Markus 10
10
Yeesus xprecht iwich ti hochtsayt ausnaner mache
Mateus 5.31-32; 19.1-12; Lukas 16.18
1Yeesus is fort kang fon tëm plats un is pis an te rechioon fon Yutëya kang, woo an te aner sayt fom Jortan flus layt. En kroos folek hot sich noch mool um em rom kesamelt, un eyer hot se al keuntericht, wii sayn kewoonheet waar. 2Phaar fariseyer wolte en proop keeche Yeesus fine. Too hon se kefroot:
— Meecht unser Kesets erlaupnis kewe tas en man sayn fraa ap xike khan?
3Yeesus hot keantwort soo am frooe:
— Was hot Mooses aych foer kexrip?
4Tii hon tsurik keantwort:
— Mooses hot kelos en priif xraywe fer ausnaner mache un ti fraa fort xike.
5Tan saat Yeesus:
— Weche ayre hart hërtse hot Mooses tas kepoot kexrip. 6Awer, am aanfang, wii Hërkot ti welt kemach hot, is kesaat kep: “Hërkot hot se man un fraa ketsoo. 7Tesweche lost te man sayne papa un mama fer sich fereeniche mit sayn fraa, 8un ti tswaay kewe wii eene.” Soo, sin se xon net mee tswaay, awer ploos wii eene. 9Also, was Hërkot fereenciht hot sol te man net ausnaner mache.
10Wii se xon tehëm waare, hon ti tisiple noch mool iwer tee phunkt kefroot. 11Un Yeesus hot keantwort:
— Te man woo sayn fraa fort xikt un sich mit en aner hayrat, tuut eepruch mache keeche sayn fraa. 12Un, wën en fraa sayne man fort xikt un sich mit en anere hayrate tuut, is sii aach eepruch am mache keeche sayne eyerxte man.
Yeesus un ti khiner
Mateus 19.13-15; Lukas 18.15-17
13Tëm noo, hon phaar layt sayn khiner keprung tas Yeesus se seechne teet, awer ti tisiple hon se kexteyert. 14Wii Yeesus tas kesiin hot, hot eyer pees kesaat:
— Lost ti khiner tsu mich khome un ferpiit net tas tii tas mache, wayl tëne keheyert Hërkots Raych. 15Ich fersichere aych tas tas woer is: weyer net em Hërkot sayne Raych aan nëmt wii en khint khomt nii too rin.
16Tan hot Yeesus ti khiner in sayn aarme kehool, tëne ti hënt triwer kehal un hot se keseechent.
Te rayche puup
Mateus 19.16-30; Lukas 18.18-30
17Wii Yeesus noch mool wayter keen wolt, is en man kelaaf khom, hot sich foer iim kekniit un hot kefroot:
— Kuute Mayster, was mus ich mache fer tas eewiche leewe kriin?
18Yeesus hot keantwort:
— Warom ruufst tuu mich “kuute”? Ploos Hërkot is kuut, sonst nimant. 19Tuu khënst ti kepoote: “Pring nimant um, mach khee eepruch, xteel net, kep khee falxe tsayer keeche nimant, hool niks fon te anere wech, rexpekteyer tayne papa un tayn mama.”
20Te man hot keantwort:
— Mayster, tsayt khint uf sin ich tii kepoote al noo kang!
21Yeesus hot em aan kekukt mit liipe un saat:
— Feelt tich ploos noch ëns: kee, ferkhaaf ales was tuu host, kep tas fer ti aarme un kriist tuu en xats im himel; tan, khom un kee mit mich.
22Unwilich mit tëne wërter, wayl eyer aarich raych waar, is eyer fort kang, kans traurich. 23Yeesus hot tan noo sayn tisiple kekukt, woo um em rom waare, un saat:
— Wii xwiirich is es fer ti rayche in te Kotes Raych rin khome!
24Wii se tas keheyert hon, hon se sich ferwunert, awer Yeesus saat wayter:
— Mayn khiner, wii xwiirich is es in te Kotes Raych rin khome! 25Is xwiiricher en rayche in te Kotes Raych rin khome als en khameel torich en nootel loch khome.
26Wii se tas keheyert hon, hon se sich nooch mee ferwunert un hon ëne fer te anere kefroot:
— Tan, weyer khan sich rete?
27Yeesus hot se aan kekukt un saat:
— Fer ti mënxe is tas net meechlich; awer, fer Hërkot, is es. Wayl, fer Hërkot is ales meechlich.
28Tan saat Pheeter:
— Kuk! Meyer hon ales inxtich kelos un sin aych noo kang.
29Yeesus hot keantwort:
— Ich fersichere aych tas tas woer is: tee woo, weche mich un weche em ewankeelium, sayn haus lost, kexwister, moter, fater, khiner ore lant 30kriit fiil mee, noch in tëm leewe. Kriit hunert mool mee hayser, kexwister, motere, khiner, lant un aach xikaane ore yachte. Un im futur kriit eyer tas eewiche leewe. 31Fiile woo yets ti eyerxte sin kewe ti letste, un fiile woo yets ti letste sin, kewe ti eyerxte.
Yeesus saat noch mool sayne toot un peleepung aan.
Mateus 20.17-19; Lukas 18.31-34
32Yeesus un ti tisiple waare uf weech, ruf noo Yeruusalëm am keen. Eyer is fone wech kang, un ti tisiple, ferwunert, hiner noo kang; ti anere layt woo mit tëne am keen waare hate pang. Tan hot Yeesus noch mool ti tisiple uf sayt keruuf un hot aankefang se xpreche iwer was mit tëm paseere teet. Yeesus saat:
33— Heyert! Meyer sin noo Yeruusalëm am keen, woo te Soon fom Man ap kep wërt fer ti xëfe fon te priister un fer ti Kesets mayster. Tii tuun em tsum toot konteneere un tuun em ap kewe fer tii woo pakaane sin. 34Tii tuun em ferxpote, ferxpuke, ferxlaan un umpringe; awer, tray taache tëm noo tuut eyer witer peleepe.
Was Tiaako un Yohan ferlang hon
Mateus 20.20-28
35Tëm noo, sin Tiaako un Yohan, Zebedeu sayn puuwe, tichter khom un saate:
— Mayster, meyer wole tich en kefale ferlange.
36Yeesus hot kefroot:
— Was wolt teyer tas ich fer aych mache?
37Tii hon keantwort:
— Wan teyer aych uf te troon fon ayre kloorixe Raych setse tuut, los tas ëne fon uns sich uf ayer rechts sayt setse tuut, un te anere uf ayer links sayt.
38Yeesus hot keantwort:
— Teyer wist net was teyer am ferlange sayt. Khënt teyer, filaycht, fon tëm khelich trinke woo ich trinke tuun un khënt teyer ketaaft kewe wii ich ketaaft kewe sol?
39Tii hon kesaat:
— Yoo, meyer khëne.
Tan saat Yeesus tëne:
— Yoo, teyer wërt fon tëm khelich trinke woo ich trinke un kept ketaaft mit tëm taaf woo ich ketaaft kewe. 40Awer, ich hon net ti recht fer aus se suuche weyer sich uf mayn rechts ore links sayt setse tuut. Wayl es waar Hërkot woo tii pletser prepareyert hot un tee kept se fer weem eyer wil.
41Wii ti anere tseen tisiple tas keheeyert hon, sin se pees kep mit Tiaako un Yohan. 42Tan, hot Yeesus al samer keruuf un saat:
— Wii teyer wist, ti kowerneyer fon te pakaane foleke hon autoriteet iwich tii un xike iwer tëne. 43Awer, unich aych tëref tas net soo sin. Kraat es keeche teel, weyer important sin wil, sol ti anere petiine, 44un weyer te eyerxte sin wil, sol sklaawe fon te anere al sin. 45Wayl, sokaar te Soon fom Man is net khom fer petiint se kewe, awer fer se petiine un sayn leewe kewe fer fiil layt se rete.
Yeesus heelt te plinte Bartimeu
Mateus 20.29-34; Lukas 18.35-43
46Yeesus un ti tisple sin an ti xtat Jerikoo aan khom. Wii eyer aus te xtat am keen waar, mit te tisiple un en kroos folek, hot eyer en plinte aan ketrof woo Bartimeu kenënt waar, soon fon Timeu. Te plinte hot am rant fom weech kesitst, am petle. 47Wii eyer yemant keheyert hot saan tas es Yeesus fon Nasarëë waar woo too am torich keen weyer, hot te plinte aankefang se xraaye:
— Yeesus, Soon fon Dawii, petauer mich!
48Fiil layt hon em kexteyert un hon em kexikt ruich playwe, awer tee hot noch mee kexraayt:
— Soon fon Dawii, petauer mich!
49Tan, hot Yeesus xtil kehal un saat:
— Ruuf te plinte.
— Tii hon em keruuf un saate tëm:
— Koraaj! Xtay uf, wayl eyer is tich am ruufe!
50Tan hot Bartimeu sayn mantel uf ti sayt kexmis, is xnel uf kextii un is kang pis ans plats woo Yeesus waar.
51Yeesus hot kefroot:
— Was wilt tuu hon tas ich mache?
Tee hot keantwort:
— Mayster, ich wil noch mool siin!
52Yeesus hot fersichert:
— Kee, tuu pist kuriert wayl tuu klaawe hast!
Im selwiche momënt, hot Bartimeu aankefang se siin un is Yeesus iwer weech noo kang.
Currently Selected:
Markus 10: NTHunsrik
Highlight
Share
Copy
Want to have your highlights saved across all your devices? Sign up or sign in
2022 Sociedade Bíblica do Brasil
