Mateus 21

Yeesus keet in Yeruusalëm rin

Markus 11.1-11; Lukas 19.28-40; Yohan 12.12-19

1Wii Yeesus un sayn tisiple ticht an Yeruusalëm am khome waare, hon se xtil kehal an te wile Petfajë, woo ticht am Oliiwe Përich playpt. Fon too hot Yeesus tswaay tisiple foer kexikt, 2mit tee ortnung:

— Keet pis an ti neekst wile, un klaych wën teyer aan khomt, siit teyer en eeseliin mit sayn yung eeselche pay tëm. Tuut ti tswaay loos pine un pringt se heyer. 3Wën yemant was saan tuut, antwort tas te Mayster se prauch hon. Soo lose se aych klaych tas fii heyer pringe.

4Tas is paseyert fer in se hale was te profët kesaat hat.

5“Saat fer tas folek fon Yeruusalëm:

Yets is ayre kheenich am khome,

is keweenlich un rayt uf en muule

en eeselche, yunges fon en eeseliin”.#Zc 9.9

6Tan sin ti tisiple kang un hon kemach was Yeesus kexikt hat. 7Hon ti eeseliin un tas eeselche kehool, hon sayn tsaych triwer kehonk, un Yeesus hot sich truf kesetst. 8Fom kroos folek woo mit tëne am keen waar, hon fiile sayn tsaych ausnaner uf te pootem keleet, un anere hon est fon te peem ap kemach un hon se uf te weech keleet. 9Tas folek woo foer am keen waar, soo wii tii woo hine noo am khome waare hon aankefang se xraaye:

Hosana, fer te Soon fon Dawii!

Tas te Hërkot seechent tee woo im Hër sayne naame khomt!

Hosana fer Hërkot im heechste himel!

10Wii Yeesus in Yeruusalëm khom is, hot ti kans xtat sich uf kereecht, un ti layt al hon kefroot:

— Weyer is tas?

11Tas folek antwort:

— Tas is Yeesus, fon Nasarëë in Kalilëya.

Yeesus im Thëmpel

Markus 11.15-19; Lukas 19.45-48; Yohan 2.13-22

12Yeesus is uf te hoof fom Thëmpel kang un hot raus kextoost al tii woo kekhaaft un ferkhaaft hon uf tëm plats. Hot ti tixe fon tëne woo kelt am weksle waare rom kextilept un ti xtiil fon tëne woo taupe am ferkhaafe waare. 13Eyer saat tëne:

— In te Hayliche Xrifte is kexrip tas Hërkot tas saat: “Mayn haus kept kenënt ‘Kepeets Haus’.” Awer, teyer het tas in en xpitspuuwe ferxtek transformeyert!

14Plinte un laame waare Yeesus am pekeechne uf em hoof fom Thëmpel, un tee hot se kuriert. 15Ti xëfe fon te priister un ti Kesets mayster sin pees kep wii se kesiin hon tas wunerliches tings woo eyer am mache waar un hon ti khiner keheyert am xraaye uf em hoof fom Thëmpel:

— Hosana, Soon fon Dawii!

16Un tii hon kesaat fer Yeesus:

— Heyerst tuu was tii am saan sin?

Yeesus hot keantwort:

— Ay sicher! meecht teyer nii keleest hon tas xtik fon te Hayliche Xrifte woo saat: “Hërkot hot te khiner un fer ti kanse kleene khiner kelërnt en perfekte loop opfere”?

17Tan hot Yeesus se kelos, is aus te xtat kang un is pis Petanye kang. Un hot too iwernacht.

Yeesus un te fayche paam

Markus 11.12-14,20-25

18Am anere taach, wii eyer tsurik am keen waar, hot Yeesus hunger kriit. 19Eyer hot en fayche paam kesiin am rant fon te xtroos un is pis tort hiin kang, awer hot niks aan ketrof; ploos pleter. Tan saat eyer fer te fayche paam:

— Kep nii mee fayche!

Un im selwiche momënt is te paam ketrokent. 20Ti tisiple hon tas kesiin, un hon sich fiil ferwunert un saate:

— Wii xnel is te fayche paam ketrokent!

21Tan saat Yeesus:

— Ich fersichere aych tas tas woer is: wën teyer klaawe het un net tswayfle tuut, khënt teyer tas selwiche tings mache woo ich kemach hon mit tëm fayche paam. Un net ploos tas, awer khënt fer tee përich saan: “Xtay uf un xmays tich ins meer”, un tas wërt paseere. 22Wën teyer klaawe tuut, kriit teyer ales was teyer ferlange tuut in kepeet.

Yeesus sayn autoriteet

Markus 11.27-33; Lukas 20.1-8

23Yeesus is an te thëmpel khom, un, wii eyer xon am unterichte waar, sin phaar xëfe fon te priister un phaar yute fiirer ticht pay em khom un hon kefroot:

— Mit was fer autoriteet machst tuu tas tings? Weyer hot tich tii autoriteet kep?

24Yeesus hot keantwort:

— Ich tuun aach aych etwas frooe: Wën teyer ti richtich antwort kept, saan ich mit was fer autoriteet ich tas tings mache. 25Antwort mich: weyer hot ti autoriteet kep fer Yohan se taafe? Waar tas Hërkot ore waare tas ti mënxe?

Tan hon se aankefang se saan ëne fer te anere:

— Wën meyer saan tas es Hërkot waar, tuut tee frooe: “Tan warom het teyer net an Yohan keklaapt?” 26Awer, wën meyer saan tas es ti mënxe waare, hon meyer pang was tas folek mache khan, wayl al tënke tas Yohan en profët waar.

27Tesweche hon se keantwort:

— Meyer wise net.

Tan saat Yeesus:

— Tan saan ich aach net mit was fer autoriteet ich tas kanse tings mache!

Ti tswaay puuwe

28Yeesus saat wayter:

— Un was tënkt teyer too tefun? En man hat tswaay puuwe. Eyer is mit em eyerste xpreche kang un saat: “Mayn soon, hayt keest tuu in mayn trauwe plantaaj xafe.”

29Tee hot keantwort: “Ich wil net keen.” Awer, tëm noo hot eyer sayn meenung ferënert un is kang.

30— Te fater is kang un hot fer te anere soon ti selwsich ortnung kep. Un tee saat: “Yoo, hër.” Awer, tëm noo is eyer net kang.

31Yeesus hot kefroot:

— Weyer fon tëne hot kemach was te fater wolt?

Un tii hon keantwort:

— Te eyerste soon.

Tan saat Yeesus:

— Ich fersichere aych tas tas woer is: ti xtayer kaseerer un ti huure sin eenter am rin khome in Hërkots Raych wii teyer. 32Wayl Yohan Te Taafer is khom fer aych te richtiche weech wayse, un teyer het net an tëm keklaapt; awer, teyer hot tas ales kesiin, awer hot aych net keroyert un hot net an tëm keklaapt.

Ti xlechte paure

Markus 12.1-12; Lukas 20.9-19

33Yeesus saat:

— Heyert en aner paraapel: seliche pauer hot en trauwe plantaaj kemach un hot se tsuu ketsaunt. Hot en thanke kepaut fer ti trauwe fertreete un wayn mache un hot en thorem kepaut fer te wacher. Klaych tëm noo, hot eyer ti plantaaj fermiit fer phaar paure un is reese kefaar. 34Wii ti ërnt tsayt khom is, hot te hër fon te plantaaj phaar knechte kexikt fer sayn teel ap hoole. 35Awer, ti paure hon ti knechte kekrif, hon ëne ferxlaa, te anere hon se umkeprung un noch en anere hon se mit xteen ferworef pis eyer toot waar. 36Tan hot te hër noch mee knechte kexikt wii tas eyerxte mool. Un ti paure hon es selwiche kemach. 37Noo tëm ales, hot eyer sayne aychne soon kexikt, am tënke: “Mayne soon tuun se rexpekteere.” 38Awer, wii ti paure te soon kesiin hon, hon se ëne fer te anere kesaat:

“Tas is te soon fom hër; tee tuut ti plantaaj ërpe. Meyer tuun em umpringe, un ti plantaaj wërt unser sin.”

39— Too hon se te soon kekrif un hon em aus te plantaaj kexmis un hon em umkeprung.

40Tan hot Yeesus kefroot:

— Un yets, wën te hër fon te plantaaj tsurik khomt, was meecht eyer mache mit tëne paure?

41Ti hon keantwort:

— Kans sicher tuut eyer ti xlechte paure toot mache un tuut ti plantaaj fer anere fermiite. Un tii wole tëm sayn teel an te richtich tsayt ap kewe.

42Yeesus hot tan kefroot:

— Het teyer net keleest was ti Hayliche Xrifte saan?

“Te xteen woo ti maurer neewe kelos hon

wërt te importanteste fon se al.

Tas is kemach kep fom Hër

un is was wunerliches!”

43Un Yeesus macht xlus:

— Ich fersichere fer aych tas te Hërkots Raych fon aych wech kehool kept un wërt ap kep fer ti layt woo fruchte fom Raych protutseere. 44Weyer uf tee xteen fale tuut wërt in xtiker playwe. Un, wën te xteen uf yemant fale tuut, tuut tee persoon in xtaap mache.

45Ti xëfe fon te priister un ti fariseyer hon Yeesus sayn paraaple aankeheyert un wuste tas tee iwer sii am xpreche waar. 46Tesweche, wolte se em fange, awer hate pang fom folek, wayl tas folek hot ketënkt tas Yeesus en profët weyer.

Currently Selected:

Mateus 21: NTHunsrik

Highlight

Copy