ယဟ 4

လွင် ဇဝ် ယေဆူ ကာလာင် ဂြုဝ်း ဒီ အီဘိုန့် ခဲင် အိူင် ဆာမာရီ

1ဂေ ဒါ တာင် ခဲင် ဖိုင် ဖာရီဆဲ ကော နပ်၊ ဂေ ဒူအီ အီ တး ဒီ ဇဝ် ယေဆူ တဲး အန် စိုပ် ဂေ ခဲင် အိုမ်၊ တဲး ဂေ ဘဲန် ဒီဘဲ အန်၊ ဂေ ကိူန် လွှိုမ် ဒီဘဲ ဒါ ဆာရာ အာယောဟာန် တွိုန်။ 2မာလဲ၊ အာဝ် မုး ဇဝ် ယေဆူ အီ စိုပ် ဒူအီ ခဲင် အိုမ်၊ န့ မုး ဒီဘဲ ဇဝ် ယေဆူ အီ ဘူင် ပါယ် တီ။ 3ဒေါ နပ် ဇဝ် ယေဆူ လွင် ဖိုင် ဖာရီဆဲ တွိုန်၊ အန် ဝီ လေး အိူင် ယူဒါ၊ ဝီ ဟာဝ် အိူင် ဂါလီလေ။

4ဒေါ ဟာဝ် အန် ဒူပ် န့တေန့် အန် လုဝ် ကာလုဝ်း အိူင် ဆာမာရီ။ 5အန် တး ဇမ် ခဲင် မိူင် ဆီဒါ။ မိူင် တီ ကွယ် ခဲင် အိူင် ဆာမာရီ။ န့ ကွယ် ကာတတ် ကာဒါယ် ပီ ဒွါ အာကူပ် ဒီ ဂွန် အန် အီ စိူဝ် အာယုဝ်။ 6ဒူင် ကွယ် အန် တီ၊ န့ မိုဝ်း အိုမ် ခိုမ် အီ ဒွိုမ် မုး အိုမ် ခိုမ် အာကူပ် တွိုန်။ ဇဝ် ယေဆူ ဟဲ့ နုန် ဒီ ဟာဝ် ဒူပ် န့တေန့်။ ခုဝ်၊ အန် ဟာဝ် တုတ့် ဒီ ခူပ် အိုမ် ခိုမ် တီ။ ဒေါ အန် တီ ဟဲ့ ဇမ် ကာတဲ ဆီငဲ။ ဂေ ဒီဘဲ အန် ဟဲ့ ဟာဝ် လိုပ် ခဲင် မိူင် တွိုန်၊ ဟာဝ် စိုဝ်း ပီ ဒီ ဟူမ် ဂေ။

7-8န့ ယီ မိုဝ်း အီဘိုန့် အူ ဝီ၊ အန် မုး ဒူအီ အာမျုဝ် ဆာမာရီ။ အန် တး တဝ်း ဒီ တဝ့် အိုမ်။ ဇဝ် ယေဆူ တဝ်း ဒီ အန်၊ “တဲး အုဝ် ဒျီင် အိုမ် ခေါ အီ စဲက်။” 9အီဘိုန့် တွိုန် ဝီ တဝ်း ဒီ အန်၊ “အုဝ် မုး အီဘိုန့် အာမျုဝ် ဆာမာရီ။ မဲ ယီ မုး ဒူအီ အာမျုဝ် ယူဒါ။ မှဝ် န့ ပါယ် ပီ မှာန့် မဲ တဲး အုဝ် ဒွါ အိုမ် ဒီ မဲ။း” (ဂေ ဒူအီ အာယူဒါ တူ တာ ဆီလယ့် ပီ တာ ဒူအီ ဆာမာရီ)။

10ပန် တီ ဇဝ် ယေဆူ ဝီ တဝ်း၊ “ဆေ မဲ နပ် ပီ ဒီ ဒွါ ဇဝ်ဖြာ ဒီ အီ၊ ဆေ မဲ ဘော နပ် အာဆေ အုဝ် မုး အီ မှာန့် မဲ ဒွါ အန် ဒျီင် အိုမ်၊ မဲ ဒီ ဘော ဝီ မှာန့် ဒီ အန်။ ဟဲ့ ဟွတ့် အန် ဒီ ဝီ ဒွါ ဒီ မဲ အိုမ် အီ တဲး အာဆာက် ဒီ အီ။”

11အီဘိုန့် တွိုန် ဝီ တဝ်း၊ “ဆာရာ၊ မဲ တူ မိုဝ်း ဒီ ဂူင့် ပုင် ဂေ ဝန် ဒီ တဝ့် အိုမ်။ ဘော အိုမ် ခိုမ် တီ ဟဲ့ လိုက်။ မဲ ဒီ ဘော ဒိုဝ်း ဒီ မှဝ် အိုမ် အီ ဒွါ အာဆာက် ဒီ အီ တီ။း 12န့ မုး ဂုန့် ဒင် အေ၊ အီ စိူဝ် အာကူပ်၊ အန် ဟဲ့ ဒွိုမ် ဂိုဝ်း ကာဒဝ် အိုမ် ခိုမ် တီ။ ဘော အန် ဘော ဒုဝ် ဆတ်ဒါဝါ အန် ဘော ဂွန် အန် ဟဲ့ ဒွိုမ် ဒျီင် အိုမ် နီ။ ပီ တဝ်း မဲ ဒေါ တီ နီ၊ န့ ပီ၊ မဲ တဝ်း မဲ တာင် လွှိုမ် ဒါ အာကူပ် တွိုန်။”

13ပန် တီ ဇဝ် ယေဆူ ဝီ တဝ်း ဒီ အန်၊ “ဒွန် အီ အီ ဒျီင် အိုမ် တီ၊ အန် ဒီ ဝီ ကာပြာန့်။ 14အာဆေ ယီ ဒျီင် အိုမ် ပီ ဒွါ အုဝ် ဒီ အန်၊ အန် တူ ဝီ ကာပြာန့် ဒေါ မှဝ်။ ပီ ဒွါ အုဝ် ဒီ အီ၊ န့ ဒီ ဘဲန် ပီ အိုမ် ခိုမ် အီ ကွယ် ခဲင် နဝ်း ဒူအီ ဆေဆေ၊ အီ တဲး ဒူအီ ကွယ် ရိုမ် ဒူပ် ဇဝ်ဖြာ ဆေဆေ။”

15အီဘိုန့် တွိုန် ဝီ တဝ်း၊ “မဲ ဆာရာ၊ တဲး မဲ ဒွါ အိုမ် ဇိုဝ် တီ ဒီ အုဝ်၊ ကွဲ့ ဟူ တဲး အုဝ် ဝီ ကာပြာန့်၊ ကွဲ့ ဟူ တဲး အုဝ် လုဝ် တး ဒူင် ကွယ် အိုမ် ခိုမ် နီ။”

16ဇဝ် ယေဆူ ဝီ တဝ်း၊ “မဲ ဟာဝ် ဒဲ့ အီမာယ် မဲ၊ တဲး ဘာယ် ဝီ တး ဒူင် ကွယ် အုဝ်။”

17အီဘိုန့် ဝီ တဝ်း၊ “အုဝ် တူ မိုဝ်း အီမာယ်။”

18ဇဝ် ယေဆူ ဝီ တဝ်း၊ “ဟဲ့ မှာန် ပီ တဝ်း မဲ။ မဲ တူ မိုဝ်း အီမာယ်။ မဲ ဟဲ့ ဒွိုမ် မိုဝ်း အီမာယ် ဖန် ဝီ။ ဘော အီမာယ် အီ ကွယ် ရိုမ် ဒူပ် မဲ ဒေါ တီ နီ၊ အာဝ် မုး အီမာယ် မဲ။”

19ပန် တီ အီဘိုန့် ဝီ တဝ်း၊ “ဆာရာ၊ အုဝ် ဟဲ့ နပ်၊ မဲ မုး ဒူအီ အီ ဘျာန် ဂြုဝ်း ဇဝ်ဖြာ။ 20ဂုန့် ဒင် ယေ ဟဲ့ ဒွိုမ် ကြိုပ် ဇဝ်ဖြာ ဒဲင် နွန် ဒွယ်။ ဘေ ဒူအီ အာယူဒါ ယီ တဝ်း၊ လုဝ် ကြိုပ် ဇဝ်ဖြာ ခဲင် မိူင် ယေရူဆာလဲမ်။”

21ဇဝ် ယေဆူ ဝီ တဝ်း၊ “တဲး မဲ ညှိုမ် ဂြုဝ်း အုဝ် နီ။ န့ ဒီ ဇမ် အာခြာဝ် ဒေါ တူ ကြိုပ် ဘေ ဇဝ်ဖြာ ဘော အာ ပ့လုဝ့်။ ဘော ဒဲင် နွန် တီ ဘော ခဲင် မိူင် ယေရူဆာလဲမ် ဘေ တူ ကြိုပ် အန် ဇဝ်။ 22ဘေ ဒူအီ အာမျုဝ် ဆာမာရီ ဘေ ကြိုပ် အန် ဇဝ် ပီ တူ နပ် ဘေ။ ယေ ယီ ကြိုပ် အန် ဇဝ် ပီ နပ် ယေ။ ခုဝ်၊ န့ မုး ဒူအီ အာမျုဝ် ယူဒါ အီ နပ် လွင် ဇဝ်ဖြာ ချွတ် ဒူအီ၊ ဝီ တဲး ဘော အီ ဟဝ် နပ်။ 23-24အာခြာဝ် အန် ဒီ တး၊ မာလဲ အန် ဟဲ့ ဟွတ့် တး ဒေါ တီ နီ။ ဒေါ အန် တီ န့ မုး နဝ်း ဖွိုမ် ဇဝ်ဖြာ အီ တဲး အီ နပ် လွင် ဇဝ်ဖြာ အီ မုး ဂုန့် အေ။ အန် ဒီ တဲး ဒူအီ ကြိုပ် ဇဝ်ဖြာ ဒွန် နာ ဒွန် ပ့လုဝ့်။ ဇဝ်ဖြာ တူ မိုဝ်း ဒုဝ် ဘူင့်၊ အန် ယီ မုး မီ နဝ်း ဖွိုမ်။ ခုဝ်၊ အာဆေ ဘော ကြိုပ် ဇဝ်ဖြာ၊ အန် လုဝ် တဲး နဝ်း ဖွိုမ် ဇဝ်ဖြာ လိုပ် ခဲင် နဝ်း အန်၊ တဲး အန် ကော နပ် နာ မှာန်။ ဟဲ့ ဟွတ့် အန် ဒီ ဘော ပွိုန် ဒီ ကြိုပ် ဇဝ်ဖြာ။ ဘော ဇဝ်ဖြာ ဆီ တဲး ဒူအီ ဇိုဝ် တီ ကြိုပ် အန်။”

25အီဘိုန့် တွိုန် ဝီ တဝ်း၊ “အုဝ် နပ်၊ န့ ဒီ မိုဝ်း ဒူအီ ပီ ရဝ်း ပီ တိုယ် ဇဝ်ဖြာ။ ဂေ ဒီ တဲး အန် စိူဝ် ဒါ အီ ချွတ် ဒူအီ။ ဆေ ဒူအီ တီ ဒီ တး၊ အန် ဒီ မာနုဝ် ယေ၊ တဲး ယေ နပ် ဒွန် မျုဝ်။”

26ဇဝ် ယေဆူ ဝီ တဝ်း ဒီ အန်၊ “န့ မုး အုဝ်၊ အီ ကာလာင် ဂြုဝ်း ဒီ မဲ၊ အုဝ် ဒီ ချွတ် ဒူအီ။”

လွင် ပီ ဒီ ဟူမ် ဇဝ် ယေဆူ

27ဒေါ ကာလာင် အန် ပါယ် တီ၊ ဂေ ဒီဘဲ အန် ဝီ တး ခဲင် မိူင်။ ဂေ မိူဝ် အာမ် ကူပ် ကာမွုန် အန် ဒီ အီဘိုန့် အူ ဝီ။ ယီ တူ မိုဝ်း အာဆေ အီ ဒီမွှတ် အန် တဝ်း၊ “မာဆေ ပီ ဘူင် မဲ၊ မှဝ် န့ ပါယ် ပီ ဂြုဝ်း မဲ ဒီ အီဘိုန့် တီ။း”

28ပန် တီ အီဘိုန့် ဝီ ဘ့လေး အုန် ကာလုဝ့် အိုမ် အန် ဒီ ခူပ် အိုမ် ခိုမ် တွိုန်။ အန် ဝီ လိုပ် ခဲင် မိူင်၊ ဝီ ကာလာင် ဒီ အီ ဟဝ် တဝ်း၊ 29“ဘေ တး ယွတ် အီမာယ် အူ ဝီ။ အန် ဟဲ့ ခဲ ဒီ အုဝ် လွင် မှာပ် ဒွန် မျုဝ် ပဲ့ ဟဲ့ ဒွိုမ် ဘူင် အုဝ်။ အုဝ် ထာင်၊ အန် မုး ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။” 30အန် ဟဲ့ ဟွတ့် ကာလာင် ပါယ် တီ၊ ဂေ ဒူအီ ကိူန် ဝီ လေး ခဲင် မိူင်၊ ဟာဝ် ဒူင် ကွယ် ဇဝ် ယေဆူ။

31ဒေါ ဝေန့် အီဘိုန့် တွိုန်၊ ဂေ ဒီဘဲ ဇဝ် ယေဆူ ဝီ စ်ု အန် ဟူမ် ဘူမ်။ ဂေ တဝ်း၊ “ဆာရာ၊ တဲး မဲ ဟူမ်။”

32အန် ယီ တဝ်း ဒီ ဂေ၊ “ဘေ တူ နပ် မာဆေ လွင် ပီ ဒီ ဟူမ် အုဝ်။”

33ပန် တီ ဒီဘဲ အန် ဝီ လာယ် ကာလာင်၊ ဝီ တဝ်း၊ “အာဆေ ဟဲ့ ဒွါ ပီ ဒီ ဟူမ် ဒီ အန်။း”

34ဇဝ် ယေဆူ ယီ တဝ်း ဒီ ဂေ၊ “ဇဝ်ဖြာ ဟဲ့ တိုယ် အုဝ် တး ဒီ နီ။ ဆေ အုဝ် ဘူင် ဂါန် ပီ စ်ု ဇဝ်ဖြာ အုဝ် ဘူင်၊ ဆေ အုဝ် ဘော ဘူင် တဲး န့ ဟွတ့် တူတ့်၊ အုဝ် ဟဲ့ ဒါခိုယ်။ န့ ပီ အုဝ် ဟဲ့ ဖဲ ဘူမ်။ 35ဘေ ဘော နပ် ဒီ တဝ်း၊ ‘န့ လုဝ် ဘော ဖွုန် မာဂျီန်၊ န့ ကော ဒီ ဇမ် အာခြာဝ် ဆုဝ့် ငှုဝ်။’ အုဝ် ယီ တဝ်း ဒီ ဘေ၊ တဲး ဘေ ယွတ် ဒူအီ၊ တဲး န့ ပီ ဘေ ယွတ် မာန် ဘေ။ ဒေါ တီ နီ န့ ပီ ငှုဝ် ဟဲ့ ဟွတ့် ဆိန်၊ ဟဲ့ ပွိုန် ဆုဝ့်။ 36အာဆေ ယီ ဆုဝ့် ငှုဝ်၊ အန် ဒီ ဝီ ပွိုန် ရုး အန်။ ဒူအီ ဆုဝ့် ငှုဝ် တီ၊ ဂေ ပီ ဒူအီ အီ ကာလာင် ဒီ အီ ဟဝ် လွင် ဇဝ်ဖြာ၊ တဲး ဂေ ညှိုမ်၊ တဲး ဂေ ပွိုန် ဒီ ကွယ် ရိုမ် ဒူပ် ဇဝ်ဖြာ ဆေဆေ။ ဒေါ အန် တီ ဘော ဒူအီ အီ ဘြတ် ငှုဝ် ဘော ဒူအီ အီ ဆုဝ့် ငှုဝ် ဟဲ့ ဒါခိုယ်။ 37ဘေ ကာလာင် ဂြုဝ်း မှာန်၊ ဆေ ဘေ တဝ်း၊ ‘အူ ဝီ ဘြတ် ငှုဝ်၊ ပေါ အူ ဝီ ဆုဝ့် ငှုဝ်။’ 38အုဝ် ယီ တိုယ် ဘေ၊ တဲး ဘေ ပီ ဒူအီ အီ ဆုဝ့် ငှုဝ် ပီ တူ ဘြတ် ဘေ။ န့ မုး အီ ဟဝ်၊ ဂေ ဟဲ့ ဒွိုမ် ဘူင် ဂါန် ပီ ဂေ ဒူအီ အီ ဘြတ် ငှုဝ်။ ဘေ ယီ ပီ ဒူအီ အီ ဒူပ် ဒီ ပန်၊ စွယ် ဂေ အီ ဘူင် ဂါန် အူ ဆိန့် ဒေါ ဂုဝ် အန်။”

လွင် ဂေ ဒူအီ အာမျုဝ် ဆာမာရီ

39ဂေ ဒူအီ အီ ဟဲ့ လေး ခဲင် မိူင်၊ ဟာဝ် ဇမ် ဒူင် ကွယ် ဇဝ် ယေဆူ၊ ဂေ ကိူန် ဟဲ့ ဝီ ညှိုမ် အန်။ ဂေ မုး ဒူအီ အာမျုဝ် ဆာမာရီ။ ဂေ ဟဲ့ ယိုဝ် ဂြုဝ်း ပဲ့ ဟဲ့ ခဲ အီဘိုန့် တွိုန် ဒီ ဂေ။ ဂေ ကော ညှိုမ် ကူပ် ဟဲ့ တဝ်း အန်၊ “အီမာယ် တွိုန် ဟဲ့ ဟွတ့် ခဲ တူတ့် ဒီ အုဝ် လွင် မှာပ် ပဲ့ ဟဲ့ ဒွိုမ် ဘူင် အုဝ် ဒွန် မျုဝ်။” 40ဂေ ဒူအီ အာမျုဝ် ဆာမာရီ၊ အီ ဟဲ့ တး ဒူင် ကွယ် ဇဝ် ယေဆူ၊ ဂေ ဝီ မှာန့်၊ တဲး အန် ကွယ် ရိုမ် ဒူပ် ဂေ။ ခုဝ်၊ အန် ကွယ် ဒူင် ကွယ် ဂေ အာဒါ အာ ဆီငဲ။ 41န့ ဝီ မိုဝ်း ဒူအီ ကိူန်၊ ဂေ ညှိုမ် ဝါယ် ထူမ် ဂေ ဂြုဝ်း ဇဝ် ယေဆူ။

42ပန် တီ ဂေ ဝီ တဝ်း ဒီ အီဘိုန့် တွိုန်၊ “ယေ တူ ညှိုမ် ကူပ် ကာလာင် မဲ လွင် အန် ဒီ ယေ။ ယေ ဟဲ့ ဟွတ့် ထူမ် ဂြုဝ်း အန်၊ ယေ မိူဝ် နပ် ဆီချာ၊ ဒူအီ တီ မုး အန် ဇဝ် အီ ဒီ ချွတ် ဒူအီ ဒဲင် ကာဒါယ်။ အန် မုး အန် ဇဝ် ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။”

လွင် ဇဝ် ယေဆူ ပီကဲန် ဂွန် ဒါ တာင်

43ဟဲ့ ဟွတ့် ပွုန် အာ ဆီငဲ တွိုန်၊ ဇဝ် ယေဆူ ဝီ လေး မိူင် ဆာမာရီ၊ ဝီ ဟာဝ် အိူင် ဂါလီလေ။ 44အန် ဝီ ကာလာင် လွင် ဒုဝ် ဘြိမ် အန်။ အန် တဝ်း၊ “ဆေ န့ မုး ဒူအီ အီ ဘျာန် ဂြုဝ်း ဇဝ်ဖြာ၊ ဂေ ဒူအီ အီ ကွယ် ခဲင် မိူင် ဘြိမ် အန်၊ ဂေ တူ ရုဝ်ဆေ အန်။” 45ဒေါ ဇမ် အန် ခဲင် အိူင် ဂါလီလေ၊ ဂေ ဒူအီ ခဲင် မိူင် တီ ဝီ ရွုး အန်။ ဂေ နပ် တူတ့် ပဲ့ ဟဲ့ ဘူင် အန် ခဲင် မိူင် ယေရူဆာလဲမ် ဒေါ လိုပ် အန် ဒီ ဘ့လွယ် တွိုန်။ ခုဝ်၊ ဘော ဂေ ဟဲ့ ဟာဝ် လိုပ် ဘ့လွယ် တီ။

46ပန် တီ ဇဝ် ယေဆူ ဘော ဝေန့် မိူင် ခါနာ အီ ကွယ် ခဲင် အိူင် ဂါလီလေ။ ခဲင် မိူင် တီ၊ အန် ဟဲ့ ဒွိုမ် ဘူင် တဲး အိုမ် ဘဲန် အိုမ် မာငုန်။ န့ ယီ မိုဝ်း အာမာတ် ခုန်ဒီခမ် အူ ဝီ။ အန် မိုဝ်း ဂွန် အီမာယ် အီ ဆဝ် ကာဆဝ်။ အန် ကွယ် မိူင် ကာပေနာရိုမ်။ 47အန် ဟဲ့ ယိုဝ် အီ ဟဝ် တဝ်း၊ ဇဝ် ယေဆူ ဟဲ့ လေး အိူင် ယူဒါ ဝီ တး လိုပ် အိူင် ဂါလီလေ။ ပန် တီ အန် ဝီ ဟာဝ် ဒူင် ကွယ် ဇဝ် ယေဆူ၊ ဝီ မှာန့်၊ တဲး ဇဝ် ယေဆူ ဟာဝ် ဒူပ် အန်၊ တဲး ဇဝ် ယေဆူ ပီကဲန် ဂွန် အန်၊ အီ ဟဲ့ ရိန် ဒီ ယမ် တွိုန်။

48ဇဝ် ယေဆူ ယီ တဝ်း ဒီ အန်၊ “ဆေ ဘေ တူ ပွိုန် ဒီ ယိုဝ် နာ မွှိုမ် အာမ် ကာဆဝ် ဘဲန် မျုဝ် ဘဲန် မျုဝ်၊ ဘေ တူ ဆီ ညှိုမ်။”

49အာမာတ် ခုန်ဒီခမ် တွိုန် ဝီ တဝ်း၊ “ဆာရာ၊ တဲး မဲ တး ဒူပ် အုဝ်၊ အာတ့် ယမ် ဂွန် အုဝ်။”

50ဇဝ် ယေဆူ ဝီ တဝ်း၊ “တဲး မဲ ဝေန့်၊ ဂွန် မဲ ဟဲ့ ကဲန်။”

ပန် တီ ဒူအီ တွိုန် ဘော ညှိုမ် ဂြုဝ်း ဇဝ် ယေဆူ ဝီ ဝေန့် ကာင် အန်။ 51ဒေါ ဟာဝ် အန် ဒူပ် န့တေန့်၊ ဒဲစေန့် အန် ဝီ တး ကာတုန့် အန် တဝ်း၊ “ဂွန် မဲ ဟဲ့ ကဲန်။” 52ပန် တီ အာမာတ် တွိုန် ဝီ ဒီမွှတ် အန် တဝ်း၊ “ဒေါ မှဝ် အန် ဟဲ့ ကဲန်။း” ဂေ ဝီ တဝ်း၊ “အာမှိုဝ် ဒေါ နုဝ့် အူ နာရီ ဝါယ် ကာတဲ ဆီငဲ၊ ဒုဝ် အန် အာဝ် ဟူ ကာဟွာ့။” 53ပန် တီ ဂုန့် အန် တွိုန် ဝီ နပ်၊ ဂွန် အန် ဟဲ့ ကဲန် ဒေါ ကာလာင် ဇဝ် ယေဆူ၊ “ဂွန် မဲ ဟဲ့ ကဲန်။” ပန် တီ ဘော အန် ဘော န့ ဟူမ် အန်၊ ဂေ ဘောကာဂ့လျီတ် ညှိုမ် ဇဝ် ယေဆူ။ 54ပါယ် တီ ဇဝ် ယေဆူ ဟဲ့ ဘူင် နာ မွှိုမ် အာမ် ကာဆဝ် ပေါ အူ မျုဝ် ဝါယ် လေး အန် ခဲင် အိူင် ယူဒါ ဝီ တး ဇမ် အိူင် ဂါလီလေ၊ တဲး န့ ဘဲန် အာ ဇေန့် ခါ နီ။

Currently Selected:

ယဟ 4: pce

Highlight

Copy