إنجيل لوقا 4

الفصل الرابع

1رجع يَسوع من الأُرْدُن معمّر بالروح القُدُس، وݣوّدوْ الروح نالخلا. 2تمّاك جرّبوْ الشيطان أربعين يوم. وْما كلا حتّى حاجة طول ديك الأيّام، وْملّي ڭازَتْ، جاه الجّوع. 3قال لو الشيطان: "إدا كُنْتِ ابن اللّٰه، قول نْهَد الحجْرة ترجع خبز." 4ردّ عليه يَسوع: "مكتوب: «ماشي بالخبز بوحدو كيعيش الإنسان.»"#4‏:4 هَد الاقتباس من سفر التثنية 8‏:3. 5وْطلّعوْ الشيطان نواحد الموطَع عالي وْورّاه مَمْلكات الدنيا كاملين في رمشة عين. 6وْقال لو الشيطان: "أنا غادي نعطيك السلْطة على هَد المملكات كاملة والعظمة ديالاْ، حيت اتّعطات لي وانا كنعطيها لِمّن ما بغيتْ. 7إدَن، إدا سجدْتِ لي، كُل شي غادي يكون ديالك." 8ردّ عليه يَسوع وْقال: "مكتوب: «سْجد نالرَّبّ إلَهك، وْهُوَ بوحدو تعبدوْ.»"#4‏:8 هَد الاقتباس من سفر التثنية 6‏:13. 9الشيطان ادّى يَسوع نأُورُشَليم، وْوقّفوْ على الصُمعة د بيت المَقْدس وْقال لو: "إدا كُنْتِ ابن اللّٰه، سيّب راسك من هنايَ نْتحت، 10حيت مكتوب: «غادي يوصّي الملائكة ديالو عليك باش يحفظوك، 11وْغادي يرفدوك على اليَدّين ديالوم باش ما تضرب حتّى حجْرة بْرِجلك.»"#4‏:11 الشيطان اقتَبس هَد الآية من المزمور 91‏:12. 12وْردّ عليه يَسوع وْقال: "كيقول الكتاب: «ما تجرّب شي الرَّبّ إلَهك.»"#4‏:12 هَد الاقتباس من سفر التثنية 6‏:16. 13ملّي كمّل الشيطان من كُل التجارب، خلّاه حتّى تجي فُرْصة يَخرى.

14رجَع يَسوع بْقوّة الروح نالجَليل، وانْتَشر الخبَر عليه في ديك المنْطَقة كاملة. 15وْكان كيعلّم في بيوت العبادة والناس كاملين كيشكروه.

16مشى نالناصِرة فاين كان تربّى وْفي نهار السبت دخل نْبيت العبادة فحال العادة، وْناض باش يقرا. 17قدّمو لو كتاب النَّبي إشَعْيا. وْملّي فتحوْ، جبر الموطَع فاين كان مكتوب فيه: 18"روح الرَّبّ عليَّ، حيت دهَنّي باش نبشّر المساكن بْخبَر الخير، صيفطني باش نعيّط نالحبّاسة بالحريّة، وْنالعُميان بالبصر، وْباش نطلق المظلومين أحرار، 19وْنخبر بالسَّنَة المقبولة عند الرَّبّ."#4‏:19 هَد الاقتباس من سفر النَّبي إشعيا 61‏:1‏-2. 20من بعدما طوى الكتاب، ردّوْ نالخدّام وْݣلس. والناس كاملين الّي كانو في بيت العبادة بقاو كيشوفو فيه بْترْكيز. 21يَسوع بدا كيقولّوم: "اليوما تحقّق الكلام في الحضور ديالكُم." 22وْكانو كاملين كيشهدو لو، وْتعجّبو من كلام النعْمة الّي خرج من دُقمو وْقالو: "واش ماشي هَدا هُوَ بن يوسف؟" 23يَسوع قالّوم: "بلا شكّ غَد تقولو لي هَد المتال: «آ الطبيب، شافي نفسك. عمل هنايَ في البلاد ديالك كُل ما سمعْنا بلّي عملْتِه في كَفْرِناحوم.» 24كنقول لكُم الحقّ، ما كاين حتّى شي نَبي مقبول في البلاد ديالو. 25وْفي الحقيقة في الوقت د إيليّا، ملّي السما تشدَّتْ مدّة تلت سنين وْنُص، وقعَتْ مجاعة كبيرة في البلاد كاملة. وْكانو في إسْرائيل في ديك الوقت بزّاف د الهجّالات. 26وَلكن إيليّا ما اتّصيفط نْحتّى واحدة مِنّوم، وَلكن اتّصيفط نواحد الهجّالة في صِرْفة ديال صَيدا. 27وْفي وقت النَّبي أَليشَع كان في إسْرائيل بزّاف د المبْراصين، وْما شافى حتّى واحد مِنّوم، من غير نُعْمان السوري تشافى." 28ملّي سمعو هَد الكلام، الّي كانو في بيت العبادة غضبو بزّاف. 29وْناضو وْطردوه من المدينة وادّاواه نالحافة د الجّبل، فاين كانت المدينة ديالوم مبنيّة عليه، باش يسيّبوه نْتحت. 30وَلكن هُوَ ݣاز فوسطوم وْمشى فحالو.

31هوّد يَسوع نْكَفْرِناحوم، وْهِيَ واحد المدينة في الجَليل، وْكان كيعلّم الناس نهار السبت. 32وْتعجّبو من التعْليم ديالو، حيت كلامو فيه السلْطة. 33كان في بيت العبادة واحد الرَّجل فيه واحد الجنّ شرّير، غوّت بْصوت عالي 34وْقال: "خلّينا! شنّو بينّا وْبينك، آ يَسوع الناصِري؟ واش جيتِ باش تهلكنا؟ أمّا أنا كنعرفك شكون أنتينا، القدّوس د اللّٰه!" 35وْنهَط فيه يَسوع وْقال: "سْكت وْخْرج مِنّو!" وْديك الساعة طيّحوْ الجنّ فوسط الناس وْخرج مِنّو وْما ضرّوْ شي. 36دهشو كاملين وْقالو مع بعطوم: "شنّو هَد الكلام؟ بالسلْطة والقوّة كيآمر الجنون المنْݣوسين وْكيخرجو!" 37والشهرة ديالو انْتَشرَتْ في كُل موطَع في ديك المنْطَقة.

38ناض وْخرج من بيت العبادة، وْدخل نالدار د سِمْعان. وْكانَت النسيبة د سِمْعان مريطة بالسخانة القويّة وْطلبوه من جهتاْ. 39قرّب مِنّاْ وْنهَط في السخانة وْخرجَتْ مِنّاْ، وْفي ديك اللحظة ناضت وْبداتْ كَتْـتسخّر عليهُم. 40ملّي غربَت الشمس، الناس جابو نيَسوع المراطين كاملين بأمْراض مخْتَلفة وْنزّل اليَدّين ديالو على كُل واحد مِنّوم وْشافاهُم. 41وْزايد على هَد الشي، خرجو الشياطين من بزّاف د الناس وْهُمَ كيغوّتو: "أنتينا هُوَ ابن اللّٰه!" وْنهَط فيهُم وْما خلّاهُم شي يهدرو، حيت عرفوه بلّي هُوَ المسيح.

42خرج يَسوع في الصباح وْمشى نواحد الموطَع خالي، وْفتّشو عليه الناس، وْملّي جبروه، حصروه باش ما يمشي شي من عندوم. 43وَلكن قالّوم يَسوع: "واجب عليَّ نبشّر بْمُلك اللّٰه في مُدُن يَخرين حتّى هُمَ، حيت على هَد الشي اتّصيفطْتْ." 44وْكان كيبشّر في بيوت العبادة د اليَهوديّة.

Currently Selected:

إنجيل لوقا 4: ary

Highlight

Copy