ဒေါ ဂုဝ် 27
27
လွင် အာကူပ် ကာလုဝ် ဒီ ဂုန့် အန်
1ဝါယ် အန် တီ ဒါ အာဆဲက် ဟဲ့ ကတ်။ ငါယ် အန် ဟဲ့ ကာပျွယ်၊ အာဝ် ဟူ ပွိုန် ယိုဝ်။ အူ ဆီငဲ အန် ဒဲ့ ဂွန် အန် အီ စိူဝ် အာဆုဝ် တွိုန်၊ ကာလာင် ဂြုဝ်း ဒီ အန်။ အန် တဝ်း၊ “အိုယ် ဂွန် အုဝ်။” အာဆုဝ် ဝီ တဝ်း၊ “အုဝ် ကွယ် ဒီ နီ။” 2အန် ဝီ တဝ်း၊ “အိုယ် ဂွန် အုဝ်၊ အုဝ် ဟဲ့ ဟွတ့် ကတ်။ အုဝ် တူ နပ် ပန် မှဝ် အုဝ် ဒီ ယမ်။ 3ခုဝ်၊ တဲး မဲ ဒိုဝ်း ဂူင့် ဘော အ ဘော ဘ့လာ မဲ၊ ဟာဝ် ခဲင် ပြဲ၊ မှေတ့် ဒုဝ်၊ ပြဲ အာဒါ အုဝ်။ 4ဟဲ့ ဟွတ့် တဲး မဲ ဒင် ဟာပ် ဆီငဲး ပီ မွက့် အုဝ်။ မဲ ဟွတ့် တူတ့်၊ တဲး မဲ ဒိုဝ်း တိုယ် ဒီ အုဝ်၊ တဲး အုဝ် ဟူမ်၊ တဲး အုဝ် ပွိုန် ဒီ မွင့်ကာရာ ဒွါ ဒီ မဲ အာတ့် ယမ် အုဝ်။”
5နာင် ဘဲက် တွိုန် ဟဲ့ ထူမ် ဂြုဝ်း ပီ ကာလာင် အာဆဲက် ဒီ အာဆုဝ်။ အာဆုဝ် မိူဝ် ဟဲ့ ဟွတ့် ဟာဝ် ခဲင် ပြဲ၊ တဲး အန် မှေတ့် ဒုဝ် ပြဲ၊ တဲး အန် တိုယ် ဒီ ဂုန့် အန်။ 6ဟဲ့ ဟွတ့် ပန် တီ နာင် ဘဲက် ဝီ ကာလာင် ဂြုဝ်း ဒီ ဂွန် အန် အီ စိူဝ် အာကူပ်။ အန် တဝ်း၊ “တဲး မဲ ထူမ် ဂြုဝ်း အုဝ်။ အုဝ် ဟဲ့ ထူမ် ဂြုဝ်း ပီ ကာလာင် ဂုန့် မဲ ဒီ အာဆုဝ်။ အန် ဟဲ့ တဝ်း၊ 7‘တဲး မဲ ဟာဝ် ဒိုဝ်း မာဒုဝ် ပြဲ ဒီ အုဝ်။ တဲး မဲ ဒင် ဟာပ် ဆီငဲး၊ တဲး အုဝ် ဟူမ်။ ဟဲ့ ဟွတ့်၊ တဲး အုဝ် မွင့်ကာရာ ဒွါ ဒီ မဲ အာတ့် ယမ် အုဝ်။’ 8ခုဝ်၊ တဲး မဲ ထူမ် ဘော ဘူင် ပီ တဝ်း အုဝ် ဒီ မဲ။ 9တဲး မဲ ဟာဝ် ဒိုဝ်း မာပဲ ပီ ဟျီင် အေ အာ ဒုဝ်။ အုဝ် ဒီ ဒင် ဟာပ် ဆီငဲး ပီ မွက့် ဂုန့် မဲ။ 10ဟဲ့ ဟွတ့်၊ မဲ လုဝ် ဟာဝ် တိုယ် ပီ ဒီ ဟူမ် တီ ဒီ ဂုန့် မဲ၊ တဲး အန် ဟူမ်၊ တဲး အန် မွင့်ကာရာ ဒွါ ဒီ မဲ အာတ့် ယမ် အန်။”
11အာကူပ် ဝီ တဝ်း ဒီ မာ အန်၊ “မဲ နပ်၊ အီကတ် အုဝ် မိုဝ်း ဟိုက် ကိူန်။ ဟုန် အုဝ် ယီ ဂ့လ။ 12အုဝ် ယုဝ် ဂုန့် အုဝ် ဒီ ပါ အုဝ်။ ဆေ အန် နပ်၊ အုဝ် ဟဲ့ ကာလုဝ် အန်၊ အုဝ် ယုဝ် အန် တူ ဝီ မွင့်ကာရာ ဒွါ ဒီ အုဝ်။ အုဝ် ယုဝ် အန် ဒီ ဒိူင် အုဝ်။”
13မာ ဝီ တဝ်း၊ “ဆေ အန် ဒိူင် မဲ၊ တဲး န့ ပီ၊ အန် ဒိူင် အုဝ်။ ကွဲ့ ယုဝ်။ တဲး မဲ ဟာဝ် ဘူင် ပီ စ်ု အုဝ်၊ ဒိုဝ်း မာပဲ တွိုန်။”
14ပန် တီ အာကူပ် ဟာဝ် ဒိုဝ်း မာပဲ၊ ဒွါ ဒီ မာ အန်။ မာ အန် ဘော ဒင် ဟာပ် ဆီငဲး ပီ မွက့် ဂုန့် အန်။ 15မာ အန် ဟဲ့ ဟွတ့် ဘူင် ပီ ဒီ ဟူမ်၊ အန် ဟာဝ် ဒိုဝ်း ခြိုင် စှိတ် ပီ အုန် အာဆုဝ် ခဲင် ထိုပ် ဘိက် မာ အန်။ အန် ဘော ဒွါ အာကူပ် စှိုပ် ခြိုင် အီကတ် အန် တီ။ 16အန် ဘော ဒိုဝ်း ဟုန် မာပဲ၊ ကာဘိတ် ဒဲ ဘော ကူမ် အာကူပ်၊ အီ မုး ဒူင် ဂ့လ ဒီ ဒုဝ် အန်။ 17ပန် တီ အန် ဒွါ အာကူပ် ဂူင့် ဟာပ် ဆီငဲး ပီ ဒင် အန်၊ ဒွါ ဘော ခါမုန် ပီ ဘူင် အန်။
18အာကူပ် တွိုန် ဝီ ဟာဝ် ဒူင် ကွယ် ဂုန့် အန်။ အန် တဝ်း၊ “အိုယ်၊ ဂုန့် အုဝ်။” ဂုန့် အန် ဝီ တဝ်း၊ “အုဝ် ကွယ် ဒီ နီ။ အာဆေ မဲ မုး၊ ဂွန် အုဝ်။း” 19အာကူပ် ဝီ တဝ်း ဒီ ဂုန့် အန်၊ “အုဝ် မုး အာဆုဝ်၊ ဂွန် ဂိန့် မဲ။ အုဝ် ဟဲ့ ဟွတ့် ဘူင် ပီ မှာန့် မဲ ဒီ အုဝ်။ တဲး မဲ ယိတ့်၊ တုတ့် ဆီချာ၊ တဲး မဲ ဟူမ် ယင် ဒုဝ် ပြဲ ပီ တး ဒွါ အုဝ် ဒီ မဲ။ ဟဲ့ ဟွတ့်၊ တဲး မဲ မွင့်ကာရာ ဒွါ ဒီ အုဝ်။”
20အာဆဲက် ဝီ ဒီမွှတ် ဂွန် အန် တဝ်း၊ “အိုယ် ဂွန် အုဝ်၊ မှဝ် န့ ပါယ် မဲ ပီ ဆော နပ် ဒီ ပွိုန် ခြန် ခြန်။း”
အန် ဝီ တဝ်း၊ “ဇဝ်ဖြာ ပီ ကြိုပ် မဲ၊ အန် ဟဲ့ စွယ် အုဝ်၊ တဲး အုဝ် စေဝ် ပွိုန်။”
21ပန် တီ အာဆဲက် တဝ်း၊ “တဲး မဲ တး ကွယ် ချြီ့ အုဝ်၊ တဲး အုဝ် ပွိုန် ဒီ ပါ မဲ၊ တဲး အုဝ် နပ်၊ ယုဝ် န့ မှာန် အာဝ် မှာန် မုး မဲ ဂွန် အုဝ် အီ စိူဝ် အာဆုဝ်။”
22အန် ဟဲ့ ဟွတ့် တဝ်း ပါယ် တီ အာကူပ် ဝီ ဟာဝ် ကာတတ် ဒူင် ကွယ် ဂုန့် အန် တွိုန်။ အန် ဝီ ပါ ဒုဝ် အာကူပ် တဝ်း၊ “ဂြုဝ်း၊ န့ မုး ဂြုဝ်း အာကူပ်။ ဒဲ ယီ မုး ဒဲ အာဆုဝ်။” 23အန် တူ နပ်၊ န့ မုး အာကူပ် အီ ကာလုဝ် အန်။ အန် ထာင်၊ ဒဲ ဟဲ့ မုး ဒဲ အာဆုဝ် အီ မုး အီကတ် အာကူပ်။ ဟဲ့ ဟွတ့် အန် တဝ်း ဒီ မွင့်ကာရာ ဒွါ ဒီ အန်။ 24ပေါ အူ ဇေန့် အန် ဝီ ဒီမွှတ်၊ “ဟဲ့ မှာန်၊ မဲ မုး ဂွန် အုဝ် အီ စိူဝ် အာဆုဝ်။း”
အာကူပ် ဝီ တဝ်း၊ “ဟဲ့ မှာန်။”
25ဟဲ့ ဟွတ့်၊ အန် တဝ်း၊ “တဲး မဲ ဒွါ ပီ ဒီ ဟူမ်၊ တဲး အုဝ် ပွိုန် ဒီ ဟာပ် ယင် ဒုဝ် ပြဲ ပီ ဒင် မဲ၊ တဲး အုဝ် မွင့်ကာရာ ဒွါ ဒီ မဲ ပန် တီ။” အာကူပ် ဘော ဒွါ ပီ ဒီ ဟူမ် ဒီ ဂုန့် အန်။ အန် မိူဝ် ဟူမ်။ အာကူပ် ဘော ဒွါ အိုမ် မာငုန် ဒီ ဂုန့် အန်၊ တဲး အန် ဘော ဒျီင်။ 26ဂုန့် အာကူပ် ဟဲ့ ဖဲ ဘူမ်၊ အန် ဝီ တဝ်း ဒီ အာကူပ်၊ “ဂွန် အုဝ်၊ တဲး မဲ တး ကွယ် ချြီ့ အုဝ်၊ အုး အုဝ်။”
27ဒေါ ကွယ် အန် ကာတတ်၊ ဂုန့် ဝီ အုး ခြိုင် အန်။ ဟဲ့ ဟွတ့် အန် မွင့်ကာရာ ဒွါ ဂွန် အန် တီ။ အန် တဝ်း၊ “အိုယ် ဂွန် အုဝ်၊ အုး မဲ န့ ပီ အုး ခဲင် ပြဲ ပီ မွင့်ကာရာ ဒွါ ဇဝ်ဖြာ။
28တဲး အန် ဇဝ် ဘော တိုယ် အိုမ် ဒီငါန် ခဲင် ဂါင်ဟြာဝ်၊ လူင် ဒီ ဒူင် နာ မဲ၊ တဲး မဲ မိုဝ်း ကာဒါယ် ဘွတ် ခဲင် မာန် မဲ၊ တဲး မဲ မိုဝ်း ဒီဂါဝ် ဘော အိုမ် မာငုန် ကိူန် ကာဆဝ်။
29တဲး ဘော ဂေ အာမျုဝ် ဒူအီ ဟဝ် တး ဘဲန် မှာယ် မဲ။ တဲး ခြိုဝ် အီ ဟဝ် ဝီ တး ဂူမ် ဒီ အာတ့် မဲ။ တဲး မဲ ဘဲန် ဒါ ကာညာ အီ အိုပ် ဂေ ဝေါဝဲ မဲ။ တဲး ဂေ ဂွန် မာ မဲ ဝီ ဂူမ် ဒီ အာတ့် မဲ။ အာဆေ ဒီ ဒိူင် မဲ၊ တဲး အန် ဇဝ် ဘော ဒိူင် အန် တီ။ အာဆေ ဒီ မွင့်ကာရာ ဒွါ ဒီ မဲ၊ တဲး ဇဝ်ဖြာ မွင့်ကာရာ ဒွါ ဘော ဒီ အန်။”
30အာဆဲက် ဟဲ့ ဟွတ့် မွင့်ကာရာ ဒွါ ဒီ အာကူပ်၊ အာကူပ် တွိုန် မိူဝ် ဟဲ့ ဟွတ့် လေး ဒူင် ကွယ် ဂုန့် အန်၊ အူ ဇေန့် အီကတ် အန် အီ စိူဝ် အာဆုဝ် တွိုန် ဟဲ့ တး ခဲင် ပြဲ။ 31ဘော အန် ဒင် ဟာပ် ဆီငဲး၊ ဒွါ ဒီ ဂုန့် အန် တဝ်း၊ “အိုယ် ဂုန့် အုဝ်၊ တဲး မဲ ယိတ့် ဟူမ် ယင် ဒုဝ် ပြဲ ပီ ဒင် အုဝ်၊ တဲး မဲ မွင့်ကာရာ ဒွါ ဒီ အုဝ်။”
32အာဆဲက် ဝီ တဝ်း ဒီ အန်၊ “မဲ မုး အာဆေ။း”
အန် ဝီ တဝ်း၊ “အုဝ် မုး ဂွန် ဂိန့် မဲ အီ စိူဝ် အာဆုဝ်။”
33ဟဲ့ ဟွတ့် ကာလာင်၊ အာဆဲက် တွိုန် ဒီယေန့် ဘော ဒုဝ်။ အန် တဝ်း၊ “အာဆေ ဟဲ့ တး ဒွါ အုဝ် ဟူမ် ဟာပ် ယင် ဒုဝ် ပြဲ အာတ့် တး မဲ။း အုဝ် ဟဲ့ ဟွတ့် ဟူမ် ပီ ဒွါ အန်။ အုဝ် မိူဝ် ဟဲ့ ဟွတ့် မွင့်ကာရာ ဒွါ ဒီ အန်။”
34အာဆုဝ် ဟဲ့ ယိုဝ် ဂြုဝ်း ဂုန့် အန် တီ၊ အန် ဝီ ယာမ် တာင်၊ နဝ်း အန် ဘော က့လိုဝ် ကာဆဝ်။ အန် ဝီ မှာန့် ဒီ ဂုန့် အန်၊ “အိုယ် ဂုန့် အုဝ်၊ တဲး မဲ မွင့်ကာရာ ဒွါ ဘော ဒီ အုဝ်။”
35အာဆဲက် ယီ တဝ်း၊ “ဝါ မဲ ဟဲ့ ကာလုဝ် အုဝ်၊ ပြာ ဒိုဝ်း ပီ ဒီ လုဝ် မွင့်ကာရာ ဒွါ အုဝ် ဒီ မဲ။”
36အာဆုဝ် ဝီ တဝ်း၊ “အန် ဟဲ့ ဟွတ့် ကာလုဝ် အုဝ် အာ ဇေန့်။ စိူဝ် အန် ဟဲ့ မှာန်။ အန် ကာလုဝ် ဆေဆေ။#27:36 ‘အာကူပ်’ ခဲင် ဂြုဝ်း ဟဲဘြဲ မုး လွင် ဒါင် ‘ဆီမာ ကာလုဝ်’ ခါ အာတ့် အန် ဟဲ့ ပြာ ပီ ဒီ ပ့လု အုဝ် ကူပ် မုး အုဝ် ဂွန် ဂိန့် မဲ။ ဒေါ တီ နီ၊ အန် ဟဲ့ ဝီ ပြာ ပီ ဒီ မွင့်ကာရာ ဒွါ မဲ ဒီ အုဝ်။” အန် ဝီ ဒီမွှတ် ဂုန့် အန်၊ “မဲ တူ မိုဝ်း ဒီ အုန် ဂြုဝ်း အီ မွင့်ကာရာ ဒွါ ဘော ဒီ အုဝ်။း”
37အာဆဲက် ဝီ တဝ်း၊ “အုဝ် ဟဲ့ ဟွတ့် တဝ်း၊ တဲး အန် ဘဲန် ကာညာ မဲ။ အုဝ် ဟဲ့ ဟွတ့် ဒွါ ဝေါဝဲ အန် ဒွန် အီ ဒီ အန်၊ တဲး ဂေ ဘဲန် မှာယ် အန်။ အုဝ် ဟဲ့ ဟွတ့် ဒွါ ပီ ဒီ ဟူမ် ပီ ဒီ ဒျီင် ဒီ အန်။ ဒဲင် တီ၊ မာဆေ န့ ဆီ မိုဝ်း၊ ပီ ပွိုန် အုဝ် ဒွါ ဒီ မဲ၊ ဂွန် အုဝ်။း”
38ပန် တီ အာဆုဝ် ဝီ တဝ်း ဒီ ဂုန့် အန်၊ “အိုယ် ဂုန့် အုဝ်၊ မဲ တူ မိုဝ်း ဂြုဝ်း ပီ မွင့်ကာရာ ဒွါ ပေါ အူ မျုဝ်။း မှာန့် တဲး မဲ မွင့်ကာရာ ဒွါ ဘော ဒီ အုဝ်။” အန် ဟဲ့ ဟွတ့် တဝ်း ပါယ် တီ အန် ဝီ စုး ဒီ ယာမ် တာင်။
39ပန် တီ အာဆဲက် ဝီ ကာလာင် ဒီ အန်၊ “မဲ ဒီ ကွယ် ကာတူင့် ဒီ ကာဒါယ် ဘွတ်။ ဒူင် ကွယ် မဲ ဘော ကာတူင့် ဒီ အိုမ် ဒီငါန် အီ လေး ခဲင် ဂါင်ဟြာဝ်။ 40မဲ ဒီ ဟူမ် ဒုဝ် ဆတ်ဒါဝါ ခဲ့ ပီ ငဝ်း မဲ တာ မာပွါ့ လာင် မဲ။ မဲ ဒီ ဘော ဘဲန် မှာယ် ဝါ မဲ။ မဲ ယီ ပဲ ဒီ ဘူင် တဲး မဲ လွတ် ဒုက် တီ၊ ကွဲ့ တဲး ဝါ မဲ အိုပ် မဲ ဆေဆေ။”
41အာဆုဝ် တွိုန် ယီ အုန် နဝ်း ဒီ အာကူပ် ကူပ် ဟဲ့ မွင့်ကာရာ ဒွါ ဂုန့် အန် နာ ဘွတ် ဒီ အာကူပ်။ အန် မိူဝ် ခြာမ် ခဲင် နဝ်း အန် တဝ်း၊ “အာဝ် လှေန့် ဂုန့် အုဝ် ဒီ ယမ်။ ဝါယ် အန် တီ အာခြာဝ် လုဝ် က့လိုဝ် ဟီ ပုန်၊ အုဝ် ဒီ ငဝ်း ဝဲန် ဝါ အုဝ်။”
42န့ ယီ မိုဝ်း ဒူအီ အီ နပ် လွင် နဝ်း အာဆုဝ် တွိုန်။ ဂေ ဝီ တး ဒူင် ကွယ် နာင် ဘဲက်၊ ကာလာင် ဒီ အန် လွင် ပီ ခြာမ် အာဆုဝ်။ ပန် တီ အန် ဘော ဒဲ့ အာကူပ် အီ မုး ဂွန် တျီ့ အန်၊ ကာလာင် ဂြုဝ်း ဒီ အန်။ အန် တဝ်း၊ “အီကတ် မဲ ဟဲ့ ရူ ကာဆဝ် ဒီ မဲ။ အန် ခြာမ် ဒီ ငဝ်း ဝဲန် မဲ။ 43တဲး မဲ ထူမ် ပီ တဝ်း အုဝ် ဒေါ တီ နီ။ မဲ လုဝ် လေး ဒူင် ကွယ် အေ အူ ဇေန့်၊ ဟာဝ် ဒူင် ကွယ် အီကတ် အုဝ် ခဲင် မိူင် ဟာရာန်။ 44တဲး မဲ ကွယ် ဒူင် ကွယ် အန်၊ တဲး ရူ အီကတ် မဲ ဒီ မဲ ကော ဟြာယ်။ 45ဆေ အီကတ် မဲ အာဝ် ဟူ ရူ ဒီ မဲ၊ ဆေ အန် ဟီ ပိဝ် ပီ ဘူင် မဲ ဒီ အန်၊ အုဝ် ဒီ ဝီ ဒဲ့ မဲ၊ တဲး မဲ ဝီ တး ဒူင် ကွယ် အေ။ အုဝ် တူ ဆီ တဲး အာဆာက် ဂွန် အုဝ် ဘော အာ ဝီ စှိုမ် အူ ဆီငဲ။”
46ပန် တီ နာင် ဘဲက် ဝီ ကာလာင် ဂြုဝ်း ဒီ အာဆဲက်။ အန် တဝ်း၊ “အုဝ် ဟဲ့ ပိုဝ် အာဆာက် အုဝ်။ ဂေ အီဘိုန့် အာဆုဝ်၊ အီ မုး အာမျုဝ် ဒူအီ ဟေထိတ်၊ ဂေ ဘူင် တဲး နဝ်း အုဝ် အာဝ် ဒါခိုယ်။ ဆေ န့ မုး ဘော အာကူပ် ဒီ ဒိုဝ်း အီဘိုန့် အီ မုး အာမျုဝ် ဒူအီ ဟေထိတ်၊ အီ ကွယ် ရိုမ် ဒူပ် အေ၊ အုဝ် တူ ခမ်။”
Currently Selected:
ဒေါ ဂုဝ် 27: pce
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
