လက် 19

လွင် ဒူအီ ဂဲပ် ရွိုန် စိုင်

1ဝါယ် အန် တီ ဇဝ် ယေဆူ လိုပ် ခဲင် မိူင် ယေရီခုဝ်၊ ဟာဝ် ဒူပ် န့တေန့် ကာတဲ မိူင် တွိုန်။ 2ဒေါ ဟာဝ် အန် ဒူင် တွိုန်၊ န့ မိုဝ်း ဒါ အူ ဝီ၊ အီ ဂဲပ် ရွိုန် စိုင်။ အန် စိူဝ် အာဆာကဲ။ အန် ဟဲ့ ခြမ် ကာဆဝ်။ 3အန် ဆီ ယိုဝ် ဇဝ် ယေဆူ။ အန် ယီ တူ ပွိုန် ယိုဝ်။ ဂေ ဒူအီ အီ ကွယ် ဒူင် တွိုန် ဟဲ့ ကိူန် ကာဆဝ်။ ဒုဝ် အန် ယီ ဒီတျီမ်။ 4ခုဝ်၊ အန် ဖူင့် ယဲတ့် ဒီ အာတ့် န့တေန့် ဟာဝ် ဇဝ် ယေဆူ။ အန် ဝီ ဟုဝ့် ဒဲင် ဟေ ဒီပူ အူ ကာဒင်၊ တဲး အန် ပွိုန် ဒီ ယိုဝ် ဇဝ် ယေဆူ။

5ဒေါ တး ဇမ် ဇဝ် ယေဆူ ဒူင် ကွယ် အာဆာကဲ၊ အန် ဆာကိုဝ်း ယွတ် အာဆာကဲ တွိုန်။ အန် တဝ်း၊ “အိုယ် အာဆာကဲ၊ တဲး မဲ လေး လူင် ဟဲ ဟဲ ဒဲင် ဟေ တီ။ အာတိုဝ် နီ အုဝ် ဆီ ဟာဝ် လိုပ် ခဲင် ကာင် မဲ။” 6အန် ဟဲ့ ဟွတ့် ကာလာင် ပါယ် တီ၊ အာဆာကဲ ပီခြန် အန်၊ လေး လူင် အူ ဇေန့်၊ ရွုး ဇဝ် ယေဆူ လိုပ် ခဲင် ကာင် အန်။ နဝ်း အန် ဘော ဒါခိုယ် ကာဆဝ်။

7ဂေ ဒူအီ ဟဝ် အီ ယိုဝ် လွင် အန် တီ၊ ဂေ တူ အိုင်။ ဂေ စုး ဒီ လာယ် ကာလာင်၊ “မှဝ် န့ ပါယ် ပီ ဟာဝ် လိုပ် အန် ခဲင် ကာင် ဒူအီ အီ မိုဝ်း မှာပ်။း”

8ဝါယ် အန် တီ အာဆာကဲ ဘော တဝ်း ဒီ ဇဝ် ယေဆူ၊ “အိုယ် မဲ ဇဝ်၊ ကြုဝ်ကြာမ် ခဲ့ မိုဝ်း အုဝ် ဒွန် မျုဝ်၊ အူ ကာတဲ အုဝ် ဒီ ကာဆာင် ဒွါ ဒီ ဒူအီ ဂိန်။ ခဲ့ ပီ ပုဝ်း အုဝ် ဒီ ဒူအီ ဟဝ်၊ အုဝ် ဒီ ဒွါ ဝိဝ် ဒီ ဂေ ဖွုန် ဘုန်။”

9အန် ဟဲ့ ဟွတ့် တဝ်း ပါယ် တီ၊ ဇဝ် ယေဆူ ဝီ တဝ်း ဒီ အန်၊ “ဒေါ တီ နီ ဘော မဲ ဘော ဒူအီ ဒွန် အီ အီ ကွယ် ခဲင် ကာင် မဲ၊ ဘေ ဟဲ့ လေး ခဲင် မှာပ် ပီ ဘူင် ဘေ။ ဒေါ တီ နီ ဘော ဒူအီ ဂေ နီ ဒွန် အီ ဟဲ့ ညှိုမ် ပီ ဒါ အာဘြာဟမ်။ 10န့ ဟဲ့ မုး၊ ဟဲ့ မှာန်၊ ဒူအီ အီ ဟဲ့ ဘဲန် ဂွန် ဒူအီ၊ အန် ဟဲ့ တး လူင် ဒဲင် ကာဒါယ် နီ၊ တဲး အန် ဟြေတ့် ဂေ ဒူအီ အီ ဟဲ့ ဘျုဝ်း၊ ဟဲ့ ဟြာယ်၊ တဲး အန် ချွတ် ဂေ ဒူအီ မိုဝ်း မှာပ်။”

လွင် ဒါ ကာညာ ဒွါ ရွိုန် ဒီ ဒဲစေန့် အန်

11ဇဝ် ယေဆူ ဘော ဝီ ကာလာင် အူဖာမာ ဒီ ဂေ ဒူအီ အီ ထူမ် ပီ တဝ်း အန် တွိုန်။ ဒေါ အန် တီ ဂေ ဟဲ့ တး ဇမ် ကာတတ် မိူင် ယေရူဆာလဲမ်။ ဂေ ဒူအီ တွိုန် မိူဝ် ညှိုမ်၊ အာခြာဝ် ဒီ အိုပ် ဇဝ်ဖြာ ကာဒါယ် ဟဲ့ ကာတတ် ဒီ ဇမ်။ 12ကူပ် ဂေ ဒူအီ တီ၊ ဇဝ် ယေဆူ ကာလာင် အူဖာမာ နီ ဒီ ဂေ။ အန် တဝ်း၊ “န့ ဟဲ့ ဒွိုမ် မိုဝ်း ဒါ ကာညာ အူ ဝီ။ အန် လုဝ် ဟာဝ် ခဲင် မိူင် တူင့်၊ တဲး ခုန်ဒီခမ် တာင် ခဲင် မိူင် တူင့် တွိုန် ဘူင် တဲး ဘော အန် ဘဲန် ခုန်ဒီခမ်။ ဝါယ် အန် တီ အန် ဒီ ဘော ဝီ တး အိုပ် မိူင် ဘြိမ် အန်။ 13အာတ့် ဟာဝ် အန်၊ အန် စ်ု ဒဲစေန့် အန် ဂိုဝ် ဝီ တဲး ဂေ တး ဇမ် ဒူင် ကွယ် အန်၊ တဲး အန် ဒွါ ရွိုန် ဒီ ဂေ၊ အူ ဝီ အူ ဟြဲန့် ဘူင့်။#19:13 ခဲင် ဘပ် ဒေါ ဂုဝ် န့ တဝ်း “ဂိုဝ် မီနာ”။ အူ မီနာ ဘဲန် အူ မာယဝ်း ဘူင့်။ အန် မိူဝ် တဝ်း ဒီ ဂေ၊ ‘တဲး ဘေ ကာစိုဝ်း ကာယွင့်၊ တဲး န့ ကော ဇမ် အာခြာဝ် ဒီ ဝီ တး ဇမ် အုဝ်။’

14အန် ဟဲ့ ဟွတ့် ဟာဝ်၊ ဂေ ဒူအီ ခဲင် မိူင် ဘြိမ် အန်၊ ဂေ ယီ တူ အိုင် ဒါ ကာညာ တွိုန်။ ဂေ ဘော တိုယ် ဒူအီ မင် အီ၊ တဲး ဂေ ဒူပ် ဒီ ပန် အန်၊ တဲး ဂေ တဝ်း ဒီ ခုန်ဒီခမ် တာင် တွိုန်၊ ‘ယေ တူ လုဝ် ဒါ ကာညာ တီ ဘဲန် ခုန်ဒီခမ် အီ အိုပ် ယေ။’

15ဝါယ် အန် တီ ဒါ ကာညာ တွိုန် ဟဲ့ ဟွတ့် ဘဲန် ခုန်ဒီခမ်၊ အန် ဝီ ဝိဝ် မိူင် အန်။ ဒေါ ဟဲ့ တး ဇမ် အန် အူ ဇေန့် အန် ဒဲ့ ဂေ ဒဲစေန့် အန် တွိုန်၊ တဲး ဂေ တး ဇမ် ဒူင် ကွယ် အန်၊ တဲး အန် နပ် မှဝ် ဂေ ဟဲ့ ပဲ ဒီ ဘူင် တဲး ရွိုန် အန် ကာပွါ။

16ပန် တီ အူ ဝီ တး ဇမ် ဒူင် ကွယ် အန်။ အန် တဝ်း၊ ‘အိုယ် မဲ ဒါ ကာညာ၊ ရွိုန် ပီ ဒွါ မဲ အူ ဟြဲန့် တွိုန်၊ အုဝ် ဟဲ့ ပွိုန် ဂိုဝ် ဘုန်။’

17ခုန်ဒီခမ် တွိုန် ဝီ တဝ်း၊ ‘မဲ ဟဲ့ ဘူင် နာ မွှိုမ်။ မဲ ဟဲ့ မုး ဒဲစေန့် အုဝ် အီ မွှိုမ်။ မဲ ဟဲ့ မိုဝ်း နဝ်း မှာန်၊ တဲး မဲ ဂျုဝ်ဂျာ ဒေါ ပွိုန် မဲ အီ စဲက်။ အုဝ် ဒီ တဲး မဲ ဘဲန် ဒါ တာင် အီ အိုပ် မိူင် ဂိုဝ် မိူင်။’

18ဝါယ် အန် တီ ပေါ အူ ဝီ ဘော တး။ အန် တဝ်း၊ ‘အိုယ် မဲ ဒါ ကာညာ၊ အူ ဟြဲန့် ပီ ဒွါ မဲ ဒီ အုဝ်၊ အုဝ် ဟဲ့ ပွိုန် ဖန် ဘုန်။’

19အန် ဟဲ့ ဟွတ့် တဝ်း ပါယ် တီ၊ ခုန်ဒီခမ် တွိုန် ဝီ တဝ်း၊ ‘အုဝ် ဒီ တဲး မဲ ဘဲန် ဒါ ကာညာ အီ အိုပ် မိူင် ဖန် မိူင်။’

20ဟဲ့ ဟွတ့် ပန် တီ ဒူအီ ပေါ အူ ဝီ ဝီ တး။ အန် တဝ်း၊ ‘အိုယ် မဲ ခုန်ဒီခမ်၊ နီ၊ ရွိုန် အူ ဟြဲန့် ပီ ဒွါ မဲ ဒီ အုဝ်၊ အုဝ် ဒွါ ဝိဝ် ဒီ မဲ။ အုဝ် ဟဲ့ ကာဘန် အုန် ခဲင် ဘိက်၊ ကွဲ့ တဲး န့ ဘျုဝ်း။ 21အုဝ် ဟဲ့ ယုဝ် မဲ။ ဟဲ့ နပ်၊ မဲ မုး ဒါ ကာညာ အီ မွှိုမ် ယုဝ်။ မဲ တူ ဘူင် ဂါန် မာဆေ၊ မဲ ယီ နပ် ဒီ ပွိုန် ကိူန်၊ မဲ တဲး ဒူအီ ဟဝ် ဘူင် ဂါန် မဲ။ မဲ မိူဝ် ဆုဝ့် ငှုဝ် ပီ တူ ဆမ် မဲ။’

22ခုန်ဒီခမ် တဝ်း ဒီ အန်၊ ‘မဲ မုး ဒဲစေန့် အီ တူ မွှိုမ်။ ဟဲ့ မှာန် ပီ ကာလာင် မဲ။ အုဝ် ဒီ ဘော ဒမ် မှာပ် မဲ ကူပ် ဂြုဝ်း မဲ တီ။ မဲ ဟဲ့ နပ်၊ အုဝ် မုး ဒူအီ မွှိုမ် ယုဝ်။ အုဝ် တူ ဘူင် ဂါန် မာဆေ။ အုဝ် ယီ နပ် ဒီ ပွိုန် ကိူန်။ အုဝ် တဲး အီ ဟဝ် ဘူင် ဂါန် အုဝ်။ အုဝ် ဘော ဆုဝ့် ငှုဝ် ပီ တူ ဆမ် အုဝ်။ 23ဆေ ဟဲ့ မုး ဟဲ့ မှာန် ပါယ် တီ၊ မှဝ် န့ ပါယ် ပီ တူ ဘ့လေး မဲ ရွိုန် တီ၊ တဲး န့ လေး အျီင် အန်။း ဆေ မဲ ဘူင် ပါယ် တီ၊ အုဝ် ဟဲ့ ပွိုန် ဒိုဝ်း အျီင် အန် ဒေါ ဝီ တး ဇမ် အုဝ်။’

24ဟဲ့ ဟွတ့်၊ အန် ဘော တဝ်း ဒီ ဂေ ဒူအီ အီ ကွယ် ဒူင် တွိုန်၊ ‘တဲး ဘေ ဒိုဝ်း ရွိုန် အုဝ် အူ ဟြဲန့် ပီ ဂူင့် အန်၊ ဝီ ဒွါ ဒီ ဒူအီ အီ ဟဲ့ ပွိုန် ဂိုဝ် ဘုန် တွိုန်။’

25ဂေ အီ ဟဝ် ယီ တဝ်း ဒီ အန်၊ ‘အိုယ် မဲ ဒါ ကာညာ၊ ဒူအီ တွိုန်၊ အန် ဟဲ့ ဟွတ့် ပွိုန် အူ ဟြဲန့်။’ ဒါ ကာညာ ဝီ တဝ်း၊ 26‘အုဝ် တဝ်း ဒီ ဘေ၊ အာဆေ ဟဲ့ မိုဝ်း ဘဲန် မျုဝ် ဘဲန် မျုဝ်၊ အန် ဒီ ဝီ ပွိုန် ပေါ န့ ပွါ၊ တဲး အန် မိုဝ်း လွှိုမ် ခါ အာတ့်။ အာဆေ ယီ တူ မိုဝ်း မာဆေ၊ ခဲ့ ပီ ထာင် အန်၊ အန် ဟဲ့ မိုဝ်း၊ အုဝ် ဒီ ဒိုဝ်း ဘော အာတီ၊ ကွဲ့ ဟူ တဲး အန် မိုဝ်း မာဆေ။’ 27ဘော ဂေ ဒူအီ တူ အိုင် အုဝ်၊ ဒူအီ တူ ဆီ တဲး အုဝ် ဘဲန် ခုန်ဒီခမ် အီ အိုပ် ဂေ တွိုန်၊ ဘေ လုဝ် စ်ု ဂေ တး ဒူင် ကွယ် အုဝ် နီ၊ ငဝ်း ယမ် ဂေ ဒီ အာတ့် အုဝ်။ ခုန်ဒီခမ် တွိုန် တဝ်း ပါယ် တီ ဒီ ဒဲစေန့် အန်။”

လွင် ဇဝ် ယေဆူ လိုပ် ခဲင် မိူင် ယေရူဆာလဲမ်

28ဇဝ် ယေဆူ ဟဲ့ ဟွတ့် ကာလာင် ဇိုဝ် တီ ဒွန် မျုဝ်၊ အန် ယဲတ့် ဒီ အာတ့် ဂေ ဒီဘဲ အန်၊ ဟာဝ် ဒူပ် န့တေန့် အီ ဟုဝ့် မိူင် ယေရူဆာလဲမ်။ 29ဒေါ တး ဇမ် အန် ကာတတ် ရဝ် ဘေတ်ဖာဂေ ဂါယ် ရဝ် ဘေထာနီ၊ အန် တး ဇမ် ဒီ ဒင် နွန် ဟေ နာမန်။ အန် စ်ု ဒီဘဲ အန် အာ ဝီ၊ 30တဝ်း ဒီ ဂါယ်၊ “တဲး ဘာယ် ဟာဝ် ခဲင် ရဝ် အီ ကွယ် ကာတတ် ဒွယ်။ ဒေါ လိုပ် ဘာယ် ခဲင် ရဝ်၊ ဘာယ် ဒီ ယိုဝ် ဂွန် မာလာ ပဲ့ ဟဲ့ ပက် အုန် ဂေ။ ဒူအီ တူ ဒွိုမ် ပဝ့် အန်။ တဲး ဘာယ် ဂဝ်း ဝန် အန်၊ တိုန့် အန် တး ဇမ် ဒူင် ကွယ် အုဝ် နီ။ 31ဆေ န့ မိုဝ်း ဒူအီ အီ ဒီမွှတ် ဘာယ်၊ မှဝ် န့ ပါယ် ပီ ဂဝ်း ဘာယ် မာလာ တီ၊ ဘာယ် လုဝ် တဝ်း၊ ‘အန် ဇဝ် အီ လုဝ် အန် အာဒါ အူ ကာစန်။’”

32ပန် တီ ဂါယ် အာ ဝီ ဘော ဟာဝ်။ ဂါယ် ဘော ယိုဝ် တူတ့် ပီ ဒွိုမ် တဝ်း ဇဝ် ယေဆူ ဒီ ဂါယ်။ 33ဒေါ ဂဝ်း ဂါယ် ဝန် ဂွန် မာလာ တွိုန်၊ ဒါ ကာညာ အန် တဝ်း ဒီ ဂါယ်၊ “မှဝ် န့ ပါယ် ပီ ဂဝ်း ဘာယ် ဝန် ဂွန် မာလာ အုဝ် တီ။း”

34ဂါယ် ဝီ တဝ်း ဒီ အန်၊ “အန် ဇဝ် ဟဲ့ လုဝ် အူ ကာစန်။”

35ဟဲ့ ဟွတ့်၊ ဂါယ် ဝီ တိုန့် မာလာ တွိုန် တး ဇမ် ဒူင် ကွယ် ဇဝ် ယေဆူ။ ဂေ ဒူအီ ကိူန် ဒိုဝ်း ခြိုင် ပီ တာ ဂေ၊ ဘ့လေး ဒဲင် ကာတု မာလာ တွိုန်၊ တဲး ဇဝ် ယေဆူ ပဝ့် နာ ဒဲင်။ 36ဒေါ ဟာဝ် အန် ဒူပ် န့တေန့် တွိုန်၊ ဂေ ဒူအီ အီ ဒူပ် အန်၊ ဂေ ဘော ဒိုဝ်း ခြိုင် ပီ တာ ဂေ၊ ဒ ဒဲင် န့တေန့် ဒီ အာတ့် ဇဝ် ယေဆူ။

37ဒေါ ဟဲ့ တး ဇမ် ဂေ ကာတတ် မိူင် ယေရူဆာလဲမ်၊ ဟာဝ် ဒူပ် န့တေန့် အီ လေး လူင် ဒဲင် နွန် ဟေ နာမန်၊ ဂေ ဒူအီ ကိူန် အီ ဒူပ် အန် ဘော ဂေ ဒီဘဲ အန်၊ ဂေ ဘဲန် နဝ်း ဆီ ဒါင် ဂုင် ဂေဇူ ဒီ ဇဝ်ဖြာ။ ဂေ မိူဝ် အိူပ် အန် ဇဝ်၊ တဝ်း ဂြုဝ်း ဒီတာင်၊ ကာလာင် လွင် နာ မွှိုမ် အာမ် ကာဆဝ် ပဲ့ ဟဲ့ ဘူင် အန် ဇဝ်၊ တဲး ဂေ ပွိုန် ဒီ ယိုဝ်။ ဂေ ဘောကာဂ့လျီတ် တဝ်း၊

38“အေ အိူပ် မျုက် ခုန်ဒီခမ် ပဲ့ ဟဲ့ တိုယ် တး ဇဝ်ဖြာ။ တဲး ဂေ ဒူအီ ကွယ် ခဲင် မိူင် ဂါင်ဟြာဝ် မိုဝ်း နဝ်း ဂျီတ်။ အာဖုင် ဒင်ခုဝ် ဇဝ်ဖြာ ဟဲ့ တာင် ကာဆဝ်။ အန် ကွယ် ခဲင် ဂါင်ဟြာဝ်၊ အီ မုး ဒူင် တာင် လွှိုမ် တူတ့်။” ဂေ ဒူအီ ကိူန် တဝ်း ပါယ် တီ။

39ဒေါ အန် တီ ဂေ ဖိုင် ဖာရီဆဲ ဘော ဂေ ဒူအီ အီ ကွယ် ဒူင် တွိုန်၊ ဂေ တဝ်း ဒီ ဇဝ် ယေဆူ၊ “ဒါ ဆာရာ၊ တဲး မဲ စ်ု ဂေ ဒီဘဲ မဲ၊ ကွဲ့ တဲး ဂေ ဆီနန် ဆီနိူင် ပါယ် တီ။”

40ဇဝ် ယေဆူ ယီ တဝ်း၊ “အုဝ် တဝ်း ဒီ ဘေ၊ ဆေ ဂေ ဒူအီ နီ တူ တဝ်း မာဆေ၊ န့ ဒီ မိုဝ်း မာဝ် ဂေ နီ၊ ဂေ ဒီ ဒတ် တာင်၊ အိူပ် ဇဝ်ဖြာ။”

41ဇဝ် ယေဆူ၊ ဒေါ တး ဇမ် အန် ဒူင် ဟဲ့ ပွိုန် ယိုဝ် မိူင် ယေရူဆာလဲမ်၊ အန် ဘော ယာမ် ကူပ် လှုဝ်း အန် ဂေ ဒူအီ အီ ကွယ် ခဲင် မိူင် တီ။ 42အန် တဝ်း၊ “ဒေါ တီ နီ၊ အုဝ် ဆီ လုဝ် ကာဆဝ်၊ တဲး အုဝ် ဒွါ နဝ်း ဂျီတ် ဒီ ဘေ။ ဘေ ယီ တူ နပ် လွင် အန် တီ။ န့ ပီ ငါယ် ဘေ အပ်၊ အာဝ် ပွိုန် ယိုဝ် မာဆေ။ 43န့ ဒီ မိုဝ်း အူ ဆီငဲ၊ ဂေ ရန်ဆူ ဘေ ဒီ တး ဇမ် ဒီ အာတ့် မိူင်။ ဂေ ဒီ ဘူင် ဘ့လဝ့် န့တဲင်၊ တဲး ဂေ ပွိုန် ဒီ လိုပ် မိူင်။ ဂေ ဘော ကွယ် ရူပ် မိူင်၊ ကွဲ့ တဲး ဒူအီ ပွိုန် လေး ပွိုန် လိုပ် နာ မှဝ်။ 44ဂေ ဒူအီ တွိုန်၊ ဂေ ဒီ ဘူင် တဲး ဘေ စှိုမ်၊ တဲး မိူင် ကော ကာပျာတ့် လိုဝ် တူတ့်။ ဘော ဂေ ဒူအီ ဒီတာင် ဘော ဂေ ဂွန် အီ ကွယ် ခဲင် မိူင်၊ ဂေ ဒီ ဘော စှိုမ် ဘောကာဂ့လျီတ်။ မာဝ် ပီ တာ ဒူအီ ဆမ် ကာင်၊ အူ ဘူင့် မိူဝ် တူ ဝီ ကွယ် ဒူင် ဘြိမ် အန်။ န့ ဒီ ဘဲန် ပါယ် တီ၊ ကူပ် တူ နပ် ဘေ လွင် ဇဝ်ဖြာ ဟဲ့ တး၊ တဝ်း ဒီ စွယ် ဘေ။” ဇဝ် ယေဆူ တဝ်း ပါယ် တီ ဒီ မိူင် ယေရူဆာလဲမ်။

လွင် ဇဝ် ယေဆူ လိုပ် ခဲင် ဝဲင် ဟုဝ် ဇဝ်ဖြာ

45ဝါယ် အန် တီ ဇဝ် ယေဆူ လိုပ် ခဲင် ဝဲင် ဟုဝ် ဇဝ်ဖြာ။ အန် ဘော ဟုဝ် လေး ဂေ ဒူအီ အီ လာယ် ကာစိုဝ်း ကာယွင့် ခဲင် ဝဲင် ဟုဝ် ဇဝ်ဖြာ တီ။ 46အန် တဝ်း ဒီ ဂေ၊ “ဘပ် ဇဝ်ဖြာ ဟဲ့ တဝ်း လွင် ဟုဝ် ဇဝ်ဖြာ၊ ‘အုဝ် ဟဲ့ ဘူင် တဲး ကာင် အုဝ် ဘဲန် ဒူင် ဒီ တး ဆာခိုဝ် ဒူအီ ဒီ ဇဝ်ဖြာ။’ ဘေ ယီ ဟဲ့ တဲး န့ ဘဲန် ဒူင် တး ချြီင် ဒါ ဇူန်။”

47ဝါယ် အန် တီ ဒွန် ဆီငဲ ဇဝ် ယေဆူ မာနုဝ် ဒူအီ ခဲင် ဝဲင် ဟုဝ် ဇဝ်ဖြာ တွိုန်။ ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒါ ဆာရာ အီ မာနုဝ် ဒါရာ ယူဒါ၊ ဘော ဂေ ဒါ တာင် အီ အိုပ် ဒူအီ အာယူဒါ၊ ဂေ လာယ် ဆင်ချာင် မှဝ် ဂေ ဒီ ပါယ် ဒီ ငဝ်း ယမ် ဇဝ် ယေဆူ။ 48ဂေ ယီ ဇေန့်ဇာ တူ လေး မာဆေ အီ ဒီ တဲး ဂေ ပွိုန် ဒီ ဘူင်။ ခုဝ်၊ ဂေ ဒူအီ ကိူန် ဘော ထူမ် ဘော ဖြူမ် ဆေဆေ ပီ တဝ်း ဇဝ် ယေဆူ။

Currently Selected:

လက် 19: pce

Highlight

Copy