Kikia 4

Ba jaane Piita de Jɔn

1Piita de Jɔn déem na wora ba ŋɔɔne konto dwoŋi ba bere nɔɔna bam to, Juu tiina badwonna ma zaŋe ba ba ba tei. Banto mo ye Juu tiina kaanem tiina, dedaane Wɛ diga kam soja tiina dedɛɛro wom, de Saduka tiina badwonna.#Luka 20:27 2Ba bane tiini de zaŋe de Yezu nɔɔna bam de ba na bere tei ba we, Yezu bi toone wone ye konto bere we twa wó jwoori ba bi ba taa ŋwe. 3Ba ma ja Piita de Jɔn ba ke peena diga ne. Tega na maŋe ka yi to, ba ma yage-ba da se tega poore. 4Ko daare kɔgɔ kom nɔɔna dedɛ ma sɛ taane delo ba na nigi to. Balo na sɛ to kɔgɔ kom déem ma ba ko yi nenɛɛne nɔɔna morro tenu (5,000).

5Tega na poore to, Juu tiina yiga tiina bam, de ba nakwa bam, de ba zamesem tiina bam ma la daane Jerusalem ne. 6Ba ma jeeri dedaane Anas wolo na ye ba kaanem yuu tu wom to, de Kayafa, de Jɔn, de Alezanda, de baara balo na tɔge ba ye kaanem yuu tu wom sɔŋɔ tiina to. 7Ba ma pa se Piita de Jɔn ba ba zege ba yiga ne. Ba ma bwei-ba ba we, “Abam ke tɛ mo á wae á ke konto? Bɛ ŋo dam mo á jege á ma á ke? Wɔ yere ŋwaane mo á ma á ke?”

8Wɛ Sin-laao kom laam ma ba Piita tei de dam. O ma leiri-ba o we, “Dé teo kom yiga tiina de nakwa bam, cheigi-na! 9Abam zem na bwei debam kolo taane to, ko ná ye debam na zeini gɔrɔ kom pa se o na yazura tei to, 10dé wó pa se abam de Isarele dwi tiina bam maama lɔre ko na ke tei. Ta‑á yei-na we Nazarete tu Yezu Krista yere dem ŋwaane mo pɛ se nɔɔno wonto yɔɔre o na yazura ye o laam ba o zege abam yiga ne. Abam nam page Yezu Krista dagara yuu ne á go, ye Wɛ nam bi‑o toone wone. 11Wonto mo ye wolo Wɛ tɔnɔ kom na maŋe ko ta o taane we:

‘Kandwɛ delo abam lɔra bam na ve to

laam mo jwoori de ba de ji

kandwɛ delo na pae diga kam dana to mo.’#Lei 118:22

12Yezu Krista yerane mo wae o jwoŋi nɔɔna o yaga. Nɔɔno wodwoŋi yere daa tera logo baŋa ne Wɛ na pɛ nabiina se dé wane dé na verem o ŋwaane.”#Jɔn 14:6; 2 Tim 2:5

13Juu tiina nakwa bam na nɛ Piita de Jɔn na jege baare de ba na ŋɔɔne tei to, ko ma ke-ba yaau de ba na ye nɔn-yɔɔro ye ba dae tɔn-yeena to ŋwaane. Ba ma jeeli we banto ya me de Yezu mo. 14Ba na nɛ gɔrɔ kom na zege Piita de Jɔn tei ne ye o jege yazura to, ba maa ware kolokolo se ba daa ta. 15Ba ma ta-ba we, ba nwoŋi ba kɔgɔ kom ne se ba daare. Ba laam maa wora ba bane daane se ba nii. 16Ba ma bwei daane ba we, “Dé nam wó ke nɔɔna bam konto tɛ mo? Nɔɔna balo maama na zoore Jerusalem ne to lɔre we banto mo ke wo-kenkagele dem konto. Dé daa bá wane dé ta we, vwa. 17Dé nam na lage se keim dento yé jage de vo yiga to, dé jege se dé kaane nɔɔna bam mo se ba daa yé ŋɔɔne de nɔɔn-nɔɔno Yezu yere ŋwaane.”

18Ba laam ma jwoori ba bwoŋi-ba, ye ba zo. Ba ma ta-ba we, ba ba jege chwoŋa se ba daa tɔge Yezu yere ŋwaane ba ŋɔɔna, naa se ba taa bere nɔɔna konto dwoŋi. 19Piita de Jɔn ma leiri-ba ba we, “Ko maŋe se dé sɛ abam mo naa Wɛ mo? Kɔ mo lana Wɛ yiga ne? Abam tete boŋe-na á nii. 20Debam nam bá wane dé yage kolo dé na nɛ ye dé kwori dé ni to ŋɔŋa.”

21Juu tiina nakwa bam laam ma fɔge ba kaane-ba dedɛ ye ba daare ba yage-ba pa ba viiri. Ba déem wo nɛ kolo kom ba na wó vaŋe ba zwa ko baŋa ne to, kolo ŋwaane teo kom nɔɔna maama tiini ba tei Wɛ de woŋo kolo na ke to. 22Kokuri nɔɔno wolo wo-kenkagele dem na ke o baŋa ne ye o na yazura to dwoi bena finna.

Yezu tɔgena tiini ba lwoori Wɛ

23Ba maa na yage Piita de Jɔn konto to, ba ma jwoori ba vo ba kɔgɔ kom tei. Ba ma ta de-ba Juu tiina kaanem yiga tiina bam de ba teo kom nakwa bam na tage kolo to. 24Ba na nigi konto to, ba maama ma woli daane ba ware Wɛ ye ba we, “Yuu-tu Baŋa Wɛ, nmo mo ke wɛyuu, de tega baŋa, de naneo, de wonnu telo maama na zoore te wone to. 25Dé nabaaro David déem mo ye nmo tontoŋeno. Nmo déem ma pa se n Sin-laao kom tɔge David ŋwaane ye o ta nmo kwora o we:

‘Bɛ mo ye logo baŋa dwi-gɛ tiina bam bane zaŋe?

Bɛ mo ye ba ke daane ba boŋe boboŋa kafɛ ŋwaane?

26Ba pwa bam de ba dedɛɛra bam ma la daane

se ba ke chichuŋu dedaane Baŋa Wɛ

de o Dam Tu Krista wom.’#Lei 2:1-2

27Ko seene ko ke konto mo. Teo konto ne mo Herodi de Pontusi Pilata jeini daane de Isarele dwi tiina, de dwi-gɛ tiina, se ba ŋɔɔne Yezu taane ba ma chɔge‑o, ye wonto ye n tontoŋeno-laao nmo na tiŋi‑o se o ba to. 28Ba na bane daane konto to, ba nam jege se ba ke kolo maama na maŋe ko wo n boboŋa ne ye n dam na wó pa se ko ke to. 29Dé Teiru Wɛ, nii ba na lage ba yaare debam tei to! Debam nam mo ye n tontoŋena. Nam pa debam chwoŋa se dé wane dé taa ŋɔɔne nmo kwora kam de baare. 30Nam twe n je-dɛa kam se n pa nɔɔna taa nae yazura, ye n pa se wo-kenkagela de maana taa ke nmo tontoŋeno-laao Yezu yere ŋwaane.”

31Ba na ware Wɛ ba ti to, jeiga kam ba na lage daane mɛ to maa ziziŋa. Wɛ Sin-laao kom laam ma ba ba maama tei de dam, ye ba ŋɔɔne Wɛ kwora kam de baare.

32Yezu tɔgena bam kɔgɔ kom maama boboŋa de ba ŋwea maama déem ye bedwe mo. Ba wolowolo wo tage we, o yerane mo tei o wonnu. Ba maama maŋe wonnu telo ba na jege to mo ba pa daane.#Kikia 2:44-45 33Yezu totoŋa nakwa bam maa jege dam-fɔrɔ, ye ba fɔge ba bere dé Teiru Yezu chega kam we o seene o bi toone wone. Wɛ ma zeini ba maama de o zaane dem lanyerane. 34Nɔɔn-nɔɔno tera ba kɔgɔ kom wone o na ye yiniga tu. Balo na jege kare naa di to wó yeigi-se mo, 35ye ba daare ba kwei sabu kom ba ja ba ba ke Yezu totoŋa nakwa bam jeŋa ne. Ba laam ma maŋe sabu kom ba pa nɔɔno wolo maama ne o na lage tei to.

36Ko na ye konto to, Levi tu wodwoŋi na nwoŋi Kupirus to, o yere mo Josef, déem ma zaŋe o yeigi o kara. Yezu totoŋa nakwa bam déem maa bwoi‑o we Banabas, ko kuri mo kwogilim tu.#Kikia 9:27; 11:22 37O ma yeigi o kara o kwei ka sabu kom o ke Yezu totoŋa nakwa bam jeŋa ne.

Currently Selected:

Kikia 4: KBG

Highlight

Copy