma pa Tabita zege ba yiga ne ye o ŋwe.

42Keim dem konto taane ma jage de yi Jopa jei sem maama. Ko ma pa se nɔɔna dedɛ ke ba wo-dedoa de dé Teiru Yezu. 43Piita ma maŋe Jopa ne taa, da kɔgɔ kɔgɔ. O déem zoore gɔgɔ kodwoŋi tei ne mo, o yere mo Simon.

Currently Selected:

Kikia 9: KBG

Highlight

Copy