ဒေါ ဂုဝ် 47

လွင် ဂေ ဒူအီ အီဆာရေလ ကွယ် ခဲင် မိူင် အဲဂိုပ်

1ဝါယ် အန် တီ အာယုဝ် တွိုန် ဝီ ဟာဝ် ကာလာင် ဒီ ခုန်ဒီခမ် တဝ်း၊ “ဂုန့် ဂေ အူကတ် အူဝါ အုဝ် ဟဲ့ တး ဇမ် မိူင် အဲဂိုပ်။ ဂေ ဘော ဒိုဝ်း ဒုဝ် ဆတ်ဒါဝါ ဂေ ဘော ကြုဝ်ကြာမ် တူတ့် ဒွန် မျုဝ် ခဲ့ ပီ မိုဝ်း ဂေ။ ဟဲ့ ဟွတ့် ဂေ ဟဲ့ ကွယ် ခဲင် မိူင် ဂုဝ်ဆေန်။” 2အန် မိူဝ် ဟဲ့ ဒဲ့ အီကတ် အန် မင် အီ၊ တဲး ဂေ ဒူပ် အန်၊ ဟာဝ် ဇမ် ဒီ အာတ့် ခုန်ဒီခမ်။

3ခုန်ဒီခမ် ဝီ တဝ်း ဒီ ဂေ၊ “ဂါန် ပီ ဘူင် ဘေ၊ မာဆေ န့ မုး။း”

ဂေ ဝီ တဝ်း ဒီ အန်၊ “ယေ မှာယ် မဲ မုး ဒါ အီ ဟျီင် မာဘူ။ ဘော ဂုန့် ယေ ဟဲ့ ဒွိုမ် ဘူင် ပါယ် တီ။ 4ယေ ဟဲ့ တး ဇမ် ခဲင် မိူင် မဲ၊ တဲး ယေ ဘဲန် ခဲတ့် ခဲင် မိူင် မဲ။ အာခြာဝ် အေတ့် ပီ ဒီ ဟူမ်၊ န့ ညှာပ် ကာဆဝ် ခဲင် မိူင် ကာနန့် တွိုန်။ အာဝ် ဟူ မိုဝ်း ပေတ့် အီ လတ့်။ ယေ မှာန့်၊ တဲး မဲ ဇဝ် ခ့ဝါင် ယေ ကွယ် ခဲင် ဒူင် စိူဝ် ဂုဝ်ဆေန် တွိုန်။”

5ခုန်ဒီခမ် ဝီ တဝ်း ဒီ အာယုဝ် တွိုန်၊ “ဂုန့် ဂေ အူကတ် အူဝါ မဲ ဟဲ့ တး ဇမ် ဒူင် ကွယ် မဲ။ မဲ ဘော အိုပ် မိူင် ဘော မိူင်။ တဲး မဲ တဲး ဂေ ကွယ် ခဲင် ဒူင် အီ မွှိုမ် လွှိုမ် ဒွန် ပ့လုဝ့်။ 6တဲး ဂေ ကွယ် ဒူင် စိူဝ် ဂုဝ်ဆေန်။ ဆေ န့ ဘော မိုဝ်း အီ နပ် ဒီ ဟျီင် ဆီချာ ဒုဝ် ဆတ် အန်၊ တဲး မဲ တဲး အန် ဟျီင် ဘော ဒုဝ် ဆတ်ဒါဝါ အုဝ်။”

7ပန် တီ အာယုဝ် တွိုန် ဝီ တိုယ် ဂုန့် အန် အီ မုး အာကူပ် တွိုန်၊ တဲး အန် တး ဇမ် ဒီ အာတ့် ခုန်ဒီခမ်။ အာကူပ် ဝီ ဂူမ် ဒီ အာတ့် ခုန်ဒီခမ်။ 8ခုန်ဒီခမ် ဒီမွှတ် အန် တဝ်း၊ “အာဆာက် မဲ၊ နှာင် ဆီနမ် ဟဲ့ နုဝ့်။း”

9အာကူပ် ဝီ တဝ်း၊ “ဇဝ်ဖြာ ဟဲ့ တဲး အုဝ် ကွယ် အာဒါ အူ မာယဝ်း ဒီ အူယ် ဂိုဝ် ဆီနမ်။ ဆီနမ် အန် တီ အာဝ် ကိူန်။ အာဆာက် အုဝ် မိူဝ် အာဝ် တူင့် ပီ ဂုန့် ဂါယ် ဒါ အုဝ်။” 10ဟဲ့ ဟွတ့် ပန် တီ အာကူပ် ဝီ မွင့်ကာရာ တဲး ဒီ ခုန်ဒီခမ် တွိုန် ဘော ဝီ လေး တ ဒူင် ကွယ် အန်။

11အာယုဝ် တွိုန် တဲး ဂုန့် အန် ဘော ဂေ အူကတ် အူဝါ အန် ကွယ် ခဲင် မိူင် အဲဂိုပ် ဒူင် အီ မွှိုမ် လွှိုမ် ဒွန် ပ့လုဝ့်၊ တဲး န့ ဘဲန် ကာဒါယ် ဂေ ဘော ဒူင် နာ ဂေ။ န့ မုး ဒူင် အီ ကွယ် ကာတတ် မိူင် ရာမေဆေတ်။ ပါယ် တီ န့ ပီ ပီ စ်ု ခုန်ဒီခမ်။ 12အာယုဝ် ဝီ ဟျီင် ဂုန့် အန် ဘော ဂေ အူကတ် အူဝါ အန် ဒွန် န့ဟူမ်။ အန် ဒွါ ဂေ မိုဝ်း ပီ ဒီ ဟူမ် ခဲ့ ပီ လုဝ် ဂေ၊ တဲး န့ ဒူပ် ခဲ့ ကိူန် ဂွန် ဂေ။

လွင် ဂါန် အာယုဝ်

13ဒေါ အန် တီ အာဝ် ပွိုန် ဟြေတ့် ပီ ဒီ ဟူမ် ခဲင် မိူင် ကာနန့် တွိုန် ဘော ခဲင် မိူင် အဲဂိုပ် ဘော မိူင်။ အာခြာဝ် အေတ့် ပီ ဒီ ဟူမ် ဟဲ့ ညှာပ် ကာဆဝ်။ ဂေ ဒွန် အီ ဟဲ့ ဇမ် ဒုက်။ 14အာယုဝ် ယီ ဒီ ဘူမ် ရွိုန် ခဲ့ မိုဝ်း ခဲင် မိူင် အဲဂိုပ် ဘော ခဲင် မိူင် ကာနန့်။ ဂေ ဒွန် အီ ခဲင် မိူင် ဂေ တီ ဟဲ့ တး ဒီ အန်၊ စိုဝ်း ပီ ဒီ ဟူမ်။ အန် ဝီ ဘ့လေး အုန် ရွိုန် ပီ ပွိုန် အန် ခဲင် ဟုဝ် ခုန်ဒီခမ်။ 15ဟဲ့ ဟွတ့် ပန် တီ ရွိုန် ဂေ ဒူအီ အီ ကွယ် ခဲင် မိူင် ဂေ တီ ဟဲ့ တူတ့်။ ဂေ ဝီ တး ဒီ အန်၊ ဝီ မှာန့် ပီ ဒီ ဟူမ် ပေါ န့ ပွါ။ ဂေ တဝ်း၊ “ရွိုန် ယေ ဟဲ့ တူတ့်၊ တဲး မဲ ယီ ဒွါ ပီ ဒီ ဟူမ် ဒီ ယေ။ ယေ ယုဝ် ယေ ဒီ ယမ် ဒီ တီ။”

16အန် ဝီ တဝ်း၊ “ဆေ ဘေ တူ မိုဝ်း ရွိုန်၊ တဲး ဘေ ဒွါ ဒုဝ် ဆတ်ဒါဝါ ဘေ ဒီ အုဝ်၊ တဲး အုဝ် ဝီ ဒွါ ပီ ဒီ ဟူမ် ဒီ ဘေ။” 17ပန် တီ ဂေ ဝီ တး တိုယ် ဒုဝ် ဆတ်ဒါဝါ ဂေ၊ လာယ် ကာရဝ်း ဂါယ် ပီ ဒီ ဟူမ်။ ပါယ် တီ အာယုဝ် ဘော ပွိုန် မင်ပြွင့် ဂေ မာဘူ၊ မာမက် ဘော မာလာ ဂေ။ ပါယ် တီ အာဒါ အူ ဆီနမ်၊ အန် ဒွါ ဂေ ဒွန် အီ မိုဝ်း ပီ ဒီ ဟူမ်။ ဂေ ယီ လုဝ် ဒွါ ဒုဝ် ဆတ်ဒါဝါ ဂေ ဒီ အန်။

18ဆီနမ် တီ ကော တူတ့်၊ ပေါ အူ ဆီနမ် ဂေ ဝီ တး ဇမ် ဒူင် ကွယ် အာယုဝ် တွိုန် တဝ်း၊ “မဲ ဒါ ကာညာ၊ မဲ ဟဲ့ နပ်၊ ယေ တူ မိုဝ်း မာဆေ ပီ ပွိုန် ဒွါ ယေ ဒီ မဲ၊ တဲး မဲ ဒွါ ပီ ဒီ ဟူမ် ဒီ ယေ။ န့ ဂိတ် ဒုဝ် ယေ ဂေ ဒူင် နာ ယေ၊ ပီ ပွိုန် ဒွါ ယေ ဒီ မဲ။ 19ဆေ ယေ ယမ်၊ ဒူင် နာ ယေ အာဝ် ဟူ လုဝ်။ ခုဝ်၊ ယေ မှာန့်၊ တဲး မဲ ဒိုဝ်း ဘော ယေ၊ ဘော ဒူင် နာ ယေ၊ တဲး ယေ ဘဲန် မှာယ် မဲ။ တဲး မဲ ယီ ဒွါ ငှုဝ် ဒီ ယေ၊ ကွဲ့ တဲး ဘော ယေ ဘော ဒူင် နာ ယေ စှိုမ်။”

20ပါယ် တီ အာယုဝ် တွိုန် ဘော ပွိုန် ကာဒါယ် အီ မုး ဒူင် နာ ဒွန် ပ့လုဝ့် ခဲင် မိူင် အဲဂိုပ် ဘော မိူင်။ ဂေ ဒူအီ ယွင့် ကာဒါယ် ဂေ။ ခုဝ်၊ ဂေ အေတ့် ဘူမ်။ ခုန်ဒီခမ် ယီ ပွိုန် တူတ့် ကာဒါယ် တီ။ 21ခဲင် မိူင် ဘော မိူင် အာယုဝ် ဟဲ့ ဘူင် တဲး ဒွန် အီ ဘဲန် မှာယ် ခုန်ဒီခမ်။ 22န့ ဂိတ် မီ ဒူင် နာ ဂေ ဒါ အီ လှူ ဒီ ဇဝ် ပီ ကြိုပ် ဂေ၊ ပီ တူ ဒိုဝ်း အန်။ ကာဒါယ် တီ မုး ကာဒါယ် ပီ ဒွိုမ် ဒွါ ခုန်ဒီခမ် ဒီ ဂေ။ ခုဝ်၊ အန် တူ ပွိုန် ဝီ ဒိုဝ်း။ ဂေ မိူဝ် တူ ပွိုန် ဝီ ယွင့်။

23ပန် တီ အာယုဝ် တွိုန် ဝီ တဝ်း ဒီ ဒူအီ ဒွန် အီ၊ “အုဝ် ဟဲ့ ဟွတ့် ဒိုဝ်း ဘော ဘေ ဘော ကာဒါယ် ဘေ၊ တဲး ခုန်ဒီခမ် ဘဲန် ဒါ အီ ပွိုန် တူတ့်။ ဒေါ တီ နီ အုဝ် ဒီ ဝီ ဒွါ ဆီမာ ငှုဝ် ဒီ ဘေ၊ တဲး ဘေ ဝီ ဆမ် ဒွန် ပ့လုဝ့်။ 24ဘေ ဟဲ့ ဟွတ့် ဆုဝ့်၊ ဘေ လုဝ် ဝီ ဒွါ ဖန် ဘုန် အူ ဘုန် ဒီ ခုန်ဒီခမ်။ အာဒါ ဖွုန် ဘုန်၊ န့ မုး ကာနာယ် ဘေ။ ဘေ ပွိုန် ဒီ ဝီ ဆမ် ဘော ပွိုန် ဒီ ဟူမ်၊ တဲး ဘော ဘေ ဘော ဂွန် ဘေ မိုဝ်း ပီ ဒီ ဟူမ်။”

25ဂေ ဒူအီ ဝီ တဝ်း၊ “မဲ ဟဲ့ ချွတ် အာဆာက် ယေ။ ယေ ဒါင် ဂုင် ဂေဇူ ဒီ မဲ၊ တဲး ယေ ဘဲန် မှာယ် ခုန်ဒီခမ်။”

26အာယုဝ် တွိုန် ယီ ဘူင် တဲး န့ ဘဲန် ဒါရာ ကာမာယ်၊ တဲး ဒွန် အီ ဒွါ ဖန် ဘုန် အူ ဘုန် ဒီ ခုန်ဒီခမ်။ ဒါရာ တီ ဂေ လုဝ် ဒူပ် ကော ဇမ် အာတိုဝ်။ န့ ဂိတ် မီ ကာဒါယ် အီ မုး ဒူင် နာ ဂေ ဒါ အီ လှူ ဒီ ဇဝ် ပီ ကြိုပ် ဂေ၊ အီ တူ မုး ကာဒါယ် ခုန်ဒီခမ်။

27ပါယ် တီ အာကူပ် တွိုန် ဝီ ကွယ် ခဲင် မိူင် ဂုဝ်ဆေန် အီ ကွယ် ခဲင် ကာဒါယ် မိူင် အဲဂိုပ်။ ဂေ ဒူအီ အာမျုဝ် အန်၊ ဂေ ဝီ ပွိုန် ကာဒါယ် ခဲင် မိူင် တီ။ ဂေ ဘော ဘြဲ ဘော ကြဲ ဒီ ကိူန်။

28အာဒါ ဂိုဝ် ဒီ ဘူ ဆီနမ် အာကူပ် တွိုန် ဝီ ကွယ် ခဲင် မိူင် အဲဂိုပ်။ ပန် တီ အာဆာက် အန် ဘော နုဝ့် အူ မာယဝ်း ဒီ ဖွုန် ဂိုဝ် ဒီ ဘူ ဆီနမ်။ 29ပန် ဒီ ဇမ် အာခြာဝ် အန်၊ အာကူပ် တွိုန် ဟဲ့ ကာတတ် ဒီ ယမ်၊ အန် ဝီ ဒဲ့ ဂွန် အန် အီ စိူဝ် အာယုဝ် တဝ်း၊ “ဆေ န့ မှာန် မဲ ဆီ ဘူင် ပီ အိုင် အုဝ်၊ တဲး မဲ ဘ့လေး ဒဲ မဲ ဒီ ဂိုမ် အုဝ်၊ တဲး မဲ ဒွါ ကာဒိက် ဆတ်ဇာ ဒီ အုဝ်။ ကွဲ့ တဲး မဲ ဒိပ် ဒုဝ် ဘူင့် အုဝ် ခဲင် မိူင် အဲဂိုပ်။ ပါယ် တီ အုဝ် ဒီ ဘော နပ်၊ မဲ ဟဲ့ ရွက့် အုဝ်၊ ဘော ထူမ် ဂြုဝ်း အုဝ် ဆေဆေ။ 30ဆေ အုဝ် ဟဲ့ ယမ်၊ တဲး မဲ ဒိုဝ်း ဒုဝ် ဘူင့် အုဝ် ခဲင် ဒူင် ကွယ် ဒူအီ အာမျုဝ် အေ၊ အီ ဟဲ့ ယမ် ဒီ အာတ့်။”

အာယုဝ် တွိုန် ဝီ တဝ်း၊ “အုဝ် ဒီ ဘူင် တူတ့် ဒွန် မျုဝ် ပီ စ်ု မဲ ဒီ အုဝ်။”

31ဂုန့် အန် ဝီ တဝ်း၊ “တဲး မဲ ဒွါ ကာဒိက် ဆတ်ဇာ ဒီ အုဝ်။” ဟဲ့ ဟွတ့်၊ အာယုဝ် ဘော ဒွါ ကာဒိက် ဆတ်ဇာ ဒီ ဂုန့် အန်။ ပန် တီ အာကူပ် ဝီ ကြိုပ် ဇဝ်ဖြာ ဒဲင် ကာစှူင့် အိတ် အန်။

Currently Selected:

ဒေါ ဂုဝ် 47: pce

Highlight

Copy