Mataio 19

Ua la kiripaita mai vei

(Mareko 10:1–12)

1Soka Iesu lea o la mei mei kaleipe lea mea, are maea lei Galilea kiripi, Iudea ve mea Ioridana itai voa ufi, 2karu sitavu sitavu arero aitetei roroa, aea are ereve eka karu la lōvoa lei lareva leiape.

3Soka Farisea karu hea arero tai foreri, arero seseōvai vei mō ōpe, Ipi hariaharia foromai ita vei karu areve ua la kiripaita safu usoso ei? 4Are tava o erero mō ōpe, Mearovaeka la pisosipe Ualare lea oarehōva soa kofa voa ereukaro vita ita ua ita la pisosipe, e lea o la muti ore ei?#Gen 1:27; 5:2 5Are ta mō ōpe, Ipi lea etau vei vita areve oa ita lou ita la kiripi, areve ua la pasaeai roi; aea ereuka maeasarōva farakeka loita reha.#Gen 2:24 6Soka ereuka orakoria kao, a—, maeasarōva farakeka. Ualare sa topiaraita lea etau la karu aea sa levi faeaia. 7Ere arero mō ōpe, Ipi levea Mose safu o mōfeare moipe, vita ua la kiripaita karoro ukai ao, aite are ua la lōri kiripaia?#Deut 24:1–4; Mat 5:31 8Are erero mō ōpe, Mose, e ua la kiripaita lea mai la kakeva leipe ipi eve haiiri kere eavia, a—, oarehōva kofa soa voa lōfeare kao. 9Ara ero o la moi, areve ua la karu sa torea leiti auke ita kiripi, ua aea la laeaita lea vita are ua torea mai la loita reha.#Mat 5:32; 1 Kor 7:10–11

10Areve satiriaraita karu arero mō ōpe, Karu sa areve ua la kiripaita safu, mai lōfeare leitita, a—, mai lareva meha, ua levi laeaia. 11A—, are erero mō ōpe, Karu foromai mea o la ovaita usoso kao, a—, Ualare sa erero miaraita lea karu sa haria. 12Maea mitutu karu ia, ere ereve lou ve ére voa lōri forerōpe; maea mitutu karu hea ta ia, karu sa erero lei maea mitutu leiape, karu hea ta ia, ua laeai auke leitita ipi kauri ve basileia vei. Mea o la ovaita ore karu sa arero ovai roi.

Iesu atutemori la o sa lei lareva leipe

(Mareko 10:13–16; Luka 18:15–17)

13Soka karu hea atutemori arero tai lariōvi forerōpe, are areve mai ere voa mopi Ualare la ere vei loki leiti vei; a—, satiriaraita karu erero o erere ōpe. 14A—, Iesu mō ōpe, Atutemori rapi ere roroa, ere araro tai koti vei erero o erere levi aria; ipi kauri ve basileia ve karu ere fefeare. 15Aite are areve mai ere voa mopi mopi roroka lei, are lōvoa kiripi maea lei terōpe.

Pisoso rovaea vita la moipe o

(Mareko 10:17–31; Luka 18:18–30)

16Soka karu farakeka aea arero tai foreri mō ōpe, Satiriaraita papuvita e, ara etau lareva lekōru la lei ara peita makuri ovai vei? 17Are arero mō ōpe, A etau lareva vei araro lalasi leipeta ipi levea? Farakeka haria lareva. A—, a peita makuri voa oropai haikaeai oria, a—, safu o la mapi kiva leitia. 18Lō mei are arero mō ōpe, Leafeare safu o? Iesu mō ōpe, Mōfefeare, a karu levi paeaia, a ua torea levi leitia, a etau torea levi leitia, a havara apeva levi paraeaia;#Eso 20:13–16; Deut 5:17–20 19ave oa ave lou ita la maeaforoe lei taivotaia, aea ave haekao peita karu la ave elore maea feare maeaforoe leitia.#Eso 20:12; Deut 5:16; Levi 19:18 20Lea harokou arero mō ōpe, Lea safu o foromai la ara mapa vovea. Ara leiti auke etau aea larelekōru? 21Iesu arero mō ōpe, A haura kofa leiti haikaeai oria, ave ovi meita etau etau la itaea lei miōri miōri, ereve tava la ovi merava karu la aioraia; a pisoso kauri voa lōri ovai roi; aite araro aitetei kotiria. 22A—, lea harokou lea o la mapi, are haieae foromai ita terōpe; ipi are pisoso rovaea vita eavia.

23Soka Iesu areve satiriaraita karu la mō ōpe, Okofa ara ero omoi, Pisoso rovaea karu ere kauri ve basileia voa oropaita heafo foromai rovaea kofa lei vovea. 24Ara mea o ta ero la moi, Nila kōvi ve uta voa kamela sa oropaita taheka mafu maea feare, a—, pisoso karu sa kauri ve basileia voa oropaita, heafo foromai rovaea kofa. 25Soka satiriaraita karu lea o la mapi haihava lei mō ōpe, Aita! leiro lei makuri leiti roi ei? 26Iesu erero ofae ruri mō ōpe, Mea etau la karu sa leitita usoso kakaeite, a—, Ualare sa etau foromai la leitita ore.

27Soka Petero tava o arero mō ōpe, Ofae eavaia, ela etau foromai la kiripi aro aitetai vovo la roroa; soka ela tava lekōru la ovai roi? 28Iesu erero mō ōpe, Okofa ara ero o la moi, etau etau la lei áre lei foreri, Karu ve Atute sa areve sosorusosoru ve terona voa avaita lea mea, e araro aitetaita karu ta terona twelve voa avi, Israela ve toruipi‐ipi twelve la seseōvi tava miarai roi.#Mat 25:21; Luk 22:30 29O aeata meha, uvi ei, a—, maraiosu ei, a—, uarosu ei, a—, oa ei, a—, lou ei, a—, atutemori ei, a—, hasu ei, arave rare vei kiripaita lea karu, tava 100 soa maravi, aeata peita makuri ta ovai roi. 30A—, omopa kofa voa pepeita karu, aite kofa voa leiti roi, aeata aite kofa karu ere omopa kofa leiti roi.#Mat 20:16; Luk 13:30

Currently Selected:

Mataio 19: TQO1983

Highlight

Copy