Akte 27

Phaulus als kefangne, uf em weech noo Room

1Is resolweyert kep tas meyer solte uf en poot in xtaye no Itaalia. Tan hon se Phaulus un ti anere kefangne ap kep fer Julius, en reemixe ofitseyer, woo fom “Kayser sayne Patalion” waar. 2Meyer sin uf en poot kextii fon te xtat Atramiitio, woo fërtich waar fer se reese noo ti prowins fon Aasia. Un soo hon meyer ti rees aankefang. Aristarko, en masetoonian fon te xtat Tesaloonika, waar pay uns. 3Am neekste taach sin mer an te poot hoof fon Sitoom aan khom. Julius hot Phaulus kuut pehantelt un hot tëm erlaupnis kep fer sayn froynte kuke keen un hilef fer ti rees kriin. 4Wan meyer fon Sitoom ap kefaar sin, is te poot torich ti nort sayt fon te insel Xipre kereest, weche em keeche wint. 5Tan sin meyer tas meer iwerkweert foer em xtrant fon te rechioon fon Siliisia un prowins Panfiilia un sin aan khom in Mira, en xtat fon te prowins Liisia. 6Too hot te reemixe ofitseyer en poot fon te xtat Alexantria ketrof, woo noo Itaalia reese teet, un hot uns too inxtaye kemach.

7Kans langsam sin mer phaar taache kefaar un mit kroose xwiirichkheete sin mer foer ti xtat Kniitos aan khom. Te wint hot uns net kelos foran khome in tee richtung, tan sin mer langst te kap Salmoona fon te insel Kreta kereest, un sin langst ti siit sayte kefaar, woo kexitst is fom wint. 8Soo sin mer mit em poot kans ticht langst em xtrant kefaar un, noch in xwiirichkheete, sin mer an en plats khom “Kuute Xif Hoof” kenënt, ticht an te xtat Lasëya.

9Too sin mer lang tsayt keplip, un is kefeerlich kep wayter se reese wayl te winter ticht am khome waar. Tan hot Phaulus awiseyert:

10— Mëner, ich siin tas unser rees fon too aan foran kefeerlich kept. Tas kept kroose ferluste, net ploos mit em poot un sayn laatung, awer aach tas mënxe um khome.

11Awer, te reemixe ofitseyer hat mee an te kapitan un an te aychner fom poot keklaapt wii an Phaulus. 12Te poot hoof waar net kuut fer iwer te winter playwe. Tesweche, hon ti meyerxte kemënt tas mer solte too ap faare un fersuuche pis noo Feniks khome. Tii xtat is en poot hoof fon Kreta, woo een sayt noo siitwëst hot un te anere noo nortwëst. Un tii hon kemënt tas meyer te winter too rom pringe khënte.

Te xtorem uf em meer

13En xwache wint hot aan kefang se ploose fon siit, un tesweche hon se ketënkt tas se mache khonte was se kepleent hate. Tan hon mer ti ankor kehoop un sin wayter kereest soo ticht wii meechlich langst te xtrant fon Kreta. 14Awer, uf mool, is en aariche xtarke wint, “Norteest” kenënt, fon te insel khom 15un hot te poot soo forx mit kexlept tas mer net khonte tas tee te richtiche khurs noo këngt. Tesweche hon mer uf kep un hon kelos tas te wint uns eenfach mit kenom hot. 16Tas mer fom wint uns xitse khënte, sin mer langst ti siit sayt fon en kleen insel kefaar, Kauta kenënt. Too, mit fiil xwiirichkheete, hon mer te poot fom poot khëne rin hoole. 17Ti meer mëner hon te poot in tas poot kehoop un hon tike xtrike um tas poot fest kepun tas es net ausnaner fale solt. Ti hate pang tas te poot pis an ti sant pënk ticht am xtrant fon Liipya ketsoo keept. Too hon se ti seekel runer kelos un hon kelos tas te wint se mit nëme teet. 18Un te xrooe xtorem is wayter kang. Am neekste taach, hon se aankefang ti laatung ins meer se xmayse. 19Un, taach truf, hon ti meer mëner, mit sayn aychne hënt, ekipamënte fom poot ins meer kexmis.

20Taache lang khont mer net ti sun un net ti xtërne siin, un te wint hot xtarek wayter keploost. Ëntlichmool, hon mer ti kans hofnung fer uns se rete ferloer.

21Nimant wolt mee etwas ese. Tan hot Phaulus sich uf kextelt tswixe tëne un saat:

— Mëner, teyer het sole mich aan keheyert hon wii ich saat meyer solte in Kreta playwe; un soo hete meyer net tee kroose ferluste kehat. 22Awer, yets ferlange ich tas teyer koraaj hon solt. Nimant tuut xtërwe; meyer tuun ploos te poot ferleere. 23Ich saan tas wayl, ti letst nacht, is en ëngel fom Hërkot tsu weem ich keheere un tiine, tsum foerxayn khom fer mich, 24un eyer saat: “Phaulus, prauchst khee pang hon! Tuu must foer te Khayser keen. Un Hërkot, in sayn kuutheet, hot tich xon es leewe kep fon tëne woo mit tich am reese sin.” 25Tesweche, mëner, koraaj! Ich klaawe an Hërkot un sin sicher tas eyer mache tuut was er mich saat. 26Awer, meyer kewe noo en insel kexlept.

27Tswaay woche truf, nachts, un meyer waare wayter im xtorem im Metiteraan Meer. Unkefeyer um halep nacht, hon ti meer mëner kemënt tas mer ticht an lant weere. 28Tan hon se en xtrik mit en kewicht an te xpits ins meer kexmis un hon kesiin tas es too seks un traysich meeter tiif waar. Wayter foran hon se noch mool kemest, un hot siwe un tswansich meeter tiif kep. 29Tan hon se pang kriit tas te poot keeche ti xteen kexmis keept. Tesweche, hon se fier ankore kexmis, an te hinerxt sayt fom poot un hon kepeet tas es klaych taach keept. 30Tan hon ti meer mëner fersuuch aus se rayse fom poot. Hon te poot runer ins meer kelos, am mache wii wën se teere ankore fon fone loos lose. 31Tan saat Phaulus tsum reemixe ofitseyer:

— Wën ti meer mëner net im poot playwe, khënt teyer aych net rete.

32Tan hon ti soltaate ti xtrike woo te poot aan kepun hon ap kehakt un hon en loos kelos ins meer.

33Foer taach, hot Phaulus ferlangt tas yeete etwas ese solt un saat:

— Es sin xon fërtsen taache woo teyer am waarte sayt un nimant hot etwas kes. 34Yets est was, pite. Teyer mist aych neere fer wayter se leewe. Wayl nimant tuut net mool en hoer faatem ferleere.

35Tëm noo hot Phaulg en xtik proot kehool un hot Hërkot ketankt. Tëm noo hot eyer tas proot keteelt un hot aankefang se ese. 36Tan hon se mee koraaj kriit un hon aach kes. 37Uf em poot waare meyer im kansem tswaay hunert seks un siptsich persoone. 38Wii se xon kes hate, hon se te weets ins meer kexmis, tas te poot laychter keept.

Al khome aan kesunt un keret

39Wii es taach kep is, hon ti meer mëner net tas lant erkhënt, awer hon en flache xtrant kesiin un hon fersuucht te xit tort uf krunt setse. 40Tan hon se ti xtrike fon te ankore ap kehakt un hon se ins meer kexmis, un hon ti lënk loos kepun. Klaych tëm noo hon se ti seekel kehoop uf te foer sayt, tas se noo em xtrant faare khënte. 41Awer, te poot is uf en sant pank xteche keplip. Ti foer sayt is fest keplip un ti hiner sayt is ferklopt kep mit te kraft fon te wele.

42Ti soltaate hon pextimt ti kanse kefangne umpringe, tas khee ëne an te xtrant kheemt un ausrayse khënt. 43Awer, te reemixe ofitseyer wolt Phaulus rete un hot net kelos tas se tas mache teere. In keeche teel, hot eyer kexikt tas tii woo xwime wiste solte ti eyerxte sin fer sich ins waser xmayse un xwime pis an te xtrant. 44Un hot aach kexikt tas ti anere sich rete solte, sich an preter fest am hale ore an xtiker fom poot. Un soo waar es tas meyer al uf lant khom sin kesunt un keret.

Currently Selected:

Akte 27: NTHunsrik

Highlight

Copy