Kikia 6

Ba le nɔɔna barepɛ totoŋa yam ŋwaane

1Maŋa kam konto ne Yezu tɔgena bam kɔgɔ kom maa wora ko pula dedɛ. Ba kɔgɔ kom wone Juu tiina balo na ye veira ye ba ŋɔɔne Girisi tiina taane dem to maa jege balo na ŋɔɔne ba tete Juu tiina taane dem to ba poona. Woŋo kolo ŋwaane ye ba poona konto to ye sabu kolo ba na yeini ba maŋe ba pa kadeina se ba maa lage ba ni-wodiu dɛ maama to. Veira bam maa we ba kadeina bam ba jwoŋi kolo na maŋe de-ba to. 2Yezu tontoŋena fuga-balei bam ma bwoŋi ba kɔgɔ kom maama ba ke daane ye ba ta ba we, “Ko wo maŋe se debam tete mo yage Wɛ kwora kam berem se dé daare dé taa nii wodiiru tem sabu kom. 3Dé nu-bia bam, abam nam jege se á le nɔɔna barepɛ á wone se dé pa ba taa nii wonnu tento baŋa ne. Banto wó taa ye balo á na yei we Wɛ Sin-laao kom wo ba tei ne lanyerane ye ba jege boboŋ-dɛɛra to. 4Ko nam ná ye debam tete, dé wó seene dé yia mo Wɛ warem de o kwora kam berem baŋa ne.”

5Ba na tage konto to, ko ma pwoli ba kɔgɔ kom maama wo. Ba ma nii ba kuri nɔɔno wodwoŋi, o yere mo Stiiven. Wonto maa tiini o jege wo-dedoa de Yezu ye Wɛ Sin-laao kom wo o tei ne lanyerane. Ba ma kuri Filipi, de Porokora, de Nikano, de Timon, de Pamena, de Nikola wolo na nwoŋi Antioka ye o ye dwi-gɛ tu na tu o sɛ Wɛ chwoŋa tɔgem to ba woli da. 6Ba ma le-ba ba ja vo ba zege Yezu totoŋa nakwa bam yiga ne. Ba ma ware Wɛ ba pa-ba ye ba kwei ba jea ba daŋe ba baŋa ne.

7Wɛ kwora kam déem ma fɔge ka jage ka yi jei maama. Yezu nɔɔna bam kɔgɔ kom ma puli dedɛ Jerusalem ne. Juu tiina kaanem tiina dedɛ de déem ma ba ba sɛ Yezu chega kam.

Ba jaane Stiiven

8Stiiven déem maa ye nɔɔno wolo Wɛ na pɛ‑o zaane de dam dedɛ to. O tiini o ke wo-kenkagela yalo na bere Wɛ dam to mo o bere nɔɔna. 9Nɔɔna badwonna nam wora ba na mage ni-kantɔgɔ ded‑o. Banto nwoŋi Juu tiina kɔgɔ kolo ba na bwoi we ‘Libatiina’#6:9 Libatiina kuri mo ye: ba ya ye kabɛ mo ye ba laam tei ba tete. to wone. Ba déem nwoŋi Kurene de Alɛzandaria mo. Ba ma tɔge ba woli de Juu tiina badaara na nwoŋi Kilikia de Asia teene dedwonna to. 10Ba nam na zaŋe ba mage ni-kantɔgɔ ded‑o to, o ma ŋɔɔne de swa taane, ne Wɛ Sin-laao kom na pɛ‑o dam tei to, pa se ba daa ware o taane ba leiri. 11Ba laam ma nwoŋi ba ke ni dedaane nɔɔna badwonna pa se ba fɔ vwa ba ta o taane ba we, “Debam nigi nɔɔno wonto na ŋɔɔne o chɔge Moses de Wɛ yuu.”

12Ba na jege Stiiven ba yaala konto to, ko ma pa se Juu tiina bam, de ba nakwa bam, de ba zamesem tiina bam maama bane zaŋe ded‑o. Ba ma zaŋe ba zi‑o ba ja vo ba nakwa kɔgɔ kom yiga ne se ba di o taane. 13Ba ma pa se nɔɔna badwonna zo ba fɔ vwa ba pa‑o, ye ba ta ba we, “Maŋa maama nɔɔno wonto yɔɔre o ŋɔɔne ta-balwaaro o pae Wɛ diga kam, de Wɛ nia yam. 14Dé ma ni o na tage tei o we, Nazarete tu Yezu mo wó ba o chɔge Wɛ diga kam, ye o daare o pipiri chwei selo maama Moses déem na bere dé nabaara se dé taa tɔge to.”

15Juu tiina nakwa balo maama na jei da to laam ma yɔɔre ba nii Stiiven. Ba ma nii ba na o yibia na nye de maleka yibia tei to.

Currently Selected:

Kikia 6: KBG

Highlight

Copy