Markos 11
11
Lɔga Kɔyɛa :Yesusi Yerusalemɔ Na Ajjɛa :Zugu Diram
1Na Yesus ko zuga kɔbhbhɛa nɔng hunaa hɛa na dokkɛa Yerusalem jaa oriya ɛlla Kutula Girarruny kèleo Betebhaga ko Bitaniyaye, Yesus ibha zuga kɔbhbhɛa nɔng gee ku ramman na egu sabbɔ na sɛɛsɛ, 2“Ago ngaɔrronu i sabbɔye. Na hunde hɛo na ngani dokko ngonuye, aleo jɔano sigirte ku hoynɛ dha bɔɔ hiriyɔ sabbɔ ngani kɔtɔyɛo chibinɛ kɛyɔye, na ɔkta na tɔktayɔ. 3Na hunde ghinnong :konnɔ na sennagung, ‘Senno mesigi ɛnɛngge?’ seyɛsɛ, ‘Hin :Komoruyɔ na aleo yakkagung ke tiri.’”
4Na zugaa gina ago na jɔya sigirɔ hoynɛ hunde chibinɛ waran konnɔ ganggu dheyyɔye. Na hunaa ɔkkanɛaye, 5yɔk zukte chillɛ ngonu gena ghini yɔk na seyɛsɛ, “Sigirɔ hoynɛ ɔkkano kɛ ɔng?” 6Na yɔk zuga kɔbhbhɛa Yesus yaktɛsɛ zugo lɔgɔ damiyaa madhɛsɛna :Yesusi. Na kìgombɛsɛ. 7Na yɔk hunaa tɔktaa sigirɔ hoynɛ chɔɔ bhɛa ihɛa ꞉Yesusiye, tɛhɛtɛsɛ ruminyaa gɛ tundɔ na irrɔgu :nɛa na tɛa bay. 8Na zuga bo mɛra gena bere ɛhɛyɛsɛnɛa ruminyaa gɛ ganggu, na ko yɔk gena bere bhiikkanɛa bhalloga bo lalna na ɛhɛyɛsɛnɛa gɔrɔ.#11.8 Ngalɔkta messɛ :zuga Ayhudhi ngangaye a bhɛa ajjɛa komoruya nɛ diram hunde kunde. Na ngaya ajjɛ Yesus diram ngangaye, dhugunnono bhɛa Yesus anɛa Komoruya bere Bɛrrana :Tumu Ibbayseo Zugo. 9Na ga jimmɛa sabbɔ ko ga kɔbhinyana wurtɔ bere yokkonɛa lɔgɔ goore na sennɛa,
“Hossana!”#11.9 “Hossana” a tuga Hibiru na a bhɛa kèsenɛa, “Ibbayseiyɔ!”
“Hirre kun na bo lɔmmana buyna ajjɛa :Komoruyɔ Tumuye, a tuhinɛ!”
10“Inde lɔmmana komorumoa kokonga na Dawiy na kɔtɔlɔmiyte, a tuhinɛ!”
“Hossana! Diram any ke na Tumua iho surr tumɔ tundɔ.”
11Na Yesus ogo na dagu Yerusalem, na koo tunnugu doraa Tumu barara tu kɛngɔ na gɔnyu aha kumulɔng. Na koo dhɔyu ngaɔrronu na dhi ko zuga kɔbhbhɛa nɔng ku 12, na ago Bitaniyagiye ke ngaya bho barsɛye.
Lɔga Bhassayɛa :Yesusi Zuga Dhakkɛa Gaw Doraa Tumu Barara Tu Kɛngɔ
12Na bhorroyɔ hunaa bansanɛa Bitaniyagiye na hɛaye, Yesus dhagu :hozzo. 13Na koo dharɛsɛ chamochite labh ko rɛna. Na ogo na kɔgɔny hunde kesea lɔ kawarɛye. Na hunaa kɔa na dokko ngonuye, aru hunde kawarɛ ninggɛ dhul na labh nganga hung ke ngaya dha bere kolea dhunggɛa :chamochau ngaanɛoye. 14Na chɔru na sɛɛsɛ, “Ngakɛta, kalda wurtɔ kawarɛ sɛgɛn ngadhungngani dhul ko kingi.” Na yɔk zuga kɔbhbhɛa nɔng shigi ngalɔkta chɔrɛ kɛyɔye.
15Na hoya chɔɔ Yerusalem, na nɔng Yesus ogo doraa Tumu barara tu kɛngɔ na bhassau zuga dhakkɛa gaw ngonu. Na ubullanu alleyiya zuga chachchɛa birinya ko ga zuga talnɛnɛa yela. 16Na taganyɛ zugo kumulɔng bhɛa ittɛa ahaa gaw na dhoyɛa doraa Tumu barara tu kɛngɔ. 17Na madhɛsɛ lɔgɔ na sɛɛsɛ, “Ngangaye lɔga Tumu bere kɔ̀gɔdhdhɛsɛna dadab bere ngasennɛayo, ‘Doraa nanu ale kèli doraa ɛlɛa :bhorinya kumulɔng na kallinɛnɛo ko anye?’ Na nɔng igge dha bɔɔ bhɔdhto ke bhogoya chimtanyayuny!” 18Na gɔldangɛa bibiyo doraa Tumu barara ko zuga madhdhɛa zugo Damiya Tumu bere kàjjɛa Muse shigi ngalɔkta wa yokkono :Yesusiye ko gaa messo. Na tɛngɛrɛ Yesus ke ngaya zugo kumulɔng iwachiyɛ lɔga madhinɛnɛa :nɛaye. Na lami ganggua senno kindɛ nɔng. 19Na hunaa bho barsaye, Yesus ko zuga kɔbhbhɛa nɔng dhɔyɔ ngaɔrronu na ago.
Lɔga Dhɔrɔgɔsɛa :Chamochiyɔ
20Na bhorroyɔ hunaa wokkɛaye, argi chamochiya bare gina hunde dhɔrɔgɔ kak ko sindayeye. 21Na Betiros kadha lɔga bare gina na sɛɛsɛ Yesus, “Hira madhdhiy, ga gɔny chamochiya bare chɔri! Dha bare dhɔrɔgɔu kak!”
22-23Na nɔng yagɛsɛ yɔk na sɛɛsɛ, “Ga shigitɔ! Yɛbhɛ Tumu! Nɔng hunde hir kona kesɛɛsɛ ngakutulda, ‘Bɔchiyaa na ngɔyɛsɛ yirisi toye,’ na ko hini ngadhaginɛ na kɛyɛbh dhere, ngalɔkta bhugnyɛsɛnɛyɔ. 24Na mɛa kennagung ɛnɛnggeo, hunde allinɛno ko Tumu na ogolloye, lɔkte ogolloye kumulɔng yɛbhɛ huna naa bɔɔ teya na aynde ale ajjɛung dhereye. 25Na hunde chillo na allinɛno ko Tumu#11.25 Zuga Ayhudhi hunde bere allinɛnɛ ko Tumuye, kali kona chillɛ na dhɔngɛ kawarɛ tumɔ na allinɛ ko Tumu. na nɔng kesea hinisichinne lɔmɛsɛno zug gena lɔgɔye, ga sabbɔ ujjugu ngalɔktonu bhɛa Tumu. Na aynde ko nɔng Baba nu iho tumɔ ujjuk lɔga gu gɛrsaye. 26Yɔk ngalɔktonu hunde ngaujjukkooye, ko nɔng Baba nu iho tumɔ lɔga gu gɛrsa ngaujjukko.”#11.26 Dadabinyaa tuga Giriki gena ngalɔkta ɛl 11:26ɔye ninggɛ.
Lɔga Kìghinɛa Yesus Hunde Buyn Ajjɛ :Noyye
27Na koo wakta chɔɔ Yerusalem sɛgɛn. Na Yesus hunaa yireo doraa Tumu barara tu kɛngɔye, yɔk gɔldangɛa bibiyo doraa Tumu barara ko zuga madhdhɛa zugo Damiya Tumu bere kàjjɛa Muse ko zuga Ayhudhi bibiyo hoya na assa nɔng, 28na ghini na seyɛsɛ, “Ngalɔkta mesi buyna nini? Na inde ajjiny buyn na me ngalɔktaye, a nɛng?”
29Na Yesus yagɛsɛ na sɛɛsɛ, “Ga ko anye kìghinong kalde dhɔnɛ na yaktaganyu, na kùdhugunogung hunde ngalɔkta kemesi buyna niniye.” 30Ngangaye, lɔga bere churɛa :Yohanisi zugo, bere ajjɛ ꞉Tumu oo ajjɛ :zugu? Ga yaktaganyuyɔ!”
31Na yɔk mɛzzi kɛngɔ na se, “Nɔng mɛa hunde kèseyɛsɛ, ‘Ajjɛ ꞉Tumu,’ nɔng sennagiy, ‘Na ngayɛbhbhooye?’ 32Na hunde kèseyɛsɛ, ‘Ajjɛ ꞉zugu?’” Yɔk dha bere ɛngɛrsɛ bho ke ngaya zugo kumulɔng gaɛ Yohanis bhɛa anɛa hira bere yogɛsɛna zugo lɔga dhugunono ꞉Tumu dhereye.
33Na yɔk yaktɛsɛ Yesus na seyɛsɛ, “Agge hunde bere ajjɛ :noyye, kimaggoyɔ.”
Na ko nɔng sɛɛsɛ, “Ko anye hunde ngalɔkta kemesi buyna niniye, ngakoyokkogungo.”
Currently Selected:
Markos 11: SUQ
Highlight
Share
Copy
Want to have your highlights saved across all your devices? Sign up or sign in
©2023 Suri Translation Project which is a project of the Ethiopian Evangelical Church Mekane Yesus
