Yohanis 2
2
Lɔga Yesus Bhɔdhɛa Ma Ke Chuttaya Woynuny
1Na unga ku sizzi, ɔra kènno Kana iho baa Gelila bere lɔmma wololo. Na mama Yesusi 2ko Yesus ko zuga kɔbhbhɛa nɔng bere ko yɔk keliyo na ɛlla wolologiye ngonu. 3Na chuttaya woynuny kùchudhɛsɛna kɔmɔna wololo hunaa dhaa garraye, Mama Yesusi sɛɛsɛ Yesus, “Na kèe chuttaya woynuny dhaa dheyta :zugu na garu.”
4Na nɔng yagɛsɛ na sɛɛsɛ, “Mattigoye, ngangaye anye seni kème ɔng? Anye kolea nanu ngani kugoo.”
5Na nɔng mama nɛnɛ sɛɛsɛ zuga ghoyɛsɛnɛa kɔmɔn chuttaya woynuny, “Lɔkte yokkogung :nɛaye mesigi kumulɔng!”
6Yɔk zuga Ayhudhi a zuga lɔmmɛa damiya nɛ onyonɛa ridhing. Na maa onyonɛa ridhing ojjɛ junyaa kèghendono bɛnne. Na ngawololoonu bere lɔmma ngajunyaonu kèghendono bɛnneye gee ku illɛy ga anda hunde kɛ̀rɛsɛna maye, kɛ̀lɛhɛnnana lotoroy kɛngi 80 oo 120.
7Na nɔng Yesus sɛɛsɛ zuga ghoyɛsɛnɛa kɔmɔn chuttaya woynuny, “Ga dhiy ngajunyaya ma se!” Na yɔk dhiy junya ma dhik dhik.
8Na koo sɛɛsɛ, “Mɛa ga togoyto gena na ayɛsɛ bara abhanyiseo kɔmɔn.”
Na yɔk togoyto na ayɛsɛ damiyaa kòyogɛsɛna. 9Na bara abhanyiseo kɔmɔn taru maa wa dhaa bhɔdhinɛna ke chuttaya woynuny. Na nɔng hunde bere kòhonyɛ oriye, bere imaggayɔ. Na yɔk zugaa ghoynɛna hunde wa ghoshshonɛ oriye, bere gayɛayɔ. Na nɔng bara abhanyiseo kɔmɔn koo eliu rori na mɛzzi dheyyɔ bhichang 10na sɛɛsɛ, “Kali kali zugo hunde duriɛ wololoye, honynyɛ chuttaya woynuny bo choyo na abhanyisiɛ kɔmɔn sabbɔ. Na hunde irgi chuttayaa choyo na dhutioye, kàbhanyisi naa mirgara. Na nɔng inye ko mɛa toye dhaa ɛmɛgu chuttaya choyo kɛr.”
11Yɔk ngalɔkta barar me :Yesusi ngaɔrra kèe Kana i baa Gelilaye agga bere sabbune. Na hunaa messa ngalɔktaye, dhɔlɛsɛ zugo dirama nɛnɛ na zuga kɔbhbhɛa nɔng yɛbhɛyɛ.
Lɔga Chugɛa :Yesusi Zuga Dhakkɛa Gaw Doraa Tumu Tu Kɛngɔ
12Na koo Yesus ko mama nɛnɛ ko gɔynggɛ ko zuga kɔbhbhɛa nɔng shittɛ na ago Kibiromɔ. Na tɛldi ngonu ungge muchugi. 13Na hunaa kolea Gibiriya Ayhudhi kèe Basika#2.13 Ngagibirita kèe Basikaye a gaminya ramman. Kona anna bere ammɛa zuga Ayhudhi na kadhdhanɛa lɔga bere ɛlɛa Gibsigiye na Tumu chirbhisiyɛa erroa gɛ ku awchina na ngakɔdhɛayo. Kona a nganda ammɛ :zugu mɛa toye na kadhdhanɛ kala bere bansanɛa :Yesusi rɛsɛyɔye. Bhee ammɛ :zugu gibiri ngabɛrgunyayaye a ngaya bere Yesus rɛsɛ kala ammɛa :zuga Ayhudhi Basikaa kadhdhanɛa lɔga bere ɛlɛa Gibsigiyeye. tewa jaaye, nɔng Yesus dhɔngɛ na ogo Yerusalemɔ. 14Na koo aru zugo hunde ɛl doraa Tumu barara tu kɛngɔ na talnɛnɛ beo ko mɛdɛrni ko yikka ko hunde gena ɛl alleychinne na chachchɛ birinyaa ku tamuninyaye. 15Na ibha mɔsɛa chicho chicho na shɛga katatogi ke chuwarray na tɔgɛ beo ko mɛdɛrni na obhonisiu tu kɛnga doraa Tumu barara ko zukke kari na chugu bhɔ. Na usurranu birinyaa zuga chachchɛa birinya na ubullanu alleyiya gɛ. 16Na sɛɛsɛ zuga talnɛnɛa yikka, “Aytɛ ngaahaya kumulɔng ngagɔrronu! Doraa Babaa nanu ke doraa gaw ngaojjo!”
17Na yɔk zuga kɔbhbhɛa nɔng kadhta lɔga bere kɔ̀gɔdhdhɛsɛna Dadaba Lɔga Tumu sennɛa, “Kihini doraa nunu goore na chɔɔ hinisa nanu ujjono na hɛ ko goa amanyi na dheshshananyi.”
18Na yɔk gulsachina Ayhudhi seyɛsɛ Yesus, “Ga me lɔkte barari gena na kàtaktɛo bhɛa lɔmɛi buyna mesɛi ngalɔkta!”
19Na nɔng yagɛsɛ na sɛɛsɛ, “Igge hunde boli ngadoriya bararte, anye kɔgɔdhdhi ungo sizziyɔ na childɔ!”
20Na yɔk yaktɛsɛ na seyɛsɛ, “Oynyaa bere kɔ̀gɔdhdhɛa ngadoriya Tumu bararte a 46. Na inye anda kɔdhdhi na chil ungo sizziyɔ sɔng ɛnɛng?” 21Nɔng Yesus ngaya senɛ, “doraa bararaye,” dha bere yokkono ke lɔga ɛlɛhɛnɛsɛna rɛa nɛnɛ. 22Na hunaa iho oynya gena na koo rɛsa na bansanaye, zuga kɔbhbhɛa nɔng katta ngalɔkta bere yokkonoye. Na koo yɛbhɛ lɔga bere kɔ̀gɔdhdhɛsɛna Dadaba Lɔga Tumu ko ga bere yokkono :nɛa.
23Na nɔng huna bere iho Yerusalemɔ kolea Gibiriya Basika, yɔk zuga bo mɛra annaa bere arta lɔga bo barara messo :nɛa na yɛbhta nɔng.#2.23 Tuga Giriki se, “...na yɛbhta sara gɛnyɛ.” 24Na nɔng bere zugo ngayɛbhbhao, ke ngaya gaɛ zugo hinisi kumulɔngge. 25Na chɔɔ bhɛa senno kɔɔbhɛsɛ :hir konnɔ lɔga ɛsɛdhdhɛa :zugu, bere ngahinnoo ke ngaya gaɛ lɔga lɔmmɛa :zugu hinisichinneye.
Currently Selected:
Yohanis 2: SUQ
Highlight
Share
Copy
Want to have your highlights saved across all your devices? Sign up or sign in
©2023 Suri Translation Project which is a project of the Ethiopian Evangelical Church Mekane Yesus
