ဒေါ ဂုဝ် 40

လွင် အာယုဝ် နပ် ဒီ ကာလာင် ပီ မ့ဘာဝ် အီ

1ဝါယ် အန် တီ န့ မိုဝ်း ဒါ အူ ဝီ၊ အန် မုး ဒါ အီ ဒွါ ပီ ဒီ ဒျီင် ဒီ ခုန်ဒီခမ် အီ အိုပ် မိူင် အဲဂိုပ်။ န့ ဘော မိုဝ်း ပေါ အူ ဝီ၊ အန် မုး ဒါ အီ ဘူင် ခါမုန် အာဒါ ခုန်ဒီခမ်။ ဂါယ် အာ ဝီ ဘူင် အီ တူ လဝ့် နဝ်း ခုန်ဒီခမ်။ 2ပန် တီ ခုန်ဒီခမ် ဘော ရူ ဒီ ဂါယ် အာ ဝီ။ 3အန် ဘော ခြွင့် ဂါယ် ခဲင် ကာပိုမ် အီ မုး ကာပိုမ် အာဖုဝ်ထိပ်။ န့ မုး ဒူင် ကွယ် အာယုဝ် တွိုန်။ 4အာမူ အာမာတ် ခုန်ဒီခမ် တွိုန် ယီ စ်ု အာယုဝ် ဝီ ဘ်ု ဂါယ် အာ ဝီ တွိုန်။

5ဝါယ် အန် တီ အာဝ် လှေန့်၊ ဂါယ် အာ ဝီ ဘော ဒါ အီ ဒွါ ပီ ဒီ ဒျီင် ဒီ ခုန်ဒီခမ် ဘော ဒါ အီ ဘူင် ခါမုန် အာဒါ ခုန်ဒီခမ်၊ ဂါယ် ဘော မ့ဘာဝ် ခဲင် မှိုဝ်။ အူ ဝီ မ့ဘာဝ် အူ မျုဝ်။

6ဆိန့်ဝး ဒေါ ဝီ တး အာယုဝ်၊ ဝီ ယွတ် ဂါယ်၊ အန် ဘော ယိုဝ်၊ နာ ဂါယ် အာဝ် ဒါခိုယ်။ 7အန် ဝီ ဒီမွှတ် ဂါယ် တဝ်း၊ “မှဝ် မ့ပါယ် ပီ တူ ဒါခိုယ် ဘာယ် အာတိုဝ်။း”

8ဂါယ် ဝီ တဝ်း၊ “ယာယ် ဟဲ့ မ့ဘာဝ်။ န့ ယီ တူ မိုဝ်း အာဆေ အီ ပွိုန် ကာလာင် လွင် ဒါင် အန် ဒီ ယာယ်။” အာယုဝ် ဝီ တဝ်း၊ “ဇဝ်ဖြာ နပ် ဒီ ကာလာင် လွင် ဒါင် ပီ မ့ဘာဝ် ဘာယ်။ တဲး ဘာယ် ကာလာင် ဒီ အုဝ်၊ တဲး အုဝ် ထူမ်။”

9ပန် တီ ဒါ အီ ဒွါ ပီ ဒီ ဒျီင် ဒီ ခုန်ဒီခမ်၊ အန် ဝီ ကာလာင် ပီ မ့ဘာဝ် အန်၊ တဲး အာယုဝ် ထူမ်။ အန် တဝ်း၊ “ဒေါ မ့ဘာဝ် အုဝ်၊ န့ ဘော မိုဝ်း ဟေ မာငုန် ကွယ် ဒီ အာတ့် အုဝ်။ 10ဟေ တီ မိုဝ်း ရာ အန် အူယ် ရာ။ ဒွန် ရာ ဝီ မိုဝ်း ဘုဝ်း ဒိုမ်၊ ဟဲ့ ဟွတ့် ဘော ဝီ ဘြး အူ ဇေန့် ဘော မိုဝ်း ဘ့လေ အန်။ 11အုဝ် ယီ မိုဝ်း ဒီ ဂူင့် ဆီလယ့် ပီ ဒျီင် ခုန်ဒီခမ်။ အုဝ် ဘော ဒိုဝ်း ဘ့လေ မာငုန် တွိုန်၊ နျီ့ တဲး အိုမ် အန် လေး ခဲင် ဆီလယ့် ခုန်ဒီခမ်။ ဟဲ့ ဟွတ့် အုဝ် ဝီ ဒွါ ဆီလယ့်၊ တဲး ခုန်ဒီခမ် ဒျီင်။”

12အန် ဟဲ့ ဟွတ့် ကာလာင် ပါယ် တီ အာယုဝ် ဝီ တဝ်း၊ “လွင် ဒါင် အန်၊ န့ ပါယ် နီ။ ရာ ဟေ အူယ် ရာ၊ ဂေ ပီ အူယ် ဆီငဲ။ 13ဟီ နုဝ့် အူယ် ဆီငဲ၊ ခုန်ဒီခမ် ဒီ ဘ့လွာ့ ဝဲန် ပီ လုတ့် မဲ၊ ဒွါ မဲ ဝီ ဘူင် ဂါန် မဲ။ ပန် တီ မဲ ဒီ ဝီ ဒွါ ဆီလယ့် ပီ ဒီ ဒျီင် ဒီ အန်၊ တဲး န့ ပီ ပီ ဒွိုမ် ဘူင် မဲ ဒီ အန်။ 14ဆေ မဲ ဟဲ့ ကွယ် ဒါခိုယ်၊ တဲး မဲ ဝီ လှုဝ်း အုဝ်၊ တဲး မဲ ဝီ ကာလာင် ဒီ ခုန်ဒီခမ် လွင် အုဝ်၊ တဲး မဲ ထေဝ် ဒီ စွယ် အုဝ် လေး ခဲင် ကာပိုမ် နီ။ 15ခါ အာတ့် နူ၊ ဂေ ဟဲ့ မှေတ့် အုဝ် ခဲင် မိူင် ဟဲဘြဲ တွိုန်၊ တိုယ် အုဝ် ဇမ် ဒီ နီ။ ဟဲ့ ဟွတ့် ဇမ် ဒီ နီ၊ အုဝ် တူ ဘူင် မာဆေ အီ ကာအာပ် ခြွင့် ခဲင် ကာပိုမ်။”

16ဝါယ် အန် တီ ဒါ အီ ဘူင် ခါမုန် ပီ ဟူမ် ခုန်ဒီခမ် တွိုန်၊ အန် ဘော ယိုဝ်၊ လွင် ဒါင် အန် ပဲ့ ဟဲ့ ကာလာင် အာယုဝ် ဟဲ့ မွှိုမ်။ အန် ဝီ ကာလာင် ဒီ အာယုဝ်၊ “နီ၊ န့ မုး ပီ မ့ဘာဝ် အုဝ်။ အုဝ် ဟဲ့ မိုဝ်း မာနာ အူယ် ဘ့လ ဒါင် ဒဲင် ဂိန့် အုဝ်။ 17ခဲင် မာနာ အီ ကွယ် နာ ဒဲင် န့ မိုဝ်း ခါမုန် ဘဲန် မျုဝ် ဘဲန် မျုဝ်။ ဂေ မာဆိမ် ယီ တး ဟူမ် ခါမုန် တီ ဒဲင် ဂိန့် အုဝ်။”

18အာယုဝ် တွိုန် ဝီ တဝ်း၊ “လွင် ဒါင် အန် တီ၊ န့ ပါယ် နီ။ မာနာ အူယ် ဘ့လ ပီ အူယ် ဆီငဲ။ 19ဝါယ် ဟဲ့ ဟွတ့် အူယ် ဆီငဲ၊ ခုန်ဒီခမ် ဒီ ဒဲပ် ဝဲန် ဂိန့် မဲ၊ ဝီ ဟွယ် ဒုဝ် မဲ ဒီ ရွင့်၊ တဲး ဂေ မာဆိမ် တး ဟူမ် ယင် မဲ။”

20ဝါယ် အန် တီ ဘော ဇမ် အူယ် ဆီငဲ၊ န့ မုး ဆီငဲ ဂွိုတ် ခုန်ဒီခမ် တွိုန်။ အန် ဝီ ဘူင် ဘ့လွယ် တာင်၊ ဟျီင် ဒဲစေန့် အန် ဒွန် အီ ဟူမ် ဘူမ်။ အန် ဝီ ဒဲ့ ဒါ အီ ဒွါ ပီ ဒီ ဒျီင် ဒီ အန် ဂါယ် ဒါ အီ ဘူင် ခါမုန်၊ တဲး ဂါယ် တး ဒူင် ကွယ် အန်။ 21အန် ဝီ တဲး ဒါ အီ ဒွါ ပီ ဒီ ဒျီင် ဒီ အန် ဝီ ဘူင် ဂါန် အန် ပီ ခါ အာတ့်၊ တဲး အန် ဝီ ဒွါ ဆီလယ့် ဒီ ခုန်ဒီခမ်၊ တဲး အန် ဒျီင်။ 22ဒါ အီ ဘူင် ခါမုန် အာဒါ ခုန်ဒီခမ်၊ ခုန်ဒီခမ် ဝီ တဲး အီ ဒဲပ် ဝဲန် ဂိန့် အန်၊ တဲး န့ ဝီ ဘဲန် တူတ့် ဒွန် မျုဝ် ပီ ပဲ့ ဟဲ့ ကာလာင် အာယုဝ် တွိုန်။

23ဝါယ် အန် တီ ဒါ အီ ဒွါ ပီ ဒီ ဒျီင် ဒီ ခုန်ဒီခမ်၊ အန် တူ ဝီ လှုဝ်း အာယုဝ်။ အန် ဟဲ့ ဝီ ပိဝ် တူတ့် လွင် အာယုဝ်။

Currently Selected:

ဒေါ ဂုဝ် 40: pce

Highlight

Copy