Lukas 16
16
Ti paraapel fom uneerliche atministratoer
1Yeesus saat fer sayn tisiple:
— Waar mool en rayche man woo en atministratoer hat woo sayn raychtum uf kepast hot. Too hon se fer te man kesaat te atministratoer teet tëm sayn kelt net richtich uf pase. 2Tesweche, hot te man em keruuf un saat: “Ich hon xlecht tings fon tich keheyert. Yets, lee meyer ti aprechnung foer, wayl tuu khanst net wayter fer mich xafe.” 3— Too hot te atministratoer ketënkt: “Te hër prauch mayn aarwat nime. Un yets, was mache ich? Ich hon khee kraft fer te potem putse un ich xeeme mich fer se petle. 4Ich wees xon was ich mache… soo wii ich fort kexikt kewe, wëre ich froynte hon woo mich in sayn hayser uf nëme.”
5— Too hot eyer al keruuf tii woo etwas xultich waare fer te hër un hot fer te eyerxte kefroot: “Wii fiil pist tuu xultich fer mayne hër?”
6— Eyer hot keantwort: “Hunert fase eel!”
Te atministratoer saat:
— “Too is tayn rechnung. Sets tich un xrayp fuftsich.”
7— Fer te anere hot er kefroot: “Un tuu, wii fiil pist tuu xultich?”
— Un eyer hot keantwort: “Tausent moos weets!”
— Too hot te atministratoer kexikt: “Xrayp acht hunert!”
8— Un tëm uneerliche atministratoer sayne hër hot em keloopt weche sayn xlauheet.
Un Yeesus saat wayter:
— Ti mënxe fon tee welt sin fiil xlauer in te kexefter wii ti mënxe woo tsum licht keheere. 9Tesweche saan ich aych: penutst ti raychtum fon tee welt fer froynte mache tas tii, wën ti raychtum aych feelt, aych ap hoole im eewiche hëm. 10Weyer in te kleenichkheete eerlich is, is aach in te kroose; un weyer uneerlich is in te kleenichkheete, is aach in te kroose. 11Wayl, wën teyer net eerlich sayt mit te raychtum fon tee welt, weyer wërt aych aanxtele fer ti echt raychtum uf pase? 12Un, wën teyer uneerlich sayt mit was te anere is, weyer kept aych was ayer is?
13— En sklaawe khan net tswaay hëre tiine in te selwich tsayt, wayl eyer ëne ap xtoose tuut un te anere foer tsiit; ore wërt leal fer ëne sin un te anere hinerkeen. Teyer khënt net em Hërkot tiine un aach em kelt tiine.#Mt 6.24
Phaar tinger woo Yeesus saat
Mateus 11.12-13; 5.31-32; Markus 10.11-12
14Ti fariseyer hon tas keheyert un hon Yeesus ferxpot, wayl tii hon es kelt keliipt. 15Too saat Yeesus tëne:
— Fer ti layt siit teyer kuut aus, awer Hërkot khënt ayer hërts. Wayl was fer ti mënxe fiil weyert hot, hot kaar khee weyert fer Hërkot.
16— Mooses sayn Kesets un te Profëte sayn wort hon kehal pis em Yohan Te Taafer sayn tsayt. Fon tee tsayt aan kept ti kuut naychkcheet fom Kotes Raych aus kexproch, un yeete eene tuut sich weere fer tort rin khome.
17— Is laychter te himel un ti eyert ferxwine, wii ti kleenst puxtaap fom Kesets wech hoole.#Mt 5.18
18— Wën en ferhayrate man sayn fraa lost, un hayrat mit en aner fraa, tan macht eyer en kroose sinte, te eepruch. Un weyer hayrate tuut mit en fraa woo xon ferhayrat waar, macht te selwiche sinte.
Ti paraapel fom rayche un Lasarus
19Yeesus hot wayter kesaat:
— Waar mool en rayche man woo sich aan ketsoo hot mit tayer tsaych un yeete taach en kroos fest kep. 20Waar aach en aarme man, woo Lasarus keheest hat, hat te khërwer fol weye un waar imer foer em rayche man sayn haus toer. 21Lasarus is imer tort keplip, un wolt fersuuche sayn hunger kaput mache mit te krimle woo fom rayche sayne tix runer kefal sin. Sokaar ti hunt sin tëm imer ti weye ap leke khom. 22Is paseyert tas te aarme kextorep is, un ti ëngle hon en pay Aapraham kenom, ins himels fest. Te rayche is aach kextorep un is pekraapt kep. 23Tee hot mechtich kelit in te hel. Eyer hot in ti hee kekukt un hot Aapraham fon waytem kesiin xteen, neewich em Lasarus. 24Too hot er kexraayt: “Fater Aapraham, tauer mich! Xik Lasarus sayn finger nas mache im waser un mayn tsung khiile, wayl ich sin tsu fiil am layte too hier in tëm fayer!”
25— Awer Aapraham antwort: “Soon, tënk traan tas tuu iwer tayn kans leewe kuut tings kriit host, soo lang wii Lasarus ploos xlecht tings kriit hot. Yets, awer, is tee in frayt un tuu machst layte mit. 26Auser tëm, tswixich uns un aych is en kroose apismus, soo tas nimant iwer keen khan, wën mer ach wolt.”
27— Te rayche man antwort: “Tan hale ich tich aan, Fater Aapraham: Xik Lasarus tsu mayne fater sayn haus, 28wayl ich hon noch finef priiter. Los tas tee tëne pexayt saat, tas tii net aach uf tas xrekliche layte plats khome.”
29— Awer Aapraham antwort: “Tayn priiter hon Mooses sayn Kesets un te Profëte sayn picher fer se awiseere. Sole se aan heere.”
30— Te rayche man hot kesaat: “Nee, Fater Aapraham, tas is net kenuuch. Awer, wën yemant fon te toote pay tëne hiin këngt, tan wëre tii sayn leewe ferënere.”
31— Awer, Aapraham antwort: “Wën se Mooses un ti Profëte net aan heere, tan tuun se aach net klaawe wën yemant fon te toote uf xtayt.”
Currently Selected:
Lukas 16: NTHunsrik
Highlight
Share
Copy
Want to have your highlights saved across all your devices? Sign up or sign in
2022 Sociedade Bíblica do Brasil
