ဒေါ ဂုဝ် 29

လွင် အာကူပ် ဇမ် ခဲင် ကာင် ဘိုဝ် အန်

1ဝါယ် အန် တီ အာကူပ် ဝီ ဟာဝ် ဒူပ် န့တေန့် ဘော ဇမ် ခဲင် မိူင် နာ လေး ဆီငဲ။ 2အန် ဘော ယိုဝ် အိုမ် ခိုမ် ခဲင် ဒူင် နာ။ ဂေ ဒူအီ အီ ကွယ် ခဲင် မိူင် တီ၊ ဂေ တဝ့် အိုမ် ဒီ တီ၊ ဒွါ ဒုဝ် ဂေ ဒျီင်။ ဂေ ဖိုင် မာဘူ အူယ် ဖိုင် ဟဲ့ ဟွတ့် တး ကွယ် ဒီ ခူပ် အိုမ် ခိုမ် တီ။ န့ ယီ မိုဝ်း မာဝ် တာင် အီ ကာဘိတ် အိုမ် ခိုမ် တီ။ 3ဂေ ဒူအီ ကွယ် ဒီ တီ၊ ဂေ တဲး ဖိုင် မာဘူ ဂေ တး ကာဇု ဒီ အိုမ် ခိုမ် တီ။ ဂေ ဘောကာဂ့လျီတ် ဟီ ဟွတ့် တး ကာဇု၊ ဂေ အီ ဘ်ု ဒုဝ် ဆတ်ဒါဝါ၊ ဂေ ဒီ ဝီ ခါဖြူမ်၊ လာယ် စွယ် ဇုန် ကာထုဝ့် မာဝ် တာင်၊ တဲး ဂေ ဒွါ မာဘူ ဒျီင် အိုမ်။ ဂေ ဟဲ့ ဟွတ့် ဒျီင် ဖဲ အိုမ်၊ ဂေ ဝီ ဘ့လေး မာဝ် တာင် တွိုန်၊ တဲး န့ ဝီ ကာဘိတ် အိုမ် ခိုမ်။

4အာကူပ် ယီ ကာလာင် ဂြုဝ်း ဒီ ဒူအီ အီ ဘ်ု မာဘူ အီ တး ကွယ် ခူပ် အိုမ် ခိုမ် တွိုန်။ အန် တဝ်း၊ “အိုယ် ဂိုက် အုဝ်၊ ဘေ တး နာ မှဝ်။း”

ဂေ ဝီ တဝ်း၊ “ယေ တး မိူင် ဟာရာန်။”

5အန် ဝီ တဝ်း ဒီ ဂေ၊ “ဘေ နပ် အာလပ် အီ မုး ဂွန် အာနာဟုဝ်။း” ဂေ ဝီ တဝ်း၊ “ဟဲ့ နပ်။” 6အန် ဝီ ဒီမွှတ်၊ “အာနာဟုဝ် တွိုန် ဟဲ့ ခ ဂျာမ်ဆာ။း” “ဟဲ့ ခ၊” ဂေ တဝ်း၊ “နူ၊ ဂွန် အီဘိုန့် အန်၊ အီ စိူဝ် နာင် ရာအေန်၊ အန် ဟဲ့ ဝဲတ် တး ဒုဝ် ဆတ်ဒါဝါ ဂုန့် အန်။”

7ပန် တီ အာကူပ် တွိုန် ဝီ တဝ်း ဒီ ဒါ အီ ဟျီင် မာဘူ၊ “န့ ဆီ ရာမ် စေဝ်၊ ညှမ် မုး အာခြာဝ် ဒီ လုဝ် ကာဇု လုဝ် အိတ် ဒုဝ် ဆတ်ဒါဝါ။ တဲး ဘေ ဒွါ ဂေ ဒျီင် အိုမ်၊ ဟဲ့ ဟွတ့်၊ တဲး ဂေ ဝီ ဟူမ် ပေတ့်။”

8ဂေ ဝီ တဝ်း၊ “ယေ တူ ပွိုန် တဝ့် အိုမ်။ ယေ လုဝ် နှဝ့် တဲး မာဘူ ဒွန် ဖိုင် ကော ဇမ်။ ဟဲ့ ဟွတ့်၊ ယေ ကာထုဝ့် မာဝ် တာင် အီ ကွယ် နာ ဒဲင် အိုမ် ခိုမ်။ ဟဲ့ ဟွတ့် ကာထုဝ့်၊ ပွိုန် တဝ့် အိုမ် ဒွါ ဂေ မာဘူ ဒျီင်။”

9ဒေါ လာယ် ကာလာင် ဂေ ပါယ် တီ နာင် ရာအေန် ဘော ဝဲတ် တး မာဘူ ဂုန့် အန်။ ဘော အန် မုး ဒူအီ အီ ဟျီင် ဒုဝ် ဆတ်ဒါဝါ။ 10အာကူပ် တွိုန် ယီ ယိုဝ် နာင် ရာအေန် အီ မုး ဂွန် အီကတ် မာ အန်၊ အန် ဘော ယိုဝ် မာဘူ ဘိုဝ် အန်၊ အန် ဟာဝ် ဒီ အိုမ် ခိုမ်၊ ဒိုဝ်း ကာထုဝ့် မာဝ် တာင် တွိုန်၊ တဝ့် အိုမ် ဒွါ မာဘူ နာင် ရာအေန် ဒျီင် ဖဲ။ 11ဟဲ့ ဟွတ့် ပန် တီ အန် ဝီ အုး နာင် ရာအေန်၊ ဝီ ယာမ် တာင်။ 12ဟဲ့ ဟွတ့်၊ အန် ဝီ ခဲ ဒီ နာင် ရာအေန် လွင် မုး အန် ဝေါဝဲ ဂုန့် နာင် ရာအေန် ဘော ဂွန် နာင် ဘဲက်။ နာင် ရာအေန် ပီ ဝီ ဟာဝ် ကာလာင် တူတ့် လွင် အန် တီ ဒီ ဂုန့် အန်။

13အာလပ် တွိုန် ဟဲ့ ဟွတ့် ထူမ် လွင် အာကူပ် အီ မုး ဂွန် ဝါ အန်၊ အန် ဝီ ဟာဝ် ရွုး အာကူပ်၊ ငျီမ် အန်၊ အုး အန်၊ ဒဲ့ အန် တး ခဲင် ကာင် အန်။ အာကူပ် တွိုန် ယီ ကာလာင် တူတ့် လွင် အာဆာက် အန်၊ တဲး အာလပ် ထူမ်။ 14အာလပ် ဝီ တဝ်း ဒီ အန်၊ “ဟဲ့ မှာန်၊ မဲ မုး ဝေါဝဲ အုဝ်။” ပန် တီ အန် ကွယ် ခဲင် ကာင် အာလပ် အာဒါ အူ မာဂျီန်။

လွင် အာကူပ် ဘူင် ဂါန် တဲး အန် ပွိုန် အီဘိုန့်

15ဟဲ့ ဟွတ့် ပွိုန် အူ မာဂျီန်၊ အာလပ် ဝီ တဝ်း ဒီ အာကူပ် တွိုန်၊ “မဲ မုး ဝေါဝဲ အုဝ်။ ခုဝ် အန် တီ၊ မဲ ယီ တူ လုဝ် ဘူင် ဂါန် အုဝ် ပီယေန့်။ တဲး မဲ ကာလာင် ဒီ အုဝ်၊ မာဆေ ပီ ဆီ ပွိုန် မဲ။း”

16အာလပ် ယီ မိုဝ်း ဂွန် အီဘိုန့် အာ ဝီ။ ဝီ တာင် အန် စိူဝ် နာင် လေအာ။ ဝီ တျီ့ အန် စိူဝ် နာင် ရာအေန်။ 17နာင် လေအာ တွိုန် မိုဝ်း နာ အီ မွှိုမ် ရွက့်။ နာင် ရာအေန် တွိုန် ယီ မိုဝ်း ဒုဝ် အီ စှိတ် ကာဆဝ် ဘော အာရိုပ် အန် မွှိုမ် ရွက့်။ 18အာကူပ် တွိုန် ဘော ရွက့် နာင် ရာအေန်။ အန် ဘော တဝ်း ဒီ ဂုန့် နာင် တီ၊ “အုဝ် ဒီ ဘူင် ဂါန် မဲ အာဒါ ဘူ ဆီနမ်။ ဟဲ့ ဟွတ့်၊ တဲး မဲ ဒွါ နာင် ရာအေန် ဒီ အုဝ်၊ တဲး အန် ဘဲန် အီဘိုန့် အုဝ်။”

19အာလပ် ဝီ ဝျီ့ ဂြုဝ်း တီ တဝ်း၊ “ဆေ အုဝ် ဒွါ မဲ ခတ် ဒိုဝ်း ဂွန် အုဝ်၊ န့ မွှိုမ် လွှိုမ် အုဝ် ဒွါ အန် ဒီ အီ ဟဝ်။ တဲး မဲ ကွယ် ရိုမ် ဒူပ် အုဝ်။” 20ပါယ် တီ အာကူပ် ဘူင် ဂါန် ဘိုဝ် အန် အာဒါ ဘူ ဆီနမ်၊ တဲး အန် ပွိုန် နာင် ရာအေန် တွိုန်။ အာခြာဝ် အန် တီ ယီ ပီ အူ ကာစန် ဒီ နဝ်း အန်၊ ကူပ် ရွက့် အန် နာင် ရာအေန်။

21ဟဲ့ ဟွတ့် ပန် တီ အာကူပ် ဝီ ကာလာင် ဒီ အာလပ် တဝ်း၊ “ဟဲ့ ဟွတ့် ဇမ် အာခြာဝ် လာယ် ကာဆဲန့် အာယ်။ တဲး မဲ ဒွါ နာင် ရာအေန် ဒီ အုဝ်။ အုဝ် ဒီ ခတ် ဒိုဝ်း အန်။”

22ပန် တီ အာလပ် ဘော ဘာင် ဂေ ဒူအီ ဒွန် အီ တး ကာင် အန်၊ ဂေ ဘူင် ဘ့လွယ် တာင်။ 23ခဲင် မှိုဝ် အန် ယီ ဒိုဝ်း နာင် လေအာ၊ တိုယ် အန် ဟာဝ် ဒူင် အိတ် အာကူပ် တွိုန်၊ တဲး အန် လာယ် နာင် လေအာ။ 24အာလပ် ဘော ဒွါ နာင် ဆီဖာ ဒီ နာင် လေအာ၊ တဲး အန် ဘဲန် မှာယ် နာင် လေအာ။

25ဆိန့်ဝး ပါ ခဲညှာ အာကူပ် တွိုန် ဘော နပ်၊ အီဘိုန့် ပီ လာယ် အန်၊ အန် မုး နာင် လေအာ။ အန် ဝီ ကာလာင် ဂြုဝ်း ဒီ အာလပ် တဝ်း၊ “မာဆေ ပီ ဘူင် မဲ ဒီ အုဝ်။း အုဝ် ဟဲ့ ဘူင် ဂါန် မဲ၊ တဲး မဲ ဒွါ နာင် ရာအေန် ဒီ အုဝ်။ မှဝ် မ့ပါယ် ပီ ကာလုဝ် မဲ ဒီ အုဝ်၊ ဝီ ဒွါ နာင် လေအာ။း”

26အာလပ် ဝီ တဝ်း၊ “ဟိတ် ယေ တူ တဲး ဝါ ခတ် ဒီ အာတ့် အီကတ် အန်။ 27တဲး မဲ ကွယ် ရိုမ် ဒူပ် နာင် လေအာ အာဒါ ဘူ ဆီငဲ။ ဟဲ့ ဟွတ့်၊ အုဝ် ဒီ ဒွါ ဘော နာင် ရာအေန် ဒီ မဲ။ မဲ ယီ လုဝ် ဘူင် ဂါန် အုဝ် ပေါ ဘူ ဆီနမ်။”

28အာကူပ် ဘော ဟဲ့ အိုင်။ အန် ဝီ ကွယ် ရိုမ် ဒူပ် နာင် လေအာ အာဒါ ဘူ ဆီငဲ။ ဟဲ့ ဟွတ့် အာလပ် တွိုန် ဝီ ဒွါ အန် ခတ် လာယ် ဘော နာင် ရာအေန်။ 29အန် ဝီ ဒွါ မှာယ် အန် အီ စိူဝ် နာင် ဘီလာ၊ တဲး အန် ဘဲန် မှာယ် ဂွန် အန် အီ စိူဝ် နာင် ရာအေန်။ 30ပန် တီ အာကူပ် တွိုန် ဘော လာယ် နာင် ရာအေန်။ အန် ရွက့် နာင် ရာအေန် လွှိုမ် ရွက့် အန် နာင် လေအာ။ ပန် တီ အန် ဝီ ဘူင် ဂါန် အာလပ် အာဒါ ပေါ ဘူ ဆီနမ်။

31ဇဝ်ဖြာ ယီ ယိုဝ်၊ အာကူပ် တူ ရွက့် နာင် လေအာ တွိုန်။ အန် ဇဝ် ဝီ တဲး နာင် လေအာ မိုဝ်း ဂွန် ကိူန်။ နာင် ရာအေန် ယီ တူ မိုဝ်း ဂွန်။ 32နာင် လေအာ တွိုန် ဒဲ ဘာဒိက် ဆန်ထေ။ အန် ဘော ဂွိုတ် ဂွန် အီမာယ်။ အန် တဲး ဂွန် အန် စိူဝ် အာရူဘေန်။ အန် တဲး အန် စိူဝ် ပါယ် တီ ခုဝ် အန် တဝ်း၊ “ဇဝ်ဖြာ ဟဲ့ ယိုဝ် ဒုက် အုဝ်။ ဒေါ တီ နီ၊ အီမာယ် အုဝ် ဒီ ရွက့် ဘော အုဝ်။”#29:32 ‘အာရူဘေန်’ ခဲင် ဂြုဝ်း ဟဲဘြဲ လေး ‘အန် ဟဲ့ ယိုဝ် ဒုက် အုဝ်’

33ပန် တီ အန် ဝီ ဒဲ ဘာဒိက် ဆန်ထေ၊ ဝီ ပွိုန် ဂွန် အီမာယ်။ ဒေါ အန် တီ အန် တဝ်း၊ “ဇဝ်ဖြာ ဟဲ့ နပ်၊ အီမာယ် တူ ရွက့် အုဝ်။ ခုဝ်၊ အန် ဟဲ့ ဝီ ဒွါ ဂွန် အီမာယ် ပေါ အူ ဝီ ဒီ အုဝ်။” ခုဝ်၊ အန် တဲး ဂွန် တီ စိူဝ် အာဆီမေအူန်။#29:33 ‘အာဆီမေအူန်’ ခဲင် ဂြုဝ်း ဟဲဘြဲ၊ လွင် ဒါင် အန် မုး ‘ဒူအီ အီ နပ်’

34ဟဲ့ ဟွတ့်၊ အန် ဝီ ဒဲ ဘာဒိက် ဆန်ထေ ပေါ အူ ဇေန့်၊ ဘော ဝီ မိုဝ်း ဂွန် အီမာယ်။ ပန် တီ အန် တဝ်း၊ “ဒေါ တီ နီ အီမာယ် အုဝ် ဒီ ကွယ် ရိုမ် ဒူပ် အုဝ်။ အုဝ် ဟဲ့ ဟွတ့် ဒွါ ဂွန် အီမာယ် အူယ် ဝီ ဒီ အန်။” ခုဝ်၊ အန် တဲး ဂွန် တီ စိူဝ် အာလေဝီ။#29:34 ‘အာလေဝီ’ ခဲင် ဂြုဝ်း ဟဲဘြဲ၊ န့ လေး ‘ကွယ် ရိုမ် ဒူပ်’

35အန် ဝီ ဒဲ ဘာဒိက် ဆန်ထေ ပေါ အူ ဇေန့်၊ မိုဝ်း ဂွန် အီမာယ် ပေါ အူ ဝီ။ အန် ဘော တဝ်း၊ “ခါ နီ အုဝ် ဒီ အိူပ် မျုက် ဇဝ်ဖြာ။” ခုဝ်၊ အန် တဲး ဂွန် တီ စိူဝ် အာယူဒါ။#29:35 ‘အာယူဒါ’ ခဲင် ဂြုဝ်း ဟဲဘြဲ၊ န့ လေး ‘အိူပ်’ ဟဲ့ ဟွတ့် ဝါယ် တီ အန် တူ ဝီ မိုဝ်း ဂွန်။

Currently Selected:

ဒေါ ဂုဝ် 29: pce

Highlight

Copy