Lɔgɔ Sabba 14

Lɔga Ibbaysiyɛa :Awurami Lot

1-2Dha bere ngabɛrguonu komoruya Sinari kènno Amorabel ko na Elasari kènno Ariyok ko na Elami kènno Kedholomer ko na Goyimi kènno Tidal tɔrnɛ na kɔnnɛ ko komoruya Sodomi kènno Beri ko na Gomora kènno Birchay ko na Adama kènno Shinab ko na Zobomi kènno Chembir ko na Bela oo Zowari. 3-4Nɔng komoruya kènno Kedholomer anna bere allinɛnɛa ngakomortɛndonu ku haynaye oynya tɔmmɔn ko ramman. Na hunaa oynya senno kete tɔmmɔn ko sizziye, yɔk tamara komorumoa nɛnɛ na daga go na koo bana kamman horora kènno Sidim oo Yirisiya Lɔmma Shɔy.

5Na hunaa oynya senno kete tɔmmɔn ku wuyte, Kedholomer ko komortɛna tɔrnɛna ko nɔng bana kamman na mɔgɔ zukte kèe Rɛbhan bhakkɛ Asatoro Karnay ko zukte kèe Zuzim bhakkɛ Hamɔ ko zukte kèe Emim bhakkɛ Sewi Kiriyatay 6ko zukte kèe Hor bhakkɛ ɔra kènno Seher baa lɔmma kutulo. Na mɔgɔ zuga Hori na chugu ko bhee dogɛ ɔra iho korugiye jaa kèe Elbaran. 7Na wakta chɔɔ Kades baa bere kèleo Anamisibati na mɔgɔ zukte kèe Amora bhakkɛ ɔra kènno Hazazon Tamar ko zukte kèe Amalakan na dhakta ngabaonu kumulɔng na te na nɛ.

8Na komoruya Sodomi ko na Gomora ko na Adama ko na Zobomi ko na Bela ibhta bholisa gɛ na tunggɛsɛ horora Sidimi na kɔtɔgɔndɛ 9ko komoruya Elami kènno Kedholomer ko na Goyimi kènno Tidal ko na Sinari kènno Amorabel ko na Elasari kènno Ariyok. Na ngakomortɛndonu ku haynaye aggee dha bere kɔnnɛ ko ngakomortɛnda ku wuyte. Na gaa ku hayna kɔ̀mɔgɔyɛ. 10Nɔng dha bere horora Sidimi lɔ bolkɛna bo mɛra lɔmɛa simbiliya kɔrra dhuhana ba toye hɛtta ko dhɔllang.#14.10 Ngasimbilitonu hɛ ko simbiliya kɔrra kèghendɛa ganggua turumbeluny. Na hunaa komoruya Sodomi ko na Gomora ko bholisa gɛ kùchukko na ngessɛaye, ngɔyɛsɛ ngabolkɛndonu. Na yɔk komortɛnaa ku sizzi jara kutulo. 11Na ngakomortɛnda ku wuyte dhakta ahaa Sodomi ko ga Gomora ko ahaa kamma kumulɔng na aytɛ. 12Na eriya Awurami gɔynɛ kèe Lot bhakka Sodom ko nɔng kibhigi na kɔ̀tɔrtɛ ahaa gɛnyɛ na kidhiganayɛ.

13Na nɔng hira jorrono mirɔga kona ko na yogɛsɛ Awuram#14.13 Tuga Hibiru se, “...Awurama ku hira bhora Hibiru...” lɔga kìdhiganɛa Lot na ahaa gɛnyɛ kɛ̀hɛyɛa. Nɔng Awuram dha bere bhak bhogonaa hira ku Amora kèe Mamirɛ jaa. Na Mamirɛ lɔ gɔynggɛye ku ramman keli Esokol ko Anar. Yɔk agga bere bhiikkɛa lɔgɔ na tɔrnɛna ko Awuram. 14Na hunaa Awuram shikko lɔga kìbhɛa Lotte, eliu gaymanyaa gɛnyɛ bere kìrrittono doraa nɛnɛ ku bara gee ku 318 na kɔbhɔ na ago chɔɔ Dan. 15Na barɔ kedhdha bara gɛnyɛ kimsinyoga ramman na tɔgɔndɛ ko mirɔga na kɔrta chɔɔ ɔra kènno Hoba iho Dɛmaskogiye bhuguyɔ. 16Na yakta Lot ko tɛrroa gɛnyɛ ko aha kumulɔng ko zug gen ko ahaa gɛ bɔɔ kɛ̀hɛyɛa.

17Na hunaa Awuram mɔgga Kedholomer ko komortɛna tɔrnɛna kari na wokkonoye, komoruya Sodomi ogo na kitinynyandɛ ko Awuram horora Sewi.#14.17 Sara ngahorortonu keli “Horora Komoruyny.”

18Na komoruya Salemi kèe Melkesedek ibha gimaya woynuny ko tila na aynɛ Awuram. Nɔng dha bere Melkesedek a gɔldang bhɛa Tumu, Komoruya Bo Ɔnnɛna. 19Na tuhu Awuram na sɛɛsɛ,

“Any kutuheny :Tumu, Komoruya Bo Ɔnnɛna bere ghendono tumu ko ba.

20Annaa ajjinyi ɔnney na mɔgɛi mirɔga gunyu na ko nɔng any kutuhɛ.”

Na nɔng Awuram ngɛru ahaa dhakkana mirɔkke gaminya tɔmmɔn na gambe dhɔnɛ aynɛ Melkesedek.

21Na nɔng komoruya Sodomi sɛɛsɛ Awuram, “Ahaa dhakkani mirɔkke kumulɔng ɔgɛ ꞉inyo na yɔk zugo sɔng yagaganydɔ.”

22Na Awuram nɔng sɛɛsɛ, “Anye wa kibhiikto ko Tumu, Komoruya bo ɔnnɛna bere ghendono tumu ko ba lɔgɔ. 23Na chɔɔ ahite dhɔnɛ bhɛa nunu ngakihiniyo. Keni ngase, ‘Awuram hunde aha a mɛriye, bere kajjɛi ꞉anyo.’ 24Na yɔk ahaa bare dhakkanɛa :bara ganyu na ammɛa gɔrɔ bhee kiyakkagɛinyi ninggɛ. Na yɔk ga bare dhakkanɛa :bara :Anari ko :Esokoli ko :Mamirɛ bɛrrɔ any kaytɛ na kusigiyɛ. Ahi kona ngakihiniyo dhul.”

Currently Selected:

Lɔgɔ Sabba 14: SUQ

Highlight

Copy